وبعدين بقي !! أنا عايز أفرح شوية مش كده.. من زمان أوي وأنا مش لاحق اتبسط... اللي فاكره اخر حاجة كنت مبسوط فيها أيام كأس الأمم الأفريقية كانت اجمل ايام حياتي لأسباب اكتر من إن مصر كسبت وهوب وأنا في الإستاد الاقي الشاشة مكتوب عليها ( دقيقة حداد علي روح ضحايا العبارة السلام 98 ) ...!!؟ سلام.. سلام إيه.. 98 ايه انا مش فاكر ان فيه حاجة حصلت في 98..!!؟ الناس ساعتها سألوني أكني انا اللي عارف يعني..! إيه يا عز ايه العبارة دي، قلتلهم ولا اعرف والماتش خلص وروحت ولاقيت اكتر من الف واحد ماتوا.. غرقوا عشان كانوا وثقوا في ناس وكانوا فاكرينهم هيوصلوهم بلدهم ..!!
وكملت الحاجات، حاجة ورا التانية مش لاحق أفرح بحياتي مكسوف أضحك وناس بتتسحل وناس بتضرب وناس بتعتقل .. مش لاحق أنسي اللي ماتوا في بني سويف محروقين الاقي ناس بتدبح وهما نايمين .. يا دوب أدور علي سي دي المسرحية اللي قلبت اسكندرية.. ملحقش اقول للناس عليه انه موجود فعلاً .. الأقي واحد بيقتل في الناس قدام الكنايس وفي الآخر يقولوا مجنون .. مفيش نفس مفيش فرق مفيش شوية كده الواحد ياخد فيهم نفسه... غمضت عينيا وقفلت ودني وقلت طظ بقي أنا عايز افرح شوية باللي في إيدي .. عايز أضحك من قلبي يا ناس ..!!
ألاقي القضاه واللي بيهلل جنبهم واللي بيدافع عن حقهم واللي بيجري واللي بيتسحل واللي واللي واللي... مفيش فرق مفيش راحة مفيش حتي النفس ..!! نسيت وقلت يلا هتعدي وهنرجع نضحك تاني وان شاء الله هاخلص اللي مطلوب مني وهاعمل اللي عليا في حياتي وهارجع اضحك تاني ... لقيت لبنان والبنزين وتمثال رمسيس وصلاح سالم الصبح والأتوبيس اللي بقي بجنيه وبريزة والنص جنيه اللي بقي فضة ومارينا وتاهيتي واللي بيتحكيلي علي اللي بيحصل فيهم والناس اللي فوق بعضها وقال إيه بيصيفوا...!!!
وسط ده كله وانا في الشغل بسمع عن حسني عبد ربه اللي جابولوا عربية بي ام دبليو عشان يمضي وانه إيه كان مزمزق ومش راضي أبداً ..!! الاقي اخويا بيكلمني بيقولي شوفت القطر !!؟ قطر إيه ؟ قطر قليوب !! قليوب إيه يا ابني إيه اللي حصل !؟ قالي في ناس ماتوا..!! قلتله ياه وبعدين بقي احنا لحقنا.
-
والله انت هايل ياعز, ان لسة عندك امل فى الفرح!!
ReplyDeleteوعلى رأيك لو بطلنا نحلم نموت ,بس للاسف الايامدى احلامنا كوابيس, ومن لم يمت بالسلام 98 مات فى اى قطار والسلام, والحقيقة كان بيتهيألى ان احنا ميتين ميتين طول ما دة حال بلدنا وكل الى يمسك حتة فى البلد كبيرة ولا صغيرة مافرقيتش لانه فى الغالب مايستهلش ياعنى اكيد فى الف واحد احسن واكفاء وكمان انسب والمصيبة احق منة, لا ومش كفاية الظلم لا كمان ييجى سى الاستاذ علشان يطلع الى قبلة ولموأخذة----- (عندة ودان طويلة شوية) وان سيادتة المهدى المنتظر الى هيجيب الديب من ديلة ويعدل المايلة ويرد الحقوق ويسوى الهوايل فى وقت قياسى (ابقى قابلنى) وبعدين تبدأ المعجزات بظلم وجور وانتقام وتصفية حسابات شخصية وما خفى كان اعظم ويزيد عدد المظلومين فى البلد وكمان فى المقابل يزيد الهباشين لغاية ما ييجى قطار ولا عبارة اى حاجة تقلبها تانى ولا حتى تلخلخها شوية,ماهو كل حتة فى بلدنا فيها(قطار ولا عبارة) بس المهم سمعنا بيهم ولا لأ ويابختة الى يتسمع عنة يمكن فى النهاية يطول جوز جنيهات من المحروسة الوزارة ويجعلة عامر ----- قصدى عز