كل عام وانتِ بخير
علي طول الحياة نقابل ناس ونعرف ناس
ونرتاح ويا ناس عن ناس ويدور الزمن
ويتغير لون ليالينا ونتوه بين الزمن والناس
ويمكن ننسي كل الناس
ولا ننسي اعز الناس
معكيش فكة يا جينا ؟ هاتي اتنين جنيه...
ايه ده !! الله بص مكتوب ايه علي الجنيه !!
مسكت الجنيه اللي صورته فوق دي وقريت المكتوب وسيبته علي جنب وقعدت اتغدي انا وجينا واندمجنا في الكلام ومكنتش لسه فكرت في الكلام اللي مكتوب اوي بس حبيت اني اخده واحتفظ بيه.. اهو واحد ماعرفوش كاتب لوحدة ماعرفهاش بس ميمنعش اني احتفظ بيه ذكري!
وصلت جينا.. وأنا في طريقي للبيت طلعت الجنيه وبصيت فيه وقريته تاني لاقيت انه صعب اوي انه وصل لإيدي من شنطة جينا !!! إزاي اصلاً اللي خدت الجنيه ده سابته يوصل لناس تانية... للدرجة دي اللي ادالها الجنيه ده ميعنيش حاجة !! للدرجة دي حتي الذكري مخلتهاش تحتفظ بيه !! ولا إيه اللي حصل خلاها تسيب الجنيه ده وتشتري بيه عيش ولا مكرونة !! بيني وبين نفسي وانا ماشي في طريقي حبيت اني اعاقب اللي كتب الكلام ده !! مع اني مش باروح من التحرير في إتوبيس عادةً وغالباً بأزهق وبابقي عايز اروح بسرعة لكن المرة دي قولت لأ !!! هاركب اتوبيس بجنيه !! وهادفع الجنيه ده !! وهأحتفظ بالتذكرة !!
مريم لسه بتقولي دلوقتي إن الكلام ده أغنية لعبد الحليم حافظ وإن جملة من الأغنية بتقول "ومين ينسى ومين يقدر فى يوم ينسى" حسيت انه بجد مكانش يستاهل اني احتفظله بالذكري بتاعته - علي إعتبار ان احتفاظي بالجنيه احتفاظ بالذكري وهي طبعاً فكرة إعتبارية مش حقيقة - بس بجد كان لازم اعاقبه علي اللي عمله.. إنه ساب ذكري ليه مع حد ما يستاهلش !
عندك حق والله بعد ما يقعد يعملها عبد الحليم ويعمل فيها روميو واكيد سبل بقة وكدة ويكتبلها اعز الناس ... تقوم تبيعة على اول محطة كدة .. لالالا مش اخلاق دية خالص يعنى ..
ReplyDeleteللمرة الالف يا عز بتقلب عليا المواجع وبتجرجرنى لمنطقة الواحد بيتلاشى يفكر فيها اعز الناس من اكتر اغانى عبد الحليم اللى ممكن تشدنى .. اول ما سالتنى على الكلام شغلت الاغنية وفضلت افتكر فى اللذى سيمضى (اصلة لسة ممضاش قرب يمضى )وبعدين قعدت افكر افكر افكر افكر
وبعدين ايقنت انى بفكر فى .... حد ميستاهلش
مش سهل انك تفرط في حاجة زي دي بسهولة لو كان الانسان ده عزيز عليك او حتى لمجرد الذكرى
ReplyDeleteانا شخصيا بحتفظ بحاجات صغيرة بتفكرني بذكرى معينة حاجات ممكن لو شفتها تحس ان ملهاش قيمة
بس بالنسبة لي صعب انساها
تخيل ممكن تكون ورقة او غطا قلم جاف بجد حاجات غريبة بس
يمكن كانت مستعجلة ولا حاجة واتزنقت فيهم
بس ليه نفترض انها بنت يمكن ولد برده :))
الا هي مين جينا دي يا عز ههههههه ...
ReplyDeleteموضوعك جميل وفعلا انا عندي رباع ونصاص وجنيهات من مدرسين وقرايب كاتبنلي عليها كلمات للذكرى بجد متتنسيش
ويمكن انت ظلمت الراجل ده والحقيقه انه كاتب الكلام ده لاي حد واللي تقع في ايده وخلاص
عموما فعلا اللي يضيع حاجه زي دي
حد ميستاهلش
JanKiez
احلى حاجة يا عز الاحتفاظ بالذكرى , انا الحمد لله فيه فلوس وممكن قطع ورق صغيرة مكتوب عليها اى كلام من اى واحد صاحبي .
ReplyDeleteانا اعرف يا عز اتنين صحاب جدا الاول ادى التانى ربع جنيه عليه ذكرى وتهنئة بعيد ميلاد التانى وللاسف التانى صرف الربع جنيه ووقع فى ايدى بالصدفة وشكيت انه يخصهم ورجعته لصاحبه الاول وزعل جدا لان التانى محافظش على الذكرى .
