Tuesday, November 21, 2006

أنا مش بحبك يا فيروز


إذا لم تظهر الصورة - Right Click / Show Picture - www.baitelezz.blogspot.com

-

احب أقول لفيروز النهاردة في عيد ميلادها الواحد والسبعين

-
" أنا مش بحبك يا فيروز "


أنا أكتر من كده بكتير، أنا بأعشق صوتك ولو غنيتي صمت حأحب صوت الصمت في أغانيكي ... فاكر أول مرة أحب وأنا لسه بأتناقش مع الإنسانة اللي حبيتها بعد كده لمدة سنة قبل ما نجبر علي التوقف لأسباب خارجة عن إرادتنا زي بتوع الأفلام الأبيض والإسود كده .. فاكر وانا باكلمها اول مرة عن فيروز فقلتلها إن حب فيروز في قلبي حاجة وحب أي إنسانة تانية حاجة تانية خالص ..!! وساعتها دار بينا نقاش كبير انا لسه محتفظ بالنص بتاعه ملخصه كان اني رجعت في كلامي وأضفت شوية من الدبلوماسية عشان أعرف أخرج من الموقف ... كانت دايماً بتقولي إني بأعرف أفلت علي الآخر

-

لما كتير بيتكلموا عن فيروز باقولهم اه فيري دي مراتي.. وبأقعد أهرج إني عندي أغاني مش عندها أصلاً، مرة وكانت من أكتر المرات اللي عرفت فيها إني فعلاً بأحب صوت الإنسانة دي كنت بأتكلم مع ريما من أصدقائي اللي بتابعني دايماً وبتابع المدونة .. قالتلي : إنت بتحب إيه لفيروز ؟ قولتلها : مفيش حاجة معينة... وسكتت شوية عشان أفتكر انا بأحب إيه ..!! فلاقيت إن كل حاجة منها حلوة ... فرديت : إني بأحب كل حاجة منها لأن بالنسبة لي صوت فيروز شئ ممتع ولو سكتت ... هاحب صوت الصمت.


علي الرغم إني مش بأسمع أغاني كتير يعني ... غالباً مفيش وقت يعني أهو انا باكلمكم دلوقتي وآخر مرة سمعتها كان من شهر تقريباً .. بس دايماً لما بأبقي فاضي ومفيش شغل وعايز استمتع أول حاجة بأفكر أسمعها هي فيروز.


إذا لم تظهر الصورة - Right Click / Show Picture - www.baitelezz.blogspot.com
21 نوفمبر 1935

من قلبي سلام لفيروز

-

Wednesday, November 15, 2006

سفاح كرموز

ده سجن في النمسا

-

!!! أنا مجرم وعايز أتسجن

وبجد تحس لما تشوف السجن ده إنك حابب الجريمة والقتل

لأ يعني فعلا تحس ان السكينة بتناديك وبتقولك تعالي يا فقري

يعني من زمان وانا حاسس إني ممكن أكون سفاح كرموز

لكن الدلع ده فعلاً يخليك تفكر تنحرف


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


إذا لم تظهر الصورة - Right Click / Show Picture - www.baitelezz.blogspot.com


أدي السجون والإ فلا

Sunday, November 12, 2006

عملوها الأبطااااااال

عز باشا
أيوة يا ميزو سلاموا عليكم ايه النظام لسه صفر- صفر ؟
والله لسه اهو فاضل 5 دقايق وربنا يسهل
إيه يعني مفيش بارقة امل يا واد ؟
اهو لسه بيحاولوا جوووووووووووووووول جووووووووووووووول جووووووووووووول جووووووووووووووووول جووووووووووووول جووووووووووووووووووووووول ووووووووووووووووووووووووووول جووووووووووووووووووووووووووووووووووووووووووووول جووووووووووووووووووول يا عز جوووووووووووووووووووووووووول


