Thursday, August 15, 2013

ثقافة اليوتيوب

يعني انا ممكن اتحمل كل وجهات النظر وأتناقش معاها، لكن اللي مش باقدر اتحمله، فتي الإخوة والأخوات العرب في الشأن المصري الداخلي وهما مش عارفين أم اي حاجه حصلت في البلد من الإخوان والجيش والشرطة خلال ال3 سنين اللي فاتت ولا عارفين أبعاد اي مواقف على الأرض وكل معلوماتهم من اليوتيوب وقناة الجزيرة.. والاقيهم بيفتوا ويدلوا بخراهم ويقفوا في صف الإخوان.. كلهم من الأردن وده شئ محزن. طب إنتوا عندكم اتساق مع الخرا اللي عندكم من الخمسينات وعاجبكم، متشاركوناش بيه إذا سمحتم.

Wednesday, August 14, 2013

تناقض البرادعي

يعني البرادعي لم يستقيل اعتراضاً على الإعتداء وقتل المئات من الأبرياء من المواطنين وقتل عشرات الجنود المرابطين في سيناء وإستقال علشان تم فض اعتصامين مسلحين واقفين حال البلد اكتر من اربعين يوم علشان شايف ان كان ممكن يحصل بشكل تاني غير كده؟ ليه ماعترضش من قبل كده وانسحب دفاعاً عن الأبرياء والجنود والدمار اللي حصل من مجاذيب الإخوان؟ رأيي انه هو بذات نفسه كان تخاذل داخل الحكومة.. انا شايف انه حسس عليهم بما فيه الكفاية وفشل في الوصول لحل.. فالبلد مش هتمشي على مزاج معاليه واتساقه مع ذاته..

اﻹخوان لوحدهم

اﻹخوان بيعيدوا تطبيق أجندتهم لـ 25 يناير بس المرة دي لوحدهم بدون مساندة وغطاء من الشعب.. كل شئ متعلق باﻷيام اﻷولى للثورة من عنف وإقتحامات وفوضى يتم إنتاجه مرة أخرى لكن المرة دي ضد الشعب والدولة.. بينتحروا ﻷن الشعب لن يسامحهم والدولة مستعدة ومسجلالهم كل خطواتهم من سنة فاتت.

Thursday, April 11, 2013

أسوء ناس

واحدة بتتصل ببرنامج أكل على قناة الحياة بتقول "انتوا اسوء برنامج واسوء ناس في الدنيا".. طبعاً الراجل ضحك وقالها طب إحنا اسوء ناس تاعبة نفسك ومكلفة نفسك ليه وبتكلمينا؟... في رأيي إن الشخصية التافهة دي وأمثالها هما سبب نكسة مصر. هيربوا أجيال تافهة زيهم وهيعلموهم إزاي يكونوا سطحيين وإنتقاميين.

فكرة انها تمسك التليفون وتتصل وتكلم الإعداد وتستنى وقت عشان تدخل على الهوا عشان تشاركنا بحقدها وشعورها البغيض اللي عبرت عنه، مع ان عندها فرصة انها تحول القناة وتريحنا من كراهيتها وسطحيتها.. لكن نقول إيه، اللي زيها هيدمر البلد على كل المستويات.

Tuesday, April 09, 2013

القاهرة بدون إضافات


شوارع القاهرة يومي الأحد والإتنين كانت أكتر من رائعة، لأول مرة من مدة طويلة أروح من هليوبوليس للزمالك في 25 دقيقة وأرجع في 20 دقيقة.. واضح ان توقف القطارات وصعوبة انتقال الملايين اللي بتدخل القاهرة يومياً لقضاء مصالحها فعلاً مؤثر مش بس كلام.. يخرب بيت المركزية في الحكم اللي خلت حياتنا كده.

Monday, April 08, 2013

الأمل

مش هيكون فيه أمل في شعب جاهل فوضوي بعيد عن الأخلاق.

Thursday, April 04, 2013

اللانشون.. إرادة شعب


من كام يوم راجع متأخر ومش عايز اصحي حد يعمل لي عشا، قولت أتصرّف من غير ما أعرف فيه إيه في البيت وأهي حاجات هتفضل موجودة لوقت تاني.. اشتريت ربع لانشون فراخ وعلبة حلاوة نص كيلو وعلبة مربى صغيرة وفينو.. بـ45 جنيه، بس.