مش عارف ليه بدأت.. هي جت بعد ما عرفت عن حاجة إسمها بلوجز أصلاً الحكاية كلها كانت من أصدقائي يسرا ومدونتها - زينب والشاي باللبن - ومحمود ومدونته - مصر اللي أحبها - بصراحة حسيت إني ياااااااه كان لازم أدون من زمان كان لازم أتكلم من زمان.. أنا بأكتب بس مكنتش بأنشر اللي بأكتبه، حسيت إني لازم اتكلم عشان مافرقعش، قلت لمحمود ساعتها إستني البلوج بتاعتي قريب !! وشوف بقي عز لما يبلوج... صباح الغرور يعني
المهم.. سيبكم من الكلام ده.. عجبني وأنا باتمشي في الشارع التدويني شوية الأسئلة دي وقلت اكتبهالكم و بالمرة أشوف أنا ليه بأدون ..!!
هل أنت راض عن مدونتك شكلاً وموضوعاً ؟
زي الفل وتمانتاشر ده بيتي يا جدعان وانا بيتي مش اي بيت يعني !!
هل تعلم أسرتك الصغيرة بأمر مدونتك ؟
في الأول كانوا خايفين يقولولي "والنبي يا شيخ إتلم !!" انا عاذيرهم الجزيرة كانت لسه ذايعة فيلم المدونون.. بس خلاص واحدة واحدة بقوا يقروا كمان انا باكتب ايه، والواد أخويا الصغير كان عايز يعمل مدونة قلتله إيه رأيك تعملك حاجة كده علي قدك وفعلاً عمل مدونة وسماها "حاجة علي قدي"
-
هل تجد حرجاً فى أن تُخبر صديقاً عن مدونتك؟ هل تعتبرها أمرا خاصا بك ؟
حرج إيه !! لأ مش بتاع الحاجات دي خااااالص، الوالد ربنا يكرمه ويشفيهولنا قالي " ما تعملش حاجة بتنكسف منها ومتنكسفش من حاجة بتعملها "
هل تسببت المدونات بتغيير إيجابى لأفكارك ؟ اعطنى مثال فى حالة الإجابة نعم
والله ما أظنش لأني مش بأغير فكري مع الرايجة يعني.. الحكاية كلها إني حسيت بإني بأحب الناس أكتر من ما كنت متخيلني يعني... حد فاهم حاجة !؟
هل تكتفى بفتح صفحات من يعقبون بردود فى مدونتك أم تسعى لاكتشاف المزيد ؟
لأ يا دوب بأشوف هما كاتبين إيه يمكن يكون عندي رد... أصل هأكتشف المزيد إزاي يعني هأمشي وراهم مخبرين
ماذا يعنى لك عداد الزوار.. هل تهتم بوضعه فى مدونتك ؟
علمته بعد شهر من إفتتاحي للبيت، حبيت أعرف مين بيدخل البيت وأنا غايب... حمش مش كده !! أيوة أكيد يهمني وبأتابعه حتي تلاقوني حاطط ترحيب بزوار البيت اللي داخلوا من البلاد المحطوطة دي
هل حاولت تخيل شكل اصدقائك المدونين؟ اعترف
والله ما حاولتش فعلاً أنا بأتخيلهم وهما بيكتبوا بس.. ده آخري من كلامهم بأعرف هما شخصيتهم إيه وكده كفاية حتي إشعار آخر
هل ترى فائدة حقيقية للتدوين ؟
اكيد والا مكنتش انا ابقي المدون رقم 28.817.595 أكيد الناس دي كلها مش بتهفلط ..!! وحتي لو انا حاسس انها مفيدة
هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه ؟
منفصل !! إزاي يعني
هل يزعجك وجود نقد بمدونتك ؟ أم تشعر انه ظاهرة صحية ؟
أبداً أنا اصلا بانشر التعليقات اينً كانت
هل تخاف من بعض المدونات السياسية وتتحاشاها ؟ هل صدمك اعتقال بعض المدونين ؟
- صدمني إعتقالهم ؟ لأ.. لأنه كان متوقع أكيد حاجة جديدة ولازم الأمن يعرف مين دول
- زعلت عليهم ؟ أكيد يعني انا عندي دم
- أتحاشهم !!؟ دانا اول عنوان بيت حطه هو الوعي المصري... عيب عليك يا أفندي
هل فكرت فى مصير مدونتك حال وفاتك ؟
الحقيقة أنا مظبط نفسي ومعرف ناس يعملوا إيه لما أموت.. بس عاماً إنتوا هتعرفوا لما أنا أموت إني مت !!
تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك ؟
انا مابسمعش أغاني مفيش وقت الصراحة... بس عامة اي حاجة لفيروز زي الفل
اكتب اسماء خمسة مدونين ليقوموا بهذا الاسقصاء بعدك
زينب والشاي باللبن
كفاية كده شكرا لحسن إستماعكم ونلتقي بعد الفاصل
-
No comments:
Post a Comment