فحسناً فعلت يا عز لما صرفت الجنيه ده لأن صاحبه مقدرش معناه .
يا جماعة ماتنسوش ان الذكرى تكتسب قيمتها من المشاعر اللى بين الطرفين يعنى جايز حاجة حصلت خلت الجنيه ده اصبح بيفكره(ا) بذكرى تؤلمه(ا) او اللى اخد الجنيه ارتبط بحد تانى و تخيلوا لو الحد التانى ظبط الجنيه ده طبعا دى حالة تلبس واضحة والكارثة لو كانت ايده(ا) تقيله شوية آى .. آى!! وفيه احتمال تانى وان كان ضعيف ان اللى خد(ت) الجنيه وصل بيه الحال انه دخل منطقة الخبز قبل الحب أحيانا مانتو عافين الظروف وصلت الناس انها تبيع ولادها !!!!!!!!!! آه والله
ReplyDeleteهو حد مايستهلش طبعا اللى يضيع ذكرى حتى لو كانت مش ظريفه لانها فى الاول وفى الاخر ذكرى فى حياته يعنى جزء منه
ReplyDeleteبس اللى مايستاهلوش وبيضيعوه الذكرى كتيييييييييييييييييييييير اوى الناس بتضيع ناس مش زكريات
وبعدين ليه نظلم مش جايز اللى كتب الجنيه ده عمل عمله سودا خلى الطرف التانى يقول اجيب بيه عيش ولا مكرونه ولا حتى لب افيد من انى احنفظ بحاجه ليه؟
CrazyRama :
ReplyDelete-------------------
للمرة الألف يا مريم خلاص انا هاجهز باسبوري وهاسيبلك البلد
يقلبولك هما المواجع بقي عشان انا احبطت
:D
ريما :
ReplyDelete-----------
لا يا ريم لو تاخدي بالك هو كاتب إنتِ بكسر التاء
هو ولد كاتب لبنت و واضحة جداً
أخ منكم انتم يا مفتريين !!
JanKiez :
ReplyDelete-----------------
شوف يا اخيييييييييي الواد
الناس كلها داخله تعلق علي الجنيه وده داخل يسأل علي جينا
بس !! بس يا ولد
جينا دي صديقتي الصدوقة المتصدقة
جورجينا يا سيد عمرو من اعز اصدقائي
إذا لم تكن الأعز
اه صحيح ورفيقة السلاح
:) تحياتي يا جيني لو هتقري البوست
3araby :
ReplyDelete--------------
والله اهو اللي انت حكيته ده يا عربي مثااااااااااااال للي انا باقوله
هي مش مسألة كبيرة عند ناس علي فكرة
فيه ناس ولا بتيجي في دماغهم أصلاً
عادي هي الحياة كده يا ريس
مجهول أو مجهولة :
ReplyDelete------------------------
هو الكلام الي حد كبير صحيح
بس برضه مش كده انا شايل حاجات لناس انا مش هاشوفهم تاني
بس انا كنت جزء من الشئ ده
يبقي مارميش الحاجة كده
مفيش مكرونة تستاهل ان حد يدوس علي ذكري انسان كده
الإ برضه اذا كان حد ما يستاهلش
rere hanem el 3a2la :
ReplyDelete--------------------------------
nicely said ya fandem
كا العاده يا عز عين الفنان غير عنينا احنا البشر
ReplyDeleteو با المناسبه السعيده ديه انا عايزه الجنيه بتاعي
:D
Gina Thabet:
ReplyDelete----------------
يا سلام يا جيني عينيا !!
