Wednesday, December 26, 2007

هو فيه كده؟


قالك "هي فوضي؟" ... قولتلهم لأ هو هبل؟ تخريف؟ استكراد؟ لكن مش فيلم اللي انا شوفته ده خالص !!

الحكاية بدأت من مريم، بس مريم حكايتها حكاية جميلة نبقي نحكيها في وقت تاني، مش مكانها هنا... قالتلي احنا رايحين "حين ميسرة" تيجي معانا؟ أحداث كتير حصلت انتهت بإني قدام سينما سيتي ستارز باكلمها بقولها "انا داخل الجزيرة.. اه لوحدي هاعمل ايه يعني" بعدها بثواني مكالمة تانية "انا داخل اي فيلم تاني، مش هادخل الجزيرة خلاص، أوك سلام" ... ويا ريتني كنت روحت مدخلتش حاجة خالص !! بس للأسف كنت وعدت نفسي اني هادخل سينما يعني هادخل سينما.. إنتهي !!


طلعت دور سيتي ستارز القبل الأخير واثق الخطي امشي ملكاً ههههههه حلوة دي !! المهم وصلت للسينما وبدأ الشعور الداخلي الموازي يراودني... هي فوضي؟ الجزيرة؟ الجزيرة؟ هي فوضي؟ طبعاً واضح تماماً اني مش باصص علي بوستر "خليج نعمة" !! بس خلاص انا قولت اني مش هادخل الجزيرة يبقي مش هادخل الجزيرة .. إنتهي !!


أيوة تذكرة واحدة.. اه هنا كويس.. شكراً.. واحدة سنيكرز لو سمحت... دخلت علي مشهد حبيبي خالد صالح وهو طايح في الطلبة بتوع المظاهرات اللي في الأول خالص.. ثواني وبدأت اندمج في الفيلم ... للأسف!!

.

المشكلة في فيلم "هي فوضي" ان اللي حصل فيه هو فعلاً فوضي !! لأني من وأنا صغير طفل طويل رضيع وانا مهتم بالسينما واعرف ان السينما دي حالة فنية.. حالة ابداعية بتاعت إنسان قرر انه يشرك البشرية معاه احساسه !! فقرر انه يجيب عشرين ثلاثين شخص تانيين يشركهم احساسه عشان يطلع علي شكل يقدر بعد كده يشرك بيه الناس كلهم والبشرية جمعااااء.


لكن اللي حصل واللي المشاهد هيقدر يميزه بسهولة تامة وهو بيتفرج علي "هي فوضي؟" ان الفيلم عبارة عن حالة ممسوخة من ابداع شخصين ملهومش دعوة ببعض !! علي عكس اللي بيتقال ان خالد يوسف ابن يوسف شاهين وتلميذه النجيب !! وده طبعاً تقليل من قدر المخرج المبدع يوسف شاهين!! الحالة ممسوخة لأنها ببساطة عبارة عن شراكة بين واحد - كان - مبدع بس الزمن واثار الزهايمر والمرض مأثريين عليه وواحد تاني مدعي معرفة وطريقة في الإخراج... فلحظات تلاقي دماغك رايحة في مكان ولحظات تلاقيها راحت في مكان تاني ومشاهد تحس انك متأثر فعلاً وعنيك ممكن تدمع ومشاهد تانية تبقي بتضرب كف علي كف ان لسه فيه كده !!


الحاجة الوحيدة الحلوة في الفيلم هي ممثليه ... يعني انا استمتعت فعلاً بمشاهد خالد صالح المبدع التحفة اللي كل كلامه بيأكد انه حد جامد جداً وبيعرف يقنع اللي قدامه انه هو ده !! طبعاً كنت متأثر بكلام ونقد صديقتي ياسمين السماحي مديرة موقع في الفن قبل اسبوع لما قالتلي انه هيصعب عليك في الآخر الشي اللي كان مخليني مستني ها هتصعب عليا امتي يا امووور !؟ فباظت اللحظة اللي المفروض كان يصعب عليا فيها فعلاً لأنها متوقعة بل منتظرة!!


استمتعت بأداء منة شلبي جداً جداً جداً واكتشفت اني باحب اشوفها علي الشاشة ... مش عشان شكلها ولا الحاجات اللي ممكن تيجي في دماغكم ... بس مش عارف بتحس انها مريحة وصادقة جداً يعني اللحظات اللي كانت بتبكي فيها وخصوصاً بعد ما الأمور اعتدي عليها في اخر نص ساعة في الفيلم !! كنت مصدقها جداً ومصدق دموعها تماماً ... طبعاً ده رجعني للفيلم الكئيب "عن العشق والهوي" اللي نزلت فيه حوالي 3 كيلو دموع ومكنتش مصدقها تماماً ... بس هنا كانت لطيفة أوي هادية جداً تحس انها مش بتمثل.



اداء هالة فاخر استغربت له جداً.!! مش عارف ليه بس كنت فاكر ان هالة فاخر بتاعت كوميديا بس لكن عجبتني جداً في الدور واجمل لحظات دورها لما بنتها دخلت عليها وهي معتدي عليها من حاتم في اخر الفيلم لما وشها اتغير لونه فعلاً ورجليها ما شلتهاش بطريقة واقعية جداً !! علي عكس المشاهد اللي ياما اتعودنا عليها في السينما ان لما حد يغمي عليه تااااك !!! يترزع علي الأرض وعينيه تقفل واكنه اتضرب بمدفع ليزر مضاد للأطباق الطايرة !!


بس !! غير كده ولا هالة صدقي ولا وكيل النيابة "شريف" ولا اي حد تاني في الفيلم كان مقنع... ده طبعاً من الناس الكبيرة.!! نروح للي خنقني من الفيلم بقي !! هاتوا ورقة وقلم !!


الموسيقي في الفيلم كانت جميلة!! بس كل حاجة لوحدها ... يعني مشهد تلاقيها لون ومشهد تاني تلاقيها كلاسيك بطريقة تانية، مشهد تلاقيها خطرة وكلها حركات وبرضه لون تاني غير الاتنيين التانيين!! الشئ اللي خلاني اترحم علي "Troy" ولا علي "Brave Heart" وازاي الجمل الموسيقية كلها كانت لون وطعم واحد ولغاية دلوقتي لما بنسمعهم بنقول اه ده فيلم كذا !! لكن اتحدي حد دخل "هي فوضي؟" يعرف هو سمع ايه !؟ ولا الدموع !! اكن اللي المونتير كان قاعد فاضي بالليل فشغل شوية موسيقي فقالوا له خلاص قشطة هي دي موسيقي الفيلم !! ولا طعم ولا لون ولا ريحة !!


المشاهد تقطيعها غريب الي حد كبير ... تحس انه مستعجل عايز يخلص مش فاضي !! عايز يوريك حاجة من كل حد حتة من كل حاجة ..!! وتحس ده كمان في الملابس !! الناس مغيرتش هدومها كتير ... الأمين حاتم تقريباً طول الفيلم لبس طقمين وترينينج غير الميري طبعا اللي ضحكني والله !! في اول الفيلم الشرطة كانت مشتية !! وفي الجو كان عادي شمس وحلو ولطيف !! في اخر الفيلم الشرطة صيفت ولبست ابيض !! يعني ما شاء الله مواسم اتغيرت والأحداث عادي ماشية هي زي ما هي ولا حد سافر مثلا ولا حد راح ليبيا !! مفيش يوم وليلتين الفيلم كله بس المخرج حب يستعرض بالميري الأبيض والإسود !!


لفت انتباهي جداً المشاهد المتركبة زي افلام زمان !!! من نوعية البطل والبطلة يبقوا قاعدين في العربية و7 رجالة قاعدين يحركوا العربية ويزقوها يمين وشمال !! مع ان العربية ماشية لقدام اصلاً والخلفية بقي يا سلام وهي بتتحرك واكن البطل طاير !! واصلاً البطل ماشي علي سرعة 30 كيلو متر وكل اللي بيعمله اصلاً انه بيهز الدركسيون يمين وشمال !! فاكرين انتوا المشاهد اللي حسست الناس ان السواقة سهلــــــــة !!


فوجئت بأول مشهد بين "وكيل الينابة شريف" اللي هو يوسف الشريف و"سيينديا" خطيبة شريف وهما ماشيين علي الكورنيش والخلفية بتجرررررري وهما اصلا ماشيين في شارع من ازحم شوارع الكورنيش !!! ومكنتش مصدق نفسي حتي اللي ورايا افتكروني مجنون لأني كنت قاعد باتكلم ومفيش حد جنبي في الصف كله!! كان كل اللي جاي عليا ... هو لسه فيه كده ؟ هو لسه فيه كده؟ وطبعاً المشهد اتكرر في المشهد اللي كان المفروض فيه اني اتعاطف مع "حاتم" وماعرفش ليه المشهد اتركب مع ان فعلاً كان فيه مشاهد في المكان متصورة !! ليه مكملوش بقية المشاهد !!؟ وايه لازمة مشهد الشباب اللي جم يتريقوا عليه لما "نور" مشيت وسابته في النادي !! هو فيه حد بيعمل كده لسه !! الكلام ده كان ايام فريد شوقي احتمال لكن مين بيعمل كده بالطريقة الهبلة دي دلوقتي !!؟


المشهد اللي اقتنعت بيه من الربع ساعة اللي ملهاش اي لازمة دي، المشهد اللي تلي الموقف اللي سابته فيه "نور" في النادي، لما رجع للحجز وطاح ضرب في الطلبة بتوع المظاهرات ! وده تأكيد لفكرة الكبت اللي يااااااااااااه كانت زمان موجودة لما يوسف شاهين كان عنده حالة عايز يشرك الناس بيها !! فاكرينها بتاعت الأول دي ؟؟


أصلا شخصية "سيينديا" شخصية اوفر !! يعني فجة بالعربي يعني !! ومفهمتهاش يعني لا هي ولا ابوها !! اللي بالحرف قاله انها مختلفة وانت زكي وهتعرف تتعود عليها !! هو فيه كده يا عالم !! فيه حد هيقول علي نفسه كده ولا علي بنته كده !! وكمان حشره لجملة " اه معلش اصل عندي اجتماع في لجنة السياسات !!" حشر ملوش اي لازمة !! لأننا مش لازم نعمل كل عناصر الفيلم ليها لازمة !! ببساطة يعني مش لازم يبقي البواب اصله ابنه مسافر العراق بيحارب الأمريكان مع جيوش فتح الإسلام الكردستاني مثلاً !! والعجلاتي كان ابنه من اطفال الشوارع وكان هيبقي ضحية من ضحايا التوربيني لولا انه عفي عنه ولمه من الشارع ووداه مكتبة ماما سوزان واستفاد من مهرجان القراءة للجميع !!! عشان يبقي لمينا العراق وكردستان وامريكا واطفال الشوارع والقراءة للجميع وكأس الأمم وحسن شحاته والحزب الوطني والإخوان والإنتخابات ولجنة السياسات !!! مفيش داعي خالص للحشو يعني !! مش ممبار هو !!


