علي السقف سائرون

كل اللي بيعدي في نفق المشاه اللي بين المتحف المصري بميدان عبد المنعم رياض

ومحطة أتوبيس عين شمس برضه اللي في ميدان عبد المنعم رياض

هيلاحظ الآثار دي علي السقف ..!!!!

صباح الفراغ لما ألاقي واحد حاطط علامة جزمته علي السقف !!!!!!

في الأول كنت عايز اعرف عملوها ازاي دي

بس بعد كده قلت ربنا يشفي، فعلاً

الأمم علي درب التنمية تسير ونحن علي السقف سائرون

-

الدنيا حر والجو نار

-

أنا كرهت صلاح سالم الصبح ..!!! خلاص ملوش حل

يعني بأفكر أسيب الشغل بسبب صلاح سالم الصبح وبعد الظهر برضه

-

وكرهت التحرير برضه

المشكلة ملهاش حل، تيبيكل نفس العلقة ولا قلم زاد ولا قلم نقص

يقولك الإنسيابية المرورية ميقولوش هي ملهاش حل

-

في كل مكان عربيات... في كل مكان من الساعة 2 للفطار الدنيا واقفة

-

مفيش حد مستحمل نفسه الحر كان فوق الوصف اليوم ده

-

تلاحم جماهيري غير مسبوق خلاني أقف ربع ساعة أصور الإشارة من كل مكان

-

وأكيد فيه عربيات ركنت علي الجنب 128 بقي او بيجو مش فارقة كل كان بيقع

-

دي بقي اللي ضحكت لما لاقيتها عطلانة

حاولت الف حواليها الأول عشان ألقط الصورة من غير ما أصحابها ياخدوا بالهم

برضه فيها إحراج ليهم... البنز إتهزمت من الحر يا منز

-

لغاية الساعة 11 بالليل بطريقة لا يمكن حد يستحملها

-

هي ساعة واحدة بس يتيمة التحرير فيها كان شكله كده

سبحان مغير الأحوال

أنا اليوم ده كنت في الشارع طول اليوم

مدينة نصر - التحرير - شيراتون - الجيزة - التحرير - شيراتون

كل سنة وإنتم طيبين

-

كايرو ساتديوم

خبرتي بالدعاية والإعلان والحركات دي خلتني أعرف إن عشان حاجة تطبع

لازم 900 بني آدم يبقوا شافوها

عايز أعرف بقي

مفيش حد متعلم في هيئة الطرق والكباري يقولهم يا شباب كلمة إستاد غلط

صحيح العلم نورن والأرض كروية تلف حول نفسها

-

دراويش تيت تيت

ها يا إستاذ محمد، إنت جاي معانا النهاردة !؟ اه إن شاء الله هنروح إزاي ؟ لأ هأبقي أكلمك لما تروح .... مكالمة شكلها من بتوع ملف المكتب رقم 19 صح ؟

بس المكالمة مكانتش فيها أي سرية هي شكلها كده بس.. الحكاية اننا كنا رايحين نشجع الدراويش - تيت تيت - طبعاً هتقولوا إنت مش كاتب إنك أهلاوي يا عم !! هأقولكم آه بس ده الكومي يا جماعة - بالمناسبة اللي ميعرفش مين هو يحيى الكومي هو رئيس مجلس الإدارة والعضو المنتدب للشركة اللي أنا شغال فيها وكمان رئيس النادي الإسماعيلي - وقلت أروح ماروحش ليه مش مقصورة وجو حلو آه أروح هو أنا هاروح الإسماعيلية كل يوم يعني.. بالمناسبة ده تاني ماتش بين الإسماعيلي والزمالك أحضره واحد في القاهرة وده التاني، نزلنا الساعة 4:15 عشان الراجل كان عايزنا نفطر كلنا مع بعض هناك مع اللاعيبه.

خدنا الليكسز وطلعنا علي الطريق الساعة 5 وصلنا الإسماعيلية الساعة 6 الحمد لله وصلنا !! دخلنا النادي أو الإستاد يعني وهنا بدء اللعب، أنا مش من محبي المنظرة ولا الكلام الفارغ ده والإ كنت إستغليت المنصب اللي كان فيه الوالد الحمد لله يعني ربنا هديني في الحكاية دي بس الصيت ولا الغني برضه... كنا ماشيين مع مدير المكتب بتاع الريس وكل ما حد يتكلم يقولوا رايحين فين الولد يرد الرجالة من مصر كندا الرجالة من مصر كندا... ونزلت الملعب لأول وآخر مرة أكيد وطلعنا المكتب قعدنا فيه ساعتين مملتيـــــــــــــن جداً بعد الفطار السمبتيك اللي فطرناه - للأسف فطرونا الفطار السوبر بتاع اللاعيبة ومخدناش بالنا إنه فطار لناس نازلة تلعب كورة بعد شوية !!! - طب وإحنا مالنا يا عم عايزين نااااااااااااكل.