بس معلش بقي علي خفية الإيدين
عشان تبقي تحرصي علي حاجتك بعد كده
علي فكرة انا حلقت دقني يا جينا تاني
مشاكل تاني مع الوالد
:s
انت هتشوفي بنفسك يوم الخميس ويا ريت متقريش الرد ده دلوقتي عشان تتصدمي مرة واحدة
السيد الفاضل المعظم المبجل رابط الرابطة وحامي الحما
ReplyDeleteالسيد عزعوز
تحية طيبة وبعد
أنا عندي تعليق على الميل بتاعك أبوجنية ده هو مش شرط إن الولد يكون إداها الجنية هو احتمال قائم طبعا بس ممكن برضه يكون هو كتب عليه الكلام ده وصرفه يعني
يمكن عايزه يلف والناس تقراه وتوصلها الرسالة دي وميكونش إداه لواحده ولا حاجه
حاجه تانية
ليه افترضت إن اللي كاتب ولد مش بنت
يمكن تكون بنت هي اللي كتباه وإديته لولد وهو اللي هانت عليها لعشرة والذكرى أو برضه بنت كتبته وكانت تقصد إنها تصرفه عشان يلف والناس تقراه وتعرف الرسالة دي
بلاش التحيز واضطهاد المرأة ده يا جدعان
حتزعل مننا كده إنت سوزان مبارك والمجلس القومي للمرأة
المهم بأة سيبك من كل ده وقولي
مين جينا ومين مريم دول ياعم
ماشي ياعم
ربنا يسهلك
بس بقولك إيه
ركز على جينا حبتين
قول يا عزعوز قول
ولا يهمك
سرك في أوله بلاش بير
أنا مستني هه
Ahmed Sayed :
ReplyDelete-----------------
أهلاً يا برنس
السلام عليكم ورحمة الله وبركاته
اولاً فكرتك عن انه مجرد حركات عشان الجنيه يلف ممكنه مع انها بعيدة
ثانياً الأخ اللي كاتب علي الجنية حل الموضوع وريحنا وكتب كل عام وإنتِ بخير بكسر التاء الصورة اللي انا مصورها كبيرة وباينة الكسرة اكتر
ثالثاً بقي والأهم واللي خلت الأخ رجب يشحن مخصوص عشان يكلمني ويسألني
جينا.. يا سيد أحمد هي جورجينا صديقتي العزيزة إن لم تكن من الأعز علي قلبي
ومن الناس القليلين اللي طلعت بيهم من الدنيا وكنا بنتغدي مع بعض عشان بقالنا كتير ماشوفناش بعض
أما مريم يا ريس فهي صديقة من اصدقائي المدونيين اللطاف بنت بتفهم صاحبة رأي جميل ومشاغبة وكفاية وكده يعني
وأخوك ملوش في الأغاني فسألتها هي دي كلمات اغنية ؟ قالتلي اه أغلي الناس لعبد الحليم قولتلها وكمان اغلي الناس ده نهاره ابيض معايا
الهدف من البوست ده اني اعاقب اي حد زي ما قولت ضيع مع حد ما يستاهلش ذكري أو حتي لحظة من عمره .. بس كده
وعلي فكرة جينا بتطالبني بالجنيه دلوقتي ..!!! بعد ما اتشهر
شكرا يا أبو حميد علي الإهتمام والتعليق وحشني الخناق معاكم
حد يجر شكلي لو سمحتوا
انا مش زعلانه على الزكري انا زعلانه على البلد الي معدش للانسان و مشاعره فيها قيمه كل حاجه بقت بتتصرف و تهون للقمه العيش يمهل و لا يهمل و زكري الله يرحمها بقا
ReplyDeleteلفت نظرنا لحاجه عدت علينا كلنا كلنا عدا علينه فلوس مكتوب عليها حب و قصايد و ايام جميله
و كلنا صرفنا الفلوس
عشان احنا مالنا نشيل ايام حلوه بتاعت ناس ليه اكيد اتصرفت لما ما عدش ليها قيمه
تحياتشي
والله يا عز باشا طول عمري بحترم فيك افكارك
ReplyDeleteيعني مافيش حاجة تقدر تعدي من ايدك بسهولة
وده شئ مش سهل:)
نرجع للبوست
بجد لما قريته حنيت لحاجاتي جدا،انا تقريبا بأملك ثروة من الفلوس اللي مكتوب عليها اللي مهما اتزنقت في فلوس ما فكرت اصرفهم غير الحاجات الرفيعة اللي عمري مااقدر افرط فيها على سبيل المثال مركب بتذكرة ترام :)
الحاجات دي مهما كانت صغيرة بس ليها معنى حلو في حياتي
زيها زي الصور بتاعتنا لما بعد اتفرج عليها بفتكر احلى ايام
صاحب فكرة ان ممكن الذكرى تفكرها بحاجة مؤلمة
انا رأيي ان الحاجة المؤلمة بتبقى ذكرى جميلة بمرور الوقت
بس لنفترض حسن النية ونقول ان المحفظة او الشنطة اتسرقت
مع اني رأيي بيقول انها اتصرفت فيه لأن الناس دلوقتي مابقاش عندها غالي خلاص
الامضاء
عضو جديد في منظمة احباط مريم
memo :
ReplyDelete-----------------
تحياتي انا كمان يا سلام مفيش حد احسن من حد :)
هو عندك حق الكل هان علي الكل خلاص الكل بقي ماشي مش شايف الا نفسه وبس، أنا إمبارح كنت في عزاء أخت جدي وكانت في مقام جدتي وكانت إنسانة اكتر من رائعة الله يرحمها، وإحنا في العزا كان قدامنا في العمارة اللي قدام دار المناسبات... فرح !! والناس بتظقطت
عادي كله بقي برتقال
TamTam :
ReplyDelete----------------------
الله يكرمك يا رضوي والله مش اوي كده هي بس عادة فيا ساعات بيبقي ليا 500 عين وبابقي ملاحظ كل شئ وساعات كتييييييييييييييييييييير اوي مش بابشوف حاجة خالص وبابقي نيلة
الله يمسيكي بالخير يا ماهيتاب اكتر واحدة عارفة الحكاية دي :)
نرجع للبوست
المسألة برضه انا مازلت مصر انها ممكن تكون عند ناس ولا ليها اي اهمية بس اصل الذكري عندي بتحتل مكانة كبيرة يمكن عشان كده اضايقت من الحكاية كلها