Wednesday, June 24, 2009

تخيل معايا


كعادتهم مؤخرا كل صباح

يتبادولوا السلام وبعض الكلمات

ثم في منتصف اليوم حديثاً عن الشعر

الذي لا يجيده احدهما ولكنه يستمتع

لأنه الآخر متمكن منه

في اخر اليوم.. سأل صديقه وقاله

تخيل معايا

انك شخصية ليك جمهور

تخيل ان فيه ناس بتحبك من غير ما تشوفك

بس بتحبك وبتابعك

ولما بيشوفوك بيكونوا مبسوطين جدا

وانت بتنكسف

بس بتكون مبسوط انت كمان

انهم عندهم المشاعر دي

وانت مكنتش تعتقد انك ممكن في يوم

تحس بالكلام ده

تخيل معايا

لو كان ليك معجبة من النوع المتيم بك

هل هيكون شئ مقبول منطقيا انك تحبها

ولا إعجاب من نوع المعجبين بالشخصيات المعروفة

وقتي؟

لحظي؟

مش حقيقي؟


سؤال افتراضي لكن مهم

رد عليه بكل هدوء زي ما عاهده دايماً

سأله.. الحب ايه؟

رد عليه.. تعاون مشاركة تفاهم

لأ.. قبل كده

هو عاطفة و جنس

تحقق واحد على حساب التاني مشكلة

لما يكون جواك الشعورين

العاطفة الرومانسية

و الرغبة الجنسية

تقدر تحط فحسابك ان العلاقة دي ممكن تاخد أبعاد

تكمل طريقها

إذا في واحد من دول مش موجود

خلاص معناها مش بتاعتك

لما تحس ان الريحة اللي طالعة منها هي الريحة اللي داخلة بيك

خليك وراها

لحد ما تعرف، إن كانت ريحتك هي اللي تفوت بيها او لاء

الدافع الجنسي، و الرغبة إلى جانب العاطفة

و المشاعر بالهدوء و الاطمئنان و السلام الداخلي

ما يتجزئوا مع بعض

بنفس الوقت اللي بتكون هي سلامك الداخلي

بيكون هادا السلام، مقوض، بالرغبة بانك تكون معها

هادا الكلام ممكن تحسه و تتأكد منه

كل ما قضيتوا وقت سوا

عشتوا كل شي ممكن سوا

من المشاعر للعواطف للتجارب المستركة

تعرف انك بتقبلها حتى لو كانت مختلفة عن معاييرك

و هي كمان

بدون مواربة

و بدون ما نحط الحاجة

لوجود الشخص التاني بحياتنا قبل الحقيقة بانه مناسب او لاء

إنت ايه شعورك ؟

رد.. انه حب بصيتها ليه وهي ماسكة دراعه و بتقول "انت حقيقي؟"

كانت عينيها بتلمع وهي بتبتسم من غير ما تبقي قادرة تتكلم

مش اول مرة يشوفها لكنها كانت مختلفة

شافته من بين ناس كتير وجريت وعينيها عليه

ابتسم صديقه ابتسامه مميزة لأنه شعر بيها وهي بتجري

كمل وصفه للمشهد بإنه كان زي ما كان بيشوف في الأفلام

والبطلة بتجري ناحية البطل وهما الإتنين بيبتسموا

جريت ناحيته

وماقدرش يعمل شئ غير اني يحضنها..