التسابق علي توظيف المبررات والأسباب وتوظيفها بشكل غير مبرر دايماً بيفسد الدراما وبيحولها لسيرك من نوع اللي يحبنا ميضربش نار في فرحنا !! يعني تلاقي نفسك بتنط في اكتر من مكان وقبل ما رجليك تلمس الأرض وتفهم انت فين وبتعمل ايه تلاقي نفسك هوب نطيت في مكان تاني !! الكلام ده بان اوي في المشهد اللي عرفنا فيه ان "نور" منه شلبي خريجة الجامعة مبتعرفش تقرا انجليزي !! ومش فاهم ازاي بس معلش اهي قالت ورمت القضية في وشنا في كسر من الثانية !! لأنها زي ما احنا عارفين مستعجلة زي ما الفيلم كله مستعجل !!

.

بس تعرفوا المشهد ده مضيقنيش خالص... وفكرني بإعلان ميلودي "ده مش ملل خالص!!" ايوة بتاع "عزيزة عزيزة" يمكن عشان منة شلبي ممثلة زي ما قولت باستريح لرؤيتها علي الشاشة واداءها وايقاعها مريح جداً ومفيهوش تكلف وبتعرف تستخدم كل تفاصيل وشها في التعبير عن اذا كان الحزن او الفرح... برضه بدون تكلف !!

.

نرجع تاني للمشهد، وتأكيداً علي فكرة ان المخرج مستعجل عنده فيلم تاني اللي هو "حين ميسرة" واللي لسه عايز يبدأ فيه فمتعطلوناش يا اساتذة لو سمحت !! المبدأ ده اتجسد واتمعظم في المشهد اللي جيه فيه المفتش بتاع الوزارة يناقشها قالتله: "انا عارفه ان كل دي حجج كان لازم اعديها وانا معدتهاش وانا اسفه" وادورت وفتحت الباب ومشيت !! اكن المخرج مديها وقت معين تخلص فيه السطرين !! وبان بعد كده في مشهد وكيل النيابة "اللي مش فاهم ساذج ده ولا ايه" لما خطيبته "الأوفر" تكون واقفة في اشارة وبتشرب حشيش والأمين يسألها وتقوله حشيش !! يروح هو متغندر وقايله انا وكيل نيابة شبرا وخطيبتي معلش بتحب تهزر ويرمي السيجارة في الشارع !!! يا سلاااااااااام !!! ويمشوا ف الأمين يمسك السيجارة ويشتمهم بعد ما يمشوا !! ايه يا عم ده هو فيه كده !!؟


طبعاً معجبنيش المشهد بتاع لجوء "بهية" و"نور" لمكتب الإخوان والمعالجة الساذجة جدا بل والفجة لفكر الإخوان والكام كلمة اللي رماهم الممثل اللي مركب دقن وقال يعني ان هو ده فكر الإخوان !! وده طبعاً مش صحيح لأن بعيداً عن السياسة ... الإخوان يميزهم انهم بيتكلموا مع الناس بطريقة سلسلة قريبة منهم وعندهم حلول لكل شئ !!! علي عكس الأي كلام اللي اتقال في المشهد اللي برضه
حسيت انه مستعجل !! مخدش اكتر من 40 ثانيه علي الشاشة !! اللي هو يلا يا استاذ معنديش وقت عايزين نشوف قضية تانية نحشرها في الفيلم !!


عجبني.. اني فهمت حاجة من فيلم لـيوسف شاهين !! زمان كان حوار افلام يوسف شاهين كان لازم لازم يقع مني فيه حاجة !! لازم كنت ما سمعش فيه كلمة كلمتين 3 جمل مثلاً !! لكن يعدي كله مفهوم ده صعب !! لكن الحوار في الفيلم بشكل عام أفضل ما سمعت في أفلام شاهين، خصوصا الحوار الجميل يرد على لسان الشخصية الرئيسية حاتم.


لكن ارجع برضه في اخر الفيلم واعاني من مشاهد ملهاش اي لازمة !! ومختلقة ومفتعلة وغير واقعية !! زي المشهد اللي قالها فيه "تعالي معايا عشان تاخدي ابو صاحبتك" يعني ايه يعني !! شايله في التلاجة !!؟ ولما كممها قصااااااااااااااد 400 بني ادم علي كورنيش النيل في شم النسيم !! واكن مفيش حد واخد باله !! بس هو فطن لإن الناس هتبتدي تعلي صوتها في السينما لو المشهد ده عدي بالشكل ده فراح مزود مشهد البنت "الساذجة" اللي بتقول "ايه ده بصوا بصوا" وبتشاور عليه وهو بيكممها !! لكن الأمين حاتم الهمام يقولها "مغمي عليها المدام مغمي عليها" فترجع البنت "الساذجة" مرة تانية لنفس انفعالها اللي بدأت بيه المشهد وأكنها ماشفتش حاجة وتكمل ضحك وكلام مع صحابها !!! يا عالم هو فيه كده !!؟ ده كان زمانه اتقطع حتت اصلاً !!! ده ع الكورينش !!!!!!!!


ويكمل المشهد بحشر تاني لمشاهد ملهاش اي لازمة زي محاولة "نور" انها ترمي نفسها في وسط النيل !! و"حاتم" وهو بينقذها وبعد كده يديها فوق دماغها عشان يغتصبها ويجري ويسبها !! واكنه ولا "حاتم" اللي مدوخ مجرمين مصر والكل بيخافوا منه واللي ملوش خير فيه يبقي ملوش خير في مصر !! ومش خايف انه يتفقس وهو سايبها غرقانة في دمها كده !!؟ وتروح راجعة الصورة الرديئة المركبة علي خلفية "حاتم" وهو راكب علي الموتسيكل الميري بتاعه !! وهو لابس ملكي !! اكنه موتسيكل بابا الباشا !! وبرضه خلفية متركبة ليه واحنا ممكن ننزل نصور في الشارع !! ايه المشكلة يعني !! بالإضافة ان المشهد طلع ساذج جداً وفكرني بمايكل جاكسون في اغنية طلعت ليه في أواخر التسعينيات كان راكب فيها ارنب علي موتسيكل بس مش فاكر اسمها !! وحتي لو خالد صالح مبيعرفش يسوق موتسيكلات !! اعتقد ضرورة الدور وانه طالع أمين شرطة يبقي يتعلم سواقة !! مش قصة يعني ... مع اني اشك ان الحكاية كده لأني واثق انه لو كده كان فعلاً اتعلم ... الراجل حالق شعره اقرع بالموس !! فمش هيستخسر درسين علي موتسيكل ... ولكنها تفنينة اخري للمخرجين المجتمعين في هذا الفيلم !!


طبعاً الفيلم مليان مشاهد ساذجة ومضحكة جداً وبجد انا تعبت من الكتابة والفيلم لسه مليان يعني !! بس هاسيبلكم متعة الفرجة والنقطة من اخر مشهد في الفيلم لما الشعب !! فجأة يفتكر انه لازم ينتفض ومعرفش هي دي نبؤة ولا امل من شاهين !؟ ويزحف علي القسم عشان يفتك بـ "حاتم" وطبعاً مش هاتطرق لمأمور القسم الساذج برضه اللي حسسني انه اي عيل ممكن يضحك عليه مش حتة امين شرطة !! ونسيوا انه المفروض مأمور قسم شرطة شبرا !! يعني الجمهورية الصغري داخل جمهورية مصر العربية !!



ومش هاتكلم عن ظابط المباحث ولا عن جملة "ايوة كده يبقي القسم فضي!!" ولا هاتكلم عن مشهد الكنيسة المحشور في الفيلم !! ولا عن مشهد الناس اللي عماله ترقص دماغها وتتمايل ولا عن الشيخ اللي نصح "حاتم" انه يقوم يذكر الله وشاورله علي الناس دول !! واكن ذكر الله في الرقض والتمايل والطرق الصوفية !! ولا هاتكلم عن حاجات كتير اوي في الفيلم من اول صورة "نور" اللي نزلت دم !! لما "حاتم" ضربها بالنار في مشهد مفهمتوش الصراحة !! لحد المشهد الأخير اللي ضرب فيه "حاتم" وكيل النيابة "شريف" واكتفي برصاصة واحدة بدل ما يموته !! ولا كمان عن إنتحاره ولا علي المأمور اللي قاله "انت بتعيط ليه دلوقتي مش انت اللي عملت في نفسك كده!؟" يا سلاااااام وانت كنت عارف وساكت يا حبيبي !!؟ ده بالإشارة الي ان حاتم مكانش بيعيط اصلاً ولا دمع حتي !! طبعاً مع الإشادة بإن خالد صالح ادي المشهد ده ببراعة وفعلاً اقنعنا انه في لحظاته الأخيرة !


الشئ اللي يرجعنا لأول نقطة وهي ان الفيلم لا يعيبه غير صانعيه !!

