Sunday, December 02, 2007

مستنيكم في اللوبي



أحساس صعب اوي الفراق.. مش اول مرة افارق حد.. بس كنت فاكر اني نسيته، او ازاي بيكون

سالينا، وئام، منار، مجد، عوض، يسري، كينزا، كيمو، عبد الله، هيثم، فاطمة، تمارا، يافا، امين، اميرة، تالا، زينب، بيرنارد، ديانا، سحر، بيير، إيمان، وديع، سعد، الحسين، اسلام، خليل، هاشم، رؤي، نور.... كل الناس بجد كل واحد منكم ليه عندي ذكري، وحتي لو منكم اقدر اشوفوا في القاهرة او الإسكندرية فبرضه... انا بجد مفتقدكم


مفتقد في سالينا الوشوش الغريبة اللي كانت بتعملها، نظرتها لينا وهي لسه صاحية من النوم وصوتها لسه رايح وبتبص من تحت النضارة، مفتقد مناقشتها اللي يبان انها عصبية لكنها علي نار هادية.... مفتقدك


مفتقد في وئام التغير الغريب اللي بيحصل في كسر من الثانية لما كنت باتكلم معاها.. شوية تحس انها مركزة جداً وشوية مش مهتمة وشوية بتحاول ترجع تهتم تاني، مفتقد فيكي نظرتك الشريرة اللي بتبصهيا لما كونت بارخم عليكي، استمتعت جداً بكلامي معاكي وكونك انسانة عقلانية جداً الواحد يحب يتكلم معاكي فعلاً ... مفتقدك


مفتقد منار الشخصية المبتسمة دايماً، حتي كونك من فلسطين وانك محطوطة تحت كمية الضغط اللي اكيد موجود عندك ممنعكيش انك تبتسمي كل ما كنت بابصلك او باتكلم معاكي، مفتقدك وانت قصيرة بتتصوري جنبي وبتحاولي تتطولي نفسك! مفتقد اشراقك في اللون الأبيض... مفتقدك


مفتقد مجد حبيب قلبي البنوتة الصغنونة المشاكسة الغلباوية اللي تحس من اول نظرة انها من فريق روك امريكي !! مفتقدك في الصور وطبعاً بافتكر صورتنا المجنونة الشهيرة وانا شايل اللاب توب ....!! مفتقد ابتسامتك الهادية جدا الصبح وانت قاعدة جنب سالينا قدام الإودتوريم وشكلكم لسه صاحيين طازة!! مفتقد حكاويكي وفيلمك اللي خلاني ادمع مع اني مش اول مرة اشوف فيلم عن فلسطين! مش هتصدقي قد ايه بس .... مفتقدك


مفتقد عوض وهو بيتكلم وبيتناقش قدام الأودتوريم برضه وبيتكلم في كل حاجة... بس كنت باركز معاه اوي لما بيتكلم عن الإخوان او عن الشيخ حسان.. مفتقدك يا ريس وبجد من الناس اللي كنت احب اتكلم معاهم اكتر من كده... مفتقدك



مفتقد بهظ ... احمد يسري الشهير بـ بهظ بيه، معرفتكش اللي في اخر يوم بس نقاشاتك برضه كانت بتبقي ممتعة وحسيت انك حد فاهم هو بيقول ايه، ومبسوط جداً اني سجلت معاك حلقة من مدونة علي الهوا... مفتقدك


مفتقدك يا كينزا، مع اني متكلمتش معاكي الا اخر يوم او يومين بس كنت كل ما ابصلك افتكر حد من اعز اصدقائي... حتي مرة انا قولتلك انك شبه رضوي حد من صحابي... لما كنت باقولك اني مسمي مجد "نجم" ... مفتقد نظرتك وانت بتتكلمي واكنك مش فاهمة انا باقول ايه!! وبعد كده الاقيكي بتبتسمي وبتهزي راسك .. فأحس انك فاهماني ... قعدت مدة اركز انت بتعرفي تتكلمي عربي ولا يا دوب بتفهمينا بالعافية!! قولت يمكن تكوني تونسية من فرنسا زي اميرة، لكن لما عرفت انك جزائرية وسمعتك بتتكلمي عربي قولت يبقي هي مبتسمة كده بالطبيعة ... مفتقد الشال بتاعك كان بيعجبني اوي شكله .. شيك جداً، زعلان من نفسي اوي اني مقدرتش اوصلك للمطار وراحت عليا نومة!! مش هتصدقي زعلت من نفسي ازاي لما صحيت لاقيت الساعة 11 والمفروض اكون موصلك المطار من 5 ساعات !!! وكمان زعلان اني مرديتش اسلم عليكي في حفلة وسط البلد سلام الوداع وكده ... عشان كنت هاسلم عليكي في المطار!! مش هتصدقي قد ايه بس... مفتقدك



