Monday, August 17, 2009

صباح كونللي


صباح الخير

.

النهاردة كانت تجربتي جميلة جداً...!!!

صحيت بدري

فتحت MBC 2

لاقيت فيلم لـ Jennifer Connelly

فيلم إسمه Career Opportunities غريب جداً بس قررت أتفرج عليه

صناع الفيلم كان واضح جداً إنهم بيستعرضوا إنهم لاقوا حد

في سن وشكل وجمال ... Jennifer

الفيلم ساذج ولكن...

خلاني لأخر لحظة واقف مستني أشوف فين الأكشن !؟

فين الحته اللي في الفيلم هتخليني مبسوط إني شوفته !؟

بس للأسف ملاقيتش حاجة كويسة..

غير إني شوفت حد زيها الصبح كده وده شئ لطيف!

















الفيلم بيحكي عن ولد عنده 21 سنة

وده بالمناسبة هو سن Jennifer لما كانت بتمثل الفيلم !!

بيحكي كاتب القصة حكاية الولد في سرعة موجزة

تكاد تكون أفسدت الفيلم.. قص المونتاج غير متناسق

تحس إن فيه حاجة ناقصة أو أكنها اسكتشات

كل واحد منها حلو.. بس لوحده!







بغض النظر عن إن موسيقي الفيلم تناسب زمن تصويره!

لكنها كانت عالية بشكل مزعج

في لحظات كتيرة من الفيلم هيكون عندكم شعور

إن أحسن لحظات الفيلم هي لحظات ظهور Jennifer









وده طبعاً مش عشان أنا واقع في حبها..!!

لأ.. الفيلم بيقول كده

لأن توتر الفيلم وموسيقاه العالية

بيكونوا في حالة سكون وإحنا بنراقبها كلنا

بما في ذلك المخرج والسيناريست.. وهي بتتكلم وتتحرك!

اكتر اللحظات اللي ركز فيها السيناريو علي هدف الفيلم

اكتر اللحظات اللي حسيت فيها ان بطل الفيلم Frank Whaley

مش مجرد ممثل عنده حاجه غريبة في عينيه ..!!

كانت اللحظات اللي هي بتتكلم فيها وبتسأله عن حياته !

وعن ازاي هو في ايده حرية انه يمشي من اهل بيته.. ورافض!

وهي ازاي عايزة تمشي من بيت ابوها الملياردير.. ومش قادرة!

واضح إني لازم أبطل كلام عنها حالاً..!!







نزلت.. طبعا كانت الساعة عدت 9 صباحاً

الطريق كان فاضي جداً

بشكل خلاني اشك إني صحيت في يوم أجازة !!

وصلت الزمالك في وقت قياسي

.

أحب اشكر إدارة MBC 2

أحب اشكر إدارة شركة Universal Studios

أحب اشكر الأخت العفيفة Jennifer Connelly

أحب اشكر هيئة الطرق والكباري

أحب اشكر كل قاطني ضاحية الزمالك الهادئة

علي تسهيلهم جميعاً مهمة إني أوصل شغلي

في سهولة ويسر بشكل لا يكاد يصدقه عقل بشري

...!!!!

.

وعشان محدش يعتقد اني معجب بمجرد ممثلة وإنه اعجاب طفولي ...

لااااا يا سادة.. المسألة أكبر من كده بكتير..

اعرفكم بصاحبة هذا الصباح ..














Jennifer Connelly

Friday, August 14, 2009

طريقة الموجة


مساء الخير

.

لحد امتي هنفضل نشتغل نفسنا؟

ونعتقد ان الفوز والانتصار في الرياضة بيجي بطريقة هيلا هوب

بغض النظر عن ايه هي الرياضة دي..

مش انه بيجي بالتعب والجهد والتدريب زي اي مكان تاني !!

لحد أمتي هنفضل معتقدين ان الجمهور اللي بيحضر المباراة

هو اللي بيخلينا نكسب أو نخسر لما ميجيش !!

.

باتفرج دلوقتي علي ماتش مصر والبرازيل

في كاس العالم للشباب لكرة اليد اللي مقام في مصر

والصراحة منزعج جدا من المعلق

عشان المفترض انه معلق كرة يد

يعني المفترض انه معلق فاهم مش واحد قاعد بيتكلم

ده اللي انا سامعه منه طول الـ 26 دقيقة اللي فاتت..

.

الله يا مصر

الله علي جمهورك يا مصر

الله علي بنات مصر

الله علي حسناوات مصر (مع إنهم مش حسناوات خالص)

الله علي أطفال مصر

عظيمة يا مصر بجمهورك

الله علي علم مصر

الله التشجيع بطريقة الموجة (هي بقت طريقة !!)

الجمهور النهاردة مرعب !!

كل المدربين بيقولوا إحنا ماشوفناش زي كده !!

صوت الجمهور المصري مسمع في كل انحاء البلد !!

.

انا ساكن قريب من الإستاد ومش سامع حاجة يا كابتن !!

عايز افهم مين اللي قاله ان المدربين بيقولوا كده؟؟

عمل معاهم لقاءات صحفية مثلاً وسألهم؟؟

يعني ايه الله علي حسناوات مصر !؟

هي الرياضة بقت بتتحسب بالحسناوات !؟

.

مش عايز طبعا انسي مخرج اللقاء العبقري..!!

اللي لسه من دقيقة مركز علي رٍجل الحكم !!

عشان عامل عليها وشم !!!!

