متوضي ومصلي وصايم ويوم جمعه وفي رمضان !!! راحت مني موتة حلوة ربنا يرزقني بخاتمة أحلي منها إن شاء الله، نرجع ونحكي من عند منزل المحور في إتجاه الكيلو 58 طريق مصر الإسكندرية الصحراوي متجهين في عربية الشركة لمزرعة المهندس يحيى الكومي رئيس مجلس إدارة شركتي ورئيس نادي الإسماعيلي الراجل ده لولا إني بأحب أقعد معاه واسمع كلامه مكنتش سافرت عشان أفطر في آخر الدنيا ومع مين مع لاعيبة الإسماعيلي !!! المهم خلاص في الطريق وكان المغرب أذن وإحنا كنا لسه نازلين الحراوي من علي المحور ...
وبعد الصورة دي بلحظات يا دوب وصلنا لخطوط الضغط العالي اللي شايفنها في آخر الصورة كده وإحنا ماشيين علي سرعة 130 كيلو متر في الساعة، الكاوتش الوراني شمال فرقع !! وتسمع أحلي صوت فرقعة في حياتك وأحلي دخان وأحلي رجرجة للعربية والحاجات بتقع في العربية وصوت الكحت في الأرض والناس كلها بتقول يا ساتر في نفس واحد وفجأة بعد لحظات بسيطة تركن العربية بفضل الله سبحانه وتعالي ولخبرة عم سعد السواق اللي مفرملش ومقلبناش ولله الحمد من قبل ومن بعد. "طبعاً أنا كنت بأصور طول الطريق زي ما طول عمري بأصور، بس الصورة دي بقت غالية عليا أوي... كانت هتبقي آخر صورة صورتها"
ده كان شكل الطريق ودي العلامة اللي عملتها العربية فيه
وده كان شكل الكاوتش بعد الفرتكة وأكن سكينة قشطته، بعدين هاقولكم إيه هي كانت السكينة
الحمد لله مفيش حاجة دي كانت اول كلماتي واول كلمات لحد بعد ما العربية وقفت، طنت بأطمن بيها نفسي وبأطمن اخويا احمد الصغير اللي كان قاعد ورايا.. ونزلنا وعم سعد بدأ بسرعة مذهلة تغيير الكاوتش وفيه ناس راحت تصلي المغرب ويشكروا ربنا علي كرمه معانا، بعد تفكير بسيط لقيت إن أصلي المغرب لما أوصل المزرعة عشان أكون هديت نفسياً من جوة ولغاية ما الكاوتش يتغير مفيش مانع من إني أحتفظ بالذكري بغض النظر عن مدي سعادتي بيها من عدمه ...!! هتفضل ذكري برضه.
وأنا بأصور الطريق والكاوتش والناس اللي واقفة والكلام ده كله، وأنا متجه في ناحية الطريق يعني شايف العربيات والطريق من قدامي وكله تمام تحت السيطرة، أفاجأ وأنا ماسك الكاميرا وبأصور وبعد ما وقفت فجأة وانا كنت متجه ناحية الطريق بجنبي بعربية طايرة !! عكسي !! وفين علي الطريق الصحراوي !! والفرق بينها وبيني مسافة مسطرة يعني 20 سم .... أصلاً لو كنت مديت إيدي مش أتحركت كنت طيرت معاها، اللي شاف المشهد ده من الزاوية العكسية ليا يعني كان شايف العربية وهي ماشية من جنبي محامي أخو محامي معانا في الشركة، قالي إنت كنت هتطير !! قلتله آه !! قالي إنت شفته !!؟ قولتله شوفته وحاسيت بالعربية وسمعت صوتها وكل حاجة في الحياة !! إيه الحيوااااااااااااان ده !! قالي الحمد لله إنت لازم تعمل حاجة لله وتطلع فدو !! قلتله إن شاء الله، بس وبلمت لغاية ما روحنا الساعة 10 بالليل.
عرفت تالت يوم كانت إيه السكينة !! السكينة كانت موسي الله يكرمه ويهديه، موسي ده الأوفيس بوي!! - مع إني معترض علي التسمية لأنه عنده اكتر من 40 سنة بس المهم - جه تالت يوم وبيقول لـ "سميح" زميل لينا، انا كنت قاعد بعد الفطار وبأقول يااااااه زمانهم بياكلوا الخرفان دلوقتي !! أنا ليه ماروحتش معاهم !!؟؟؟!! قاله : ده إمتي يا موسي الكلام ده ؟ قاله : بعد الفطار علي طول !! قالوا أيوة هي بعد الفطار علي طول.. شكراً يا موسي !!
