Wednesday, December 26, 2007

هو فيه كده؟


قالك "هي فوضي؟" ... قولتلهم لأ هو هبل؟ تخريف؟ استكراد؟ لكن مش فيلم اللي انا شوفته ده خالص !!

الحكاية بدأت من مريم، بس مريم حكايتها حكاية جميلة نبقي نحكيها في وقت تاني، مش مكانها هنا... قالتلي احنا رايحين "حين ميسرة" تيجي معانا؟ أحداث كتير حصلت انتهت بإني قدام سينما سيتي ستارز باكلمها بقولها "انا داخل الجزيرة.. اه لوحدي هاعمل ايه يعني" بعدها بثواني مكالمة تانية "انا داخل اي فيلم تاني، مش هادخل الجزيرة خلاص، أوك سلام" ... ويا ريتني كنت روحت مدخلتش حاجة خالص !! بس للأسف كنت وعدت نفسي اني هادخل سينما يعني هادخل سينما.. إنتهي !!


طلعت دور سيتي ستارز القبل الأخير واثق الخطي امشي ملكاً ههههههه حلوة دي !! المهم وصلت للسينما وبدأ الشعور الداخلي الموازي يراودني... هي فوضي؟ الجزيرة؟ الجزيرة؟ هي فوضي؟ طبعاً واضح تماماً اني مش باصص علي بوستر "خليج نعمة" !! بس خلاص انا قولت اني مش هادخل الجزيرة يبقي مش هادخل الجزيرة .. إنتهي !!


أيوة تذكرة واحدة.. اه هنا كويس.. شكراً.. واحدة سنيكرز لو سمحت... دخلت علي مشهد حبيبي خالد صالح وهو طايح في الطلبة بتوع المظاهرات اللي في الأول خالص.. ثواني وبدأت اندمج في الفيلم ... للأسف!!

.

المشكلة في فيلم "هي فوضي" ان اللي حصل فيه هو فعلاً فوضي !! لأني من وأنا صغير طفل طويل رضيع وانا مهتم بالسينما واعرف ان السينما دي حالة فنية.. حالة ابداعية بتاعت إنسان قرر انه يشرك البشرية معاه احساسه !! فقرر انه يجيب عشرين ثلاثين شخص تانيين يشركهم احساسه عشان يطلع علي شكل يقدر بعد كده يشرك بيه الناس كلهم والبشرية جمعااااء.


لكن اللي حصل واللي المشاهد هيقدر يميزه بسهولة تامة وهو بيتفرج علي "هي فوضي؟" ان الفيلم عبارة عن حالة ممسوخة من ابداع شخصين ملهومش دعوة ببعض !! علي عكس اللي بيتقال ان خالد يوسف ابن يوسف شاهين وتلميذه النجيب !! وده طبعاً تقليل من قدر المخرج المبدع يوسف شاهين!! الحالة ممسوخة لأنها ببساطة عبارة عن شراكة بين واحد - كان - مبدع بس الزمن واثار الزهايمر والمرض مأثريين عليه وواحد تاني مدعي معرفة وطريقة في الإخراج... فلحظات تلاقي دماغك رايحة في مكان ولحظات تلاقيها راحت في مكان تاني ومشاهد تحس انك متأثر فعلاً وعنيك ممكن تدمع ومشاهد تانية تبقي بتضرب كف علي كف ان لسه فيه كده !!


الحاجة الوحيدة الحلوة في الفيلم هي ممثليه ... يعني انا استمتعت فعلاً بمشاهد خالد صالح المبدع التحفة اللي كل كلامه بيأكد انه حد جامد جداً وبيعرف يقنع اللي قدامه انه هو ده !! طبعاً كنت متأثر بكلام ونقد صديقتي ياسمين السماحي مديرة موقع في الفن قبل اسبوع لما قالتلي انه هيصعب عليك في الآخر الشي اللي كان مخليني مستني ها هتصعب عليا امتي يا امووور !؟ فباظت اللحظة اللي المفروض كان يصعب عليا فيها فعلاً لأنها متوقعة بل منتظرة!!


استمتعت بأداء منة شلبي جداً جداً جداً واكتشفت اني باحب اشوفها علي الشاشة ... مش عشان شكلها ولا الحاجات اللي ممكن تيجي في دماغكم ... بس مش عارف بتحس انها مريحة وصادقة جداً يعني اللحظات اللي كانت بتبكي فيها وخصوصاً بعد ما الأمور اعتدي عليها في اخر نص ساعة في الفيلم !! كنت مصدقها جداً ومصدق دموعها تماماً ... طبعاً ده رجعني للفيلم الكئيب "عن العشق والهوي" اللي نزلت فيه حوالي 3 كيلو دموع ومكنتش مصدقها تماماً ... بس هنا كانت لطيفة أوي هادية جداً تحس انها مش بتمثل.



اداء هالة فاخر استغربت له جداً.!! مش عارف ليه بس كنت فاكر ان هالة فاخر بتاعت كوميديا بس لكن عجبتني جداً في الدور واجمل لحظات دورها لما بنتها دخلت عليها وهي معتدي عليها من حاتم في اخر الفيلم لما وشها اتغير لونه فعلاً ورجليها ما شلتهاش بطريقة واقعية جداً !! علي عكس المشاهد اللي ياما اتعودنا عليها في السينما ان لما حد يغمي عليه تااااك !!! يترزع علي الأرض وعينيه تقفل واكنه اتضرب بمدفع ليزر مضاد للأطباق الطايرة !!


بس !! غير كده ولا هالة صدقي ولا وكيل النيابة "شريف" ولا اي حد تاني في الفيلم كان مقنع... ده طبعاً من الناس الكبيرة.!! نروح للي خنقني من الفيلم بقي !! هاتوا ورقة وقلم !!


