المركب غرقت يا قبطان

رجعت البيت إمبارح بعد يوم طويل من الشغل وبعد الشغل كان فيه جلسة في نموذج جامعة الدول العربية بجامعة القاهرة كنت أنا مديرها، اليوم كان صعب بالنسبة لي لأسباب كتيرة... لكن المهم رجعت، فتحت جهازي الغلبان والمظلوم معايا عشان أمارس مهامي اليومية بسرعة قبل ما أنام لأني أصلاً كنت نايم، دانا حتي نمت وانا بأتكلم مع البنت اللي كنت مروح معاها.. لدرجة إني صعبت عليها وقالتي "أصمد يا عز" ابتسمت لها وقلتلها معلش اصلي عايز انام خالص.

جهازي الحبيب بقي حب يداعبني فلاقيت النت مش شغال، وأنا بالنسبة لي النت بايظ يبقي اليوم كده أو ماتبقي منه..إتضرب، فكرت إني أرتب الجهاز واشوف الفيديوهات اللي عندي والحاجات اللي استقبلتها ونزلتها من غير ما ارتبها.. يعني عملية تنظيمية كده استغل وقت فراغي من غير شغل في إني انظم الجهاز، بالصدفة وانا بأدور لقيت ملف صوت عندي في الداونلودز لسه مسمعتوش قبل كده، إسم الملف كان "الصندوق الأسود" باللغة الإنجليزية، شغلته واتشغلت عنه وقمت بس كانت السماعات بتاعتي صوتها عالي الشئ اللي خلاني وانا في الأوضة بتاعتي أجري وأرجع.. الصوت كان صعب أوي، كان صوت صراخ.. جريت وحطيت السماعة علي وداني أول حاجة سمعتها، "المركب غرقت يا قبطان" بلهجة إسكندراني، إتصدمت وقعدت لحظة عرفت إن دول ضحايا عبارة السلام 98 وهما بيغرقوا وبدأت بعدها أكتب السطور دي عشان اسمعكم اللي سمعته بنفس الطريقة اللي موجودة في الملف، طبعاً فيه مصطلحات غريبة عليا وما اعرفهاش هتلاقوها بين "علامتين" واعتذر لو نطقها او كتابتها غلط... أنا مش بحار!!

صوت القبطان : ممكن تشوف فيه "سكعة" جاية من جنب يمين زيادة.. وصلنا 18 درجة

صوت القبطان : شوف كده هل فيه حاجة في الجنب يمين بتدخل مية

لحظات سكون مع صوت صفارة في الخلفية

صوت لاسلكي : لا مفيش حاجة يا قبطان مفيش حاجة في الجنب يمين

صوت القبطان : طيب أومال إيه ؟ ده ده الطرمبة شغاله والـ واااا و"المـَـلص" بيتملي ومعملتش أي حاجة "السكعة" بتزيد

صوت مساعد القبطان : ....... المية في الصراف اليمين .... حد يشوف .....

صوت القبطان : طيب شوف هل المية بتزيد في جنب يمين ولا إيه ؟

صوت لاسلكي : بنحاول

لحظات سكون مع صوت صفارة في الخلفية

صوت مساعد القبطان : مفيش حاجة إسمها بتحاولوا مفيش حاجة إسمها هنشوف

صوت القبطان : حاولوا طب تشوفوا "المـَـلص" احنا نزلنا عشرين درجة دلوقتي يا جماعة.. المركب هتقلب

صوت مساعد القبطان : كل واحد مكانه في مكانه واحد بيتكلم يرد علينا بيريحنا !!

لحظات سكون مع صوت صفارة في الخلفية

صوت القبطان : أرجوك يااا يا شيفـ يااا فيرست شوفلنا حاجة للمية لحسن المركب "بتسكع" 20 درجة دلوقتي

صوت القبطان : تعالي علي اليمين كده واحدة واحدة
صوت مساعد القبطان : هنروح فين يمين ....... يرد بصوت ضعيف غير مسموع

صوت القبطان : أنا عايز أقول يمكن

صوت مساعد القبطان : لأ .............. يكمل الرد بصوت غير مسموع

صوت القبطان : أصل الريح في اليمين يعني بدل ما هو ... جايز هو مقصر معانا.. لو نيجي بعلو شوية

صوت مساعد القبطان : خطر يا قبطان

صوت مساعد القبطان : لازم يا قبطان تستحملوا شوية

يبدأ الرعب في المركب والألم للمستمع لهذا الملف، يبدأ الضحايا في الصراخ وفي التخبيط علي القبطان

صوت مساعد القبطان : هدي الناس.. هدي الناس.. هدي الناااااس

صوت القبطان : كلمولنا الـ ... يعني مش عارفين يعملوا "المـَـلص" أنا مش قادر أفهم برضه يعني

صوت أشياء تسقط نتيجة للميل الكبير في المركب

صوت مساعد 2 : السكعة دلوقتي 25 يا قبطان

تبدأ اصوات الصفارات المتقطعة في البدء منبهة إن هناك خطر

صوت مساعد 2 : الوضع خطر جداً يا قبطان دلوقتي

صوت القبطان : أطلب "دومان" أطلب "دومان" أطلب "دومان" أطلب "دومان"

"دومان" (كلمة غريبة أعتقد إنها تعني إطلب نداء إستغاثة)

تستمر الأشياء في السقوط وتتعالي أصوات الضحايا والصراخ يملئ المكان

صوت مساعد 2 : المركب بتغرق يا قبطان

صوت القبطان : أطلب "دومان"

صوت مساعد 2 : الناس

-

أنا هأقف هنا عند الصوت ده، صوته خلاني أبكي، إفتكر مسئوليته، الوحيد اللي إفتكر الناس في اللحظه دي لما هتسمعه الصوت هتحسوا إنه خايف فعلاً، صوته مرعب.. صوت النفس بتاعه خلي جسمي يقشعر تخيلت نفسي مكانه، تخيلت نفسي شايف اللي هو شايفه، ناس بتغرق ناس بتجري ناس بتصرخ.. لحظة مميته والله أعلم عايش ولا غرق، الله يرحمه في كلا الحالتين

صوت القبطان : كله شمال

صوت مساعد 2 : كله شمال

صوت مساعد 2 : المركب بتغرق.. المركب بتغرق يا قبطان

صوت القبطان : أطلب "دومان"

صوت مساعد 2 : الناس

صوت القبطان : كله شمال

صوت مساعد 2 : كله شمال

صوت مساعد 2 : المركب بتغرق يا قبطان

صوت القبطان : كله شمال

صوت القبطان : كله شمال

صوت القبطان : كله شمال

صوت مساعد 2 : المركب غـًرقت يا قبطان (بلهجة إسكندراني)

صوت الضحايا يظهر من الخارج لا حول ولا قوة الإ بالله.. لا حول ولا قوة الإ بالله

صوت مساعد 3 : أشهد أن لا إله الإ الله ... وأشهد أن محمداً رسول الله

صوت مساعد 2 : المركب غـًرقت يا قبطان

صوت القبطان : إستنونا بس يا جماعة

صوت مساعد 2 : إستنونا إيه يا قبطان المركب غـًرقت

صوت مساعد 2 : مفيش لايف جاكيت هنا يا جماعة... أي لايف جاكيت

صوت القبطان : هاتوا لنا .....

وينتهي صوت الملف عند هذه الكلمة بالظبط

بس واضحة مش محتاجة نظرية لإستنتاج الكلمة أكيد ماكنش هيطلب إتنين شاي ...!!

للأسف الملف الصوتي كان موجود ولكنه اختفي.. اللينك بتاعه باظ !!