هوب الماتش بدء ودخلنا المقصورة والماتش بدء وكنت سعيــــــــــــــد لما وأخيراً جمهور الإسماعيلي شتم في جمهور الزمالك !! طبعاً مش مبسوط من الشتيمة ولكن مبسوط إن أخيراً جمهور الإسماعيلي ممكن يعامل جمهور الزمالك زي أي ناس مش أكنهم ولاد عم !!! إشمعني الأهلي يعني هو إحنا يهود !! المهم والغريب إن مش كمان شتموا الزمالك دول نادوا أهللللللي أهلللللللي انا مكنتش مصدق فصورتها صوت وصورة !! ده تاريخ يا جدعان.

الماتش خلص والزمالك غلب واحد صفر !! من جوايا كنت بأرقص عشان التلات نقط اللي طاروا من الإسماعليلي في سباقه مع الأهلي بس كنت بأموت وعايز أكل برضه في نفس الوقت.. روحنا وافي الطريق كان فيه هيصة وموكب وناس واقفة علي الجنبين بتتفرج علي العربيات اللي ماشية ولسان حالهم يوقلولنا "منورين يا ولاد الـ " يلا تعيشوا وتاخدوا غيرها يا دراويش وعقبال الأهلي وهأبقي أحكيلكم علي اليوم ده.

ع المائدة مع جينا

زمان من أيام ما كنت بألعب في النادي الأهلي بالجزيرة وأنا نفسي أفطر في الشارع علي مائدة رحمن أيام ما كنت بأروح بعد التدريب ساعة الفطار... لمدة 3 سنين كنت بأفطر غالباً عند ميدان العباسية وأنا في الأتوبيس فاكر أوي الأيام دي كانوا الناس بيطلعوا الإتوبيس ويوزعوا كوبايات بلح، بس فكرة الفطار علي المائدة أجمل بس كانت بعيدة والكسل كان واخد حده معايا.

النهاردة كان عندي شغل بأعمله مع "جينا" خلصنا الشغل علي الساعة 5:15 العصر وكنا جنب الجامعة في التحرير وبنفكر لسه هانفطر فين... قالتلي إنت فطرت قبل كده علي مائدة رحمن ؟ قلتلها لأ والنهاردة كنت لسه بأفكر إمتي هأعمل الحكاية دي.. قالتلي طب إيه !! ما تيلا.. قولتلها ماشي يلا !! يا سلام دي أنا كنت عايز أعمل الحكاية دي من زمان، قالتلي هيبقي فيه مشكلة لو الناس عرفوا إني مسيحية يعني؟

قولتلها أكيد مفيش مشكلة يا بنتي المسألة مش كده خالص والناس مش كده ... مفيش حد هيقولك حاجة طبعاً، أنا وأنا بقولها كده يمكن جزء مني كان خايف إن فيه حد يطلع فشنك ويحرجني ويضايقها وساعتها كان الموقف مش هيبقي ظريف.

مشينا يمين في شمال في يمين ما شاء الله الموائد كانت كتيرة بس أنا كنت بأدور علي مائدة فيها ستات قاعدة عشان يبقي ممكن تقعد معايا علي المائدة، لقينا مائدة دخلنا عليها بهدوء كده يشوبه الحذر زي ما بيقولوا في النشرة بتاعت الساعة 9 الجميل بقي هو التالي: الراجل اللي بينزل الأكل علي المائدة فضحنا "إتفضلوا يا أسااااااااااااااااااااااتذة دي مفيهاش إحرااااااااااااااج دي حاجة بتاعت ربنا مفيهاش كسوووووف"

يا عم مفيش كسوف ولا حاجة - سيبك من انك فرجت علينا المائدة كلها - كل سنة وإنت طيب يا ريس وقعدت أنا وهي، الناس قعدوا يتفرجوا علينا شوية كده كأننا سياح بس لحظات وكله بص في اللي كان بيبص فيه وبدأت أنا في الملاحظة والمراقبة كعادتي دايماً، طبعاً كنت مركز مع جينا في الكلام بس برضه كنت مركز مع الراجل اللي كان علي أقصي يمينا.