الموسيقي في الفيلم كانت جميلة!! بس كل حاجة لوحدها ... يعني مشهد تلاقيها لون ومشهد تاني تلاقيها كلاسيك بطريقة تانية، مشهد تلاقيها خطرة وكلها حركات وبرضه لون تاني غير الاتنيين التانيين!! الشئ اللي خلاني اترحم علي "Troy" ولا علي "Brave Heart" وازاي الجمل الموسيقية كلها كانت لون وطعم واحد ولغاية دلوقتي لما بنسمعهم بنقول اه ده فيلم كذا !! لكن اتحدي حد دخل "هي فوضي؟" يعرف هو سمع ايه !؟ ولا الدموع !! اكن اللي المونتير كان قاعد فاضي بالليل فشغل شوية موسيقي فقالوا له خلاص قشطة هي دي موسيقي الفيلم !! ولا طعم ولا لون ولا ريحة !!


المشاهد تقطيعها غريب الي حد كبير ... تحس انه مستعجل عايز يخلص مش فاضي !! عايز يوريك حاجة من كل حد حتة من كل حاجة ..!! وتحس ده كمان في الملابس !! الناس مغيرتش هدومها كتير ... الأمين حاتم تقريباً طول الفيلم لبس طقمين وترينينج غير الميري طبعا اللي ضحكني والله !! في اول الفيلم الشرطة كانت مشتية !! وفي الجو كان عادي شمس وحلو ولطيف !! في اخر الفيلم الشرطة صيفت ولبست ابيض !! يعني ما شاء الله مواسم اتغيرت والأحداث عادي ماشية هي زي ما هي ولا حد سافر مثلا ولا حد راح ليبيا !! مفيش يوم وليلتين الفيلم كله بس المخرج حب يستعرض بالميري الأبيض والإسود !!


لفت انتباهي جداً المشاهد المتركبة زي افلام زمان !!! من نوعية البطل والبطلة يبقوا قاعدين في العربية و7 رجالة قاعدين يحركوا العربية ويزقوها يمين وشمال !! مع ان العربية ماشية لقدام اصلاً والخلفية بقي يا سلام وهي بتتحرك واكن البطل طاير !! واصلاً البطل ماشي علي سرعة 30 كيلو متر وكل اللي بيعمله اصلاً انه بيهز الدركسيون يمين وشمال !! فاكرين انتوا المشاهد اللي حسست الناس ان السواقة سهلــــــــة !!


فوجئت بأول مشهد بين "وكيل الينابة شريف" اللي هو يوسف الشريف و"سيينديا" خطيبة شريف وهما ماشيين علي الكورنيش والخلفية بتجرررررري وهما اصلا ماشيين في شارع من ازحم شوارع الكورنيش !!! ومكنتش مصدق نفسي حتي اللي ورايا افتكروني مجنون لأني كنت قاعد باتكلم ومفيش حد جنبي في الصف كله!! كان كل اللي جاي عليا ... هو لسه فيه كده ؟ هو لسه فيه كده؟ وطبعاً المشهد اتكرر في المشهد اللي كان المفروض فيه اني اتعاطف مع "حاتم" وماعرفش ليه المشهد اتركب مع ان فعلاً كان فيه مشاهد في المكان متصورة !! ليه مكملوش بقية المشاهد !!؟ وايه لازمة مشهد الشباب اللي جم يتريقوا عليه لما "نور" مشيت وسابته في النادي !! هو فيه حد بيعمل كده لسه !! الكلام ده كان ايام فريد شوقي احتمال لكن مين بيعمل كده بالطريقة الهبلة دي دلوقتي !!؟


المشهد اللي اقتنعت بيه من الربع ساعة اللي ملهاش اي لازمة دي، المشهد اللي تلي الموقف اللي سابته فيه "نور" في النادي، لما رجع للحجز وطاح ضرب في الطلبة بتوع المظاهرات ! وده تأكيد لفكرة الكبت اللي يااااااااااااه كانت زمان موجودة لما يوسف شاهين كان عنده حالة عايز يشرك الناس بيها !! فاكرينها بتاعت الأول دي ؟؟


أصلا شخصية "سيينديا" شخصية اوفر !! يعني فجة بالعربي يعني !! ومفهمتهاش يعني لا هي ولا ابوها !! اللي بالحرف قاله انها مختلفة وانت زكي وهتعرف تتعود عليها !! هو فيه كده يا عالم !! فيه حد هيقول علي نفسه كده ولا علي بنته كده !! وكمان حشره لجملة " اه معلش اصل عندي اجتماع في لجنة السياسات !!" حشر ملوش اي لازمة !! لأننا مش لازم نعمل كل عناصر الفيلم ليها لازمة !! ببساطة يعني مش لازم يبقي البواب اصله ابنه مسافر العراق بيحارب الأمريكان مع جيوش فتح الإسلام الكردستاني مثلاً !! والعجلاتي كان ابنه من اطفال الشوارع وكان هيبقي ضحية من ضحايا التوربيني لولا انه عفي عنه ولمه من الشارع ووداه مكتبة ماما سوزان واستفاد من مهرجان القراءة للجميع !!! عشان يبقي لمينا العراق وكردستان وامريكا واطفال الشوارع والقراءة للجميع وكأس الأمم وحسن شحاته والحزب الوطني والإخوان والإنتخابات ولجنة السياسات !!! مفيش داعي خالص للحشو يعني !! مش ممبار هو !!


التسابق علي توظيف المبررات والأسباب وتوظيفها بشكل غير مبرر دايماً بيفسد الدراما وبيحولها لسيرك من نوع اللي يحبنا ميضربش نار في فرحنا !! يعني تلاقي نفسك بتنط في اكتر من مكان وقبل ما رجليك تلمس الأرض وتفهم انت فين وبتعمل ايه تلاقي نفسك هوب نطيت في مكان تاني !! الكلام ده بان اوي في المشهد اللي عرفنا فيه ان "نور" منه شلبي خريجة الجامعة مبتعرفش تقرا انجليزي !! ومش فاهم ازاي بس معلش اهي قالت ورمت القضية في وشنا في كسر من الثانية !! لأنها زي ما احنا عارفين مستعجلة زي ما الفيلم كله مستعجل !!

.

بس تعرفوا المشهد ده مضيقنيش خالص... وفكرني بإعلان ميلودي "ده مش ملل خالص!!" ايوة بتاع "عزيزة عزيزة" يمكن عشان منة شلبي ممثلة زي ما قولت باستريح لرؤيتها علي الشاشة واداءها وايقاعها مريح جداً ومفيهوش تكلف وبتعرف تستخدم كل تفاصيل وشها في التعبير عن اذا كان الحزن او الفرح... برضه بدون تكلف !!