هي دي الطريقة بالظبط اللي عرفت بيها ان الوحوش عملوها وكسبوا كأس الأندية أبطال الدوري، بعد ما كل الناس شككوا إنهم هيقدروا .. واللي لبس فانلات الصفاقسي التونسي من اخواتنا الحاقدين المصريين واللي واللي واللي... دانا واحد صاحبيفي الإسماعيلية قالي ان الناس في القهوة كانوا جايبين علم 25 متر لصفاقسي !!! المهم ... أنا كنت في ميدان الحجاز للأسف متفرجتش علي الماتش كنت اليوم كله من أوله في الجامعة الأمريكية وبعدها كان عندي مشوار مهم، بجد كانت اجمل لحظات اليوم لما سمعت صوت الناس وهي بتهيص فجأة بعد صمت رهيب قعد 92 دقيقة.. مكنتش مصدق مع إني كنت متوقع الفوز لأننا ببساطة أكننا بنلعب قصاد دولتين... دولة التوانسة ممثلة في الصفاقسي ودولة الحاقدين ممثلة في الناس القالشة من جماهير الإسماعيلي والمصري والزمالك وغيرهم من الناس اللي عندها سواد !! واللي نسيوا إن دي كورة يعني رياضة يعني ترفيه !!


-
إذا لم تظهر الصورة - Right Click / Show Picture - www.baitelezz.blogspot.com

-
-المشهد ده شافوه اللاعبين في فترة الإحماء قبل المباراة

-
إذا لم تظهر الصورة - Right Click / Show Picture - www.baitelezz.blogspot.com

-

وسبحان الله يجي نفس اللاعب اللي رسمينه كفرعون

بيركع وبيسلم كأس أفريقيا للمتغطرس

وبيمثله النادي الصفاقسي التونسي وهو حاطط رجل علي رجل

ويطرقعهم في آخر دقيقة

هاهاهاهاهاهاهاهاهاهاهاهاهاهاهاهاهاهاهاهاهاهاهاهاها

بس تصدقوا صعبوا عليا في الدقيقة 90 فعلاً

الصواريخ بدأت تنطلق والموسيقي العسكرية

بدأت تلف الإستاد والجمهور بدأ يحتفل وأكن الكأس في جيبهم

ميعرفوش اننا شايلينه في الشنطة بتاعت الإتوبيس وراجعين بيه القاهرة

-

يا مجرم يا أبو تريكة

-
إذا لم تظهر الصورة - Right Click / Show Picture - www.baitelezz.blogspot.com
-

مصادر الصور: filgoal.filbalad.com - AFP

-

Friday, November 10, 2006

لما إتهز وسط البلد


تحديث

فيديو للبنت قطعوا هدومها علي بوابة مقصورة الإستاد

بعد كذا تعليق وطلب من ناس إني أشيل الفيديو ده شيلته

ولو إني مقتنع إن المشكلة كان لازم تتعرض عشان الناس تعرف إن المشكلة موجودة

والبنت وشها مكانش باين بالإضافة إني مأظنش إن فيه حد هيبقي

بالدناءة إنه يبص علي جسم بنت في موقف زي ده

فكرتي من عرض الفيديوهات دي كلها إني أعرف الناس إننا في أزمة أخلاق حقيقية

-

شهادة وائل عباس في قناة المحور



-

فيديو للتحرشات الجنسية بالبنات

في وسط البلد في عيد الأضحي العام الماضي

إلتقطه مصري يعيش في نيويورك كان في زيارة لمصر

المصور إسمه شريف صادق



مش هاقولكم تركزوا مين كان واقف عشان انتوا اكيد هتركزوا !!

-

تغطية أوربت للمهزلة



-

صور جديدة خاصة بالوعي المصري



علا غانم









مصدر الفيديو والصور misrdigital.blogspirit.com

---------------------------------------------------------------------------


التدوينة الأصلية

إذا لم تظهر الصورة - Right Click / Show Picture - www.baitelezz.blogspot.com


عايزين تعرفوا ليه المسخرة اللي حصلت في وسط البلد دي حصلت ؟ اتفضلوا دوسوا علي الصورة اللي فوق وانتوا تعرفوا... الهانم " الرقاصة " دينا مع اتنين من أشباه الرجال واللي هايتفرج علي الفيديو هيلاقيها بترقص !! آه رقاصة وبترقص زي العيال كبرت ..!! الأستاذة والعيال اللي كانوا معاها عشان يروجوا للفيلم بتاعهم وقفوا قدام سينما مترو وهاتك يا رقص !! وفي أخر الرقص هتشوفوا أشباه الرجال بيبوسوا الهانم علي خدودها !!! يبقي اللي جريوا ورا البنات في الشارع دول مجريوش من فراغ !! آه طبعا دي قلة أدب مش مبررة بس انا مش بأبرر هنا ولا بأختلق اعذار انا بس بأحاول اقنع نفسي ان مفيش دخان من غير نار..

