Sunday, September 17, 2006

كان يوم أبيض


تعليق صغير !!


فيه واحدة باعته بتقول إنها "بنت مصرية" بس أنا أكيد انها مش هي لأني أعرف أخلاق بنت مصرية ومتأكد إنها مش هي.. المهم، الهانم معرفش هي بتجيب كلام من عندها ولا منين المهم بتتهمني إني معقد وعندي كبت وبتدعي إن ربنا يخلصها من الناس اللي زيي !!!!!!!! هاهاهاهاهاهاهاها ضحكتيني والله يا إسمك ايه... أنا عندي كبت !!!؟ دانتي متعرفينيش بقي !! وبما إنك متعرفيش إنت بتقولي إيه أصلاً... أحب أوضحلك


يا سيدتي يا ضيقة الأفق ! أنا وضحت وقلت أنا مش شيخ طريقة يعني ولا صاحب فضيلة بس أنا متضايق من إن هو ده بقي الحال، إن الشباب بقي متلطع علي الكورنيش بيحب في بعضه... وهما حرين ميحبوا في بعض ويعملوا اللي هما عايزينه كل واحد ليه صحيفته وليه حسابه !!! مش قضيتي أصلاً... أنا قصدت إن الشباب دول لو كان ليهم فرص عمل ولا لاقوا شقق تلمهم يتجوزوا فيها طبعاً لحسن تقولي إن بأحرض علي الرذيلة !! مش كان يبقي أحسن من الأفلام اللي بيعملوها في الشارع دي ...!!!

وبالنسبة للبنات اللي لابسين كت أنا قولت إني مش معترض علي الكت لأن دي مش قضيتي دلوقتي نبقي نتناقش عليها مرة تانية..!! أنا قلت إن ده أعلان يبقي إزاي ماشيين في الشارع كده !!! مفيش قانون مفيش آداب عامة !! مفيش تصاريح ولا هي زيطة !! مش بأتكلم علي البنات اللي ماشية في حالها أو في غير حالها ولابسة كت !! أنا بأتكلم عن حالة خاصة هنا.. يا ضيقة الأفق !!!!!

-

وبالنسبة للبنت العيلة اللي باطنها باينة !!! مين يا هانم قال إني لقحت عليها كلام !!! أنا ولا عبرتها أصلاً أنا برضه يا سيدتي يا ضيقة الأفق لحد أنا لا أتخيله فكأكنك تقرأي القشور فقط العناوين !!!!! أنا كنت أقصد إن دي كده وأهلها معاها وهي دي ثقافتها إنها تمشي تترقص قدام الرجالة..!!! يبقي محدش يجي يشتكي بقي ولا يعيطوا لما يحصلها حاجة !! برضه كنت بأتكلم علي حالة خاصة

دي الفكرة ببساطة عشان دماغك تستوعب !! وتاني مرة يا كتكوتة لو عندك رأي تقوليه بأدب مش تدعي علي الناس وتشتمي وتغلطي مش ناقصاكي والله الحكاية !!

-------------------------------------

التدوينة الأصلية - بتاريخ 7 سبتمبر 2006

-

صباح الخير يا قوم... شكل البلد دي مش هتجيبها البر علي فكرة..!! امبارح كان يوم أبيض بالنبسة لي خلصت شغل روحت كورس جرافيكس خلصت الكورس روحت أقابل صديقة مشوفتهاش يجي من سنة وصلت ملاقيتهاش جت لاقيت واحد برضه مشوفتوش من سنة هو واحدة تانية مشوفتهاش من نفس المدة... دقائق ولقيت 6 صحاب كانوا اختفوا من سجل الأصدقاء وبوس بقي وأحضان وفجأة مشيوا بسرعة زي ما جم ..!!

كورنيشنا حبيبنا


خلصت الغدا مع صديقة زمان اللي ماشوفتهاش من يجي سنة، مشينا يجي 30 كيلو مش مركزين عمالين نشوف ايه اللي حصل في الكام شهر اللي فاتوا مشينا من التحرير طلعنا علي الكورنيش، إتمشينا طول الكورنيش لغاية ما وصلنا لمنيل الروضة عند مقياس النيل كده مسافة جميلة علي النيل.. علي كورنيشنا الحبيب بس للأسف شوفت مناظر ..!! مش هأدعي إني صاحب فضيلة وإني بأستنكر اللي أنا شفته !!! لأ، أنا بس قرفان إن الحال وصل لكده... وصل لإن ميبقاش فيه مكان فاضي علي طول الكورنيش كله ناس قاعده فوق بعض... أقصد جنب بعض ..!! كل دول ناس بتحب بعض..!! كل دي بنات خارجة من ورا أهلها ..!! ولا كل دي ناس مش عارفة تتجوز ..!! ولا كل دي ناس مكبوته مش لاقية حاجة حلوة في الحياة غير ساعة في قرب الحبيب علي كورنيشنا الحبيب..!!