.

نرجع تاني للمشهد، وتأكيداً علي فكرة ان المخرج مستعجل عنده فيلم تاني اللي هو "حين ميسرة" واللي لسه عايز يبدأ فيه فمتعطلوناش يا اساتذة لو سمحت !! المبدأ ده اتجسد واتمعظم في المشهد اللي جيه فيه المفتش بتاع الوزارة يناقشها قالتله: "انا عارفه ان كل دي حجج كان لازم اعديها وانا معدتهاش وانا اسفه" وادورت وفتحت الباب ومشيت !! اكن المخرج مديها وقت معين تخلص فيه السطرين !! وبان بعد كده في مشهد وكيل النيابة "اللي مش فاهم ساذج ده ولا ايه" لما خطيبته "الأوفر" تكون واقفة في اشارة وبتشرب حشيش والأمين يسألها وتقوله حشيش !! يروح هو متغندر وقايله انا وكيل نيابة شبرا وخطيبتي معلش بتحب تهزر ويرمي السيجارة في الشارع !!! يا سلاااااااااام !!! ويمشوا ف الأمين يمسك السيجارة ويشتمهم بعد ما يمشوا !! ايه يا عم ده هو فيه كده !!؟


طبعاً معجبنيش المشهد بتاع لجوء "بهية" و"نور" لمكتب الإخوان والمعالجة الساذجة جدا بل والفجة لفكر الإخوان والكام كلمة اللي رماهم الممثل اللي مركب دقن وقال يعني ان هو ده فكر الإخوان !! وده طبعاً مش صحيح لأن بعيداً عن السياسة ... الإخوان يميزهم انهم بيتكلموا مع الناس بطريقة سلسلة قريبة منهم وعندهم حلول لكل شئ !!! علي عكس الأي كلام اللي اتقال في المشهد اللي برضه
حسيت انه مستعجل !! مخدش اكتر من 40 ثانيه علي الشاشة !! اللي هو يلا يا استاذ معنديش وقت عايزين نشوف قضية تانية نحشرها في الفيلم !!


عجبني.. اني فهمت حاجة من فيلم لـيوسف شاهين !! زمان كان حوار افلام يوسف شاهين كان لازم لازم يقع مني فيه حاجة !! لازم كنت ما سمعش فيه كلمة كلمتين 3 جمل مثلاً !! لكن يعدي كله مفهوم ده صعب !! لكن الحوار في الفيلم بشكل عام أفضل ما سمعت في أفلام شاهين، خصوصا الحوار الجميل يرد على لسان الشخصية الرئيسية حاتم.


لكن ارجع برضه في اخر الفيلم واعاني من مشاهد ملهاش اي لازمة !! ومختلقة ومفتعلة وغير واقعية !! زي المشهد اللي قالها فيه "تعالي معايا عشان تاخدي ابو صاحبتك" يعني ايه يعني !! شايله في التلاجة !!؟ ولما كممها قصااااااااااااااد 400 بني ادم علي كورنيش النيل في شم النسيم !! واكن مفيش حد واخد باله !! بس هو فطن لإن الناس هتبتدي تعلي صوتها في السينما لو المشهد ده عدي بالشكل ده فراح مزود مشهد البنت "الساذجة" اللي بتقول "ايه ده بصوا بصوا" وبتشاور عليه وهو بيكممها !! لكن الأمين حاتم الهمام يقولها "مغمي عليها المدام مغمي عليها" فترجع البنت "الساذجة" مرة تانية لنفس انفعالها اللي بدأت بيه المشهد وأكنها ماشفتش حاجة وتكمل ضحك وكلام مع صحابها !!! يا عالم هو فيه كده !!؟ ده كان زمانه اتقطع حتت اصلاً !!! ده ع الكورينش !!!!!!!!


ويكمل المشهد بحشر تاني لمشاهد ملهاش اي لازمة زي محاولة "نور" انها ترمي نفسها في وسط النيل !! و"حاتم" وهو بينقذها وبعد كده يديها فوق دماغها عشان يغتصبها ويجري ويسبها !! واكنه ولا "حاتم" اللي مدوخ مجرمين مصر والكل بيخافوا منه واللي ملوش خير فيه يبقي ملوش خير في مصر !! ومش خايف انه يتفقس وهو سايبها غرقانة في دمها كده !!؟ وتروح راجعة الصورة الرديئة المركبة علي خلفية "حاتم" وهو راكب علي الموتسيكل الميري بتاعه !! وهو لابس ملكي !! اكنه موتسيكل بابا الباشا !! وبرضه خلفية متركبة ليه واحنا ممكن ننزل نصور في الشارع !! ايه المشكلة يعني !! بالإضافة ان المشهد طلع ساذج جداً وفكرني بمايكل جاكسون في اغنية طلعت ليه في أواخر التسعينيات كان راكب فيها ارنب علي موتسيكل بس مش فاكر اسمها !! وحتي لو خالد صالح مبيعرفش يسوق موتسيكلات !! اعتقد ضرورة الدور وانه طالع أمين شرطة يبقي يتعلم سواقة !! مش قصة يعني ... مع اني اشك ان الحكاية كده لأني واثق انه لو كده كان فعلاً اتعلم ... الراجل حالق شعره اقرع بالموس !! فمش هيستخسر درسين علي موتسيكل ... ولكنها تفنينة اخري للمخرجين المجتمعين في هذا الفيلم !!


طبعاً الفيلم مليان مشاهد ساذجة ومضحكة جداً وبجد انا تعبت من الكتابة والفيلم لسه مليان يعني !! بس هاسيبلكم متعة الفرجة والنقطة من اخر مشهد في الفيلم لما الشعب !! فجأة يفتكر انه لازم ينتفض ومعرفش هي دي نبؤة ولا امل من شاهين !؟ ويزحف علي القسم عشان يفتك بـ "حاتم" وطبعاً مش هاتطرق لمأمور القسم الساذج برضه اللي حسسني انه اي عيل ممكن يضحك عليه مش حتة امين شرطة !! ونسيوا انه المفروض مأمور قسم شرطة شبرا !! يعني الجمهورية الصغري داخل جمهورية مصر العربية !!