لكن ممثليه فكانوا اكتر من رائعين !!

Tuesday, December 25, 2007

دي الفرحة عرفتها



شمس النهار هتجيني
هتغني وتصحيني
غنوة أمل وحياة
ولا عمري سمعتها
مع أول شوق هاروق
وهاشوف حاجات كتير
ما شوفتش زيها

عصفور جناحه حرير
هيطير لفوق ويطير
يحكيلي عن أساطير
ولا عمري سمعتها
مع أول شوق أنا هاروق
وهاشوف حاجات كتير
ما شوفتش زيها


الكون هيضحك تاني
والنور هيستناني
أضحك خلاص يا زماني
ما الفرحة عرفتها
دي الفرحة عرفتها ...
.
شمس النهار - وسط البلد

Tuesday, December 11, 2007

هاتى إيدك


من زمان عايش بعقلى وقلبى رافض فتح بابه

سبب مخاوفه كان اللى شايفه من الحب ومن صحابه

لكن إنتى إزاى فى لحظة خطفتى قلبى قولى ليه

علشان عرفتى أسرار مشاعرى انا قلبى أهه مادد إيديه

قربيلى ..

هاتى إيدك ..

نرقص رقصة للحياة

بسمة منك ..

ضحكة منى ..

إحساسى سافر منتهاه

دانا كنت شايف الحب لعبة قلبى ده مش قدها

كنت أخاف أخطى خطوة عقلى قاللى عكسها

عمرى ماتخيلت موقف عقلى مش راضى عليه

لكن إنتى هزمتى عقلى وبسمتك ضحكت عليه

قربيلى ..

هاتى إيدك ..

نرقص رقصة للحياة

بسمة منك ..

ضحكة منى ..

إحساسى سافر منتهاه


قربيلي - وسط البلد / كلمات: اياد ابو بكر

Sunday, December 02, 2007

مستنيكم في اللوبي



أحساس صعب اوي الفراق.. مش اول مرة افارق حد.. بس كنت فاكر اني نسيته، او ازاي بيكون

سالينا، وئام، منار، مجد، عوض، يسري، كينزا، كيمو، عبد الله، هيثم، فاطمة، تمارا، يافا، امين، اميرة، تالا، زينب، بيرنارد، ديانا، سحر، بيير، إيمان، وديع، سعد، الحسين، اسلام، خليل، هاشم، رؤي، نور.... كل الناس بجد كل واحد منكم ليه عندي ذكري، وحتي لو منكم اقدر اشوفوا في القاهرة او الإسكندرية فبرضه... انا بجد مفتقدكم


مفتقد في سالينا الوشوش الغريبة اللي كانت بتعملها، نظرتها لينا وهي لسه صاحية من النوم وصوتها لسه رايح وبتبص من تحت النضارة، مفتقد مناقشتها اللي يبان انها عصبية لكنها علي نار هادية.... مفتقدك


مفتقد في وئام التغير الغريب اللي بيحصل في كسر من الثانية لما كنت باتكلم معاها.. شوية تحس انها مركزة جداً وشوية مش مهتمة وشوية بتحاول ترجع تهتم تاني، مفتقد فيكي نظرتك الشريرة اللي بتبصهيا لما كونت بارخم عليكي، استمتعت جداً بكلامي معاكي وكونك انسانة عقلانية جداً الواحد يحب يتكلم معاكي فعلاً ... مفتقدك


مفتقد منار الشخصية المبتسمة دايماً، حتي كونك من فلسطين وانك محطوطة تحت كمية الضغط اللي اكيد موجود عندك ممنعكيش انك تبتسمي كل ما كنت بابصلك او باتكلم معاكي، مفتقدك وانت قصيرة بتتصوري جنبي وبتحاولي تتطولي نفسك! مفتقد اشراقك في اللون الأبيض... مفتقدك


مفتقد مجد حبيب قلبي البنوتة الصغنونة المشاكسة الغلباوية اللي تحس من اول نظرة انها من فريق روك امريكي !! مفتقدك في الصور وطبعاً بافتكر صورتنا المجنونة الشهيرة وانا شايل اللاب توب ....!! مفتقد ابتسامتك الهادية جدا الصبح وانت قاعدة جنب سالينا قدام الإودتوريم وشكلكم لسه صاحيين طازة!! مفتقد حكاويكي وفيلمك اللي خلاني ادمع مع اني مش اول مرة اشوف فيلم عن فلسطين! مش هتصدقي قد ايه بس .... مفتقدك


مفتقد عوض وهو بيتكلم وبيتناقش قدام الأودتوريم برضه وبيتكلم في كل حاجة... بس كنت باركز معاه اوي لما بيتكلم عن الإخوان او عن الشيخ حسان.. مفتقدك يا ريس وبجد من الناس اللي كنت احب اتكلم معاهم اكتر من كده... مفتقدك



مفتقد بهظ ... احمد يسري الشهير بـ بهظ بيه، معرفتكش اللي في اخر يوم بس نقاشاتك برضه كانت بتبقي ممتعة وحسيت انك حد فاهم هو بيقول ايه، ومبسوط جداً اني سجلت معاك حلقة من مدونة علي الهوا... مفتقدك


مفتقدك يا كينزا، مع اني متكلمتش معاكي الا اخر يوم او يومين بس كنت كل ما ابصلك افتكر حد من اعز اصدقائي... حتي مرة انا قولتلك انك شبه رضوي حد من صحابي... لما كنت باقولك اني مسمي مجد "نجم" ... مفتقد نظرتك وانت بتتكلمي واكنك مش فاهمة انا باقول ايه!! وبعد كده الاقيكي بتبتسمي وبتهزي راسك .. فأحس انك فاهماني ... قعدت مدة اركز انت بتعرفي تتكلمي عربي ولا يا دوب بتفهمينا بالعافية!! قولت يمكن تكوني تونسية من فرنسا زي اميرة، لكن لما عرفت انك جزائرية وسمعتك بتتكلمي عربي قولت يبقي هي مبتسمة كده بالطبيعة ... مفتقد الشال بتاعك كان بيعجبني اوي شكله .. شيك جداً، زعلان من نفسي اوي اني مقدرتش اوصلك للمطار وراحت عليا نومة!! مش هتصدقي زعلت من نفسي ازاي لما صحيت لاقيت الساعة 11 والمفروض اكون موصلك المطار من 5 ساعات !!! وكمان زعلان اني مرديتش اسلم عليكي في حفلة وسط البلد سلام الوداع وكده ... عشان كنت هاسلم عليكي في المطار!! مش هتصدقي قد ايه بس... مفتقدك



مفتقدك يا كيمو، مع انك شغال معايا في الراديو وممكن اشوفك... بس كريم اللي كان هناك في المنتدي كان صديق جديد بالنسبة لي، مفتقد ندانا علي بعض دايماً لما بنشوف بعض وشغلنا مع بعض واننا علي طول كنا علي خط واحد... مفتقد العرض بتاعك والليلة التحفة اللي اتعاملت لفيلمك "اتجاه المرج" ... كل ما افتكر طلعت معاك من الفندق لطريق السويس علي رجلينا ... اقول الحمد لله اني كنت صاحي لأني متأكد انك لو كنت مشيت لوحدك كنت توهت!! وحمدت ربنا اني كنت عارف الطريق... عارف! انا خدت في الطريق ساعة مشي معاك وساعة وانا راجع!! بس مبسوط اوي اني عملت ده.. حسيت اني دي هتبقي هي ذكري اننا سافرنا المنتدي ده... مفتقدك
مفتقدك يا هيثم وبجد كل ما افتكر وانت مطحون في الفندق رايح جاي كل ما اشوفك تكون بتطحن اكتر من المرة اللي قبلها ..!! بجد تعبت معانا جداً وفعلاً اتمني ان الصداقة بينا تستمر لأنك انسان مجتهد ونشيط جداً ... اينعم انت عملت فيا مقلب اني استقبل المشاركين من المطار وكانت لغبطة لي جداً في الكام يوم اللي قبل المنتدي... الشئ اللي خلاني احضر شنطتي قبل نص ساعة من الميعاد اللي كان لازم اروح فيه المطار عشان اسافر مع اخر فوج!! بس بجد انا سعيد اني اتعرفت عليك ... مفتقدك


مفتقدك يا فاطمة... ومفتقد برررررنس اللي كنت بتقوليهالي كل ما تشوفيني! قالولي عنك كلام حسسني اني هسافر مع اكلة لحوم بشر !! بس فعلاً لما قابلت واشتغلت معاكي اتأكدت ان اللي قالولي كده ... مبيفهموش في الناس!! ... بجد مفتقدك

مفتقد عبد الله مع انه هنا في القاهرة وممكن اشوفه بس ذكريات المنتدي كانت مضحكة... عبدالله كنت مرحب بالجميع من قبل المنتدي وكنت كاتبلي علي الوول بطريقة ودية جداً حسستني انك ابن عمي اللي في البرازيل..!! طبعاً كنت مبسوط ومتشوق اني اشوف مين الشخص المرحاب ده ... ولما شوفتك مستغربتش لأنك ما شاء الله مبتسم علي طول وابتسامة عريضة ..!! وبجد انسان محترم ولطيف جداً ونشيييييييط جداً ... تشرفت بمعرفتك يا ابو عبدالله


مفتقدك يا تمارا.. مفتقد لما كنت باشوفك وماعرفش ليه ... كنا دايماً بنعدي علي بعض وكل واحد في اتجاه، في اللوبي في المطعم في القاعة ... كنت دايماً بارفع حواجبي اكني مستغرب!! واقولك تماااااارااااا ازيك ؟؟ معرفتش اتكلم معاكي كتير عشان كان لازم تسافر تاني يوم وده كان شئ سئ جدا بس بجد انبسطت اني روحت وانا علي الأقل معايا صورتين او تلاتة ليا معاكي... وكفاية الصورة الأشهر في المنتدي واللي تصلح إعلان كما قال الكتاب!! بجد يا تمارا اتمني اشوفك تاني وبجد... مفتقدك