مفتقدك يا كيمو، مع انك شغال معايا في الراديو وممكن اشوفك... بس كريم اللي كان هناك في المنتدي كان صديق جديد بالنسبة لي، مفتقد ندانا علي بعض دايماً لما بنشوف بعض وشغلنا مع بعض واننا علي طول كنا علي خط واحد... مفتقد العرض بتاعك والليلة التحفة اللي اتعاملت لفيلمك "اتجاه المرج" ... كل ما افتكر طلعت معاك من الفندق لطريق السويس علي رجلينا ... اقول الحمد لله اني كنت صاحي لأني متأكد انك لو كنت مشيت لوحدك كنت توهت!! وحمدت ربنا اني كنت عارف الطريق... عارف! انا خدت في الطريق ساعة مشي معاك وساعة وانا راجع!! بس مبسوط اوي اني عملت ده.. حسيت اني دي هتبقي هي ذكري اننا سافرنا المنتدي ده... مفتقدك
مفتقدك يا هيثم وبجد كل ما افتكر وانت مطحون في الفندق رايح جاي كل ما اشوفك تكون بتطحن اكتر من المرة اللي قبلها ..!! بجد تعبت معانا جداً وفعلاً اتمني ان الصداقة بينا تستمر لأنك انسان مجتهد ونشيط جداً ... اينعم انت عملت فيا مقلب اني استقبل المشاركين من المطار وكانت لغبطة لي جداً في الكام يوم اللي قبل المنتدي... الشئ اللي خلاني احضر شنطتي قبل نص ساعة من الميعاد اللي كان لازم اروح فيه المطار عشان اسافر مع اخر فوج!! بس بجد انا سعيد اني اتعرفت عليك ... مفتقدك


مفتقدك يا فاطمة... ومفتقد برررررنس اللي كنت بتقوليهالي كل ما تشوفيني! قالولي عنك كلام حسسني اني هسافر مع اكلة لحوم بشر !! بس فعلاً لما قابلت واشتغلت معاكي اتأكدت ان اللي قالولي كده ... مبيفهموش في الناس!! ... بجد مفتقدك

مفتقد عبد الله مع انه هنا في القاهرة وممكن اشوفه بس ذكريات المنتدي كانت مضحكة... عبدالله كنت مرحب بالجميع من قبل المنتدي وكنت كاتبلي علي الوول بطريقة ودية جداً حسستني انك ابن عمي اللي في البرازيل..!! طبعاً كنت مبسوط ومتشوق اني اشوف مين الشخص المرحاب ده ... ولما شوفتك مستغربتش لأنك ما شاء الله مبتسم علي طول وابتسامة عريضة ..!! وبجد انسان محترم ولطيف جداً ونشيييييييط جداً ... تشرفت بمعرفتك يا ابو عبدالله


مفتقدك يا تمارا.. مفتقد لما كنت باشوفك وماعرفش ليه ... كنا دايماً بنعدي علي بعض وكل واحد في اتجاه، في اللوبي في المطعم في القاعة ... كنت دايماً بارفع حواجبي اكني مستغرب!! واقولك تماااااارااااا ازيك ؟؟ معرفتش اتكلم معاكي كتير عشان كان لازم تسافر تاني يوم وده كان شئ سئ جدا بس بجد انبسطت اني روحت وانا علي الأقل معايا صورتين او تلاتة ليا معاكي... وكفاية الصورة الأشهر في المنتدي واللي تصلح إعلان كما قال الكتاب!! بجد يا تمارا اتمني اشوفك تاني وبجد... مفتقدك


مفتقدك يا يافا ومفتقد لهجتك اللي ماكنتش عارف احدد اذا كنت مصرية ولا لأ ... وخصوصاً اسم يافا.. بس فاكر لما حسستيني ان الياهو غزا اللاب توب بتاعك .. وانا ماعملتش حاجة بس شكرك ليا كان شئ لطيف منك وبرضه انت نورتينا في الصورة الأشهر ... مفتقدك

