Friday, December 19, 2008

هاي موهاماد

لسه قافل الموبايل بتاعي من شوية.. من دقيقة، لاقيت علي الموبايل كلمة "Call" وبما إني فيه موضوع شاغلني من كام يوم كده وبأتكلم مع حد من صحابي من شيكاغو في الكام يوم اللي فاتوا، فقولت ان يمكن هي اللي بتتصل عشان إمبارح كان حظنا سئ جداً كان فيه عاصفة والخطوط كانت بتقطع بشكل خلاني عايز انزل ابوس السلك بتاع المصرية للإتصالات !!

رديت علي الموبايل لاقيت حد بيقولي "هاي موهاماد"، هاي... هو ايز زيس، اي سييد.

لأن "أسما" بتعرف تتكلم عربي زي الفل مش بتتكلم معايا إنجليزي، يبقي ده حد تاني !! ، لاقيت البنت اللي بتتكلم بتقولي ان انا من شركة "USAFIS" وان حد من صحابك رشحك عشان تدخل معانا في سحب لوتاري للحصول علي "الجرين كارد"، هل انت مهتم؟ قولتلها والله كنت لسه باتكلم مع صاحبتي امبارح اني مهتم جداً مهتم أوي، قوليلي ايه اللي عندك.

مش عارف ليه كملت كلامي معاها، مع ان اي كلام مع اي حد من النوع البياعيين ده في مصر باقفل معاه جداً وبادي المتصل ارقام الناس اللي مخنوق منهم عشان يكلموهم يقرفوهم !! مش عارف ليه بس كملت الكلام معاها، يمكن الحلم الأمريكي يراودني، المهم قالتلي صديقتك اللي رشحتك اسمها "Yara Inemadelb Ayafah" طبعاً انا ماعرفش اي حد مشوه بالإسم ده خالص ههههههههه !! قولتلها لأ ماعرفش حد بالإسم ده خالص، قالتلي هي من سوريا وعايشة دلوقتي في أبو ظبي !!! حابكه جداً القصة : ولد اللي رشحته اكيد تبقي بنت .. عايشة في ابو ظبي ... وهي من سوريا .!!! كان ناقص تقول انها مواليد الحلمية وعندها شقة في التجمع الخامس !!

المهم برضه كملت المكالمة قولت اتفرج اشوف بينصبوا ازاي هناك، اهوا الواحد برضه يتعلم... كملت الشابة الكلام وقالتلي ان كل سنة الحكومة الأمريكية بتدي 75000 جرين كارد لبلاد كتير مش ممنوع منها ان يجي منها هجره، انت عايز تهاجر لأمريكا؟ قولتلها يعني انا بافكر استخرج فيزا اني اروح امريكا بس الموضوع ده بياخد وقت عندنا في مصر مش سريع، قالتلي لأ الفيزا حاجة والجرين كارد حاجة تانية... دي احسن من الفيزا ..!! يا سلام يا فكيكة مانا عارف !! موهاماد، انت عندك كام سنة؟ مواليد القاهرة؟ متجوز ولا اعزب؟ بتشتغل ايه؟ مممممم اوك موهاماد انت عندك فرصة حلوة اوي انا مبسوطة جداً ليك !!! يا سلام والله ده شئ حلو اوي شكراً ليكي !!!

طيب موهاماد، انت بتستخدم فيزا كارد؟ ماستر كارد؟ ولا اي بطاقة تانية؟ ....ايوووووووووووه تعالي هنا بقي!! اه يا شابه باستخدم فيزا كارد (ده شئ مش صحيح طبعاً)، استخدمتها بره مصر يا موهاماد؟ اه في الأردن (طبعاً ده محصلش) اوك موهاماد، اسمك بيتكتب كده؟ طب ايميلك؟ اوك موهاماد ده الموقع بتاعنا (www.usafis.org) وهاديك باسورد عشان تتابع الأبليكيشن معانا اونلاين، اللوتاري بيبدأ في فبراير وفي مايو بتعرف اذا كنت هتسافر ولا لأ، احنا هنعمل كل الإجراءات ليك وهنودي الأبليكيشن بتاعتك ونتابعها مع الحكومة، بس هتدفع مرة واحدة مبلغ 349 دولار ودي هتدفعها مرة واحدة بس طول فترة السحب علي الجرين كارد، حتي لو كانت 10 سنوات وليك ولكل العائلة واولادك، يعني هي دفعة واحدة بس مرة واحدة بس .!!!! بتحاول تقلل تأثير الكلمة عليا اللي هو يعني ايه يعني 349 دولار مرة واحدة !! وكمان هندخلك مسابقة (VIP) ودي تخليك تدخل مسابقة اكبر لمدة عشر سنين يعني فرص الجرين كارد تبقي متاحة ليك ولكل عيلتك لمدة عشر سنين، الحكومة بترفض الطلبات من دول زي الصين اندونيسيا روسيا.. وقالت كام اسم كده بس نسيتهم، انت عندك فرصة كبيرة يا موهاماد !! ايه رأيك يا ؟