مفتقدك يا يافا ومفتقد لهجتك اللي ماكنتش عارف احدد اذا كنت مصرية ولا لأ ... وخصوصاً اسم يافا.. بس فاكر لما حسستيني ان الياهو غزا اللاب توب بتاعك .. وانا ماعملتش حاجة بس شكرك ليا كان شئ لطيف منك وبرضه انت نورتينا في الصورة الأشهر ... مفتقدك

مفتقدك حبيب قلبي يا أمين... انت انسان مجتهد جداً ومنظم جداً وبجد شرفت اني اشتغلت معاك وكان نفسي اكون اكتر مساعدة ليك من كده، في الأول ماكنتش متقبل فكرة المنتدي ... لكن اصرارك علي النجاح وتركيزك علي الشغل الخاص بشبكة المدونين الشباب العرب... هو اللي خلاني اروح في المقام الأول واقابل كل الناس اللي انا قاعد الساعة 5 الصبح باكتب عنهم .... مفتقدك

أميرة.. مفتقد فيكي شغلك الدائم، من الناس القليلة اللي مشوفتهاش بعيد عن شغلها هناك في المنتدي... كنت دايماً يا بتسجلي يا بتكتبي علي اللاب توب!! مفتقد فيكي الإبتسامة الجميلة جداً الهادية وطبعاً النظرة اللي واضح انها علي الرغم من انك تونسية لكن اخدتيها من كينزا ... النظرة اللي تحسسني انك مكونتيش فهماني او لاقية صعوبة في فهم العربي... بس طلعتي بتتكلمي عربي زي الفل!! مفتقدك هدوءك ودأبك علي شغلك ... مفتقدك

مفتقد يا تالا، البنت اللبنانية العملية جداً، مشوفتكيش في النقاش ازاي بس لما اتكلمنا اكتر من مرة علي العشا والفطار والغدا بالترتيب ده.. كان كلامك منظم جداً ومنطقي تماماً ... فاكر اليوم اللي جيتي فيه علي العشا وقولتيلي انت اكلك مش صحي تماماً وبدأني تنصحيني.. علي فكرة بانفذ النصايح لغاية دلوقتي.. وكل ما اجي احضر الغذا او اكل مع اهلي افتكر وابتسم وانت بتقوليلي فين السلطة فين الخضار ؟؟ وافتكر تاني يوم بعد العشا ده لما روحت وحضرت فطار صحي تماماً... مفتقدك


زينب!! يعني اجدع بنات لبنان... يعني اللي مبتسكتش علي حقها، الف مرة!! لأ كده بقي فرح!! بجد يا زينب انت من الناس اللي انا احترمتهم من اول تعاملي معاكي، حد عارفة حقوقك بجد وبتعرفي امتي تاخديهم بغض النظر عن ايه ومين وفين!!؟ هادية جداً مع انك شعنونة وطقة!! في نفس ذات الوقت.. فنانة وعجبني شغلك جداً ومتتخيليش قد ايه هافضل فاكرك ... زينب الطقة اللي نزلت في حمام السباحة الساعة 2 الفجر بهدومها!! عشان مجرد انها عندت انها ممكن تعمل ده !!! زينب بجد بجد بجد ... مفتقدك



مفتقدك بيرنارد... ومفتقد التهييس بتاعك وغناك لأغاني وسط البلد واحنا في الساقية قبل ما تسافر... فاكر اوي لما كنت اقولك حاجة ... برضة كنت بتاخد نفس المدة عشان تترجم كلامي ... وباضحك كل ما افتكر ان كان معظم اجاباتك ... إيه إيه، وطبعاً هافضل فاكر انك اديت التاكسي 10 دولار يعني 60 جنيه مصري من القلعة للمطار !!! مفتقدك


حبوبتي ديانا، هو مبدئياً وقبل اي كلام.. وحشتيني ومفتقد جداً البنوتة الصغيرة اللي تحس معاها وانت ماشي انك ماشي مع مدير ادارة مالية !! محامية صغيرة !! تحس انك ماشي مع حجة في الهندسة التحليلية ... مش عارف بس تحس انك ماشي مش مع مجرد بنوتة صغيرة جاية مصر عشان تحضر منتدي للشباب !! كنت زعلان اوي وانا بافرجك علي القلعة مع مي صاحبتك وايمان وجان وانت يا حرام كنت عمالة تحسبي وتجمعي وتضربي امتي ممكن تيجي تاني مصر... ومتصدقيش كنت مبسوط قد ايه علي الرغم من انك طيرتي نص الزيارة بس وانت خارجة من القلعة وبتقوليلي اوك انا عرفت امتي ممكن اخد اجازتي عشان اجي مصر !! وكنت زعلان اوي وعينيكي مدمعة واحنا في صالة المطار، ولما روحتي وكتبتيلي علي الوول "تعالي رجعني القاهرة" متصدقيش زعلتيني قد ايه!! بجد ... مفتقدك

سحر هانم عساف... لازم اقول كده عنك يا سحوره... من الناس الشيك جداً بتوع الشغل بس.. مشوفتكيش بتضيعي وقت او قاعدة بدون كتابة او نقاش، وكنتي دايماً شيك جداً وفاكر اول مرة اصلاً اتكلم معاكي لما قولتلك سحر ؟ صح... يا ريت قبل ما تروحي الفيلا بتاعتك اتصور معاكي بالطقم الرمادي الهايل ده! علي الرغم من انها بداية معرفة غريبة شوية ... بس بجد بعد كده لاقيتك حد مجتهد جداً جداً جداً وبتاعت شغل مش جاية تضيعي وقتك وبجد معرفتك كانت شرف ليا ... مفتقدك

بيير صديقي وتوأمي اللبناني، انا مقتنع بنظريتك اننا كنا توأم واني خدت انا الطول وسيبتلك شوية انشات... بيير انت من اكتر الناس اللي شوفتهم مبتسمين في حياتي – نمسك الخشب – بس بجد انت من الناس الهاديين والمحترمين جداً واعتقد اني لو كنت جارك او صديقك في الشغل اكيد اكيد كنا هنبقي اعز اصدقاء... لأنك من الناس القليلين اللي شوفتهم هناك يبان انك عمرك ما ضايقت حد في حياتك! فعلاً كان الواحد نفسه يتعرف عليك اكتر بس الجايات كتير ان شاء الله وفعلاً مفتقد ابتسامتك الهادية جداً... مفتقدك

إيمان ... او ايماني زي ما كان جان بيحب يغيظك ... الدكتورة الصغنونة اللي ماكنتش اعرفها الا لما جينا القاهرة... ايمان اول ما شوفتك في المنتدي قولت دي حد من الشباب الصغيرين اللي جم من الأردن مع الدكتورة عبلة اللي استقبلتهم اول ناس..!! وحتي صورتك كذا صورة بس ماكنتش اعرفك هناك... بس اتفاجأت لما روحت انك كنتي انت اللي بتدي المحاضرة مع كامل النابلسي وتمارا !! صدقيني اتفاجأت انك كمان جراحة !! كونك صغنونة ده ميمنعش انك زي العسل... انا اللي كبير زي ما عوض قال "هالك" بجد ايمان كنت مبسوط جداً وانت مبسوطة لما كنا بنلف في المتحف المصري ومنبهرة بالاثار


اتبسطت اوي اني قدرت اوديكي تشوفي عمارة يعقوبيان، واتبسطت برضه لما فكرت بسرعة وجبتلك كارت عليه مخطط لهرم خوفو من جوه عشان كنتي عايزة تدخليه ومعرفتيش، وسعادتي اني قدرت اصحي وماعملش زي ما عملت مع كينزا وكمان مع ممدوح الشخصية المرحة جداً والجدعة جداً والواضحة جداً واللي بجد كنت سعيد اني عرفته مع اني عرفته متأخر بعد المنتدي ما خلص... ايمان فعلاً اتعلمت منك حاجات حلوة وفعلاً ... مفتقدك

وديـــــــــــــــع ... تكشبيلااااااااااا سعيد اني اتعرفت بيك يا وديع، فعلاً من المغاربة القليلين اللي اتكلمت معاهم في المنتدي بس بجد كان الواحد نفسه يتكلم معاك اكتر والأغاني المغربية اللي اديتهالي اكتر من رائعة وباشغلها كتير، فاكر جداً شوية الصور الكتير اللي وريتهالي اللي فيها نفس فكرة وقوفك واكنك ساند علي برج ايفيل برجلك، كانت صور مبدعة يا ابو الشباب ... وديع علي الرغم اني ماكنتش فاهم نص كلامك وخصوصاً لما بتقلب فرنساوي... بس مفتقدك

سعد سعد يحيا سعد، انت من الناس الودودين جداً واللي تحب يكونوا اصحابك.. حد جدع جداً وفي الأول كنت متلغبظ وفاكرك معتز الغازولي !! لكن لما عرفت انك سعد سعد يحيا سعد وعملت كام حركة لطيفة كده استجدعتك والحمد لله من الناس اللي انا كسبتهم اصدقاء بعد المنتدي مش فيها

اللي كان نفسي فيه فعلا يا حسين.. انت واحمد خليل اني اتكلم معاكم اكتر من كده!! انا عارف اني كنت بارجع الساعة 8 الصبح وكنت علي طول بادخل انام ولا لحقنا نتكلم مع بعض... بس خليل فعلاً تحس انك دكتور قائد طيار محارب ... عارف اللي هو تبقي عايز تعرف انت بتعمل ايه في دول بقي؟؟ انسان محترم جداً وكانت معرفتك شرف ليا وفعلا انت والحسين صاحب الإبتسامة اللي تحسسك انه امير الدمام او ملك الأردن، الابتسامة اللي بوقار دي.!! فعلاً مفتقدكم