راجل غريب مش بيكتفي عمال كل ما حد يعدي يقولوا هات هات وياخد ويخبي تحت العيش، ومركز برضه مع الست الطيبة اللي كانت جنب جينا ست غلبانة علي الرغم من إنها كانت فقيرة وطيبة بس كانت إيديها عالية.. لما الأكل نزل والآذان أذن خدت شوية بطاطس ورجعت الباقي لو حد محتاجها واديت الراجل بتاع النظافة علبة الرز باللبن بتاعها.. ست منتهي الطيبة علي الرغم من إحتياجها للحاجة اللي بتوزعها.

المائدة كانت إلي حد كبير نظيفة جداً، الناس المسئولة عنهم ناس طيبين مجتهدين ربنا يكرمهم، الفطار في مجمله كان جامد جداً أنا نفسي في البيت مش بركز أوي كده وبأنوع في الأكل زي كده أينعم المعالق كانت من أرق ما شوفت في حياتي لدرجة اني خفت عليها مش مني !! لأ من جينا كمان، الفطار كان كالتالي: طبق رز + طبق بطاطس + طبق سلطة (علي قد حاله) + علبة رز باللبن بالمكسرات + موز + جوافه + كوباية مية بالبلح! البلح كان بالنوي بتاعه بس مش مهم كانت جميله!

"جينا" طبعاً عملت أجمد تعليق في اليوم كله !! لاقيتها بتقولي هما حاطين ليه بلح في المية !!؟ أنا ماما بتحط نعناع لكن بلح!؟

قلتلها لأ ده المفروض إنه مشروب رمضاني بيبقي البلح متقطع وبيتنقع في المية لفترة طويلة وبيبقي طعمه تحفة !! اشربي اشربي هتلاقيه حلو.. طبعاً انا مكنتش لسه واخد بالي ان الناس عملينه علي عجلة من أمرهم الظاهر فيااااادوب ملحقش يبقي مشروب أوي يعني.. البنت شربت وقالتلي آه حلو حلو وبعدت الكوباية آخر حاجة في الطربيزة !

فكرتني جينا بحكاية المعالق دي، كانت معلقتها طارت من شوية هوا !!!! فسألنا واحد من اللي بينزلوا الأكل قالنا لأ والله يا بيه خلصوا.. سألت واحد تاني قالي من عينيا وغاب ورجع بيبص لجينا ويقولها دي معلقة الحلويات !! قولتلها إتفضلي جاي بيعاكسك قبل الفطار وعيني عينك كده، قالتلي حرام عليك الراجل فعلاً جايب معلقة البسبوسة ..!!

جينا كانت مبسوطة أوي كانت بتقول إنها من زمان نفسها تآكل علي مائدة في الشارع وحسيت إنها مش خايفة من الناس ولا مقلقة منهم حتي كانت طول القعدة بتتكلم عن صحابها في الكنيسة وعن حاجات في الكنيسة بتحصل عندها، أنا كنت مبسوط عشان اللي خد باله من الناس إنها مسيحية إتصرف بطبيعية ومعملش حاجة ملهاش لازمة تتعمل.. وعجبني في جينا كان كل ما بينزلها حاجة تديها للست العجوزة الطيبة اللي كانت جانبنا حتي أنا مخدتش بالي في مرة وأنا بينزلي طبق الرز وكنت سرحان وحطيته قدامي، لاقيتها بتزغدني وبتقولي "give it to her"..!!

بجد تجربة حلوة قوي وأحب إني أكررها تاني طبعاً كان نفسي أصور الناس وأتصور أنا شخصياً بس حسيت إنها هتبقي قلة ذوق مني وتقليل من الناس اللي قاعدين يفطروا في آمان الله وعلي مائدته.