-

إذا لم تظهر الصورة - Right Click / Show Picture - www.baitelezz.blogspot.com


الصور دي فكرتني باللي كان بيحصل في مدرستي الحبيبة " طبري الحجاز " كان فيه مدرسة فرنساوي (1) كانت لما بتمشي المدرسة كلها بتتلوح - بالرغم من انها كانت متحجبة - بس كانت المدرسة كلها معتقداها ملكة جمال راس البر ..!!! وكان فيه مدرسة غلبانة وطيبة (2) اظن كانت بتاعت فلسفة او تربية وطنية حاجة زي كده ، الحصة بتاعت المواد اللي من الشكل ده انتوا عارفين بتبقي عامله ازاي !! حصت المدرسة دي كانت بتبقي كاملة العدد، ليه !!؟ لأن الطلبة المش محترمين (3) كانوا بيطلعوا الكبت اللي شايفينه والإثارة اللي شايفنها من مدرسة الفرنساوي في الغلبانة دي ..!!


هو ده بالظبط اللي حصل في وسط البلد في أول أيام العيد ..!! الهانم ام احمر (1) نزلت ورقصت ولمت عليها العيال (3) اللي اصلاً عندهم حرمان وكبت جنسي وأصلاً مفيش أخلاق ولا دين - الإ من رحم ربي - وإيدتهم شحنة !! يفرغوها فين بقي لما هما أصلاً مشحونين خلقة، فجريوا ورا البنات (2) اللي ملهومش اي ذنب غير انهم بنات !! مهزلة أخلاقية وفساد وعبث منتشر ولسه متوقعين خير، ربنا يستر.

-

مصدر الصور والفيديو filfan.filbalad.com

-

Wednesday, November 08, 2006

عايز الشخليلة واليويو


حكاية حياة

زي ما سميتها جينا

-

النهاردة عدي من عمري 25 سنة، يعني أنا بأحتفل النهاردة باليوبيل الفضي... أحب أشكر اللي ما أفتكروش عيد ميلادي قبل اللي إفتكروا وبالمناسبة الغريبة دي أحب أرغي شوية عن حاجات عدت في حياتي ...، صديقة عزيزة عليا سألتني: ها عايز إيه في السنة الجديدة ؟ قولتيلها عايز الشخليلة واليويو ..!! فاكرين الجملة دي من إعلان فودافون ؟ ..أنا إفتكرتها أول ما سألتني.. وبعد شوية ضحك شرحت لها أنا عايز إيه.


طول عمري وأنا بأحب الحياة الجميلة، بأحب الحياة عاماً.. بأحب ألعب بأحب أسمع فيروز بأحب أرسم بأحب أفكر في ربنا بأحب أروح البحر مع إني مبعرفش أعوم لحد دلوقتي... بأحب أجري مع إني مجرتش كتير وأنا صغير نظراً لإني كنت أطول واحد في الصف بتاعي..!! كنت عم القائد بقي وكده فكان لازم أبقي قدوة للباقيين في الإلتزام.. بأقف مع المدرسات والمدرسين لحد ما البريك يخلص وطبعاً ولا لعب ولا جري الإ قليل أوي لو عرفت أفلت من المدرسة وهي بتتكلم مع حد من المدرسين... حد هيضحك دلوقتي ويقولي "إيه الطفولة المشردة دي يا عم !!" لا متتخيلوش كانت سعادتي أد إيه وأنا مميز وواقف مع الناس الكبار ..!! اللي هما كانوا المدرسين ساعتها.