أما إسلام وهاشم ففعلاً مفتقد لما كنتوا بتشوفوني وانا قاعد في اللوبي وعلي النت... وهاشم يجري عليا ويقولي يا ابني يا ابني النت خلص من مصر خلاص!! بلهجته السعودية الودودة... اسلام انت اشتغلتني كام مرة كده وصدقتك ودي من المرات القليلة اللي حد يقدر يعمل كده فيا!! ومش هانسي المرة اللي في المطعم ساعة ما كان هاشم نزل القاهرة وحبيت انا وديانا وتالا نعزم بيرنارد من السي كلوب علي العشا معانا... وقولتله اكنك مكان هاشم!! ورايح اسألك هو هاشم اسمه ايه بالكامل ؟؟ ولاقيتك بترد عليا رد غريب جداً ... وبتقولي مايجي بيرنارد هو يسأل..!! انا هاوريك يا بيرنارد انا هاوريك !! انا هارجعك لبنان ماشي !! انا هاوريك !! انا ساعتها قولت هو ماله الولد هو عملك ايه عشان كل ده ... وكملت الدور عليا لغاية ما تقريباً صعبت عليك فضحكت !! معرفتك كانت اضافة ليا يا ابو اسلام والله، وكمان هاشم من الشباب اللي لسه بيعرف ان فيه ربنا ودي حاجة خلتني احترمك بيها جداً وحسيت انك ابن ناس ومتربي تربية سليمة، فعلاً... مفتقدكم

رؤي مش عارف اقولك ايه... غير انك شبه شيرين المغنية!!! فعلاً من الناس اللي اتبسطت اني عرفتهم وفعلاً كون حد صغير زيك كده ومعاه الشهادة اللي معاكي وكونك عايزة لسه تتطوري من نفسك ده قد ايه شئ ظريف جداً.. وكمان كنت باضحك لما هاشم يقولي لو شوفت ماما قولها اني مستنيها في اللوبي.. وطبعاً هاشم مش ابنك بس عجبني انكم واخدين بالكم من بعض كأهل بلد واحدة، فعلاً يا رؤي... مفتقدك

نور الصديقة المبتسمة ماشاء الله دايماً، كنت منورة في حفل الإفتتاح وانت في الزي البدوي... اللي وجدت صعوبة اني اقتنع انك وكونك انسانة صاحبة بشرة بيضا... انك تكوني بدوية من سيناء!! بس فعلاً لا يمكن انسي لما كنت واقفه جنب الإتوبيس مع عبد الله مسعد وبقية العصابة وقعدتي تنطي علي القزاز اللي جنبي عشان تسلمي عليا علي القزاز... وخليتيهم كلهم يعملوا كده... كانت حركة حلوة اوي حسستني في الأول اني من النادي الأهلي وطالع بعد ماتش مهم والناس بتسلم عليا !! لكن بعد كده زعلت وبصيت جوه الإتوبيس لأني حسيت اننا بنودع بعض وده شئ انا مش باحبه...
مفتقدك

وزي ما بدأت البوست بإني باكره الفراق او تقريباً كنت نسيت طعمه... أنا هاعتبر نفسي لسه هناك وانكم موجودين، مش مسافرين كل واحد في بلده، وإنكم نايمين كل واحد في الفيلا ولا في الغرفة بتاعته، وانا قاعد مستني اشوفكم لما تيجوا تاني... يلا بسرعة

مستنيكم في اللوبي


Wednesday, November 21, 2007

تقديم لفيلم "إتجاه المرج"


منتدي جامعة الدول العربية للشباب – العين السخنة – مصر
اليوم الثالث – 21 نوفمبر 2007


جيت برضه متأخر علي جلسة تقديم فيلم كريم الشناوي... كيمو صديقي من مصر! بس حضرت بسرعة وصورت شوية صور حلوة.. كريم كان بيتكلم بطريقة مشوقة وخفيفة جداً والناس كانت متحمسة جداً معاه وكانوا بيتكلموا معاه وبيسألوه اسألة كتيرة عن عمل ايه والتصاريح اللي اتطلبت منه ، كان حاضر الجلسة محمد مصطفى مخرج فيلم "أوقات فراغ" اللي برضه هيتعرض بالليل علي الساعة ثمانية بالليل...

كريم كسب أستاذ محمد مصطفي بطريقة جميلة جداً وخلاه يدخل في الكلام بطريقة حلوة وخلاه يتكلم معاه عن مشاكل التصريحات والأمن في تصوير السينما، وللأسف الواحد اكتشف ان التصريحات مشكلة معوقة بسكل كبير جداً وبشكل كمان متخلف في بعض الأحيان!! ان التصريح يبقي يومي !! ده شئ مزعج !! ان مخرج الفيلم وكاتبه يقعدوا يتناقشوا مع الأمن في فكرة الفيلم !! فده شئ مقرف !! المفروض ان الأمن شغلته أنه يكون أمن لكن انه يتناقش مع فكرة فنية اعتقد انه ميقدرش ومينفعش وميحصلش .... "مجد من فلسطين" دلوقتي سألتني : انت بتحكي بالعامية؟؟ واااو انا باحب المواضيع بالشكل ده، شكراً يا "مجد" بس الفكرة اني محبش اني اقرا كلام باللغة العربية الفصحي !! واللي ماحبوش لنفسي ماحبوش لغيري!! مش كده ولا إيييييييه ؟؟

القصة -الغير- قصيرة!


منتدي جامعة الدول العربية للشباب – العين السخنة – مصر
اليوم الثالث – 21 نوفمبر 2007


للأسف الشديد رجعت بعد ما كنت نازل اتغدي ..!! قولت ارجع اسمع الأشعار والقصص القصيرة اللي المفروض كانت هتبدأ بعد ما الأفلام الروائية القصيرة تخلص عرضها!! بدأت اول كاتبة تقص قصتها ... "سمر من تونس" بدأت قصتها "الغير" قصيرة تماماً ...
انا ماكنتش اعرف انها بدأت تقرا القصة من ساعة ما انا خرجت، "وئام من سوريا" هي اللي قالتلي اه هي بتقرا من اول ما خرجت!!! المشكلة ان "سمر" من اللجنة المنظمة !! وده كان شئ اعتقده بمثابة واسطة !! لأن لو كان اي حد من المشاركين هو اللي بيتكلم كان وقفوه ... مش هانسي امبارح "المحاضر" اللي عرف يسكت القاعة ويسيطر عليها ... سكتوه وقالوا له ان وقته انتهي !!

بدأت دلوقتي "نور من مصر" في قص قصيدة من قصيدتين هي كاتباهم ... بدأت بالقصيدة اللي باللغة العربية، قصيدة علي رغم بدايتها اللي معجبتنيش لكن نهايتها وبقية القصيدة حلو اوي ...

إجتماع شبكة المدونين العرب


منتدي جامعة الدول العربية للشباب – العين السخنة – مصر
اليوم الثالث – 21 نوفمبر 2007


صحيت متأخر!! للأسف الشديد في اهم جلسة في المنتدي، المفروض كنا نتقابل الساعة عشرة ونصف الصبح لكن صحيت قبل الظهر بمفيش كام دقيقة !! حضرت وكان موضوع النقاش ... "أخلاقيات التدوين" طبعاً لسه هاحاول اجمع الناس بتقول ايه ... بس بجد بجد مش مصدقني !!! ازاي اتأخر عن اليوم اللي انا جاي عشانه !!!؟

علي البوورد مكتوب اقتراحات للحملات اللي ممكن تتبناها الشبكة في الست شهور الأولي: (1) تشجيع حركة التدوين في سوريا، (2) تشجيع البرلمانيين والسياسيين علي التدوين.

مكتوب ان تاريخ 31 ديسمبر يكون الموقع شغال ونكون انتهينا من اختيار المدونيين المنسقين، وفي 1 يوليو هيكون ميعاد الإنتهاء من النظام الأساسي لأول مرحلة.

طبعاً فيه كلام كتير بس انا عشان باحاول الحق اللي فاتني مش لاحق اكتب!!

تم توزيع استبيان علينا الآن عن رأي المشاركين في فعاليات منتدي جامعة الدول العربية للشباب حول القمة الإقتصادية والتنموية والإجتماعية... ودلوقتي المسئولين عن القمة الإقتصادية المزمع عقدها بيحاولوا يشرحولنا جدوي القمة او قد ايه هي مهمة لينا. المدونين العرب

Tuesday, November 20, 2007

مشكلة المياه في المنتدي العربي!



منتدي جامعة الدول العربية للشباب – العين السخنة – مصر
اليوم الثاني - 20 نوفمبر 2007


اتضح ان مشكلة المياه في الوطن العربي مش هي المشكلة دلوقتي!! المشكلة دلوقتي هي مشكلة المياه في المنتدي!! إتضح ان قزازة المية هي المشكلة... القزازة في الفندق زي ما قولتلكم الصغيرة بخمسة جنيه والكبيرة بثمانية جنيه!! فطبعاً مشلة مش لطيفة لأن فيه حوالي 120 شاب وفتاه فتقريباً اكتر سؤال اتسألته لغاية دلوقتي هو : لو سمحت انت جيبت القزازة دي منين؟؟ أوك المنتدي بيوفر كارتين مية كتير ... بس الناس اكتر والدنيا شمس!! بس المضحك بجد المية اللي في المطعم واحنا بنفطر، بنتغدي او بنتعشي...
ان لو اتجرات وطلبت مية من الوييتر يوقولي لأ حرضتك انت كده هتدفع!! اقوله انا كده هاموت هات يا عم!!

