Tuesday, August 08, 2006

إشمعني قانا.. ودلوقتي

إشمعني قانا !!؟ تاني ؟ لما جيت أبص علي الأحداث لاقيتها كالتالي: الجيش الإسرائيلي دخل مرجعيون وبنت جبيل وبإيه بأعتي جنوده بكتيبة "جولاني" خيرة قواتهم، والأنباء وصلت إن فيه مقاومة شرسة لهم وقناة المنار والجزيرة أكدوا إن فيه قتلي كتير من القوات البرية اللي دخلت القرية... تاني أو تالت يوم نفاجأ بإنسحاب إسرائيل من القرية والأماكن المتاخمة لها..!!! يبقي اللي سمعناه صح..
يبقي ميدنكم علي قفاكم بجد !!! المهم طلع علينا مسئول وقال يا جماعة متخفوش إحنا كويسين " ده إنسحاب تكتيكي !! "


ساعتها إتأكدلي إنهم فعلاً خدوا علي قفاهم وكنت منتظر حاجة تحصل، حاجة كبيرة..!! لأن اللي يفكر إستراتيجياً ويمكن ده من الحاجات القليلة اللي بأفهم فيها في الحياة من كتر لعبي ألعاب إستراتيجية (بدون ضحك ولا تريقة لأنكم متعرفوش الألعاب دي مهمة إزاي وفيها تفكير وتخطيط قد إيه) معلش ما هو الواحد إتكتب عليه ان التفكير الخططي يبقي العالم التخيلي !! هي الحياة كتبت علينا كده.


المهم كنت متأكد إنهم مهزوزين والمهزوز قبل ما ينسحب عشان ينظم صفوفه لازم يعمل هيصة قبل ما ينسحب، يقوم يضرب إيه ؟ يضرب مدنيين عشان الناس تتلم وتتكلملها كام يوم عن الموضوع... الله !! وإيه الجديد ما إحنا بنضرب في مدنيين من أول ما بدأنا...!!! لأ إحنا نضرب حاجة تخليهم يتشغلوا ويعملوا ملخصات كل 15 دقيقة وعناوين تملا صحف تاني يوم وتحركات دولية تحصل وهيصة وزمبليطة نكون إحنا ظبطتنا الدنيا عندنا... نضرب فين ؟ نضرب قانا..!! عشان نصحي تاني يوم في جريدة الأهرام نلاقي الصورة دي بعرض الصفحة وفوقيها كلمة قانا 2006


-

No comments:

Post a Comment