أنا لما جت أختي الكبيرة تقولي وتحكيلي علي البلاوي اللي في الطريق وبتعمل ايه في عربيتها وهي بتعدي عليها، مصدقتش .!! اينعم البلاوي دي المسماه "Road Bombs" موجودة من زمن بس مش عارف مكونتش شايفها مشكلة أوي، إمبارح وأنا بالصدفة ماشي جنب في صلاح سالم عند نفس المكان اللي إشتكت منه إختنا قبل كده عند دار القوات الجوية كده سمعت وشوفت بعيني اللي غيري كتير مبيسمعوش.
شوفت العربيات وهي بتترج وبتتخلخل ( بالنسبة للعربيات القديمة شوية ) وسمعت الصوت الرهيب والغريب واكن العربية بتقع من علي منحدر مش بتعدي علي حاجة ملهاش لازمة اصلا وقال إيه عشان الناس تهدي السرعة ..!!! ما هي إشارة أصلاً والناس بتزحف فيها .. فين السرعة اللي عايزين يهدوها !!؟ قلت ما هو إحنا كده بنستغبي علي بعض ... يعني الشباب الفاضي اللي ماوراهوش شغلة يجي في النزهة يعمل سباقات عربيات كل خميس يمطررررررررروا الشارع بمطبات !!! يعني عشان شوية شباب مستهتر بيتجمع علي ولا شئ يوم واحد في الإسبوع يقرفوا الآلاف طول العمر طول اليوم ..!! حد يسألني مش الأحسن إنهم كانوا يحطوا عربية نجدة ولا موتسيكل من أبو عسكري فوقيه ده !! أقولهم إزاي والبهوات أصلاً كانوا بيشتركوا معاهم وأنا شفتهم بعيني وهما بيـ "خمسوا" معاهم ( يعني بيفحروا - بتشديد الحاء - بلهجة الأخوة القاطنين بالخليج العربي والمملكة .. وعلي الأخوة خارج مدينة القاهرة مراعاة فروق التوقيت ) نرجع لموضوعنا !! هو إحنا كده بنستسهل الأذية مع بعض ..!! بدل ما نشد علي قلة متسرعة بتتسبب في الآلاف الحوادث نقرف الناس كلها ونعمل زحمة مرورية عملالي أنا شخصياً عقدة لأن زي ما إنتم عارفين الناس بتهدي غصب مش عشان هي لازم تهدي وفيه إدراك والحاجات الوحشة اللي عند الناس الوحشين دي !! لأ بيهدوا غصب عشان كاوتشاتهم متتاكلش، وبعدين ليه أهدي أصلاً في طريق مطار سريع وفيه أنفاق للمشاه !!!!!!!! ... يا شباب أنا بأبقي شايف عمارات العبور من عند بيتنا رؤي العين المجردة !! وباروحلها في 40 دقيقة.
زي ما إنتوا شايفين في الصورة !! الأسفلت نفسه إشتكي وإتهري ... وكمان فيه قطعة حديدية إتشالت من مكانها ... أي عالم رياضيات أو كهربائي سليسيون علي رأي صديقي مصطفي يعرف إن الآثار دي زي ما هي في الأسفلت أكيد زيها في آلاف العربيات الغلبانة اللي بتعدي عليها...!!! واضح إن كان فيه أوكازيون وهما بيشتروا البلاوي دي أو جابوها من كارفور ..!!
No comments:
Post a Comment