الحوار الأوروبي واللاإستماع العربي


منتدي جامعة الدول العربية للشباب – العين السخنة – مصر
اليوم الثاني - 20 نوفمبر 2007


حاولت أحضر من الصبح لكن للأسف الشديد وعلي الرغم من اني نمت كويس جداً لكن مقدرتش احضر من بدري قبل ما انشر الكام بوست اللي فاتوا عشان ميتراكموش عليا ... بس حضرت علي الساعة 11 صباحاً اكتشفت بعد ما دخلت وبدأ الحوار يتمحور ... ان المحاضرة عن الحوار العربي الأوروبي، واللي ضايقني في الجلسة وعلي الرعم من ان المتحدث لبق جداً وتحدثه بالإنجليزية رائع .. بس كان فيه مشكلتين .. أول مشكلة ان المتحدث يتحدث باللغة الإنجليزية والحضور كله عربي !! اينعم فيه خدمة ترجمة الإنجليزية لكن للأسف واضح انها لعدد قليل ... منهم الدكتور اللي علي شمالي وهو طبيب من العراق ... لكن للأسف ولقلة سماعات الترجمة ... الحضور كله من الشباب بيتكلم .. كل مع اللي جنبه !! وفي مواضيع مختلفة منها المهم ومنها اللي هو مجرد طيارة ورق !! طبعاً مش هانكر ان اول سبع صفوف قاعده مستمعة كويس ... منهم "وئام" اهي علي يميني ... لسه ماشفتنيش بس مستمعة تماماً ... "تمارا من الأردن" داخلة بتجري في القاعة عايزة تلحق اخر شوية.

مشكلة الصوت مشكلة غريبة جداً ... برضه ازاي يكون فيه قاعة مؤتمرات علي مستوي خمس نجوم ويكون فيه مشاكل في الصوت بالشكل ده ...!!! مش عارف يمكن انا ودني بقت واخدة علي حساسية الصوت بس ... جودة الصوت مش علي المستوي خاااالص !!

دكتور عبد العزيز من السودان بدأ كلام محاضرته عن الصحة الإنجابية دلوقتي، دكتور عبد العزيز انا رأيي انه دكتور دماغ !! عجبني في المطار لما كنت بأستقبله انه ماستناش بقية الشباب لما ينزلوا من الطيارة !! دكتور زيه من المتحدثين المفروض يكون ليه استقبال لوحده ميستناش في المطار ساعة او ساعتين زي الشباب... اعتقد كان المفروض يحصل زي ما هو عمل بالظبط !! راح أجر ليموزين علي حسابه وطلع علي العين السخنة لوحده !!

حد لسه ماعرفتش اسمه بدأ الكلام ... بس جدع !! سكت القاعة كلها عشان تسمع الثلاث دقايق اللي عايز يقولهم، المشكلة ان اللي اتكلموا قبله كانوا وكأنهم بيأدوا واجب ..!! يعني عايزين يخلصوا الكلمتين اللي جايين يقولوها ويمشوا !! مع كامل الإحترام والتقدير.

سألت "وئام" علي إسمه لكن معرفتوش.

ولا حاجة !! كانت اجابة وئام لما سال ايه دور والدي ووالدتي في موضوع الصحة الإنجابية؟؟

الحوار العربي الأوروبي


منتدي جامعة الدول العربية للشباب – العين السخنة – مصر
اليوم الثاني - 20 نوفمبر 2007


بدأ "جوزيف" و"جان" ورشة العمل الخاصة بالحوار العربي الأوروبي، خلينا نقول ان الموضوع شكله هيوضح اكتر من الجلسة التعريفية اللي كانت قبل الإستراحة، اللي مكانش فيه حد بيسمع فيها اي حاجة..!! مع اننا في نفس قاعة امبارح اللي كانت فيها ورشة عمل "RespAct" اللي كانت الي حد ما كويسة، لكن للأسف احنا مش لوحدنا في القاعة!!! فيه ورشة تانية معانا ناطقة باللغة العربية، فتقريباً ولا احنا سامعين ومركزين 100% ولا هما أكيد لأن صوت جوزيف عالي جداً!!

بدأ يشرح ان الحوار العربي الأوروبي بدأ من سنة 1996 وانه تقريباً كل المؤسسات اللي موجودة دلوقتي هي مؤسسات حكومية.. زي الأمم المتحدة، الإتحاد الأوروبي... بس برضه فيه مؤسسات فيها شباب ومش حكومية وتابعة للمجتمع المدني!! وليه وجهة نظر ان كل المشترك بين المنظمات الغير حكومية انها مش بتمثل بس الشباب!! لكن بتمثل الشباب بداخل المجتمع المدني.

أنا مش مركز تماماً!! باسمع العافية!! الصوت بتاع الورشة اللي مشاركانا القاعة عالي جداً!! "سعد" اللي علي شمال دلوقتي لما قولتله كده ..... قاللي الناس كلها ليه جاية تشتكي!!؟

اتكلم عن المنظمة الشبابية الخاصة بالحوار العربي الأوروبي واللي مقرها بروسكل، وانها متكونة من 25 شاب بيجتمعوا غير انهم بيجتمعوا مرة كل سنتين ... طبعاً بطريقة دورية بيتناقشوا فيها وبيطوروا فيها النقاط المشتركة والمستجدة خلال السنتين اللي فاتوا..

مشكلة الحوار مش في اللغة الإنجليزية او الفرنسية.!! المشكلة ان جوزيف نفسه مش محاضر قوي... "وئام" بتقولي انا مش فاهمة !! انا بافهم انجليزي وفرنسي ومش فاهماه!! هو مش عارف يشرح ويوضح!! أنا معاها في الكلام ده لأن لغته مش صحيحة اوي بل والفكرة كمان مش واضحة!!

شبكة المدونين العرب

منتدي جامعة الدول العربية للشباب – العين السخنة – مصر
اليوم الثاني - 20 نوفمبر 2007


اتجمعنا كلنا علي الساعة عشرة مساءاً كل المدونين المشاركين في المنتدي، فاطمة من مصر، أحمد يسري من مصر، أميرة سويلم من تونس، أمين الزياني من تونس، محمد عبادة من فلسطين ... محمد اتعذب لغاية ما وصل المنتدي... احتجزوه الصهاينة علي المعبر وهو جاي علي مصر بس الحمد لله وصل امبارح في نص الليل تقريباً، ، أيوب المزين من المغرب، شريف عبد العزيز من مصر وأنا.

بدأ امين قائد الجروب في شرح فكر واجندة المدونين في المنتدي، حاولنا كمان محاولة تجهيز افكارنا عن انشاء شبكة المدونين العرب الشبان وايه ممكن افكارنا لما نبدأ الشبكة، طبعا اتكلمنا في اسم الشبكة وان كان فيه اقتراح اننا نزود كلمة تبرز تميزنا الي حد ما زي الفعاليين النشطين ... انا رفضت ومعايا فاطمة وتقريباً كل الحضور وافقونا عشان كده هنشد لينا اعضاء ضعيفة لغرضها انا تنتمي لشئ كبير او هنبعد منا المدونيين اصحاب الرأي لشعورهم بالتمييز!!

بدأنا نتكلم دلوقتي في موقفنا او سياستنا تجاه الشركاء، الأحداث أو الحكومات حتي، هل هنبقي مع ولا ضد ولا محايدين... يعني لو خدنا مثل منع وحظر التدوين في سوريا... هل ممكن نعمل حملة للسماح بالتدوين في سوريا او اي بلد عربي ممنوع فيه التدوين؟!

أحمد يسري من مصر، دلوقتي بيطرح فكرة هتهد فكرة شبكة المدونين العرب الشبان!! بيقول ان التدوين اصلاً تجربة شخصية مينفعش اننا نحطها في قالب شبكة أو منظمة!! كده هنمسخ منه صفته الشخصية... الكل بيستمع بس اكيد لسه هنتكلم ونتناقش في الفكرة.

شريف من مصر، بيطرح فكرة انا شايفها حلوة! هو مش عايزنا نبقي تابعين لأي ايدلوجية... عايزنا نبقي ضد اننا نبقي في اطار معين منخرجش منه، عشان منسلخش التدوين من صفته!! الناس بتتكلم دلوقتي في الموضوع ده وانا معاهم الصراحة!!

اندمجنا في الكلام... معرفتش اجمع الكلام لأني ركزت شوية اكتر مع الكلام... بس احنا دلوقتي بنحضر لإجتماع الغد الرئيسي.

Monday, November 19, 2007

عشان الإعلان بس!


منتدي جامعة الدول العربية للشباب – العين السخنة – مصر
اليوم الأول - 19 نوفمبر 2007


بعد استراحة الغداء عملت اكتر من حاجة كانت متأخرة عليا، منها اني ابعت تصميم بانر حملة "رابطة المتطوعون في العمل" لكسوة الأطفال الأيتام بطاطين في الشتاء، وبعته أخيراً بعد طول عناء ... وشوفت "وئام" من سوريا ... وئام حد من الناس اللي تحب تقعد معاهم، انسانة هادية مبتسمة ما شاء الله طول الوقت، ابتسامة هادية مش سمجة ولا بلهاء !! متحدثة لبقة مش عشان مجرد انها بتتكلم لكنة غير مصرية!! لأ حتي لما كنت مش بالحق افهم هي بتقول ايه وتلاقي علي وشي علامات السكوت !! كانت بتقولي يعني بالمصري : وتعيد نفس كلامها بنفس النكهة بس واحدة واحدة.

حضرت جزء صغير جداً من حفل الإفتتاح الرسمي " الحضور فيه كان بالزي الوطني للدولة " بعد ما عرفت ان السيد عمرو موسي سافر لبنان عشان الإنتخابات هتبدأ هناك، ومش هيقدر يحضر حفل الإفتتاح..!! مع ان ميعاد الإنتخابات معروف من فترة – زي ما قالت فاطمة إمام من مصر – فإزاي يكون المنتدي برعايته ويذكر انه حاضر وميحضرش ..!!؟؟

لاقيت ناس كتير وأزياء اكتر وكانت الحفلة متعة في حد ذاتها ... قعدت امشي بين الصفوف واصور اللي اقدر عليه، لاقيت "وئام" وكانت ما شاء الله متأنقة !! زيها السوري المتألق كان بجد مخليها سوبر ستار ..!! معرفش ليه خرجت بعد الحفلة وراحت تغير هدومها !!!!! ومشوفتهاش بقية السهرة لأني كنت مشغول في حاجات تانية وأظنها نامت ... قبل ما الجلسة الإفتتاحية تخلص كنت أنا خرجت ولاقيت مجموعة الظباط الأحرار !! مجموعة من الفنانيين والمبدعين الشباب العرب اللي مكانش عاجبهم ان الجلسة محضرهاش عمرو موسي ... وقاعدنا نهرج ونصور صور لا تمت بالمنتدي بصلة لا من بعيد ولا من قريب ..!! "كريم الشناوي – مصر" و"سلينا – سوريا" كانوا من اكتر الناس المطرقعين اللي موجودين... انا وسلينيا اتصورنا شوية صور برضه تهريج حاطتها يمكن علي البوك مفيش داعي انها تبقي هنا.