.

ويا سلام لما النور قطع في الصالة

وده خطأ اتحاسبت عليه اللجنة المنظمة قبل كده

من قبل الإتحاد الدولي واتفرض عليها غرامه بالدولار الحي!

الحمد لله مسمعتوش بيقول الله علي كهرباء مصر !!

بس قال حاجة ضحكتني.. لما المخرج جاب الصورة

علي اعمدة النور في الصالة اللي انطفت..

قال واهو المخرج مندمج في اجواء المباراة !!

هو المفروض يكون مندمج في اجواء ايه بالظبط ؟؟؟

الشوط الأول خلص

والمذيع المتألق تمني ان يا رب مصر تفضل دايماً متقدمة

مجابش سيرة أي خطة لعبوا بيها خلاص تعليقه

ولا هما بيدافعوا ازاي ولا بيعتمدوا علي ايه !!

انا كنت لاعب كرة يد لمدة سنتين !!

كنت حارس مرمي وفاهم كرة يد اكتر من كرة القدم !!

عايز اقولك يا كابتن اللي انت قولته في الماتش ده !!

اهانة مباشرة ليا ولكل واحد بيلعب او لعب كرة يد !!

قال الله علي حسناوات مصر قال !!

.

مفيش استديو للتعليق زي أي بشر بتحترم الرياضة

باسمع دلوقتي لمزيج من الأغاني الوطنية الفاكسة !!

للأسف هنفضل كده ماشيين بالزق وفاكرين ان هو اللي بينفع

للأسف هنفضل فاكرين ان بدلة سمير زاهر هي اللي كسبتنا كاس افريقيا

للأسف هنفضل فاكرين ان لما البنات بتحضر ماتشات ده انجاز عالمي!

للأسف هنفضل نهدي الفوز لكل رؤساء الإتحادات ومجالس الإدارات!

للأسف هنفضل بنشغل اغاني منير وشيرين وحماده هلال ونانسي عجرم!

قبل كل ماتش ان شاالله ماتش بلي مسافات طويلة!

.

سلام عشان اغنية منير بدأت..!!

Thursday, August 06, 2009

دي اصطباحه يا بيه



صباح الخير

ماهو لازم كان هيجي اليوم !

للتاكسي الأبيض ابو عداد ديجيتال !

كنت حابه جدا لأن مشاويري كلها طويلة الأمد

بما إن حياتي كلها في وسط البلد و الزمالك وانا ساكن في هليوبوليس

و أنا اصلاً عندي مشكلة شخصية مع العربيات

اتمني انها تخلص قريب ..!!

صاحي متأخر

ولازم اكون الساعة 9 علي مكتبي

مع ان حالة من الإحباط بدأت تسيطر عليا

لكن عشان ماأكدش المعلومة اللي بتسطير "عليها" اني باتدلع

وأنا مش باتدلع تماماً

_

- زمالك ؟

- اتفضل

.. التاكسي مشي لحد صلاح سالم ..

- لاحظت ان العداد مش شغال ..!!

- يا ريس انت مش مشغل العداد ؟؟

- يا بيه اصل دي منطقتي مابخرجش منها

- بس قولت يلا جالك رزق بره مترفضش

- ف قولت اوصلك ...!

- متشكر جدا علي كرمك

- بس انا باركب التاكسي ده عشان العداد

- ليه بس يا بيه.. في بيتها

- كلها حاجات بسيطة خالص

.. كل ده العداد مش شغال ..

- علي فكرة يا ريس لو فيه مشكلة انا ممكن انزل

- يا بيه ليه بس هاوصلك

- وانت كل يوم بتروح الزمالك وهتقدر كويس

- لأ ما هو انا باركب التاكسي ده عشان ماقدرش

- لا حول ولا قوة الا بالله ليه كده بس يا بيه

- ايوة عشان ماحدش يقولي ظلمته و الكلام ده

- لا يا بيه مفيش ظلم ولا حاجة

- انا بس مش باخرج من المنطقة مشاويرها صغيرة

.. كل ده العداد لسه ماشتغلش ..

- طب يا ريس انا بس مش فاهم المبدأ

- يا بيه مفيش مشكلة والله خليها علي الله

- انت عارف يا بيه دانا امبارح نزلت لاقيت القزاز متفشفش ميت حته

- لا حول ولا قوة الا بالله معلش

- يا بيه خليها علي الله دي اصطباحه العربية

_

لحد الوقت ده انا مافهمتش انا ليه دخلت في الحوار ده كله

وايه اللي دخل الرزق في انه يشغل العداد

وايه مشكلة انه مش بيخرج من منطقته و انه يشغل العداد

وايه مفهومه عن انه قال يلا هيوصلني.. كتر خيره

وصلت الزمالك و كان شغل العداد ..!!!

طبعا مش هاحكي الحكاوي المعتادة

ان التاكسيات اللي ركبتها في عمان الأردن

كانت عاملة ازاي و السواقين كانت اخلاقهم ازاي

او المواصلات اللي ركبتها في لوكسمبورج كانت ازاي

لأن ده كلام هيكون مقارنة بالكلام اللي عندنا ... كلام مبتذل !


انا مش متضايق تماماً

انا في اسعد ايام حياتي تقريباً

بس حبيت اشارككم

سلام


and for my friends from ALF EuroMed Training

I won't forget my promise and I will use Meedan.net

to translate this post and upcoming posts too

I have so much to post about those lovely days we spent