ومش هاتكلم عن ظابط المباحث ولا عن جملة "ايوة كده يبقي القسم فضي!!" ولا هاتكلم عن مشهد الكنيسة المحشور في الفيلم !! ولا عن مشهد الناس اللي عماله ترقص دماغها وتتمايل ولا عن الشيخ اللي نصح "حاتم" انه يقوم يذكر الله وشاورله علي الناس دول !! واكن ذكر الله في الرقض والتمايل والطرق الصوفية !! ولا هاتكلم عن حاجات كتير اوي في الفيلم من اول صورة "نور" اللي نزلت دم !! لما "حاتم" ضربها بالنار في مشهد مفهمتوش الصراحة !! لحد المشهد الأخير اللي ضرب فيه "حاتم" وكيل النيابة "شريف" واكتفي برصاصة واحدة بدل ما يموته !! ولا كمان عن إنتحاره ولا علي المأمور اللي قاله "انت بتعيط ليه دلوقتي مش انت اللي عملت في نفسك كده!؟" يا سلاااااام وانت كنت عارف وساكت يا حبيبي !!؟ ده بالإشارة الي ان حاتم مكانش بيعيط اصلاً ولا دمع حتي !! طبعاً مع الإشادة بإن خالد صالح ادي المشهد ده ببراعة وفعلاً اقنعنا انه في لحظاته الأخيرة !


الشئ اللي يرجعنا لأول نقطة وهي ان الفيلم لا يعيبه غير صانعيه !!

لكن ممثليه فكانوا اكتر من رائعين !!

36 comments:

  1. الشئ اللي يرجعنا لأول نقطة وهي ان الفيلم لا يعيبه غير صانعيه !!

    لكن ممثليه فكانوا اكتر من رائعين !!

    النتيجة دي فعلا هيه كانت مقولة معظم اللي دخلوا الفيلم و قالوا رأيهم فيه

    ReplyDelete
  2. ana fe3lan awel mara asma3 men 7ad kol el na9d dahhh 3ala felm...!!!
    bass ana chayef en el fel bekol basata beyen2el el wa9e3 el masri....we kol el halss eli beye7sal...fi kol el magalat wel 7ekouma wel game3at...wel mowazafin...ya3ni heya gat 3ala el felm dahhhhhh..........koloo halss fe halsss....3adiha ba2a...felm ta3ban bass el gomhoor mabsout...yeb2a ehh el mochkela...!!!
    we 3ala fekra ya 3ezzoo enta awel wa7ed asma3o bey2ool en felm "heya fawda" we7ech..!!!

    ReplyDelete
  3. 7'osara wa2tak fi film we 7'sara aktar ennak tekteeb 3adad el7roof dah fi elfag 7'aled youseef :D
    ta3keb so3'ayar 3almusic:-
    7'aled youseef byda7'al elmusic 3la tare2eet ( 23lali b7teet kamanga 7azeen hena yabni )...:S
    Over

    ReplyDelete
  4. Ana sha5seyan ma shofet el film, kont 7abbe ashofo o ro7et 3la city stars o kan awal youm 3ard lal film bs konna nfaker inno el 3ard @ 22:30 o ray7een 3l shebak bekul theqa inno neshtri tickets o kan el shi el 3'areeb inno ma kan fe nas kteer, tab3an ra7 wa7ed min el ma3ana yejeeb tickets fa byekteshef inno el 3ard 22:00 mesh 22:30, el mohem 2olna ma fe mshakel bnetfarag 3laih fe 3ard 01:00 am nzelna la t7et lafeena shwai fil mall o b3dain 23dna fe cafe mesh mtzakre sho 2osomha l7d ma sar el w2et 2reeb 01:00 bdna njeeb tickets ma fe tickets ... inno 23deen talat sa3at o nos nestna 3lashan netfarag 3l film heya fwda o bil25er ma fi tickets tayeb leh haik bseer, o ana tab3an tani youm ao b3dha b 4 sa3at msafre :D,

    ReplyDelete
  5. el mohem ma kan fe 5ayarat kteere la aflam ao yemken kan fe bs ana ma kan 3jebni shi leano mhy2a 7ali nfseyan la heye fawda, el mohem b3d modawalat o mofawadat da5lna "fil Beowulf".... ana hadi el naw3eye min el aflam ma ba7ebha, film ma fe shi yenshaf leano kolo ishia mo2refe, ma rakazet kteer feeh leani 23de o mesh tay2a :D

    ReplyDelete
  6. el mohem ya EzZo elli bdi a2olo adeh inta mrakez fil film o fil tfaseel feeh, ya3ni ana o ana atfarag 3l film kteer ishia bto23 menni :D
    bs elli sayer bardo inno fe kteer aflam bekon feha ishia ma elha lazme o bkon 3njad nefsi afham sho 3laqet haik 7dath ao mawqef ao mshhad ao ay shi bilmawdo3 bekon bs decor tab3an o e7na el motfaregeen mafrod nestamta3 o e7na 3m netfarag o inno ahh wow sho 7elo :S, ao inno film byebda o bye5las o bekon nefsak tefham sho el mawdo3 ao sho el no2ta eli mafrod ywsalo la elha feeh!!!!
    ma 7da fahem leh haik o sho fe o sho el 2oussa ....

    anyways a5er shi bdi a2olo inno m3 kul el comments elli 3ndak la heya fawda i guess inno akeed kteer a7la min ma tkon 23ed 3m tetfarag 3la "Beowulf" o3'air haik sa3a 01:00 am kman :D

    ReplyDelete
  7. el mohem ya EzZo elli bdi a2olo adeh inta mrakez fil film o fil tfaseel feeh, ya3ni ana o ana atfarag 3l film kteer ishia bto23 menni :D
    bs elli sayer bardo inno fe kteer aflam bekon feha ishia ma elha lazme o bkon 3njad nefsi afham sho 3laqet haik 7dath ao mawqef ao mshhad ao ay shi bilmawdo3 bekon bs decor tab3an o e7na el motfaregeen mafrod nestamta3 o e7na 3m netfarag o inno ahh wow sho 7elo :S, ao inno film byebda o bye5las o bekon nefsak tefham sho el mawdo3 ao sho el no2ta eli mafrod ywsalo la elha feeh!!!!
    ma 7da fahem leh haik o sho fe o sho el 2oussa ....