المهم وصلتها لأقرب نقطة تركب منها لبيتها وإفتكرت ان اليوم وصل لنهايته كده ..!! لكن كنت غلطان اليوم خلص الساعة واحدة صباحاً بعد يوم مروري خاااانق ورحلة استغرقتها من غرب العاصمة لأطراف شرقها حيث يقبع منزلي الجميل المتواضع، رحلة وقفت فيها في ميدان رمسيس قلت برضه عيب انا مصورتش الميدان وهو فاضي.. روحت طلعت فوق الكوبري وخبطه خمس صور من كل الزوايا ... بالمناسبة للي ما شافوش المكان دلوقتي، بيعملوا مكانوا جنينة !!

بجاحة لا تقاوم !!

نرجع للمشهد اللي عديته فوق واحنا واقفين مستنيين الباص اللي هتركبه البنت لاقيت التالي: عربية نص نقل عليها مجسم لإزازة "آكس" وقاعد ساند عليها افندي طحش في عمر النخيل، ماشي وراه عربية جيب واقف فيها أربع بنات - يليق بهم صفة أقدم مهنة في التاريخ - لابسين "باديهات" كت - مش مشكلتي الكت دلوقتي علي فكرة دي نبقي نتكلم عنها بعدين - المهم عمالين يشاوروا علي الولد ويعملوا باي للناس اللي في الشارع والجيب معليا الصوت بتاع الكاسيت..، كلهم كان وراهم عربية تالتة عليها إعلان المنتج الأساسي مكتوب عليه "آكس، جاذبية لا تقاوم" ..!!! صديقتي العزيزة علي الرغم من كونها ليبرالية التوجه لكن ضحكت وقالتلي إيه ده !! ده فعل فاضح في الطريق العام يا ابني وضربنا كف علي كف وكملنا كلامنا.

السؤال هنا... مش ده يعتبر فعل فاضح في الطريق العام ولا ده إيه !!؟ الأخوة بتوع القانون يا ريت يردوا ويا ريت لو حد يعرف عسكري مرور يسألوا مش ده كده فعل فاضح ولا ده إعلان هادف في سياق الدراما !؟!؟ أفهم بس انا مش عايز منهم حاجة دول حتي كانوا بيوزعوا حاجات علي الناس خفت قلت انا لسه صغير علي الحاجات دي تكون حاجة أصفرة ولا حاجة !!

تشيك تشوك


آخر حاجة أقفل بيها اليوم الجميل ده .... وواضح إن المكان ده كان فيه حاجة مش مظبوط... وسط مكالمة مملة علي الموبايل كلفتني 120 جنيه..!! ألاقي بنت نازلة عيلة صغيرة يجي 13، 14 سنة نازلة من عربية عرفت بعد كده إنه باباها ومعاها مامتها كمان... البنت أكتر من 14 سم من بطنها باين ..!! أصلاً لما شوفتها كنت في وسط المكالمة فمش مركز قلت عادي واحدة ومش خايفة علي جسمها.. بشوف منهم كتير... لكن لاقيتها رايحة للوالد الإريال اللي كان ركن عربيته علي أول الشارع يعني أنا بقيت بينها وبين العربية فماشيه ماشية طبيعية جداً عادي بنت صغيرة..!! لغاية ما شافتني واقف !! إيه ده راجل !! إتغيرت 960 درجة ولاقيتها فجأة بتترقص شمال ويمين وبتتدلع اكنها ماشية علي بلاج ماريني مشبوه !! خير يا ماما !! مالك يا بنتي بطنك بتوجعك !!! المشكلة إني مكنتش بابصلها ومش مهتم أصلاً بطفلة في عمر أولادي لو كنت إتجوزت ...!! وكل ده إيه وأهلها معاها وشايفنها وهي كده !!!! ولما يجي يحصلها حاجة وهي لوحدها يعيطوا ويقولوا الذئاب البشرية المش متربية !!!!! مين اللي مش متربي هنا بالظبط !؟

2 comments:

  1. المناظر ديه مليا البلد بس لما بتشفها بجد لازم تصعب عليك لانها ملقتش الى يقلها عيب وحرام الى انتى عمله فى نفسك ده العيب على الاهل الى سمحلها انها تمشى كدة والعيب كمان على الناس الى بيكونو مثل للبنت ده او لغرها على العموم ربنا يهديهم ويهدينا جميعا ويكتر من رايتك لصحابك القدام

    ReplyDelete
  2. احنا خلاص فى بلد اتعودت على المناظر ديه لما بتشفها بتصعب عليك لانها ملقتش الى يقول لها كدة غلط وكدة حرام الزنب كله من الاصل على الاهل الى بيسيبو بناتهم يلبسه كدة وبعد كدة بيزعلو من الولاد لما تعاكس بنتهم ربنا يهدنا ويهديهم (ويكتر من الايام البيضة فى حياتك)

    ReplyDelete