روحنا للفندق اللي احنا نازلين فيه "Grand Hotel" اللي بيبعد خطوات عن "Sea Club" اللي بتحصل فيه كل فاعليات المنتدي، عشان نغير هدومنا الرسمية ونلبس لبس عادي نكمل بيه السهرة... طبعاً بعد الرجوع تاني كله أخد مكانه في الملجأ اللي هو صالة الإستقبال بتاعت السي كلوب.

بدأنا علي الساعة عشرة ونص بالليل اجتماع تحضير ورشة عمل المدونين اللي كان المفروض بعد العشاء ... اتأخر وبدأت انام وانا قاعد لكن امين الزياني منسق مجموعة المدونين فضل اننا انا وهو واميرة سويلم من تونس اننا نبدأ نقاش وتحضير .. اتكلمنا عن كلام انا شايف انه لو اتعمل هتبقي حاجة حلوة جداً، اتناقشنا في انشاء شبكة للمدونين العرب وكيفية تجهيز لموقع وشبكة بمثل هذا التشعب ...

خلصنا الإجتماع علي كلام جميل وتجهيز للقاءنا غداً مع كامل اعضاء الفريق اللي ما شاء الله كانوا مشغولين في الدي جي وكالعادة العذر كان "محدش قال !!" مع ان المفروض اننا هنا عشان نقول وعشان نجتمع يعني لو محدش قال نقول احنا ... بس المهم ، في انتظار بكرة هيحصل ايه ؟؟

موقف غريب جدا حصل من ادارة الفندق، في حدود الساعة 12 بالليل طلع شباب من معانا...، إسلام، احمد وسعد لأقرب بنزينة علي الطريق عشان يجيبوا مية وبيبسي وشيبسي والحركات يعني!! لأن قزازة المية هنا اغلي من الغرفة في حد ذاتها !!

راحوا الشباب ورجعوا وجابوا اللي جابوه الأمن رفض دخولهم بالمشروبات والشيبسي !! يمكن مش ده المهم لأن دي ممكن تكون تعليمات ... المشكلة في اللي قاله الأمن ..!! قال افتحوا القزايز واشربوا منها وادخلوا !!!!! يعني لو دخلوا كده هيتاجروا فيها !؟! طبعاً انك تفتح قزازتين مية لكل مواطن عشان تشرب منهم منظر مش لطيف خالص واهانة لنزلاء في فندق مفترض انه 5 نجوم وهو ستيلا دي ماري! "عشان الإعلان بس !!"

مواطن عربي مسئول


منتدي جامعة الدول العربية للشباب – العين السخنة – مصر
اليوم الأول - 19 نوفمبر 2007


جلسة تعريف برنامج او بوابة مواطن عربي مسئول "RespAct" واللي اتكلم عنها مسئول مؤسسة إقتدار "Information and Communication Technology for Development in The Arab Region – ICTDAR” عجبنتي جداً، الفكرة نفسها واننا نبدأ نطور التكنولوجيا في خدمة اهداف التنمية ... يعني بالعربي، عجبني ان البرنامج طور لعبة لتأصيل مفاهيم التنمية والتطوير للمواطن العربي بطريقة تفاعلية سهلة عن طريق ألعاب والمشاركة بسواء مواضيع او فيدهات او ارآء خاصة بمتصفحي الموقع ... طبعاً لسه هاشوف الكلام ده كله اول ما اوصل لإنترنت فائق السرعة ولا حتي محدود السرعة !! للمرة التانية بنتواجد في قاعة مفترض انها للمؤتمرات وللمرة التانية مفيش انترنت !! ازاي مؤتمر تابع لمنظمة تكنولوجية بتعمل كل الكلام الحلو اللي انا حسيته وباقوله في اول المقطع ده .. ومفيش خدمة انترنت في القاعة !!؟

عجبني ان البرنامج لسه بيطور نفسه والقائمين عليه مش محبطين، بمعني ان الموقع لسه حالياً شغال فيه بس 4 الي 5 اشخاص ..!! بس المسئول عن الموقع والبرنامج بيقول ان البرنامج هيبقي "Open Source" وان اول ما يجهز هتتبناه اكثر من منظمة بحيث تكون كل منظمة مسئولة عن جزء من البرنامج.

مشاركة من مصر مش عارف اسمها، قالت ان المرحلة العمرية المستهدفة من البرنامج هي بتقترح انها تكون من 18 – 40 سنة ... الشئ اللي خلي المشاركين يتجهوا في الحوار حول المرحلة العمرية ... كام تكون ؟ بس انا عايز اسأل عن حاجتين مهمتين جداً ... اول حاجة اسم الراجل المسئول اللي بيتكلم ؟ لأن ده شئ مهم بالنسبة لي ... تاني حاجة عن ليه ميتعملش Game تسهل علي الشباب معرفة كل محتويات وافكار واهداف البرنامج !!؟ لأني اكتشفت ان مفيش لعبة زي ما انا كنت معتقد ... المسألة انهم استخدموا كارتون توضيحي ..!! عايز اسأل ليه مفيش لعبة زي "CIVILIZATION".

سألت الأسئلة بتاعتي !! وعرفت ان اسمه زياد من لبنان، وان فيه كارتون او لعبة توضيحية بس بسيطة !! لأ انا عايز لعبة زي "CIVILIZATION" مليش دعوة !! احنا مش اقل من اللي عملوا اللعبة دي ... تاخد مهما ما تاخد مننا !! المهم تتعمل ..!! واشتكيت ان ازاي قاعة مؤتمرات وتكنولوجيا معلوماااااات ومفيش انترنت !! زياد قالي انه ملوش ذنب لكن هيوصل شكوتي ...

كلمة مواطن عالمي ... كلمة من اميرة من مصر، عجبتني جداً ... كده يبقي فيه "قرن الديناصورات" و"مواطن عالمي" ... طبعاً انا عارف اميرة تقصد ايه بس اهي من الكلمات اللي صوتها حلو! المواااطن العااالمي ..!!

كلام ماعرفش ايه لازمته الصراحة بس فجأة لاقيت استاذة اعتقد من تونس وزي ما رؤي من السعودية سمتها "المحاربة" قالت كلام كبير اوي وانتوا قادة الغد .. انتوا قادة المستقبل .. وكلام كتير حاولت ما اسمعوش مع كامل احترامي ليه بس هو كلام تشجيعي ملوش طائل ... كلام من الماركات العربية اللي احنا متعودين عليها في عالمنا العربي اللذيذ !!

صحيت وكأني منمتش!


منتدي جامعة الدول العربية للشباب – العين السخنة – مصر
اليوم الأول - 19 نوفمبر 2007


ثلاث ساعات بس وصحيت لوحدي قبل ما المنبه يضرب !! ولأول مرة !!

الجلسة الإفتتاحيية للمنتدي والكلمات الإفتتاحية بدأت في قاعة بفندق "سي كلوب" الساعة 9 صباحاً والشئ الغريب ان مفيش انترنت في القاعة !! والمفترض انها قاعة اجتماعات !! اول غلطة في الفندق اللي اعتقده جميل وهادي جداً.

كلمة برنامج Capacity 2015 التابع لبرنامج الأمم المتحدة الإنمائي "UNDP" ألقتها الدكتورة عبلة العماوي ... دكتورة عبلة اللي كنت استقبلتها مع وفد من 22 شاب وفتاه من الآردن واللي رفضت انها تستني اكتر من ساعتين في المطار عشان الإتوبيس يجي !! وجبتلها اربع باصات نقلتها ووفدها.

مرة تانية يجي ذكر الأهداف الإنمائية للألفية !! ابقوا فكروني فعلاً اعرف ايه هي الأهداف الإنمائية للألفية !!

كلمة برنامج الأيدز التابع للأمم المتحدة .. الممثل للبرنامج بدأ علي طول الكلام بطريقة لفتت نظر الناس كلها !! من غير صباح الخير وكمان بيتكلم عن ايه !!؟ بيتكلم عن الإيدز !!!! جانبي "أفنان" وهي منسق برامج التعليم في المحميات من الأردن .. بتقول ان موضوع الأيدز محشور حشر !! وكمان خمس ساعات أفلام عن الأيدز !! مش كده يعني ..!!

كلمة نائب مؤسسة اقتدار التابع دكتور زياد، وهو برنامج اقليمي مركزه القاهرة تابع لبرنامج الأمم المتحدة الإنمائي يستمد اهدافه من تقرير التنمية العربية، والحمد لله قال صباح الخير !! وكمان خص الشباب بصباح الخير مخصوصة!! يعيشك حبيبي !! اعلن النائب عن برنامج انتجه برنامج اقتدار اسمه "مواطن فعال" RESPACT – Responsible Citizen Act ودعانا لجلسة تعريفية عن البرنامج عشان ياخد ارآنا ونتواصل لأنه برنامج لينا في الأصل.