قاله.. حضنتها وكنت حاسس ان عضمها هيتكسر في ايدي

فضلت متعلقة فيا ورجليها مش ع الأرض



كان شكلهم باين انهم مش منزعجين وهما واقفين

كل شوية يمسك ايديها و يحضنها وهما بيتكلموا

واكنهم يعرفوا بعض من زمان

سكتوا شوية

وكمل... بس انا خايف من حاجتين

ان يكون الإعجاب ده مؤقت لحظي

يمكن عينيها لمعت بحاجة هي شايفاها جميلة

يمكن اعجابه بالإعجاب ده تسليم للأمر الواقع

أمر واقع جميل لكن يمكن يكون حابه عشان هو كده

اللي انا خايف منه انها تكون بس منبهرة.. قال لصديقة وهو بيبص بعيد

كان سرحان في عناوين جريدة علي مكتبه

رد عليه.. بس انت ممكن تكون تحت ضغط انك مش لازم تكون وحيد

لا انا مش منزعج من الحكاية دي

انا عارف ان في يوم من الأيام هاقابل حد

بس باحاول دايما اني اقرا الإشارات مش اكتر

بس عجبني اوي انها فعلا مبسوطة انها شايفاني

سأله.. طب أزاي تقدر تخلص من مخاوفك؟

اني اتكلم معاها واشوفها اكتر.. كان رده

وده اللي انت هتعمله؟

بالظبط

طب عظيم

لو تقدر تشيل كل المخاوف من راسك

و تنبسط بحالة وجود حد قريب و عاطفي

و تستمتع لحد ما تشوفها وتقرب منها

و تقدر تعرف حقيقة او تكون تصور عن شعورك تجاهها

بتكون عملت تقريباً المستحيل

ابتسم و قال.. سأحاول صديقي


Friday, June 12, 2009

يرحمكم الله

كيف تحمي نفسك والآخرين من أنفلوانزا الخنازير



استخدم منديل ورقي عند السعال او العطس

ارمي المنديل بعد استعماله في القمامة فورا

داوم علي غسل يديك بالماء والصابون

اذا ظهرت عليك اعراض الإنفلوانزا سارع بزيارة الطبيب

حافظ علي مسافة لا تقل عن متر عند تعاملك مع الأخرين

لا تغادر المنزل الي العمل او ايه اماكن مزدحمة

احذر العناق او التقبيل او المصافحة عند تحية الآخرين

احذر لمس العينين او الأنف او الفم دون غسل اليدين


منظمة الصحة العالمية - المكتب الإقليمي لشرق المتوسط

http://www.emro.who.int/csr/h1n1/pdf/poster_ar.pdf

Wednesday, June 10, 2009

ارتدِ كمامه.. انت في الزمالك


علي موسيقي الدور الأول بدأت اليوم

وانا باعدي علي نيل مصر الحبيبة "الشقيقة"

محمود قالي: بس وصلنا الزمالك

قولتله آه.. مرحباً بكم .. ارتدِ كمامه ، انت في الزمالك

وفكرت انها تكون عنوان التدوينة دي

 

المفترض ان الواحد لما يكون فيه وباء في المكان اللي هو فيه يعمل ايه؟

يعني يفكر زي ما كان بيفكر؟

يحب زي ما كان بيحب؟

يكره زي ما كان بيكره؟

لو فيه التزام مادي عليه يلحق يجري يدفعه؟

ولا يكبر دماغه خلاص ما كلنا هنموووووووت

زي ما نهي حامد صديقتي كل ما تشوف وشي تقولي

 

طب لو حد كان بيفكر يتجوز يعمل ايه؟

يلحق يتجوز بقي ويعيش كام يوم؟ او حتي يتخانق كام يوم؟

ولا يكبر دماغه بقي بدل ما يتجوز ويجيب عيال والوبا ياخدوا هو بس !!

 

طب هل هيحصل ده في مصر؟

يعني لما حكاية انفلوانزا الخنازير تنتشر وتتحور بعد ما تتحد مع

فيروس انفلوانزا الطيور اللي خلاص استوطنت في مصر

يعني العالم كله خلصت منه واستوطنت عندنا احنا

 

هل لو ده حصل و الإتنين عملوا فيروس لا يقهر

فعلاً هنتحول لمنطقة وباء و احتمال الحياة تقف عندنا؟

 

يعني مفيش حفلات بعد كده؟

مفيش وسط البلد في قلعة صلاح الدين يوم 23 يونيه؟

ولا في مكتبة الإسكندرية يوم 24 يونيه؟

ولا في مسرح الجنينة بالأزهر بارك يوم 25 يونيه؟

ولا في الأورمان مع كايروكي يوم 26 يونيه؟

 

ماهو لازم حد يتكلم في البلد دي ويطمن الناس

او يقولهم يعيشوا عادي ويكبروا

لما صاحبتي أميرة سألتني امبارح الناس عامله ايه؟

قولتلها ولا اكنهم هنا حتي لو الخنازير جريت ورا الناس في الشارع

برضه مش هتفرق مع الشعب المصري


زي ما صديقي احمد عدلي قالي لما قولتله كلام نهي ...