واخدين بالكم طبعاً ان موهاماد بيشتري منها الكلام بس مش بتكلم الا، اوكيه، ممممم اوكيه، يسس اوكيه ممممم منبهر جداً ان كل الإخوة النصابين حول العالم متفقين علي كود ومبادئ واحدة في الشغل وده حلو!! حقيقي حلو منهم!!

أوكيه موهاماد انا دلوقتي هادي التليفون مع المديرة بتاعتي عشان تكمل معاك الإجراءات (يااااااااااااااا ربي نفس الأداء بالظبط نفس الدخلة) ودخلت عليا المديرة، هاي موهاماد ايام هانا... ها هانا هاو ار يو؟ انا شايفة انك عندك فرصة كبيرة اوي وحلوة جداً مبروك وحظ طيب، انا بس عايزة اتأكد منك من شوية معلومات، اسمك كده صح؟ ايميلك كده صح؟ بتستخدم فيزا كارد؟ تاريخ الصلاحية بتاعها بينتهي امتي موهاماد؟ هنا بقي كنت خلاص زهقت وعايز اقفل اللي هو شكراً يعني انستونا، فقولتلها ممممممم سبتمبر 19 ممم سبتمبر، لما لاقيتني بافتكر، بسرعة شديدة اوك موهاماد انت ممكن تروح تشوف تاريخ انتهاء الصلاحية وانا هاستناك هنا اتس اوكيه!! اوكيه يا شابه ثانية واحدة.. وحطيت الموبايل ع المكتب فعلاً

سيبتها 30 ثانية كده وقفلت المكالمة وقفلت الموبايل وكتبت البوست ده !!

طبعاً انا اه عايز اروح أمريكا، لأسباب كتيرة لسه بافكر فيها بتمعن وبهدوء شديد، عشان دي مش حكاية سهلة، مش هاروح اشتغل في دبي!! لأ دي تجربة ممكن تغير حياة الإنسان، يا إما للأحسن يا إما للأسوأ، المشكلة بس إن مش هي دي الطريقة اللي هاروح بيها .!!! ومش علي آخر الزمن يتنصب عليا من هانا مونتانا اللي كلمتني دي !!

Wednesday, December 17, 2008

Dream A Little Dream Of Me



Stars shining bright above you,

Night breezes seem to whisper, "I love you",

Birds singing in the sycamore tree, "Dream A Little Dream Of Me".

Just say "nightie-night" and kiss me,

Just hold me tight and tell me you miss me;

While I'm alone and blue as can be, Dream A Little Dream Of Me.

Stars fading, but I linger on, dear,

Still craving your kiss;

I'm longing to linger till dawn, dear, Just saying this:

Sweet dreams till sunbeams find you,

Sweet dreams that leave all worries behind you,

But in your dreams whatever they be, Dream A Little Dream Of Me.

Dream A little dream of you and me.
by Doris Day



Sunday, December 14, 2008

منتصر - للعرب - الزيدي


الصحفي الشجاع العراقي منتصر الزيدي
يرمي جورج بوش بحذائيه في مؤتمر صحفي بالعراق



Thursday, December 04, 2008

Cute Little Book!