فاكر أوي كل تفاصيل وأنا في الحضانة " بسم الله ما شاء الله " مش عايزين حسد ..!! فاكر "محمد عادل" كان عنده أنيميا البحر المتوسط علي ما أتذكر وكان المفروض إنه مياكولش فول وطعمية ..! أفتكر ساعتها كنت في روضة سادس - فضلت في سادس دي لغاية ما وصلت إعدادي - متذكر جداً إن الأولاد كانوا بياخدوا منه السندويتشات بتاعته ويحاوله يأكلوه فول وطعمية !! عيال مؤذية ؟ صح. تصدقوا إني فاكر شكل وشه وهو بيعيط قبل ما ينزل الفسحة - تم تسميتها بريك لزوم إن المدرسة دخل فيها قسم لغات وكده - مش عارف ليه أكيد مش فاكر بس كنت بأديله سندويتشاتي أنا واخد انا منه الفول والطعمية اللي الأولاد حطوهملوا في الشنطة، أنا ماشوفتوش بعد روضة، حسب عقليتي ساعتها .. محمد إختفي !! وحشتني يا واد علي فكرة الله يمسيك بالخير لو لسه عايش ويرحمك لو مت.


فاكر بعد كده سنة رابعة، كانت فصول مختلطة ساعتها كان معانا بنات، أنا ساعتها كنت بأرسم حلو أوي وفاكر إني كنت حافظ خريطة الوطن العربي "صم" وكنت بأرسمها للعيال في الفصل وكانوا بيقفوا طابور عشان أرسمهالهم... تصدقوا أنا فاكر شكل الخريطة حتي كنت بأرسمها بقلم جاف "بيك" وطبعاً كنت ساعات بأرسم للبنات الأول قبل الأولاد - محدش يضحك مش عشان حاجة !! - أكيد مكانش فيه حاجة جوايا ساعتها... بس مش عارف ! ده شئ كان بيخلي ناس كتير من الأولاد ميحبونيش !! علي عكس البنات... مقولوكوش بقي إيـــــــــــــــه ..! كنت عفريت ساعتها، وإحتمال لغاية دلوقتي معرفش مش فاكر الصراحة ..!!


فاكر وأنا في سنة خامسة في مرة المدرسة سابت الفصل وبصفتي رائد الفصل ومكنتش بأفرق بين صاحب وغير صاحب بنت أو ولد وكنت حقاني - اللي بيتكلم بأطلعه بره وأوقفه علي السبورة - وقفتي علي الفصل .. ومشيت إختفت تماما لباقي اليوم اللي كان فاضل فيه أكتر من تلات حصص .. أفتكر يومها قعدت أتكلم مع الفصل كتيــــــــــــــــــــــــــر وحكينا حكاوي !! فاكر الديسك اللي كنت قاعد فيه والله وصوت الصمت وهما بيسمعوني... كان ساعتها إحساس حلو أوي وإنت شايف الفصل كله قاعد ساكت وبيسمعلك !! مش فاكر أوي كنت بأقول إيه ولا بأتكلم في إيه..!! بس فاكر إن فيه بنات كتير كانوا بيتكلموا معايا وبيتناقشوا في اللي احنا بنقوله - كبيرة اوي كلمة يتناقشوا علي بنات في سنة خامسة ؟؟ - لأ أصلكم ماشوفتوهمش ساعتها... أنا فاكرهم حتي بالإسم، أميرة ، سها ، سلافة، رانيا و سارة - متضحكوش عشان انا مش فاكر ولا إسم ولد .. المسألة بدأت تقلقني أنا شخصياً ... أنا مالي كنت مركز مع البنات كده ليه !؟! المهم كانوا تحس إنهم اكبر من سنهم بمراحل... سنة خامسة دي يعني كان عندي 10 أو 11 سنة مش فاكر بس كانوا آنسات كده وفاكر أوي قوة شخصيتهم وتفوقهم كنت انا وهما وكمان واحد تاني بس إسمه رايح مني خالص.. كنا الفريق بتاع الفصل.