    anyways a5er shi bdi a2olo inno m3 kul el comments elli 3ndak la heya fawda i guess inno akeed kteer a7la min ma tkon 23ed 3m tetfarag 3la "Beowulf" o3'air haik sa3a 01:00 am kman :D

    ReplyDelete
  8. 3arf ya 3zz en el film kan el momslyn fyh f3ln to7fa + en el kesa mish we7sha howa kan 3yz ywsal try2t t3mol aw sysa 3mtan bas fe kest amyn shorta y3ny in indirect way , bas el fekra f3ln fe mshhd ktyr kant mish lyha lzma y3ny somya el r2sa wely kant bt3mlo eih lazmt dah makhlas 3rfna en feh nas zeft mish lazm el tafsyl y3ny , we shryf ely sab khtybto we fe 2a2l men kam yoom kan by7b marym ......
    bos ana 3gabany el fekra bt3t el film awyyyy bas kan momken tetwzf a7sn men keda bktyr

    ReplyDelete
  9. i couldn't read to the end: too long!
    next time do it on episodes... i'm serious

    ReplyDelete
  10. shoran ya ezz basha 3ala al mawdo3 al gamed da wa howa al kalam al fo2 da fa3lan feh kater awe sa7 mesh 3arf 7ad 7'ad balo wala la2 an feh mashahed ba3nha kada wa 7arkat kamera bayna gadan anhya yussef shahin wa homa aslan talat arba3 mashed fe al film kolo ta7s an al film wa7ed 3amlo kolo wa 7ad tane gah alo tab sable al mashed de 3amal 7aga tanya 7'ales wa mashe :D wa fa3lan al moseka fe al daya3 mafesh aslan wa al croma al anta batkalam 3alaha mawgoda fe 7en maysra nafs al manzr bardo :D ma3fna bs kafya kada 3ashan bat3ab :D

    ReplyDelete
  11. just perfect ya EZZ edafa haila lbiet el3ez

    ReplyDelete
  12. الهي يعلي مركبك يا عز يا ابن أم عز وينصرك علي مين يعاديك ، ويخليهم لك يا قادر يا كريم

    دا فيلم كرتون أصلا يا عز يا أخويا . .كلهم كرتون (المناضله العظيمه /هاله صدقي ) اتقابلنا في مظاهره و حبينا بعض في مظاهره واتجوزنا في مظاهره . . . . . . .
    و الشرير الشر المطلق / خالد صالح (مع انه الحاجه العدله الوحيده ف الفيلم)
    وكيل النيابه طبعا أساسي

    ReplyDelete
  13. المزه بتاعت وكيل النيابه ف أول الفيلم اللي مفهمتهاش خالص ولا هيا ولا أبوها ولا عمرو عبد الجليل ولا ماهر عواد هوا وقصة اللوحه العجيبه دي (كلها شخصيات كارتون معندهمش غير صفه واحده)
    المهم بقي مينفعش واحنا بنتكلم عن الفيلم ننسي نقول للناس ان الفيلم دا أصلا مش بطولة خالد صالح ولا حاجه

    ReplyDelete
  14. أقولكوا بقي بطولة مين . . . .بطولة (يفط حمدين صباحي ) اللي ظهرت في كادرات كتير أكتر من كادرات هاله فاخر مثلا . . .آه والنعمه ، ومفهمتش ايه العلاقه
    اللي غاظني جدا ان الفيلم عامل ايرادات وهميه ، هوا تقريبا أعلي ايرادات لأفلام يوسف شاهين علي الإطلاق ؟!!!!!!!!!!!!!! الله يرحم فيلم العصفور وبهيه اللي بجد، ناس كتير أوي عجبها الفيلم لدرجة اني بدأت أشك ف نفسي، ربنا يخليك يا عز ، صحيح يا ولاد مصر بخير

    ReplyDelete
  15. بس بجد يا عز لازم تخش (حين ميسره) الفيلم دا محصلش

    ReplyDelete
  16. makontsh 3arfa enak naked gamed keda ya ezz afandi
    am not as good at criticizing movies as you or most of the others who commented are coz i did like the movie ... however i really like ur review and i agree on "el mashahed el metrakeba" which is sumthin that really bothered me when i was watching the movie but didn remember it untill u brought it up and also about Menna Shalaby .. she was amazing

    ReplyDelete
  17. سواء هي فوضى أو حين ميسرة
    هذا هو النهج الجديد للناصرجية الجدد
    فشخ الطبقات الفقيرة واعتبارهم بهايم ما ينفعش غير انهم يتسحبوا من رقابيهم زي الجمايس بسلبة أو حبل من قبل المثقفين المتنورين بتوع الطبقة الوسطى وبالذات الناصرجية
    وهذه هي دعوة خالد صالح وهويدا طه ومن شابههم

    ReplyDelete
  18. أما مشهد سيجارة الحشيش
    المصيبة انه ما كانش امين
    ده كان على كتفه نسر !!!
    شوف المشهد تاني !

    ReplyDelete
  19. وانا اعرف ان الفيلم متمول من جهات فرنسية
    طب هي الجهات الفرنسية دي ايه علاقة حمدين صباحي بيها؟؟؟
    هي فرنسا بقت بتؤيد التيار الناصري في مصر؟
    وليه الفيلم كل حارة وشارع ومبنى فيها متعلق عليه يافطة حمرا لحمدين صباحي
    مع ان دي شبرا
    مش البرلس !!!
    هالة صدقي فعلا يا اسماء طلعت في مشاهد تتعد عل ىصوابع الايد الواحدة
    حتى صورة عبد الناصر طلعت مرة واحدة
    انما يفط حمدين صباحي بالزوفة !!!
    هو فعلا ممبار !!!