You are a cute little book,

Am enjoying folding its papers,

Turning its pages,

Jumping between its chapters,

Wandering inside its beautiful details…



Sunday, November 30, 2008

Wednesday, November 19, 2008

Tuesday, November 11, 2008

أجمل حب


كما ينبت العشب بين مفاصل صخرة
وجدنا غريبين يوما
وكانت سماء الربيع تؤلف نجما ... ونجما
وكنت أؤلف فقرة حب
لعينيك.. غنيتها
أتعلم عيناك أني انتظرت طويلا
كما انتظر الصيف طائر
ونمت.. كنوم المهاجر
فعين تنام لتصحو عين.. طويلا
وتبكي على أختها،
حبيبان نحن، إلى أن ينام القمر
ونعلم أن العناق، وأن القبل
طعام ليالي الغزل
وأن الصباح ينادي خطاي لكي تستمرّ
على الدرب يوما جديداً
صديقان نحن، فسيري بقربي كفا بكف
معا نصنع الخبر و الأغنيات
لماذا نسائل هذا الطريق .. لأي مصير
يسير بنا ؟
ومن أين لملم أقدامنا ؟
فحسبي، و حسبك أنا نسير
معا، للأبد
لماذا نفتش عن أغنيات البكاء
بديوان شعر قديم ؟
ونسأل يا حبنا ! هل تدوم ؟
أحبك حب القوافل واحة عشب و ماء
وحب الفقير للرغيف
كما ينبت العشب بين مفاصل صخرة
وجدنا غريبين يوما
ونبقى رفيقين دوما


أجمل حب  \   لـ محمود درويش

Sunday, November 09, 2008

حادثة؟ لأ زمالك

جريد الأهرام - اللي مبحبهاش بس باقراها كل يوم
الأحد 9 نوفمبر 2008

Thursday, November 06, 2008

خطاب باراك أوباما للعالم


الكتير من الناس كان ليهم رأي في مسألة اهتمام العالم كله الإنتخابات الأمريكية السنة دي، واللي فيها كان مرشح باراك حسين أوباما "أول أسود يرشح للإنتخابات الرئاسية"، والكتير قالوا كلام كتير جداً ما بين أمل وحلم وما بين ناس أصلاً بتستنكر علي الناس إهتمامها بحاجة جميلة !! عملية إنتخابية نظيفة !! حاجة مش بنشوفها كتير في حياتنا... حاجة زي الأفلام اللامعة الحلوة الرومانسية اللي البطل فيها بيجري عشان يلحق حبيبته وهو راكب تاكسي من التاكسيات الصفرا في شارع زحمة..!! فيحس إنها هتضيع منه ومش هيلحقها فينزل جري من التاكسي ( غالباً مش بيحاسب التاكسي وبما إن التاكسي تبع الفيلم في المنتج غالباً هو اللي بيحاسب !!)

المهم إننا كنا بنتفرج وإذا بي أفوجأ بناس صعبان عليهم اننا بنغسل القرف اللي شوفناه وبنشوفه كل يوم وكل ساعة بدءاً من "الطبعة الأولي" علي قناة دريم مع الصحفي أحمد المسلماني الساعة 8:30 بعديه "الحياة اليوم" علي قناة الحياة مع مذيعين مقدرتش احفظ اسمهم لأنهم سخيفين بدرجة سخيفة ودايماً مبتسمين وهما بيقولوا للناس همً كل يوم وبرضه نفس الإبتسامة السخيفة علي وشهم !! وأكنهم فرحانيين انهم طالعين ع التلفزيون !! وبعد كده طبعاً "90 دقيقة" مع معتز الدمرداش علي المحور و أخيراً والختام مع مني الشاذلي في "العاشرة مساءاً" علي قناة دريم..!!

قرف الواحد بيشوفه كل يوم وحال للبلد لم ولن ينصلح ولو بعد مليون سنة الإ لو حصل اللي قولت عليه لصديقتي "يمني" لما انتقدت اني مهتم بالإنتخابات الأمريكية ليه يعني؟ هيفرق معايا مين اللي هيكسب أوي؟ ... بس "يمني" ماكانتش لوحدها المنتقدة لإهتمام الناس بالإنتخابات !! فيه منهم كان مش مهتم لأنه لازم ميهتمش الا بالإنتخابات اللي في بلدنا ! مش عارف فين الإنتخابات دي؟ قولي عليها وأنا أهتم !! ده كان صديقي "هشام الحفناوي"، أو "دينا عبد الرازق" أو "محمد حسن" أو "سيف أبوزيد" أو أو أو كلاً كان ليه رأي يا إما مع يا إما ضد.

لكن كلهم كانوا بيصبوا في نفس المكان، وهو إمتي بقي نقدر إحنا كمان نغير !!