أميرة كانت طول كتفي في الوقت ده شعرها أصفر تقيل لونها كان عادي مش أبيض ومش أسمر اللون المصري العادي، سها دي بقي كانت ما شاء الله من الناس اللي كنت بأتمني إننا نبقي أكبر 900 سنة عشان أتجوزها مع إني مش فاكر أوي إني كنت اعرف يعني إيه جواز !!! بس كنت معجب بيها أوي ... كان طولها مش كبير اقصر من أميرة، كانوا أصدقاء أوي شعرها كان أصفر من شعر أميرة ولونها أبيض لدرجة الشفافية - يظهر إني كنت معجب بيها أوي - عينيها رمادي فاتح صوتها كان مضحك ولا تتخيلوا إني ممكن اكون فاكر صوتها... سها من الناس اللي إختفوا من الحياة بعد سنة خامسة، شوفتها بعد كده بكذا سنة في الشارع بس خفت أروح اعملها قصة مسرحية عشان أقولها إني أنا محمد اللي كان في معرفش إيه بتاع مدرسة إيه .... عشان تقولي لأ آسفة والله مش فاكرة.. سلافة مش فاكرها أوي، رانيا بقي رسمياً ولأول مرة أقول الحكاية دي بس رانيا أول وآخر بنت مشيت وراها عشان أعرف بيتها فين !!!! متتخضوش مش معاكسة ولله الحمد عمري ما عاكست بنت في حياتي .. ممكن أعجب بحد آه يمكن كتير جداً لكن عمري ما قليت أدبي ... بس أصلكم مش فاهمين ..!!! دي كانت لعبة بنلعبها وأكننا بنراقب البنات وعاملين فيها شارلوك هولمز - اللي أكيـــــــد ما كنتش أعرفه ساعتها ..!! بس البنات كانوا عارفين إننا بنمشي وراهم وكانوا بيستخبوا مننا وكانت لعبة غريبة بس جميلة، فاكر أوي الأماكن اللي كنا بنستخبي فيها، إحنا كنا صحاب أوي ساعتها.


فاكر أيام الزلزال اللي ضرب مصر أول مرة في سنة 1992، كنت في أولي إعدادي وكنا في آخر حصة وفاكر أوي المشهد، أنا قاعد في آخر صف - كالعادة بصفتي أطول واحد برضه في الفصل - والشباك علي شمالي والساعة 3:12 دقيقة، فيه طيارة شوفتها من الشباك وبعدها الأرض بدأت تتهز.. الإستاذ جري والعيال كلهم بدؤا يجروا، فاكر أوي إن الفصل في دقايق كان فاضي والدور كله صريخ... وأنا كنت قمة في الهدوء وفاكر وأنا بألم أقلامي وبأحطهم في المقلمة - أنا شايف واحدة دلوقتي هي عارفة نفسها لو بتقرا السطور دي هاتقول : أصلك يا محمد منظم بطريقة مملة .. ماشي هاعديهالك - فاكر إن الفصل كله فضي وأنا لسه بألم حاجتي وبأحطها في الشنطة وساعتها واحد صاحبي - للأسف الشديد بجد للأسف الشديد مش فاكر إسمه - رجع !! شوفوا الجدعنة رجع والمدرسة كانت بتقع - علي حد تفكيرنا في الوقت ده - وشدني وقالي : يلااااااااا تعالي وسيبهم هنا وشدني من دراعي.. الله يمسيك بالخير يا صديقي والله لو كنت إفتكرتك لأكلمك ولازم أشوفك ... كان جدع فعلاً وأنا مش فاكر ايه اللي كان في دماغي ساعتها !! أقلام إيه !! المهم جرينا ونزلنا علي السلم وفاكر منظر السلم وهو متكدس تلاميذ واقعين فوق بعض !! وفاكر إن فيه حد زقني ووقعت عليهم !!!! طبعا اللي كانوا تحتي دول اتفعصوا !! كان يوم وحش أوي والفترة كلها كانت مؤلمة بلاش أفتكر أكتر من كده.