كلمة أستاذ عبد الله ممثل البرلمان العربي الإنتقالي... احب اني اعرف ايه هو البرلمان العربي الإنتقالي .. برضه ابقوا فكروني اقرا عنه ..!! تقريباً كلمة البرلمان العربي مؤثرة علي كلام ممثله !! الكلام مفهمتش منه ايه هو البرلمان ومفهمتش من كلامه ولا الكلمة الشعرية اللي القاها ايه المفروض اننا نعمله ؟؟

قرن الديناصورات !! كلمة قالتها ممثله منتدي الشباب الخليجي ..!! انا مش افهم كان قصدها ايه بس هي اللي قصدته ان الفجوة اللي بينا وبين العالم كبرت .. اننا بقينا في قرن الديناصورات والناس في مكان تاني خالص ...\بس عجبتني كلمة قرن الديناصورات !!

كلمة منظمة العمل الدولية الدكتور عبد الكريم ... وكلمة وتحية للشباب مع امل بأن تزيد مشاركة الشباب في البرلمانات العربية لأنها قليلة جداً ...!! بس متقولش برلمانات بس !!

لفت انتباه فاطمة امام المشاركة معايا في جروب المدونين في المنتدي، اننا احنا الإتنين مش لابسين اي حاجة تدل اننا من مصر ... الشباب والصبايا كله لابس بادجات او رست بألوان بلادهم .. قالتلي عايزين نجيب بادجات مصر علي فكرة!! قولتلها اوك او نجيب كوفيات الأهلي ...!! بصتلي بصة تعني انها زملكاوية .. قولتلها بصي قدامك طب !! بس البنت طلعت اجدع مني وقالتلي ممكن البسها معاك تضامن !! هو ده الكلام !!

طبعاً واضح اني باكتب ومازلت كلمة ممثل منظمة العمل الدولية بتضخ ارقام ونسب وكميات بليونات دولارات !!

كلمة مرة اخري للدكتورة عبلة للتعريف بفكرة تعزيز قدارت المنطقة العربية لتحقيق اهداف المنطقة العربية، استعرضت جروب المنظمة التابعة ليها البرنامج واللي بيتكون من 22 شاب وفتاه بعمر 15 سنه ... اللي انا كنت استقبلتهم في اول يوم بهدلة .. اقصد تطوع ليا في استقبال الوافدين.

للمرة التانية تذكر كلمة الأهداف الإنمائية ... بس الحمد لله عرفت انهم 8 غايات و28 مؤشر وان الأهداف دي مقدر ليها غاية سنة 2015 لتحقيقها ... منها خفض الفقر والجوع الي النصف ، تحقيق شمولية التعليم الإبتدائي والألزامي، تحقيق المساواة في العمل
الإجتماعي، خفض وفيات الأطفال، خفض وفيات الأمهات، خفض وفيات الإيدز والأوبئة، وتحقيق شراكة عالمية ... كل ده مقدر ليه انه يحصل في 2015 .... ممكن حد يصحيني لما ده يحصل ؟؟

الصوت بدأ يظهر بطريقة عربية جميلة ..!! كله بدأ يمل وكله بدأ يتكلم بطريقة غير منظمة والممثلين مازالوا يتكلموا شارحين ازاي هيتم سير عمل فرق العمل في المنتدي.

Saturday, November 17, 2007

مش عارف أحضر الشنطة



منتدي الجامعة العربية للشباب – العين السخنة – مصر
اليوم صفر – 17 نوفمبر 2007


التحرك بالأتوبيس الي العين السخنة كان اسهل الخطوات في التجهيز لرحلة منتدي الجامعة العربية للشباب، اولاً حبيت اني اكون مساعد جيد ومرحب بضيوف بلدي... اتصلت بمنسق أعمال المنتدي هيثم كامل عشان اقوله انا معاك يا معلم!! هيثم مكدبش خبر وكلمني وقالي بكرة اول وفودك اللي هتستقبلها مطار القاهرة.

كلمني الساعة 10:45 بيقولي فيه طيارة الساعة 11:20 الصبح !! يعني بعد نص ساعة ... ساعتها قولتله هيثم انا ساكن جنب المطار مش نايم جنب المطار ... بس روحت واستقبلت وفد جاي من الأردن قائدة الجروب ست زي العسل .. د عبلة استقبلتهم ومشيتهم في اتوبيسات غير اللي المفروض كانوا هيروحوا فيها عشان اتأخرت !!

روحت نمت وعشان اصحي اقابل جروب بالليل ... الجروب ده هو اللي تقريباً حسسني بالموضوع ! حسسني اني علي وشك تجربة حلوة، حاجة جديدة عليا ... ليه ؟

اقولكم ليه ... انا طول عمري في النشاطات الطلابية بس كان دايماً بتبقي النشاطات دي نشاطات بين طلاب الجامعات المصرية، فكانت دايماً الكلام اللي بيتقلب في دماغي كان واحد من خلفية اجتماعية وثقافية واحدة !! قابلت وئام وسلينا من سوريا ... البنتين دول من كلامي معاهم اللي متعداش فترة انتظارنا لعبد الفتاح انه يوصل علي الخطوط الليبية .. بس كلامهم اللي هاتكلم عنه بعد كده اثر فيا الي حد كبير... كلام غير !! مختلف من خلفية مختلفة ، ناس فاهمة هي بتقول ايه ومش هاقول ان كلامهم كله كان صح بس اللي عجبني فيه انهم مش ناصريين واللي صدمني فيه ان مفيش مدونات في سوريا !! ولا تعرف تقرا مدونات ولا يكون ليك مدونة اصلاً ..!!! عايزكم تصلوا علي النبي كده في سركم وتشكروا اونكل طارق ..!!

لسه زي ما وعدت "سيلينا – سوريا" اننا هنكمل كلامنا ... انا دلوقتي في بلكونة غرفتي في ستيلا دي ماري بس لسه ماشوفتش سلينا ... لما نكمل كلامنا يمكن اقولكم علي بقية الكلام ... ولا بلاش عشان وئام قالتلي متنشرش الكلام ده !!

Wednesday, September 05, 2007

تست تست واحد اتنين تلاتة


حاجة غريبة جداً حصلت

ناس اتصلوا بيا وقالولي ان جدي اللي في البلد مات !!

لا حول ولا قوة الا بالله ... دانا لسه كنت شايفة من كام اسبوع

طب يا جدعان ايه اللي حصل ؟؟ مانعرفش ..

طب ايه كان عنده ايه ؟؟ مانعرفش ..

طب المستشفي قالت ايه ؟؟ لا ما نعرفش .. اصل اهل جدك مكتمين علي الموضوع


طب ازاي طب انا من حقي اني اعرف ايه اللي حصله ... ده جدي يعني

مانعرفش مانعرفش مانعرفش !!


الغريب !! ان تاني يوم وانا بأجهز نفسي اني اروحله

حد اتصل بيا وقالي : جدك نزل يصلي الفجر معانا !!!

يا ربي !!! ازاي بقي !! هو مات ولا لسه عايش


والمشكلة اني ماعرفش اتصل بيه ازاي

مفيش وسيلة بينا للإتصال !!

وقالولي ان جدي لما خرج يصلي قالهم انه كويس وان مفيش حاجة

بس تقريباً اهل البلد محدش كتير منهم شافوا

فبرضه ترتيبات الميتم كانت مستمرة !!

والخبر انتشر في البلد كلها


وجدتي قالت في قعدة مع صحابها يا حبايب الحج بخير

ولا حصل حاجة وصحته "زي الفل" انا مش عارفه مين اللي قال الخبر ده

برضه ستات البلد مصدقوش جدتي


مشكلة كبيرة حصلت في العيلة !!

طب نأكد للناس ازاي ان جدي لسه عايش

احنا نفسنا نتأكد ازاي ان جدنا لسه عايش


انا قولت مبدهاش انا مسافر يعني مسافر

واللي يحصل يحصل بقي ... ده جدي يعني !!

وانا مسافر واول ما دخلت البلد الناس مفيش علي لسانها الا سؤال واحد

هو ليه الحاج مطلعش بنفسه يقول انه كويس وانه لسه مامتش

ليه مش عايز يظهر تاني بعد صلاة العشا


بأبص لاقيت عيل صغير كده بيجري بيقول

عم الحاج ظهر عند برج الكهربا

عم الحاج ظهر عند برج الكهربا

عم الحاج ظهر عند برج الكهربا


مسكته من قفاه ... خد تعالي يا ابني عم الحاج مين ؟؟

قالي عم الحاج جدك يا استاذ !!!


الواد ده عرفني منين اصلا !!؟

هو انا بقيت مشهور اوي كده !!

هو ايه اللي بيحصل وليه كل ده بيحصل اصلا

جريت علي بيته لأني خلاص بقي عايز اتاكد هو ولا مش هو

عايش ولا ميت

فوجئت ان بيت جدي حواليه قلق وماعرفتش ادخل

قعدت طول الليلة بارغي مع الناس وانا مش فاهم انا ليه هنا اصلا

اللي يقولي انه مات وهو شاف جثته بنفسه

واللي يقولي ده كانوا ناقيلنه في عربية وهو اللي كان شايله

واللي يقولي دي حركة يا استاذ عشان جدك يشوف حسه في البلد !!

واللي يكذب الباقيين ويقولهم انت بتفتروا علي الراجل

واللي يقولي واللي يقولي واللي يقولي


وانا قاعد مش فاهم حاجة

بس طن في وداني صوت ميكرفون البلد وصفرته العالية

اللي خلتني اسد وداني عشان ما فقدهاش


لاقيت واحد صوته سئ جداً بيقول :

تست تست تست واحد اتنين تلاتة


يا أهالي البلد الكرام

الحاج بكره عنده اجتماع مع شيخ الغفر عشان يتفقدوا اي حاجة!!!


والصوت اتقطع فجأة ورجعت صفارة الميكروفون تاني

لدرجة خلتني اغمض عينيا

من كتر ما انا خايف علي ودني انها تطير من صوت الصفارة


فتحت عينيا بس ملقيتش حد من اللي كنت باكلمهم حواليا
لاقيتني قاعد في سيلنترو وماسك جرنان الدستور في ايديا

!!!



----------------------------

ملحوظة : جدتي متوفية من 5 سنين وجدي عايش هنا في القاهرة