أحبطت جداً لما كنت باتابع الإنتخابات وإزاي الموضوع كان بيتم بمنتهي السهولة واليسر وكله بيحصل في دقائق !! طبعاً عملية الفرز اللي أقصدها هنا... أنا بدأت المتابعة من 3 الفجر، كان معايا علي الماسينجر صديقتي "العزيزة حالياً" واللي إتكلمت عنها في البوست اللي قبل ده... "Ilia" وهي من لوس أنجلوس، كاليفورنيا.. طبعاً كالعادة كلامها كان عميق جداً غير ما أنا شايف في التلفزيون وبأقرا في الجرايد اللي مازالت بتتعامل مع قراها بمنطق "وقعنا 200 طيارة للعدو !!"، كانت بتشرحلي ( وأنا تعبان جداً ومش قادر وبأنام ) بس هي كانت بتشرح عملية الفرز، وإزاي ولاية تكون متساوي فيها الديمقراطيين مع الجمهوريين، وإزاي بتتم عملية الفرز، وإزاي أوباما كان بينجح إنه يكسب أصوات ولايات هي في الأصل جمهورية..!! ولما كنت بأجري زي العبيط أقولها كسب ولاية "نيويورك" هيييييييييييييه !! إزاي كانت بترد بكل هدوء

NY is democratic !!

اللي هو كان فاضل تقولي .. يا حمار! ما هوا لازم يكسبها !!

شكراً يا ستي مكانش فيه داعي للإحراج يعني أنا كنت حاسس إنها ديمقراطية !! أهلها شكلهم ناس طيبين !!

معلش أعذروني أصلي متربي علي إن كل حاجة بتتاخد كده بالحب والنية الصافية اللي زي القشطة ولا مؤاخذة !! معلش معذور لما الاقي رئيس إتحاد كورة بينسب الفضل اننا كسبنا كأس امم في غانا !! عشان كان لابس نفس البدلة بتاعته اللي لبسها في كأس أمم 2006 !!

المشهد الأخير من عملية الفرز كان مؤلم ليا جداً..!! لما مذيع قناة ABC تشارلز جيبسون وهو بيتكلم مع مراسل في أخر خمس دقايق قبل ما تعلن النتيجة، المراسل بيلمح !! ان أوباما خلص بيحسم السباق في أخر أمتار !! وقال بالتعبير المتعارف عليه في الثقافة الأمريكية "السيدة البدينة لم تبدأ في الغناء، لكنها بدأت في الإحماء" ( ده كده يعتبر تحيز لأحد المرشحين ) المذيع إستني المراسل يخلص وأكد انه لن يتم الإعلان عن من هو الرئيس القادم الا بحلول الساعة الحادية عشر بتوقيت الساحل الشرقي وهي الثامنة بتوقيت الساحل الغربي وقبل ذلك لن نعلن من هو الرئيس القادم !!

يعني بيؤكد حيادية القناة الإخبارية مع إنه هو ممكن ان يكون صوت لصالح أوباما أو ماكين ولكنه كاااااااااااااااااان محاااااااااااااااايد !!!! كان مؤلم ليا لأني لو في مكان تاني كنت لاقيت المذيع بيقول... وهااااااا هو صاحب ( أي حاجة ) يتقدم ويفوز ويبرهن ويثبت لشعبه بأنه الأقدر خلال هذه الفترة العصيبة والتي شاهدناها معاً سوياً معاه طوال 80 سنة وهااااا هو يحصد الأصوات صوتاً بعد صوتا وكما أنت جميلة يا أصواااات الحرية !!!

المذيع قبل دقيقتين من تمام الساعة ومع الميعاد اللي المفروض تعلن فيه النتجية... سكت وبص لساعته، أول ما الساعة دقت 11 وكانت هنا 6 صباحاً قال إذا باراك أوباما هو الرئيس المنتخب للولايات المتحدة الأمريكية !!

يا سلام ؟؟ بس كده ؟ بالسهولة دي ؟؟ طبعا هي مش بالسهولة دي أكيد كان فيه شغل وتعب وجهد من كل الناس وكل اللي ساهموا في ده بس عجبني السلاسة في التعامل والدقة في كل شئ، وبما إني اول مرة اتابع الإنتخابات الأمريكية بهذه المتابعة الرهيبة، قبل كده كان يمكن احب أعرف مين اللي فاز بس، لكن بما اني كنت جوه التلفزيون باتابع ... أبهرني ان لكل شئ ( في القناة ) لكل شئ مقياس ومعدلات، وفيه ناس قاعدة بتراقب كل شئ، حتي كان فيه بنت شابة صغيرة كده مكتوب علي الشاسة بتاعتها، ( متابعة الإنترنت ) وكانت بتقول ايه التغيرات في الفييس بوك و تويتر وغيرها من المواقع !!

اللحظات التالية اللي هاشارككم بيها هي اللي أصابتني بالإحباط وأكدت لي ان إحنا لا يمكن نلاقي أوبامانا !! الإ إذا حصل اللي قولت لـ "يمني" عليه... حد يكلمها يا جماعه يعرف أنا قولت إيه قبل ما أموت !!