الإعدادية أنا كنت فيها ملك !! بكل معاني الكلمات، كنت عبقري الدور - هي سنة تالتة إعدادي كلها كانت دور واحد في المدرسة - كنت بآخد درس مع أستاذ خالد عبده ... واللي كان معايا في المدرسة كان يعرف مين خالد عبده، الراجل كان مقتنع بيا لدرجة غريبة وكان بيعملني أكني قابل للكسر وثروة يجب الحفاظ عليها !!! بيني وبينكم انا كانت عجباني الحكاية .. وفعلاً كنت عفريت مكانش فيه مسألة في الجبر والهندسة كانت بتقف قدامي، بجد كنت فظيع لدرجة إني كنت معروف في المدرسة كلها وكانت الفصول لما تيجي تعمل مسابقات مع فصول تانية من مدارس تانية كانوا بياخدوني علي إني معاهم ...!! بدأت في السنة دي ألعب كرة سلة !! تخيلوا بقي معايا... رائد للفصل - وعلي فكرة السنة دي أنا أخدت رائد الفصل وأنا في البيت !! بالتزكية زي ما بيقولوا !! تصدقوا كنت أنفع في الحزب الوطني والله !!!!! آه والله وانا في البيت تخيلوا مدي الشهرة وكمان خدت المقرر الرياضي - يعني رائد فصل ومقرر رياضي ولاعب سلة وملك في الجبر والهندسة !!! يخرب بيت عقلي أنا كنت جامد جداً في الأيام دي.. كان الفصل بتاعي هو الفصل الوحيد اللي في المدرسة فيه مسيحين، كنت مصاحب الكل وبأعملهم الكل نفس المقدار مفيش فرق بين مسلم ومسيحي... يمكن ده اللي خلا علاقتي بالمسيحين كويسة لحد دلوقتي لأني فعلاً مش بأكره حد عشان دينه !! لأن هو ده الإسلام فعلاً ... فاكر ماجد كان من البروتستانت كان الوحيد اللي في المدرسة اللي كده، الشئ اللي خلاني أتطلع وأعرف مين فين ومين إيه وأعرف الطوائف في المسيحية.


ودخلت المرحلة الثانوية وكان لازم أختار !! علمي ولا أدبي ..!؟ طبعاً اللي كان يعرفني كان لا يمكن يفكر أويخطر له ببال إني هأبقي أدبي !! لكن فعلاً دخلت القسم الأدبي لأني بيني وبينكم مش بتاع مذاكرة.. مسألة الجبر والهندسة دي كانت حكاية تانية .. الجبر أنا خدته عند لأني مكنتش فاهمة وأنا مبحبش أخسر !! والهندسة إستاذ خالد عبده ربنا يمسيه بالخير والله عايز أروح أزوره هو اللي صنع الهالة دي حواليا ... أنا كنت بأفكر مش بأحفظ - وهو ده اللي خلاني أدخل الأدبي مع إنه كله حفظ !! بس برضه كان - عند - من العناد يعني !!


زهقت من الكلام عن المدرسة يمكن مفيش حاجة جميلة حصلتلي في المرحلة الثانوية إحتمال !! بس مش عايز أفتكر حاجة اكتر من اني دخلت وخرجت من الطبري الثانوية بنين وما أدراك ما هي الطبري الثانوية بنين ! وأنا زي ما أنا متغيرتش.. كملت كرة سلة - كنت بدأت ساعتها ألعب في النادي الأهلي - فضلت محترم مبحبش الخناق زي ما أنا، معاكستش ولا بنت، مزوغتش ولا يوم، مشربتش سجاير ولله الحمد من قبل ومن بعد، لآخر يوم في المدرسة أنا كنت ملتزم.


حاجات كتير حصلت من اليوم اللي عرفت إني جايب فيه 83% في القسم الأدبي في الثانوية العامة لغاية يومنا هذا... حاجات كتير أوي وفرح وحزن وحب وكره وحب تاني ونسيان وحب تاني ودموع وزعل وزهق وجري ولعب ومنطقة وعمار بن ياسر وإستاد ومراقبة وجامعة وتنمية وأوتوماركت وافلام وخروجات وشمس وحفلات وإعتكاف ودقن وبساطة وروستري وسيتي ستارز الصبح والغردقة وتطوع ونزول وطلوع ومارينا والبيت وأنا لوحدي وموبايلات وصلاة ونقاشات وصوم ومجادلات ومواقع وتصميم ودبلومات وصحاب راحوا وصحاب جم وبنات كلمتها وبنات بعدت عنها وصحاب رجالة وصحاب لأ وحاجات كتير أوي لدرجة إني إتلغبطت ..!! هو أنا كده عايز كل حاجة !؟ ولا ده العادي !! أنا كده اللي عايز أكوي القميص وبرضه أخيط الزراير ..!! وعايز العب الشوط الأول والتاني والإضافي ويا سلام لو فيه ضربات جزاء !! أنا اللي عايز الشخليلة واليويو وده كتير إني أطلبه !؟ ولا هو ده المفروض أساساً إن الإنسان يطلبه !!