مفتقدك حبيب قلبي يا أمين... انت انسان مجتهد جداً ومنظم جداً وبجد شرفت اني اشتغلت معاك وكان نفسي اكون اكتر مساعدة ليك من كده، في الأول ماكنتش متقبل فكرة المنتدي ... لكن اصرارك علي النجاح وتركيزك علي الشغل الخاص بشبكة المدونين الشباب العرب... هو اللي خلاني اروح في المقام الأول واقابل كل الناس اللي انا قاعد الساعة 5 الصبح باكتب عنهم .... مفتقدك

أميرة.. مفتقد فيكي شغلك الدائم، من الناس القليلة اللي مشوفتهاش بعيد عن شغلها هناك في المنتدي... كنت دايماً يا بتسجلي يا بتكتبي علي اللاب توب!! مفتقد فيكي الإبتسامة الجميلة جداً الهادية وطبعاً النظرة اللي واضح انها علي الرغم من انك تونسية لكن اخدتيها من كينزا ... النظرة اللي تحسسني انك مكونتيش فهماني او لاقية صعوبة في فهم العربي... بس طلعتي بتتكلمي عربي زي الفل!! مفتقدك هدوءك ودأبك علي شغلك ... مفتقدك

مفتقد يا تالا، البنت اللبنانية العملية جداً، مشوفتكيش في النقاش ازاي بس لما اتكلمنا اكتر من مرة علي العشا والفطار والغدا بالترتيب ده.. كان كلامك منظم جداً ومنطقي تماماً ... فاكر اليوم اللي جيتي فيه علي العشا وقولتيلي انت اكلك مش صحي تماماً وبدأني تنصحيني.. علي فكرة بانفذ النصايح لغاية دلوقتي.. وكل ما اجي احضر الغذا او اكل مع اهلي افتكر وابتسم وانت بتقوليلي فين السلطة فين الخضار ؟؟ وافتكر تاني يوم بعد العشا ده لما روحت وحضرت فطار صحي تماماً... مفتقدك


زينب!! يعني اجدع بنات لبنان... يعني اللي مبتسكتش علي حقها، الف مرة!! لأ كده بقي فرح!! بجد يا زينب انت من الناس اللي انا احترمتهم من اول تعاملي معاكي، حد عارفة حقوقك بجد وبتعرفي امتي تاخديهم بغض النظر عن ايه ومين وفين!!؟ هادية جداً مع انك شعنونة وطقة!! في نفس ذات الوقت.. فنانة وعجبني شغلك جداً ومتتخيليش قد ايه هافضل فاكرك ... زينب الطقة اللي نزلت في حمام السباحة الساعة 2 الفجر بهدومها!! عشان مجرد انها عندت انها ممكن تعمل ده !!! زينب بجد بجد بجد ... مفتقدك



مفتقدك بيرنارد... ومفتقد التهييس بتاعك وغناك لأغاني وسط البلد واحنا في الساقية قبل ما تسافر... فاكر اوي لما كنت اقولك حاجة ... برضة كنت بتاخد نفس المدة عشان تترجم كلامي ... وباضحك كل ما افتكر ان كان معظم اجاباتك ... إيه إيه، وطبعاً هافضل فاكر انك اديت التاكسي 10 دولار يعني 60 جنيه مصري من القلعة للمطار !!! مفتقدك


حبوبتي ديانا، هو مبدئياً وقبل اي كلام.. وحشتيني ومفتقد جداً البنوتة الصغيرة اللي تحس معاها وانت ماشي انك ماشي مع مدير ادارة مالية !! محامية صغيرة !! تحس انك ماشي مع حجة في الهندسة التحليلية ... مش عارف بس تحس انك ماشي مش مع مجرد بنوتة صغيرة جاية مصر عشان تحضر منتدي للشباب !! كنت زعلان اوي وانا بافرجك علي القلعة مع مي صاحبتك وايمان وجان وانت يا حرام كنت عمالة تحسبي وتجمعي وتضربي امتي ممكن تيجي تاني مصر... ومتصدقيش كنت مبسوط قد ايه علي الرغم من انك طيرتي نص الزيارة بس وانت خارجة من القلعة وبتقوليلي اوك انا عرفت امتي ممكن اخد اجازتي عشان اجي مصر !! وكنت زعلان اوي وعينيكي مدمعة واحنا في صالة المطار، ولما روحتي وكتبتيلي علي الوول "تعالي رجعني القاهرة" متصدقيش زعلتيني قد ايه!! بجد ... مفتقدك