Saturday, October 11, 2008

That ONE ( Obama '08 )


مش قادر اسكت او اطلنش واتشغل في شغلي وافوت البوست ده !! طبعاً عايز اسجل لنفسي قبل غيري ان ضاعت عليا كتير اوي مواضيع كنت عايز اكتب فيها.. حاجات حصلت في حياتي وحاجات فعلا كنت احب اني اكتب عنها عشان تفضل معايا في ذاكرتي!

اللي هاكتب عنه دلوقتي هو الحملة الإنتخابية للرئاسة الأمريكية.. وطبعاً انا مع "باراك اوباما" ليه ماعرفش هما الإتنين واحد بالنسبة لي وهما الإتنين اتمني انهم ميطلعوش واحد في النهاية.

طبعاً مش هاعلق عن الحملة الإنتخابية المنظمة جداً لباراك اوباما لأن رأيي هيبقي متأخر اوي والإنتخابات خلاص فاضل عليها شهر تقريباً، لأن انا هاعلق دلوقتي علي موقف حصل لي، ليا صديقة من لوس انجلوس - كاليفورنيا، صديقة اتعرفت عليها من مسابقة في التصوير، بدأ الكلام بينا فجأة عن اوباما وانجرفت معاها في الكلام وفوجئت اننا واخدين بالنا بس من جزء بسيط اوي من الصراع علي الرئاسة وان في السباق بيحصل حاجات كتير اوي وحاجات صغيرة مياخدش باله منها الا المواطن الأمريكي اللي عايش علي ارض المعركة.

المهم صديقتي "Ilia- Lasierra" فوجئت بيها وفي ميعاد لقائنا اليومي بالصدفة اللي غالباً بيكون 6 صباحاً بتوقيت القاهرة وبيكون 11 مساءاً بتوقيت كالفورنيا، فوجئت بيها بتوريني الصفحات اللي تناولت الصراع الإنتخابي ( كعادتها دائماً بتوريني كل جديد في الموضوع ده ) والجميل ان كلامها فيديوهات يوتيوب عشان اسمع واشوف علي طول مش كلام ع الفاضي، ضحكتي "Ili" لما لاقتها بتقولي ان "ماكين" وهو المرشح الجمهوري المنافس لـ باراك اوباما قال في المناظرة الأخيرة بينهم من 3 أيام، يوم 7 أكتوبر...

قال عن أوباما وهو واقف قدامه "That One" وهو بيشاور عليه !! وده كان شئ طفولي منه طبعاً وقليل الذوق جداً، وأكنه بيشير اليه بإستحقار واهانة، كان كلامه بمعني " فاكرين طبعاً مشروع الطاقة اللي اتناقش في الكونجرس واللي كان ملئ بالخيرات لشركات البترول !! وكان مدعم من بوش و نائبه شيني ... عارفين مين اللي صوت مع المشروع ؟ هذا الشخص ! عارفين مين صوت ضد المشروع؟ انا " وطبعاً ده قمه في قلة الذوق انا مش عارف هو فكر في الكلام ده ازاي قبل ما يقولوا !! هي رأيها ان الجمهورين خلاص بيخسروا فبيلعبوا بحقارة واللي يقدروا يعملوه بيعملوه.

اللي عجبني بقي رد فعل الحملة الدعائية لباراك أوباما علي اللي ممكن احنا نسميه "إهانة".. الرد كان أكتر من مبدع! عملوا حملة جديدة للدعاية بناءاً علي الكلمة دي، من تي شيرتات واعلانات في الشوارع والميادين واستخدموا الكلمة المهينة اللي قالها منافسه في الدعاية له !!


هههههههههههههههههههههه

عملوا تي شيرتات عليها بدل اسم "Obama"

حطوا مكانها كلمة "That One"

انتخبوا هذا الشخص!

بس خلاص كده خلص البوست وده لينك خطبة "ماكين"

اللي قال فيها الكلمة الطفولية بتاعته

http://www.youtube.com/watch?v=lNzA9LfMlmU

Monday, July 07, 2008

إجوان الأهلي هتفضل أحلي

مات جدي "الله يرحمه" يوم السبت اللي فات، 5 يوليو 2008 ... عن اكتر من 80 سنة – لو صح معلومة انه من مواليد 1924، مات وانا في الإسكندرية في رحلة مع صحابي من الجامعة، الله يرحمه كان بيحبني بجد مش مجرد اني ابن بنته وبس.. لأ كان بيحبني وكان حاسس بيا في حاجات كتير اوي مريت بيها في حياتي، طبعاً لأني متربي عنده في البيت لغاية ما وعيت علي الدنيا لأن والدي كان بيخدم سنتين الصعيد اللي علي كل ظابط شرطة وهو لسه متخرج جديد.