أنا كل ده علي فكرة لسه ما قولتش أنا فعلاً عايز إيه !! كل ما أتمناه من الله بعد ما أتميت ربع قرن علي وجه هذه الكرة الصاخبة... إنه يتولاني برحمته لأني فعلاً من غيره ماكنتش نجيت من كل الهيصة اللي أنا عديت بينها دي.. ماكنتش إتعلمت من كل اللي شوفتهم في حياتي.. ما كنتش بقيت لسه أنا الأخ اللي كان بيحب "محمد عادل" وبيعامله اكنه مسئول منه.. ماكنتش فضلت الإبن اللي أستاذ خالد كان بيتعامل معاه.. ولا اللي كان بيسيطر علي الفصل والمدرسة مش موجودة.. ولا اللي الناس بتحبه حتي وهو مش موجود بينهم.. واللي حب وعرف معني الكره.. بأحمد ربنا إني لسه زي ما أنا نفس الإنسان اللي صورته فوق على اليمين تحت عنوان المدونة، يلا كل سنة وإنتم طيبين وأنا زي ما أنا بس ربنا يكرم بس وأقدر أكمل.-

-

Sunday, November 05, 2006

الكيان الصهيوني الأحمر


مباريات الإسبوع الحالي لأندية الإسماعيلي والمصري إنتهت بالتعادل السلبي والأخبار بتقول إن الكثير من الجمهور كانوا لابسين تي شيرتات الصفاقصي التونسي !! برضه سواد حقد وغباء !! يلا أديكوا اتعادلتوا وربنا إداكو علي قد نيتكم ... وعشان تعرفوا إن اللي يجي علي الأهلي ميكسبش وأنا حاسس إن الأهلي ربنا هينصره إن شاء الله في تونس عشان الكل ضده بدون سبب !!!!!!!


والله البلد دي مش هاتقوملها قومة ..!!! طول ما إحنا متخلفين بالشكل ده .. وبنخلط الأمور ببعضها بالمنظر الغريب ده... وأنا بأتفرج علي مباراة المصري والأهلي ببورسعيد، فوجئت بالمنظر الغريب ده ..!!


إذا لم تظهر الصورة - Right Click / Show Picture - www.baitelezz.blogspot.com


يا سلاااااااااااااااااااااام يعني إيه يعني !!! وأكن الأهلي ده من إسرائيل !! والله لو من إسرائيل ميستجري راجل واحد فاكر نفسه راجل إنه يعلق اليافتة دي !!! مش عارف أنا ضحكت لما شوفتها وقولت يا سلام ما إن شاالله ما بورسعيد حبت الأهلي !! يعني لو حبيت بورسعيد الأهلي هينول الرضي يعني ... وفوجئب بمقال أشد غرابة علي موقع جمهور الزمالك وضحكتني أوي كلمات كلها حقد علي فريق " بيلعب كرة القدم " مش بيعذب ناس يعني !! ولا بيسرق قوت الغلابة !! ولا بياخد قروض وبيسافر برة !! ولا بيشحنوا بشر وبيغرقوهم ويجري علي لندن !! وزي ما قولتلكم قبل كده إن في ناس بتجيب أي حاجة وبتروح الإستاد .!! أهو علم إيطاليا في مباراة الأهلي والمصري !!!


دي رياضة يا بشر ..!! يعني فيها غالب ومغلوب !! ومش مشكلة الأهلي إنه بيكسب يعني .. بيجي وقت برضه وبيتغلب عادي !! مش منزل يعني - أعوذ بالله - بس نقول إيه بقي لعقليات لسه بتفكر بالشكل ده ... إقروا معايا الكلمات اللي جت في المقال ولا لأ مقال إيه ده تخريفة لواحد معندوش أي حاجة في أي بتنجان أصلاً : ( علشان خاطر سهير رمزي: بورسعيد بتحبك يا أهلي [ إستمع لتصريحات سئ متولي المستفزه، وشاهد ليلة سقطت فيها الأقنعة الحمراء! ) ده العنوان !!