    ReplyDelete
  20. to Sherihan Tohamy (Kuwait):

    هو فعلاً احلي حاجة في الفيلم ممثليه !!!

    to Mamdouh Osama (Tunisia):

    ya prince la2 !!! el film saie2 w wakhed akbar mn 7agmo wel nas taybeen w far7aneen beeh !! w hwa crap aslan :D w ana m3adeha aked m3amltsh ma7dar le sanee3y el film w lawenohom yestahloo walahhy :D

    to Karim El-shenawy:

    ya man ana masme3tsh kalamak w 2olt kol wa7d w zo2o w eny lazem agarab!!! ya raitny kont sme3t :D

    to Manar IDRIS :

    hwa tab3an ya MaNoO ana sorry lel experience bta3tekk with the movie w enek ma3reftesh tdkholeeh !! bs e3tabery nafsekk ma7zoza :D bardo " Beowulf " a3atked ahwann mn ely ana shoftoo :d

    to Heba Ali Youssef :

    Hoba msh hatkalem 3n el ra2s wla el mashahed elly kan feha mat w lat w 3agn w eno makansh leh lazma aslan bs eshta ya3ni :D w fe mas2aleet fekret el film b2a ana msh shaief en feh ay fekra aktr mn eno baein el ta3zeeb ely fel sgoon wel 7agzaa !! lakn fekret eh !! da 7ashwooo wa7d moda3y fekrr

    ReplyDelete
  21. to Amin Zayani :

    ma3lesh ya Aminos! ana raghaie shwaia w kont shaeil mn el film :D u do the episodes thing ;)

    to Marouan Omara:

    aked ya man enta kont btet2aleemm mn mashahed el film wely bei7sall w shokran leek la2eny 2a3adt afteker esm el khed3a el se7eria ely kant btet3emel el "croma" :D 7aga tokhno2 ya 3am ... hwa lsa feh kda !!

    to Angel..Aj Adam :
    ew3a tedkhol el film ya rayes :D

    to Asmaa Aly :

    والله كنت طول الفيلم بافتكرك !!! وباقول ما البنت كانت بتقول اوعوا تدخلووووووووه دخلتوا ليه انا !!!؟ بس فعلاً انا نسيت اتكلم عن مشاهد اليفت !!! اللي بانت حوالي 340 مرة !! واللي المشهد اظن كان بيتبني عليها !! يعني بيوقفوا اليوفت وبعد كده الممثلينن !!!! وكل شوية اقول يا عم اشفينا ياعمي ارحمنا مش كده !!!

    وطبعاً مشهد المظاهرة بتاع حبينا بعض في مظاهرة واتجوزنا بعض في مظاهرة ده مفهمتوش يعني !!! ومخليين يوسف الشريف هو اللي يعمل ابوه في مشهد ساذج يعني مع ان الصورة بتاعت الراجل مش شبهه علي الإطلاق !! وده طبعاً تأكيدا للفكرة الأفلاطونية اللي كانوا عايزين يرموها في دماغنا !!! ودموعها مصدقتهااااااش خالص !!! وللأسف الناس طيبة !! الناس ماشية بتهلل يا جدعااااااااااااااااان

    to Marwa El Masry:

    ya gamel wla naked wla 7aga :D ana bs kont shaeil w m3abyyy w kont hoping eno ykon film 7lew !!! mn ely sme3to ya3ni !! w bgd bgd bgd 3agabteny enek m3aya fe 7ekait menna shalaby!! ana 2olt el nas haifhamony ghalat !! bs bgd ana banbeset lama bashofha .. eslobha hady w gamel w sabt w mn gher fazlaka w de aktr 7aga ba7ebaha feha :))) ... 3ayzen nro7 "حين ميسرة" ya wad el nas ahy bt2ol 3aleeh 7elw!! hakalemek w neratebb.

    Wael A.:

    يا ريس للأسف الشديد انا ماخدتش بالي اوي من مشهد الإشارة بتاع سيجارة الحشيش !!! لسه مكنتش واخد خوانة ان الفيلم كله حفر !! اللي مجنني هنا مش الأمين !! لأ وكيل النيابة اللي المفروض هو امل مصر وان هو محارب الظلام واللي مفيش حد قادر عليه والطيب الهمام !!! اللي امل الغلابة كلهم مرمي عليه !! البرنس لما حب يهرب يعني اتحمي في اللقب بتاعه وكمان رمي السيجارة في الأرض !! يعني متآمر واهبل !! المشهد ده انا والله العظيم كنت باخبط كف علي كف والسينما اتفرجت عليا !!! لأ مش معقول سذاجة في المعالجة ولا آملين اوي في سذاجة الناس يعني !!

    وفكرة اليوفت زي ما قالت اسماء !! كانت مبالغ اوي فيها دانا حتي شكيت قولت يمكن كان ماتش للأهلي ولا حاجة !!! الفكرة بقي في مسألة الناصرجية ان المعالجة تحسسك انهم معتقدين ان الناس ساذجة !! ... انا مش عارف بس توجه الفيلم الفكري كان باين اوي يعني ... واتمعظم اوي في مناقشة فكر الإخوان !! والكام كلمة اللي رماهم مرشح الوطني اللي في الأول ده ابو نظارة !!!! اللي قاله للناظرة "خلي بالك احنا كتير اوي" و "انت عندك ابن وكيل نيابة لو بتحبيه متخليهوش زيك" ولا مش فاكر قالها ايه ساذج كده !!! هو فيه كده يا عالم !!؟؟ سيناريو بتنجان من الآخر

    ReplyDelete
  22. أنا مدخلتش الفيلم بس وارد جدا يكون الفيلم رديء مش عشان مخرج كبير يبقى كل اللى بيعملو يبقى رائع .. وكونك شكرت في التمثيل ده في حد ذاته ممتاز لانه بيضيف القيمه للفيلم ، وأعتقد نقدك ده نتيجه لأن اللى حط سيناريو الفيلم هادف لإظهار السلبيه حتى ولو بسذاجه ..
    تحياتي لك ..