فاكر اوي لما كان يوصلني للبيت وكانوا هو وجدتي الله يرحمها ساكنين قريب اوي من بيتنا القديم، كان يوصلني وهو ماسك ايدي جامد جداً..!! كنت مبقدرش اقوله بالراحة يا جدو لأنه هي دي كانت طبيعته – الله يرحمه – صلب قوي سريع الخطوات.

كنت باقعد اضحك وهو بيحكيلي عن مغامرات والده لما هرب من حفر قناة السويس، وازاي هرب هو وأخوه من اللي كانوا بيلموهم عشان يروحوا يبنوا القناة، وكان يحكيلي عن ادق التفاصيل بطريقة جميله جداً ومشوقة، فاكر جداً انه كان بيتكلم في كل حاجه واسع الأفق متعلم لبق في الحديث، الله يرحمه كان حافظ للقرآن ودايماً كنت متأكد انه خاتمته جميلة تليق بواحد جميل، عاش حياته كله يربي اولاده وبناته الثمانية، وعلمهم احسن تعليم وشاف ما شاء الله بنات وولاد ولاده وبناته.

الله يرحمه كان احسن واحد يتناقش معايا بعد ماتشات الأهلي، كنت استني الماتش يخلص عشان اكلمه اسمع رأيه إيه، سواء خسرنا او كسبنا، كان ينقد لي الماتش بالتفصيل لدرجة اني كنت باحس اني مابفهمش كورة، من كتر ما هو دقيق في المعلومات وانا مش باحفظ اماكن اللاعبين ولا مراكزهم.!!

كنت ساعات بأهرب من مكالمته بعد الخسارة عشان عارف انه هيكون زعلان، وياما اتفرجت معاه علي ماتشات، يمكن في السنتين الآخريتين كنت باهرب من مكالمته عاماً.!! لأنه كان بدأ – الله يرحمه – يصاب بالزهايمر وكان بيصعب عليا اوي لما اكلمه واحس ان الشخص القوي اوي اللي كنت باكلمه زمان مش فاكر التفاصيل زي زمان، او بيتوه مني في الكلام في النص، كان بيصعب عليا اوي وبأحس بخنقة في صدري لما باشوفه كده.

في آخر مناسبة وانا كنت باحتفل بشهادة تأجيل الجيش، كان اكتر يوم ألمني اني اشوفه تعبان، لما لاقيته بيقولي "يلا قوم البس عشان نروح لمحمد عشان عامل ليلة وبيحتفل عشان الجيش، يلا قوم مش عايز تروحله ليه".. محاولاتي اني اقنعه اني انا محمد وان انت موجود عندنا يا جدو، ألمتني اوي، انه مش عارفني.! بعد ما كان كل الناس لما كان بيتعب بيخلوه يكلمني لأنهم عارفين انه لايمكن يتلغبط فيا.

الله يرحمه كان كل ما بيكلمني يقولي "عايزين نفرح بيك بقي يا محمد؟" وانا اقوله ان شاء الله قريب يا جدو إن شاء الله قريب، بس ربنا يسهل بس... كان يقولي دايماً مقولة لا يمكن انساها... "ضاقت ولما استحكمت حلقاتها فرجت، وكنت أظنها لن تفرج".

الله يرحمه كان دايماً شايف ان الأهلي أحسن فريق بيلعب كورة، مش بس لما بيكسب، لأ... كمان لما كان الأهلي كان بيخسر، كنت اكلمه ويكون الأهلي خسران 3-1 يقولي وبكل ثقة وبدون تردد.... "شوفت جون الأهلي؟، جون الأهلي احلي..!! التلات اجوان اي كلام، لكن جون الأهلي ملعووب" ويتقل علي الواو واكنه بيغنيها... من مدي حبه للأهلي.


آسف يا جدي إني ماكنتش موجود في دفنك

وماكنتش موجود في عزاك زي ما انت كنت موجود في كل مناسبة ليا

آسف إني ماروحتش اشوفك وقولت لوالدتي ان شاء الله هاروح

آسف إني قولتلها لأ مش يوم السبت، يوم السبت مسافر مع صحابي

آسف اني مقدرتش اشوفك

آسف وأوعدك اني هافتكرك دايماً بالدعاء زي ما انت كنت بتدعيلي دايماً

وهافتكرك دايماً كل ما الأهلي يجيب جون..