أول أيام رمضان

في جاكرتا - إندونيسيا

-

في جاكرتا - إندونيسيا

في كابول - أفغانستان - الفول بيجهز للفطار

في مانيلا - الفلبين

جنوب تايلاند - الإحتفالات بقدوم رمضان.. الله عليكم

صيدا - جنوب لبنان - الناس بتشتري مخلل عشان الإفطار

الرباط - المغرب - إقبال علي الحلويات

رام الله - فلسطين

الصومال - النساء يبيعون السمبوسك وفي إنتظار الإفطار

وفي مصرنا الحبيبة

كل سنة وانتوا طيبين

-

كل شهر وإنتم بخير

كل شهر وإنتم بخير

ويا رب كلنا السنة الجاية ان شاء الله نحصل علي كل ما تمنيناه من الله هذا العام

-

تموين الخير لشهر الخير

النهاردة كان يوم تعبئة شنط تموين رمضان

الحمد لله من قبل ومن بعد ربنا وفقنا وعبينا 1200 شنطة من تموين رمضان

يعني 18 طن مواد عذائية للمحتاجين من أهلنا بمناسبة شهر رمضان

كل شباب وبنات "المتطوعون في العمل" بالجامعة الأمريكية

كانوا موجودين وجاهزين الساعة 9:30 صباحاً

وصلنا المكان اللي فيه المواد اللي هنعبيها

حاجة تانية الكل خد بالوا منها

الكل كان بيقول يا جماعة تعالوا بهدوم مبهدلة شوية عشان اليوم ده هيبقي فيه بهدلة

الكل جيه أشيك حاجة وأكنهم رايحين عيد رايحين إحتفال

فعلاً لأنهم فرحانيين بالمجهود اللي تم وبالأسر اللي هنرسم البسمة علي وجههم

تم تقسيم البنات والشباب علي كل الأصناف وفي عمل إنسيابي
كان موجود فيه الضحك والروح الحلوة

كله كان عارف شغله كله عارف مطلوب منه إيه وأكنه خلق للعمل ده

-

ما شاء الله في دقايق المكان إتملي والشنط بقيت في كل مكان وأعاقت حركتنا

-

بدأ الكل يجيب العربية بتاعته في الجراج ويشيل شوية شنط من اللي إتعبت

ويطلع علي الأماكن اللي حددناها من خلال شغلنا وأبحاثنا عن مستحقيها

-

بدأنا كلجنة للبحث والتطوير نراجع أسماء الناس في ميت عقبة المستحقين للشنط دي

أنا مش موجود في الصورة دي علي فكرة أنا اللي مصورها

وبدء الجد... وبدء ترتيب دخول العربيات النقل المخصصة للأماكن البعيدة والجمعيات الخيرية

وبدأنا بجمعية خيرية في الزقازيق - محافظة الشرقية

-

وبدء التحميل علي العربيات وبدء الحب والغيرة كله بيجري يشيل أكتر من ما يتحمل

قولوا أنا الحمد لله زي الباب فمش مشكلة معايا لما اتبهدل ولا أشيل ثلاث شنط في مرة واحدة

الجميل إن البنات كانوا بيشيلوا شنطتين كل واحدة في إيد وماشيين ولا أكن فيه حاجة

ولا أكن الحمل 30 كيلو متوزعة علي الإيدين

كنت مبسوط أوي وأنا شايف إن البنات طلع منهم الحماس ده

بيتسابقوا عشان يحملوا علي العربيات النقل

-

ومن المشاهد برضه اللي مش هانساها من اليوم ده

مشهد للمصور الخاص بالجامعة اللي هنستخدم الفيديو اللي صوره بعدين

لاقيته قفل الكاميرا وشالها في شنطته

وجري يشيل اشولة فاضية ويمر علي الأصناف ويعبي زينا

روحت قلتله إيه ده عايزين نصورك بقي إنت كمان، قالي لا مليش في التصوير

وراح كمل نقل في الشنط

وإستمرت العربيات في الدخول والخروج والناس بتدون العدد وبيحتسبوا من عند الله الأجر

أنا إتعجبت من التنظيم ما شاء الله وعلي الرغم من إن الشارع من أضيق شوارع المنيل

سبحان الله العربيات النقل دي كانت واقفة إزاي وإتنظمت إزاي في الدخول والخروج

العربيات دي كانت واقفة فين أصلاً ولا مين اللي إداهم التوقيتات

الله أعلم كانت لحظات جميلة أوي

وتيجي أكبر عربية كان هيتحمل عليها 150 شوال ومش هأقولكم أكتر من إن كل العربيات

اللي فاتت كانت بتتحمل وتمشي في هدوء تام

آخر عربية بعد ما الراجل عد الرقم 150 كلنا ممسكناش نفسنا وكله سقف بحرارة

-دي صور من توزيع الشنط في الجيزة تبع جمعية أحب الأعمال الخيرية

تابعها لنا الصديق علاء من مجلة "دايمنشنز" بالجامعة الأمريكية

علاء برضه من الناس اللي كان يغطي الحدث عشان هدف معين للمجلة

لكن قالي في ايميل بعتهولي اني كنت جاي عشان كده فعلاً ولكن لما لاقيت الروح

كان لازم اشارك معاكم وبأشكركم علي المجهود اللي عملتوه وربنا يتقبل

.. قلتلكم الكل كان متحمش من الروح والغيرة علي الثواب ..

مش هأعرف مهما حاولت أنقل الصورة اللي كانت هناك ولا الروح اللي كانت موجودة

إن شاء الله يتقبل منا عملنا ومن الصائمين صيامهم

وبإذن الله نفرحهم مرة تانية لما نتجمع تاني ونشتري لهم لبس العيد

-

كل سنة وإنتم طيبين يا أهلنا يا طيبين

-

توقيع

المتطوعون في العمل

Volunteers In Action

-