( حيث أرى توافق كبير بين التفكير الصهيوني الإسرائيلي والتفكير الأهلاوي الأحمر.. حيث ان كلاهما يسير على مبدأ معاداة الساميه، ويبدو أن العنجهيه الصهيونيه الحمراء قد وصلت مداها، فيخرج كل يوم علينا الأحمر تلو الآخر ليحذروا من ان أي مخالف لهم ولا يطيقهم فهو معادي للساميه.! ) يكمل البرنس تخاريفه !! ومعرفش معاداة السامية إيه اللي جابها هنا بالإضافة للفظ الجديد "الصهيونية الحمراء" أي كلام أي كلام في أي كلام والعيب علي اللي بيقروا التخاريف دي أصلاً


ويكمل تخاريفه بإستخدام ألفاظ : ( الطائفة الزملكاوية ببورسعيد ) ( وسوف يبيدهم بالأسلحة الكيماويه ) ( الحشرات الحمراء ) ( ولكن الحقيقة أن اللافتة الكبيرة التي وُضعت في مدرجات الفريق البورسعيدي ما هى إلا لافتة تعبر عن كل ما بداخل الشعب البورسعيدي الباسل تجاه هذا النادي الأحمر وجماهيره ومسئوليه وأبواقه الإعلاميه المأجوره، فمن لا يريد أن يؤمن بأن هذه هى الحقيقه وأن شعوب مدن القناة الباسلة بأكملها سواء بورسعيد أو الإسماعيليه أو السويس تكره هذا النادي الأحمر، عليه أن يلقي بنفسه في أقرب صندوق قمامه بجواره لكي يتخلص من التعجرف الذي يتواجد بداخله، أو يأتي لأقرب زملكاوي ويطلب منه تطبيق مقولة مرتضى منصور الشهيره عليه "اللي يشوف أي أهلاوي في الشارع يضربه بالـ ) حاجة منتهي قلة الأدب والتخريف والعيب علي اللي مخلي بني آدم زي ده يكتب أصلاً


ويكمل لسه بدري الراجل اتكلم في كل حاجة من أول دبابات إسرائيل حتي نواب القروض !!! خلط كله في كله !! يلا ما كله عند العرب صابون.... ( خطة الكيان الصهيوني الأحمر ) ( السامية الحمراء ) ( مدير مباحث الاستاد ) فيه حاجة إسمها مدير مباحث الإستاد أصلاً !! ( اننا سنساند النادي الصفاقسي التونسي الشقيق ) ( للكيان الصهيوني الأحمر ) ( الإعلام الأحمر المصري المأجور ) ( وظهر مشجعو الأهلي بزيهم الشيطاني الأحمر ) يا جماعة والله مش قادر من كتر الضحك يخرب بيت الفراغ والسواد اللي في قلوب الناس !! مش قادرين نفهم أبسط مبادئ الحياة وهي التنافس في الرياضة !! رياضة يا جماعه مش حرب.


ويكمل البرنس : ( وأتمنى ألا أكون قد أطلت عليكم ولكن مازال بداخلي وبداخلكم بالطبع الكثير والكثير تجاه هذا الكيان الصهيوني البغيض ) لاااااااا يا راجل متقولش كده دانتا حتي كلامك حِكم !!


آخر الكلام وبصفتي راجل أهلاوي عاقل ولله الحمد لا أظن ان لافتة زي دي وكلام متخلف زي ده ولبس جماهير بورسعيد لفانلة الصفاقسي !!! كل ده اكيد مش هايورينا تقدم أبداً طول ما إحنا كارهين بعض أصلاً وعشان إيه عشان رياضة !! الصراحة الواحد زهق من الناس كل ما الواحد يقول هتمشي .. الاقي العملية بتتعقد وبتزداد سواد !! يعني يروحوا يشتروا فانلات لفرقة تونسية !! يا ساتر يا رب !! ربنا يهدي الجميع دي كورة يا عالم !


للإستماع لإتصال سيد متولي رئيس نادي المصري البورسعيدي ( اللي مش بيحب الأهلي والأهلي أصلاً مش فارقة معاه مين يكرهه ) مع برنامج الكورة مع دريم
-