وهتفضل في نظري زي ما هي كانت في نظرك بس

إجوان الأهلي دايماً هي الأحلي

Friday, June 27, 2008

لكن مكسوف يقول

ايه يعني لما سبتيني بشكل مش معقول

مانا عايز أسيبك من بدري لكن مكسوف أقول

ماضيكي مش لطيف.. ودمك مش خفيف
وشيطانك اللي جوه حيوانك الأليف

ايه يعني لما سبتيني بشكل مش معقول
مانا عايز أسيبك من بدري لكن مكسوف أقول

رغم انك بليدة أستاذة في الخيانة
فاكرة نفسك حويطة وانتي في أولى حضانة

تتغدى ع الباتيه.. وعاملة بنت بيه
أمال لو كنتي حلوة كنتي عملتي ايه

ايه يعني لما سبتيني بشكل مش معقول
مانا عايز أسيبك من بدري لكن مكسوف أقول

مسكنتك خلت قلبي يدق وقعت في حبك ليه
أنا حاسس اني كنت بالؤ في جزمة حبك دي

صبرت عليكي كتير.. وكنت ف حبى أمير
أعصر على نفسي لمونة وأقول قشطة الأيام هتطير

ايه يعني لما سبتيني بشكل مش معقول
مانا عايز أسيبك من بدري لكن مكسوف أقول

كات حالتي تصعب ع الكافر وكمان خسيت النص
فلوس وصحة ف النازل من بعد ما كنت البوص

فرجتي عليا الناس.. وخسرت أعز الناس
حتى البواب لما يشوفني كان يقفل بالترباس


فيديو : إيه يعني لما سيبتيني ؟

الفيديو تصوير صديقتي العزيزة دينا - عشان بس حقوق الملكية الفكرية


الكلمات دي والأغنية دي باهديها لواحدة حبيتها من كام سنة كده! وايه اللي فكرني بيها دلوقتي؟ سؤال حلو... إمبارح كنت في حفلة "بلاك تيما" وغنوها بطريقة احلي من كل مرة كعادتهم زي كل مرة!

ضحكت! لأن اللي كتب الكلمات دي، كان أكنه قاعد معانا طول السنة ونص!! وكمان وانا باكلمها المكالمة الأخيرة!! بالظبط نفس الشعور وبالظبط نفس اللي كنت عايز أقوله طول سنة ونص!!

بس أنا لما اتكلمت بعد سنة ونص قولت اكتر من اللي الأغنية قالته.. بكتير!! وبأحمد ربنا اني مكنتش ظالم وياااااااااااااااه استريحت بشكل بعد ما قولت الكام كلمة دول!! انا فاكر لغاية دلوقتي.

بس خلينا نكتفي بكلمات أغنية بلاك تيما ودي اهداء مني لكل واحد نفسه... لكن مكسوف يقول!

Monday, April 07, 2008

إضرب.. خليك راجل


المسألة بقت عاملة ببساطة شديدة يمكن زي السجاير، لما حد يجي يقولك إشرب يا عم إِشرب خليك راجل..!! طبعاً انا بدأت الموضوع من النهاية، نبدأ من البداية؟ يللا.

من شهر او اكتر بدء جروب علي الفييس بوك الموقع اللي ربنا يخليهولنا جروب بينادي بإضراب شامل وعام في شتي ربوع مصر وانحائها... الجروب لاقي اقبال غريب !! وصل عدد المشتركين فيه لـ 56 ألف مثلاً ده علي اقل تقدير... صاحبة الجروب واللي اسمها اسراء كانت محور حديثي انا ورجب زميلي في الشغل.

لما باقوله ان فيه واحد صاحبنا اسمه شادي اتمسك في الإضراب امبارح يا رجب... وكمان اسراء اللي عملت الجروب بتاع الإضراب وناس كتير، فقالي طب وانت مالك فرحان ليه او مبسوط وانت بتقول علي اسراء تلاقيها اتبهدلت؟؟ قولتله اكيد مش فرحان !! بس انا متضايق عشانها.. كان لازم لو عايزة تعمل حاجة زي كده تحاول تعملها من غير ما تعرض نفسها للتهلكة !! تحاول تعملها بذكاء شوية مش تدخل تعمل الجروب بإسمها وبشخصيتها !! كانت تحاول تتعب نفسها شوية وتعمل حاجة تانية بدل ما هي كده يا عيني تلاقيهم بيظبطوها !! عارف طبعاً إنها صاحبة قضية وأكيد مش في دماغها كده ... بس دي بنت وانا بجد كنت أتمني ان الإضراب يكون أكتر نظاماً وملوش ضحاياً بالشكل ده.