    ReplyDelete
  23. تحياتى الى محمد عز الدين ..ايه الجمال ده يامعلم أخيرا لقيت حد شايف ان خالد يوسف مالهوش فى البطيخ

    ربنا يخليك للغلابة باابن عز

    ReplyDelete
  24. عمنا عز ... تسمحلي أدردش معاك شوية؟

    بص يا سيدي أولا ... مش عارف إنت عارف ولا لأ بس أنا حلمي أني عايز أطلع مخرج ... أو طموحي يعني اللي بشتغله من زمان ... لإدورت كتير و بحثت كتير عن
    What makes a great director

    عارف في الآخر و بعد أم سمعت أكبر أساتذة العالم في هذا الفن من سبيلبرج لزويك لسكورسيزي لمايكل باي لنريتوفر نولان و أخيرا برايان سينجر و برايان دي بالما

    إن قصة الإخراج ليس في الزوايا و لا في التمثيل و لا المزيكا

    قصة الإخراج في
    Story telling

    أو فن قص القصة و ترتيب الرواية و إنتقاء الكلمات و الأحاسيس و فهمها و تحليلها ثم وضعها في سياق متصل و تتجلى براعة صانعية في اتصال السياق بالواقع في أي نقطة منه حتى و لو كان خيال علمي

    فمثلا ... من سبيلبرج و
    War of the worlds
    تنسى كل الحوارات اللي حصلت و تقف مذهولا أما حالة الفوضى الناتجة عن التدمير ... و الأدهى حالة الفوضى التي انتابت الناس أنفسهم و الشعور بالهزيمة و العجز أمام قوى لا ترحم و انهم ما لبثوا أن وجدوا سلاح إلا وقاموا بتوجيهه في وجه بعضهم البعض

    أنا اخترت هذا الفيلم بالذات و أتمنى أنك تكون قد رأيته لأستدل عن الفرق بين الفوضى كفكرة و عرضها بطريقة منظمة كعرض له بداية و وسط و نهاية و مغزى أو معنى

    ورغم أن الرجل كان يتكلم عن مخلوقات فضائية و تدمير و أكشن و مادونه إلا أنه في أي لحظة لم ينسى أن هدفه في النهاية عرض الفوضى الناتجة عن ذلك و هو سبب صنعه للفيلم في المقام الأول

    وكمان كا ليه نظرية مقنعة في كيفية تطور الأحداث و ما ستؤول إليه في النهاية
    كل هذا دون أن يتكلم عن الفوضى بأي كلمة أو حوار بالفيلم و لم يجعل عنوان فيلمه هي فوضى كما يصنع المتخلفون عندنا

    في النهاية تكلمت عن المونتاج وهو أيضا مفهومه خاطئ تماما عندنا وهو في كل العالم يدور حول شيء واحد

    Character Development

    أو تطور الشخصيات سواء في زمن القصة أو في زمن الفيلم و كيفية احساسك بالزمن في نفس الوقت فمثلا تتذكر في
    Seven

    الفيلم يدور في إسبوع مع سرد لأحداث كل يوم على حدة أتحداك أن يكون إحساسك بأي من الأيام السبعة في الفيلم أطول من الأيام الباقية رغم إختلاف وقتهم فعلا على الشاشة و لهذا كان من أعظم عشر سيناريوهات كتبت في تاريخ السينما

    أما الموسيقى و قد ذكرت

    troy and braveheart

    شوف إئاي علموا معاك ... طيب هل تعلم إنهم لنفس المؤلف؟

    شوفت عندهم الفنان ليه إستايل واحد مع إختلاف مذاقات إلحانه أو إنتاجه الفني

    لأنه يستخدم نفس العملية الإبداعية لإنتاج فن مختلف كل مرة و لكنه تشعر أنه أخو الفن الذي قبله و ابن عم الذي يليه أي أنهم من شجرة واحدة و هو اسمه
    James Horner

    في النهاية ... المشكلة ليست في يوسف شاهين مع تحفظي الشديد في رأيك فيه و في أعماله ... فهو من أتفه المتفلسفين حقيقة و سطحي للغاية و أعماله لا تعبر عن واقعها الذي استقاها منه و هو في كل العبر كمخرج

    ولا المشكلة في خالد يوسف الذي أصبح كبيرا نظرا فقط للمدعرة اللي فاتحها في أفلامه

    المشكلة في الجمهور

    لأن هي فوضى صار أنجح أفلام يوسف شاهين جميعها تخيل على مدى عيوبه الفنية البحتة؟

    و أيضا حين مسخرة بتاع خالد يوسف

    زمن أنصاف الموهوبين صحيح

    المهم أنا طولت عليك يا عز و مش عايزك تكون زعلان ... عايز تتبسط روح خش

    Beowulf

    هيعجبك أوي مع انه أنيميشن

    و ابقى سلملي عالمزيكا يا عز
    سلام

    ReplyDelete
  25. انا مقتنعة جدا ومعاك فى كلمة قلتها ونفس رؤيتى تقريبا ..


    بس ممكن تفهمنى وجهه نظرك بشكل اوضح فى خالد يوسف ؟؟ وفى ان يوسف شاهين -كان- مبدع؟؟كان؟؟

    بس المرة دى ياريت ترد عليا انا عارفة انك بيزى اكيد .. بس معلش



    هابى نيو يير


    :)

    ReplyDelete
  26. بصراحة يا عز أنا مادخلتش الفيلم
    بس بعد البوست ده كأنى دخلته بالظبط تحليل ممتاز
    شكرا على البوست

    ReplyDelete
  27. هو بغض لنظر عن الاخطاء او الحاجات اللي موجوده في الفيلم معجبتنيش .. ومعظمها الحقيقه فنيه بحته




    المشهد اللي كنت بتكلم عليه وانه مش منطقي دا اللي كمم في البنت في عز الضهر من اهم المشاهد اللي في الفيلم



    عايزه اقول لك ان في حاجه غريبه بتحصل عندنا دلوقت


    حاله اللا مبالاه عند الناس
    اكيد مش كلهم


    بس تعرف ان فيه واحده تم التحرش بيها في المترو ولما استغاثت بالناس وابتدت تتخانق مع المتحرش قالولها وانتي راكبه عربيه الرجاله ليه

    تعرف ان في ناس فعلا بتفكر كده



    عامه لو الفيلم معجبكبش بلاش تدخل حين ميسره لانك هتتفاجا بكم كبير من الحاجات اللي ضايقتك في هي فوضي
    من حشر لعدد كبير من الافكار .. لسقطات فنيه برضه .. لكن دا ميمنعش انه من افضل افلام خالد يوسف ويتحسب له