هنمووووووووووووت يا احمد

قالي سمي بالله و كل يا عم

اروح اشتغل بقي

 

سلام

Monday, June 08, 2009

بالصور.. أنفلوانزا الخنازير في الزمالك














إنتظروا فيديوهات بعد شوية

تصوير الفيديو والكاميرا لـ محمود إبراهيم .. مدونة مصر اللي بحبها

أنفلوانزا الخنازير وصلت


المشهد جميل من الشباك

حديقة خضرا جميلة.. أكتر من جميلة

الشمس داخلة من الشباك الطويل

شعاع علي الأرض

زي فيديو عمرو دياب القديم اوي اللي مش فاكر اسمه

صباح الخير يا زمالك

بس صعب ان اليوم يفضل كده و فيه اصوات عصافير

لازم صوت سكراتش ....... وندخل علي الواقع

انفلوانزا الخنازير في الزمالك !!

أعلن رئيس الجامعة الأمريكية في القاهرة انهم اكتشفوا حالتين مصابتين بأنفلوانزا الخنازير في مبني سكن طلاب الجامعة الأمريكية بالزمالك، وان المبني تم وضعه تحت الحظر الصحي لمدة 24 ساعة بكل اللي فيه من طلاب واللي يقدروا بعدد 100 طالب وطالبة اجانب أو من غير سكان القاهرة.

كانت اول حالة تم اكتشاف اصابتها بانفلوانزا الخنازير كانت قد اعلنت في 2 يونيو، وكانت المصابة فتاة مصرية امريكية قادمة من الولايات المتحدة الأمريكية.

مزيد من التفاصيل والصور هتلاقوها عندي وعند مدونة (مصر اللي بحبها) لـ محمود ابراهيم

اللي اديته الكاميرا بتاعتي ينزل يصور الأجواء ومكان السكن.


خسارة .. قولت اليوم جميل وشاعري !!!

Wednesday, June 03, 2009

عودة الغضنفر


مع الإعتذار لصديقي المخرج الشاب جهاد عبد الناصر
اللي اقتبست منه العنوان… اللي طالعنا بيه علي صفحته الخاصة علي الفيس بوك، أنا رجعت

هو أنا مكنتش مشيت بس كنت مشغول عن إني افكر، وكالعادة لازم بعد كل انشغال يجي فراغ فكري، الفراغ اللي بيصاحبه هدوء، هدوء ما قبل العاطفة… ده يمكن هيكون عنوان ل بوست جاي بس لسه شوية مش هاكتبه دلوقتي، عشان مشغول

بس مش عايز اقول حاجة من اللي حصلت
عايز اقول ان فيه حاجات كتيرة حصلت السنتين اللي فاتوا
لأني قررت اني ماتكلمش في اللي حصل
بس انا عارف نفسي هاقول وهاحكي عشان دماااااااغي ماتضربش
بس يمكن مش دلوقتي

عشان افتح نفسي علي الكتابة هاكرر تجربة كنت عملتها من كذا يوم مع صديقتي ديانا من لبنان، لما كانت بتتكلم عن حكم هشام طلعت مصطفي و قررت اني اقرا لها عناوين اخبار جريدة المصري اليوم، اللي بدأت اواظب عليها بعد ما عم عبد الله البواب قرر ان ده في مصلحتنا و انها احسن من جريدة الأهرام، أشكرك يا عم عبد الله، بالمناسبة عم عبد الله كانوا مجتمعين امبارح مجلس امناء البرج، عشان يرفدوه من منصبه، كبواب.

عناوين جريدة المصري اليوم
الأربعاء 3 يونيو 2009

الأمن يجبر عمرو خالد علي الرحيل إلي لندن.. ويمنع برامجه في الفضائيات
الأزمة بدأت مع مشروع محاربة الفقر لاصطدامة ببرنامج الحزب الوطني
"الف قرية".. وتصاعدت بسبب "المجددون" وبرنامج "موسي الذي تحدي الفرعون"

أنفلونزا الخنازير.. وصلت مصر
الإصابة الأولي لطفلة تحمل الجنسيتين المصرية والأمريكية.. وتتلقي العلاج حالياً بالقاهرة

إسرائيل تعلن رفع أسعار شراء الغاز المصري والإتفاق يقضي بتحريك الأسعار مستقبلاً

بس وبعد كده بقية الصفحة الأولي اعلان لمعرض اثاث منزلي !!


انتهت التدوينة.. اقعدوا بالعافية.. مواااه