رطم رجب بكلمات وهمهمة انا مسمعتهاش بس السيجارة اللي ولعها بعصبية اكدتلي انه اتضايق!! بس فعلاً انا سواء الإضراب نجح أو فشل زي ما شافه كل الناس امبارح واللي كان اعتقد بيتلخص في المحلة الكبري والضرب اللي حصل فيها، والمظاهرة اليتيمة اللي حصلت امام نقابة الأطباء، وكمان شوية احداث في الإسكندرية... او حتي كونه إضراب يرضي جميع الأطراف .. زي ما قالت جريدة المصري اليوم، انا شايف انه علي الرغم من كونه كان ضروري ان الناس تصحي وتعرف مسئوليتها وحقوقها.. لكن اللي انا مش راضي عليه انه مكانش اضراب منظم !! يعني الكلام اتطاير في الهوا.. مكانش معروف مين اللي منظمه، مين صاحب الفكرة؟ ايه الهدف منها؟ ايه مطالبنا؟ بنطالب بأي وزير مثلاً يسيب وزارته؟ فوضي!!

الصور اللي شوفتها والفيديوهات لناس همج بيكسروا كباين الميناتيل والنيل اللي في الشارع، ولا اللي بيرموا القطار اللي ماشي بالطوب ولا اللي ولعوا نار في السكة الحديد واتضطر القطار انه يعدي فيها وهي مولعة !! ولما كانت النار تمسك في العربية... كان هيبقي كده كويس؟؟ كان هيبقي الإضراب نجح؟؟

الملخص انك طلعت بيوم مش عارف ايه اللي هيحصل فيه؟ ايه الغرض منه؟ ايه الفايدة منه؟ غير ان الناس تقول ااااااااه بصوت عالي عشان الحكومة تعرف انهم موجوعين! انا شخصياً من الناس الي مكنتش مقتنع بالإضراب.. بس عشان اكيد معنديش بديل ولا انا مفوض عن الشعب ولا الي الشعب حتي.

فأنا شوفت الحكاية بتاعت الإضراب زي السجاير، اضرب خليك راجل ..!! كان نفسي تبقي لو هتحصل فتحصل زي في فرنسا لما سواقين القطارات بيضربوا عن العمل يوم ولا يومين... بيبقي الكل متضامن وبجد!! عمري ما شوفت سواق ماشي بالقطر والتاني راكن!! عشان مضرب!!

طبعاً انا حزين وقلقان علي أصحابي اللي اتقبض عليهم في حكاية الإضراب زي شادي العدل ومحمد شرقاوي، وحتي اللي مش صحابي... الشباب المتحمس الجميل جداً.. واللي مضايقني ان كل ده كان ممكن يتنظم بطريقة وشكل أحسن من كده وميبقاش فيه خساير ولا حد يروح ميرجعش..!!

Sunday, January 13, 2008

Quarrel Love


ده بوست من صديقة لطيفة جداً وطيبة جداً جداً، حبيت اني انشره بالنيابة عنها لأنها معندهاش مدونة... بس حسيت ان البوست بيتكلم بالنيابة عن ناس كتير أوي، فحبيت اكون انا بأنشر بالنيابة عنها :)

although i dnt even have a b.f. yet, i am already apologizing.. i am sorry 4 all the hard time i am gonna give u.. i am sorry 4 freaking out, every time we just quarrel.. i am sorry i am so scared of even thinking of quarreling.. i am sorry 4 being scared of starting a relationship cuz it might end.. i am sorry i might act crazy cuz i am scared.. but believe me its not my fault that i am scared... i am just a normal little gurl who grew up in the 1990's and 2000's.. the time that u rarely find a happy couple... the time when divorce is a very normal word.. the time when u cant find a home with no fighting parents.. the time when all sorts of couples are unhappy, whether married/engaged/committed and even open relationships.. time when girls and boys seek marriage but once they get there they start missing the "single" times. time of youth who grew up cherishing love,, but never found that fairytale kind of it that they have cherished.. time of mislead youth... I'm sorry i have a fragile heart that got scared.. i am sorry u'll have to do much effort to assure me so as not to run.. i am sorry i'll have the will to run and run very fast, cuz I'll b running 4 my life... i am sorry that i might push u away with all the force i got, like i did and still do with every guy who likes me .. i am sorry u'll have to tolerate all this... I'm sorry i grew up in the time of "quarrel love" and not the "fairytale love"..:)

by: N. A.R