    ReplyDelete
  28. خلود صلاح :

    شكراً ليكي انك بتردي علي البوست
    ومعلش لو رديت متأخر عليكي

    انا باحب خالد يوسف كمخرج ... مشروع كويس
    بس فكره منيل بنيله !!! طريقته في الواقعية
    ممكن تخلينا علي رأي صديقة ليا وهي مديرة موقع في الفن دوت كوم، قالت لخالد يوسف انا خايفه من واقعيتك اني اشوف في يوم ستات عريانة بجد !!! بس طبعاً مش كل ده هو اللي مضايقني منه... اللي مضايقني منه في هي فوضي بالذات انه كروت اوي افكار كتير مدهاش حقها في النقاش ... وطبعا ده عشان مش شغله لوحده ومعاه يوسف شاهين .. المركب اللي ليها ريسيين بتغرق

    اما يوسف شاهين فهو يوسف شاهين من زمان وهو ملغبط الناس ومش مفهمهم حاجة!! بس هو فنان ... رأيي انه مكانش المفروض يتحط اسمه وكان اعتذر عن الفيلم ده لأنه فعلاً مريض ومش قادر علي حكاية الإخراج ومش مركز دلوقتي اللهم اشفي مرضانا، فكان سابوا للولد او لغاه خالص.

    لكن ان الفيلم يخرج مشوه كده !! علي حد رأيي يعني، ده اللي مكنتش احبه

    بس يا ستي :)

    ReplyDelete
  29. Mayoya :

    لا ادخلي الفيلم !! اتا مش باحب اخد برأي حد في الأفلام
    لأن دي تجربه شخصية ... ممكن الفيلم يعجبك
    ومتشوفيش اللي انا شوفته ده كله فيه
    عادي يا فندم دي اذواق

    احتمال انا اللي شايل من الناس :D

    ReplyDelete
  30. The Last Samurai :

    شكرا طبعا علي الدردشة دي

    عجبتني وجهة نظرك طبعاً
    واه انا كنت اعرف ان هما نفس المؤلف لموسيقي الفيلمين
    ودي من الحاجات اللي خلتني احب الموسيقي بتاعت الفيلمين اكتر

    مش عايزك تفتكر انك طولت عليا والله استمتعت بالتعليق

    اما بخصوص فيلم
    Beowulf

    فناس كتير قالولي انه حلو
    بس مش عارف !! مش باحب افلام الأنيميشن
    اللي من النوع ده
    مش كلها طبعا بس انا شوفت اجزاء من الفيلم
    مشجعتنيش

    بس لو فيه فيلم تاني دخلته اكتب عنه ونتناقش تاني يا ريس
    وهاسلملك علي المزيكا ... حاضر من عينيا
    سلام

    ReplyDelete
  31. اولا احييك على المدونة الرائعة دى
    ثانيا انا معاك فى كل كلمة انتا قلتها فى الموضوع
    وفعلا
    بلدنا بقت فوضى وهى فوضى
    كل حاجة فوضى
    بس مش معنى كدة ان احنا نفضل نطلع فى العيوب
    عاوزين حد يغير
    بس امتى
    وهنفضل دائما نقول
    لحد امتى
    بس
    لازم يكون عندنا أمل فى بكرا
    واكيد بكرا قرب

    ReplyDelete
  32. طبعا يوسف شاهين مشكلتة الوحيدة الواقعية
    فنلاقى الناس فهمت المشهد الاخير من الارض غلط
    و المشهد الاخير من العصفور
    و كمان الناس مفهمتش الاستعراض اللى فى اسكندرية لية
    و دة اللى خلى شاهين ينتج فيلم السقا مات و ميخرجوش لكن اخرجة صلاح ابو سيف الله يرحمة
    و طبعا افلام شاهين كلها ممتازة عدا سكوت حنصور و الاخر و اسكندرية نيورك
    لأن لمسات خالد يوسف كانوا واضحين
    و كأن يوسف شاهين مش كاتب ديكوباج للفيلم و لا اى حاجة
    لكن هى فوضى لو كان شاهين اخرجة من غير خالد كان بقى احسن من كدة
    و لا لو كان اخرجة يسرى نصرالله او داوود عبد السيد او خيرى بشارة كان الفيلم بقى معجزة
    من الاخر خالد يوسف بقولة حسبى الله و نعمة الوكيل
    سلام
    تبقى زور مدونتى كنت كاتب فيها موضوع عن الفيلم

    ReplyDelete
  33. اكيد مكونتش اقصد افرض رايي

    ReplyDelete
  34. السلام عليكم ورحمة الله
    انااول مره ازور فيها مدونتك يا عز وده فعلا لسوء حظى لانها بجد مدونه جميله جدااااااااااااااااا
    انا عرفتها من واحده صديقتى ودى فرصه كويسه جدا علشان كان نفسى من زمان اكون مشتركه فى مدونه جميله ومفيده زى دى
    انا اسمى ساره فى كلية الالسن سنه تالته
    وانشاء الله هتابع المدونه وارسل تعليقى على طول
    اتمنى جداااااااااا يا عز انى اكون صديقه ليك ولكل المشتركين فى المدونه
    ارجو ان ترد عليا وتقولى اذا ممكن تقبل صداقتى او لأ
    اما بالنسبه لفيلم هى فوضى فهو فعلا زى ما قلت فوضى
    حسيت انى مجنونه وانا بتفرج عليه شويه اضحك على الهبل فى كل حاجه فى الفيلم وشويه اعيط على مشاهد منه شلبى
    وشكررررررررررررررررررا
    ساره

    ReplyDelete
  35. يا استاذ عز فينك ليه مش بترد عليا دى اول مره ليا فى المدونه انا مش عارفه عنك حاجه خالص دراستك,اهتماماتك,كده يعنى لو ممكن تقولى تكون شااااااااااااااااااااااااااااكرا

    ReplyDelete
  36. يا سارة بلاش بس استاذ دي
    انا مش بحبها خاااااااااالص
    مشيها محمد أو عز الأسهل

    انا رديت عليكي في البوست التاني
    بتاع تغير كل ما فينا
    وكتبتلك الإيميل

    تحياتي ومنورة المدونة

    :)

    ReplyDelete