سحر هانم عساف... لازم اقول كده عنك يا سحوره... من الناس الشيك جداً بتوع الشغل بس.. مشوفتكيش بتضيعي وقت او قاعدة بدون كتابة او نقاش، وكنتي دايماً شيك جداً وفاكر اول مرة اصلاً اتكلم معاكي لما قولتلك سحر ؟ صح... يا ريت قبل ما تروحي الفيلا بتاعتك اتصور معاكي بالطقم الرمادي الهايل ده! علي الرغم من انها بداية معرفة غريبة شوية ... بس بجد بعد كده لاقيتك حد مجتهد جداً جداً جداً وبتاعت شغل مش جاية تضيعي وقتك وبجد معرفتك كانت شرف ليا ... مفتقدك

بيير صديقي وتوأمي اللبناني، انا مقتنع بنظريتك اننا كنا توأم واني خدت انا الطول وسيبتلك شوية انشات... بيير انت من اكتر الناس اللي شوفتهم مبتسمين في حياتي – نمسك الخشب – بس بجد انت من الناس الهاديين والمحترمين جداً واعتقد اني لو كنت جارك او صديقك في الشغل اكيد اكيد كنا هنبقي اعز اصدقاء... لأنك من الناس القليلين اللي شوفتهم هناك يبان انك عمرك ما ضايقت حد في حياتك! فعلاً كان الواحد نفسه يتعرف عليك اكتر بس الجايات كتير ان شاء الله وفعلاً مفتقد ابتسامتك الهادية جداً... مفتقدك

إيمان ... او ايماني زي ما كان جان بيحب يغيظك ... الدكتورة الصغنونة اللي ماكنتش اعرفها الا لما جينا القاهرة... ايمان اول ما شوفتك في المنتدي قولت دي حد من الشباب الصغيرين اللي جم من الأردن مع الدكتورة عبلة اللي استقبلتهم اول ناس..!! وحتي صورتك كذا صورة بس ماكنتش اعرفك هناك... بس اتفاجأت لما روحت انك كنتي انت اللي بتدي المحاضرة مع كامل النابلسي وتمارا !! صدقيني اتفاجأت انك كمان جراحة !! كونك صغنونة ده ميمنعش انك زي العسل... انا اللي كبير زي ما عوض قال "هالك" بجد ايمان كنت مبسوط جداً وانت مبسوطة لما كنا بنلف في المتحف المصري ومنبهرة بالاثار


اتبسطت اوي اني قدرت اوديكي تشوفي عمارة يعقوبيان، واتبسطت برضه لما فكرت بسرعة وجبتلك كارت عليه مخطط لهرم خوفو من جوه عشان كنتي عايزة تدخليه ومعرفتيش، وسعادتي اني قدرت اصحي وماعملش زي ما عملت مع كينزا وكمان مع ممدوح الشخصية المرحة جداً والجدعة جداً والواضحة جداً واللي بجد كنت سعيد اني عرفته مع اني عرفته متأخر بعد المنتدي ما خلص... ايمان فعلاً اتعلمت منك حاجات حلوة وفعلاً ... مفتقدك

وديـــــــــــــــع ... تكشبيلااااااااااا سعيد اني اتعرفت بيك يا وديع، فعلاً من المغاربة القليلين اللي اتكلمت معاهم في المنتدي بس بجد كان الواحد نفسه يتكلم معاك اكتر والأغاني المغربية اللي اديتهالي اكتر من رائعة وباشغلها كتير، فاكر جداً شوية الصور الكتير اللي وريتهالي اللي فيها نفس فكرة وقوفك واكنك ساند علي برج ايفيل برجلك، كانت صور مبدعة يا ابو الشباب ... وديع علي الرغم اني ماكنتش فاهم نص كلامك وخصوصاً لما بتقلب فرنساوي... بس مفتقدك