الفكرة هنا إني فكرت كتير ولغاية دلوقتي بأفكر .. إيه اللي حصل ده وليه وايه اللي المفروض أستفاده منه !! لغاية دلوقتي صوتين مش ناسيهم، الأول صوت العربية اللي كانت هتطيرني علي الصحراوي وصوت "سها" أختي وهي بتقولي: إييييه يا محمد !! مرتين في يوم واحد !!؟ المهم، إني كنت بأتكلم عن فيلم "كليك" لآدم ساندلر وبأقول للناس إني بأحسده عشان في آخر الفيلم خد فرصة تانية في الحياة ومفيش حد بياخد فرص تانية !! أظن إن الإجابة وصلتني ووصلتني دوبل !!
-
حمدلله على السلامة
ReplyDeleteجت سليمة المرة ده، بس نصيحة متعرفوش موسى بعد كده انتم رايحين فين
بس الحمد لله على كل حال وربنا يسترها
الله يسلمك يا عزعوز
ReplyDeleteانا لسه قاري الميلات كله دلوقتي والله
وعرفت إنك كنت حتعمل بعد الشر عليك حادثة
وربنا يباعد بين الناس كلها وبين الحوادث
إسأل مجرب يابني
بس الحمد لله قدر الله وما شاء فعل
وألف سلامة عليك
والحمد لله على سلامتك
الف الف سلامة عليك يا عز والحمد لله على سلامتك بس عارف يا عز انك محظوظ جدا
ReplyDeleteوانا شخصيا بحسدك لانك شوفت الموت بعنيك وربنا ادالك فرصة تانية للحياة علشان تعرف ان الموت بيجى فى لحظة وان الدنيا ولا حاجة
شوفت انت محظوظ ازاى
Al slam 3lykom wa ra7mat Allah wa barakatoh
ReplyDeleteAwalan alf slama 3leek ya ezz we el 7amd lelah enaha gat 3la ad keda, we Rabena yeg3al ely 7asal da fi mezan 7asanatak, we 3ebra lena kolena
Ana asfa eny masa2altesh 3lek mn sa3et ma 3reft enak ta3ban, bs ma3lsh zroof walahi, mana3etny eny as2al 3leek we 3la el nas kolaha.
Alf slama 3leek mra tanya & el 7amd lelah enaha gat 3la ad keda
NANA
سلامتك ياعز الف سلامة بصراحة مش عارفة اقولك ايه بجد كان يوم صعب مستحيل تنساه
ReplyDeleteوخليتني اقتنع ان الانسان تجيله فرصة تانية للحياة لأني كنت زيك مش مقتنعة بفكرة كليك اوي
المهم سلامتك مرة تانية
allah ysalemek ya Doaa, NaNa, Moha, Rima w yesalaemak ya abo 7meeeed el 7amdolelah 3adet bs khaletny afakar tafker ta3abny w tala3 3eny, bs itada7ly in kol shi2 feh forsa tania rabena ykrem.
ReplyDeleteas salm alykom w ra7mat ALLAH w barakatoo
ReplyDeleteal 7amdo le ALLAH gat salema we yarb tekoon 25er maraa te7sal we yakfeena shar 3am Mossa
ALLAH ysalaema/ek ya DF, w ya rab at3alem el 3ebra eli el mafrod at3alemha mn el 7adsa di w yehdy moussa w yrzo2o ely ykhaleh maybosesh le ghero ya rab amin
ReplyDeleteالف حمد الله على سلامتك كنا هنفتقدك كتير
ReplyDeleteبس لازم تفكر المفروض تعمل ايه بعد الفرصة التانية دى وتعيد حساباتك
وكمان ماتنساش قبل ماتنام واول ماتصحى تقول المعوذتين وربنا يحميك
الله يسلمك يا أميرة القلم وشكراً علي المجاملة اللطيفة دي بجد شكراً :)
ReplyDeleteالحمد لله فكرت كتير وعرفت انا المفروض عليا اعمله بس ربنا يقدرني بقي واعمله لأن فعلاً مفيش وقت للإنسان
ربنا يحفظنا من شر الحسد