سعد سعد يحيا سعد، انت من الناس الودودين جداً واللي تحب يكونوا اصحابك.. حد جدع جداً وفي الأول كنت متلغبظ وفاكرك معتز الغازولي !! لكن لما عرفت انك سعد سعد يحيا سعد وعملت كام حركة لطيفة كده استجدعتك والحمد لله من الناس اللي انا كسبتهم اصدقاء بعد المنتدي مش فيها

اللي كان نفسي فيه فعلا يا حسين.. انت واحمد خليل اني اتكلم معاكم اكتر من كده!! انا عارف اني كنت بارجع الساعة 8 الصبح وكنت علي طول بادخل انام ولا لحقنا نتكلم مع بعض... بس خليل فعلاً تحس انك دكتور قائد طيار محارب ... عارف اللي هو تبقي عايز تعرف انت بتعمل ايه في دول بقي؟؟ انسان محترم جداً وكانت معرفتك شرف ليا وفعلا انت والحسين صاحب الإبتسامة اللي تحسسك انه امير الدمام او ملك الأردن، الابتسامة اللي بوقار دي.!! فعلاً مفتقدكم

أما إسلام وهاشم ففعلاً مفتقد لما كنتوا بتشوفوني وانا قاعد في اللوبي وعلي النت... وهاشم يجري عليا ويقولي يا ابني يا ابني النت خلص من مصر خلاص!! بلهجته السعودية الودودة... اسلام انت اشتغلتني كام مرة كده وصدقتك ودي من المرات القليلة اللي حد يقدر يعمل كده فيا!! ومش هانسي المرة اللي في المطعم ساعة ما كان هاشم نزل القاهرة وحبيت انا وديانا وتالا نعزم بيرنارد من السي كلوب علي العشا معانا... وقولتله اكنك مكان هاشم!! ورايح اسألك هو هاشم اسمه ايه بالكامل ؟؟ ولاقيتك بترد عليا رد غريب جداً ... وبتقولي مايجي بيرنارد هو يسأل..!! انا هاوريك يا بيرنارد انا هاوريك !! انا هارجعك لبنان ماشي !! انا هاوريك !! انا ساعتها قولت هو ماله الولد هو عملك ايه عشان كل ده ... وكملت الدور عليا لغاية ما تقريباً صعبت عليك فضحكت !! معرفتك كانت اضافة ليا يا ابو اسلام والله، وكمان هاشم من الشباب اللي لسه بيعرف ان فيه ربنا ودي حاجة خلتني احترمك بيها جداً وحسيت انك ابن ناس ومتربي تربية سليمة، فعلاً... مفتقدكم

رؤي مش عارف اقولك ايه... غير انك شبه شيرين المغنية!!! فعلاً من الناس اللي اتبسطت اني عرفتهم وفعلاً كون حد صغير زيك كده ومعاه الشهادة اللي معاكي وكونك عايزة لسه تتطوري من نفسك ده قد ايه شئ ظريف جداً.. وكمان كنت باضحك لما هاشم يقولي لو شوفت ماما قولها اني مستنيها في اللوبي.. وطبعاً هاشم مش ابنك بس عجبني انكم واخدين بالكم من بعض كأهل بلد واحدة، فعلاً يا رؤي... مفتقدك

نور الصديقة المبتسمة ماشاء الله دايماً، كنت منورة في حفل الإفتتاح وانت في الزي البدوي... اللي وجدت صعوبة اني اقتنع انك وكونك انسانة صاحبة بشرة بيضا... انك تكوني بدوية من سيناء!! بس فعلاً لا يمكن انسي لما كنت واقفه جنب الإتوبيس مع عبد الله مسعد وبقية العصابة وقعدتي تنطي علي القزاز اللي جنبي عشان تسلمي عليا علي القزاز... وخليتيهم كلهم يعملوا كده... كانت حركة حلوة اوي حسستني في الأول اني من النادي الأهلي وطالع بعد ماتش مهم والناس بتسلم عليا !! لكن بعد كده زعلت وبصيت جوه الإتوبيس لأني حسيت اننا بنودع بعض وده شئ انا مش باحبه...
مفتقدك

وزي ما بدأت البوست بإني باكره الفراق او تقريباً كنت نسيت طعمه... أنا هاعتبر نفسي لسه هناك وانكم موجودين، مش مسافرين كل واحد في بلده، وإنكم نايمين كل واحد في الفيلا ولا في الغرفة بتاعته، وانا قاعد مستني اشوفكم لما تيجوا تاني... يلا بسرعة

مستنيكم في اللوبي


16 comments:

  1. برررررررررررررررنس
    انا جالي اكتئاءب كدة
    ليه تقطيع البصل علي القلب كدة
    تدكر قول نجاة الشهير
    مهما الايام تعمل فينا ما بنستغناش عن بعدينا
    ما بنستغناش ابدا ابدا
    ارجوكوا سيبنوا تلاقونا بنكلم بعض لوحيدنا و لا نستغنااااااااااااااش و لا نستغناش عن بعضينا

    ReplyDelete
  2. بيت العز فعلا يا عز
    يا عز انت انسان رائع جدا من أول ما اتعرفت عليك من خلال تعريف نفسك على جروب المنتدي وتقديمك لنفسك بكل التفاصيل في نشاطاتك وشغلك
    وبعدين لقائي بيك في المطار وإحنا بنستقبل الناس ووقوفك في الأتوبيس طول الطريق من المطار للفندق لما طلع عدد الكراسي أقل من عدد الشباب اللي هيركب الأتوبيس وأسلوبك الجميل في التعامل رغم ان النظرة الأولى لك في المنتدى تشعر انك فقط جئت للتصوير والجلوس على النت
    إلا انك بالفعل كنت من أكثر الشخصيات التي استطاعت ان تجعل الجميع يحترمها ويحب التعامل معك ويكفي انك عندما كنت تدخل الغرفة كنت تجلس في البلكونه حتى لا تقلقنا ونحن نيام بالتأكيد أهم سبب إنك كنت بتنام 8 الصبح بعد ما يكون الجمييييييييع قد نام
    ويكفي إسلوب الرائع في إحترام الجميع والإهتمام بهم
    بجد انت إنسان رائع سعت بالتعرف عليك واتمني بالفعل لك كل التوفيق في حياتك
    واتمنى ان تذهب إلى النوم في الوقت الطبيعي ومستنيك في الغرفة
    سلام
    حسين

    ReplyDelete
  3. عز
    بجد شكراً على الكلام الجميل ده ... انا كنت خلاص هعيط ... انا فى الاوضه مع عوض بزبط الشنطه و جايلك على اللوبى يا باشا

    ReplyDelete
  4. eh ya 3am elkalam dah
    walahy kont 7a3ayt
    miss u man
    ahmed esmat

    ReplyDelete
  5. cant u find a better photo for me, you kept taking shoot to put then somebody eles photo..
    Change it ..
    This is the ugliest phot ever for me!!!! Chaaaaaaaaaaange it !!!!!

    ReplyDelete
  6. انا كتير مبسوطة ومحظوظة انه اتعرفت عليك، انه بتذكر من اول يوم فاطمة عرفتنا عليك بس بعدها ما حكينا سوا لحد آخر يوم، انه قاعدين كان في شي عابر بنحكي فيه وبعدين .. طيب مش نتعرف على بعض!! وحكينا با شيا كتيرة، كان كتير حلو انه التقينا اكتر من مرة في القاهرة بعد المنتدى وكنت كتير محظوظة انه ناس كتير ما كان في فرصة انه نحكي سوا في المنتدى التقينا بعده..

    كان كتير حلو انه معظم مشاريعنا ما كانت تزبط، بس انا بآمن انه الاشيا اللي بنخططها مش دايما بتزبط وانا بحب اكتر الاشيا اللي بتصير لحالها بلا تخطيط انه يلا!!!... يلا :]

    حبيت بشخصيتك العقلانية والزوق في التعامل، شخصية بتفرض احترامها.

    مرسي كتير على كل شي وان شالله عن قريب بنلتقى بس برضه مش هنطلب همالايا :)

    وحشتوني اوووووووووي

    ReplyDelete
  7. hehe, nice one...
    Do you have another nicer pic?
    All the Best from the Lebanese Phoenix.
    B/.

    ReplyDelete
  8. مش عارف ااقولك ايه بجد ..

    بس قاعد بقرا الكلام وبفكر انت قد ايه طلعت بصداقة ناس زى العسل زى ما انت وصفتهم كده ...وقد ايه رغبتك فى الاخر رفض انهم سافروا بلدهم ...وهما لسه موجودين...وهيفضلوا موجودين فى القلب والعقل ومش هيغيبوا طبعا..

    يا بختك..:)

    ReplyDelete
  9. بيت العز : يعني الجدعنة
    بيت العز : يعني الرجولة
    بيت العز : يعني الصداقة
    بيت العز : يعني الاخلاص
    بيت العز : يعني الحب
    بيت العز : يعني الامن
    بيت العز : يعني الامان
    بيت العز : يعني الاعتزاز
    بيت العز : يعني الفخر
    بيت العز : يعني الاصالة
    بيت العز : يعني الشهامة
    بيت العز : يعني العروبة
    بيت العز : يعني بيت العز يا بيتنا

    حبيبي يا عز
    بجد من افضل الشخصيات اللي عرفتها
    وفعلا مش عاوزك تزعل مني لما شلتك بالعافية واحنا في اللوبي و اتصورت معاك وانت زعلت يومها سوري يا برررررررررررررنس

    بس بجد يا عز كلامك مؤثر جدا و يخلي اي حد يعيط للابد

    بجد اصيل و ابن اصول يا عزوووو

    ويارب يجعل بيتك عامر دايما يا عزززز

    بيت العز شكرا جزيلا

    ReplyDelete
  10. wallah lama gereet alkalam jany alboka :((

    wallah miss u too o i miss everything .. aiam 7elwa o aiam aljaia ra7 tekon a7la o a7la ...

    Allah yedom alma3rof o ye7faz sadagatna :)

    take care

    ReplyDelete
  11. 7ayete m7amad..meen beeen kol el sewar lee leyaa 3andaakk..ma 7atetsh gher el sora el marida dih!!!!!!!!!1 ghayar sorteeeeeeeeeeeeeee..other than that..what u wrote abt all is so beautiful and thank u 4 what u wrote abt me hehehe w enta gada3 w tayeb w handsom..ma ra7 e7ke bil lebanese shu ben2ol a7sa ma tfaker 3am sebbak hahahaha
    i miss u all ..truly mdly deeply..hope we meet soon..w law 7ad feko gah lebnan..alah la ysem7o eza ma kalemnee./..i am a very good tourist guide u know :P
    \best rehards to all of u

    ReplyDelete
  12. مش عارفة اقولك يا بختك بناس عساسيل زى دول
    ولااقولك معلش انك مفتقد كل الناس دى
    بجد بوست هايل وناس عساسيل جدا
    وانت كمان :)

    ReplyDelete
  13. عز باشا
    طبعا بعد ما اتخضيت جدا فى الاول وقولت فى ايه ؟ عز ماله؟
    بس الحمدلله طلع ير لما قريت باقى البوست
    هو انا مش عارفه ده احساس ولا افكار بس فى كل الاحوال سواء احساس او افكار تسلم دماغك اللى فكرت او قلبك اللى حس
    لان مبقاش كتير اللى بيفتكر صحابه او حد قابله حتى لو فضلوا سنين مع بعض بعض الفراق او حتى مجرد البعد الناس بتتشغل عن بعض وبتنسى حتى الزكريات
    او انها فى يوم تطلع الصور القديمه تتفرج عليها وتفتكر

    شكرا يا فندم على البةست الاكتر من رائع ده
    وبجد يا فندم ك وقت بحترمك اكر
    رغم انك ساعات بتنكد علينا
    بس ماشى هنعمل ايه

    ReplyDelete
  14. allah yesam7k ya 3ezz .. 7'altny a3ayat .. 3agbk kda ?!

    begad masha2 allah 3aliko .. howa lsa feeh nas kda ?!

    ReplyDelete
  15. جرى ايه يا عز

    انا قعدت ادور على نفسى فى لسته الناس المفتقدين ملقتهاش

    اخص عليك يا عز .. لا بجد اخص اخص جدا يعنى محسسسنى انى كل يوم نشوف بعضينا
    ده انا ولا يوم من ايامى

    ده انا

    ولا بلاش كفايه كده

    المهم تعرف غلطتك وتصالحنى باى شكل
    انا راضيه باى مبلغ فى البنك يا عز


    ويارب يلم شملك انت والناس الغايبين كلهم يارب


    وانا كمااااااااااان

    ReplyDelete