طريقة الموجة

مساء الخير

.

لحد امتي هنفضل نشتغل نفسنا؟

ونعتقد ان الفوز والانتصار في الرياضة بيجي بطريقة هيلا هوب

بغض النظر عن ايه هي الرياضة دي..

مش انه بيجي بالتعب والجهد والتدريب زي اي مكان تاني !!

لحد أمتي هنفضل معتقدين ان الجمهور اللي بيحضر المباراة

هو اللي بيخلينا نكسب أو نخسر لما ميجيش !!

.

باتفرج دلوقتي علي ماتش مصر والبرازيل

في كاس العالم للشباب لكرة اليد اللي مقام في مصر

والصراحة منزعج جدا من المعلق

عشان المفترض انه معلق كرة يد

يعني المفترض انه معلق فاهم مش واحد قاعد بيتكلم

ده اللي انا سامعه منه طول الـ 26 دقيقة اللي فاتت..

.

الله يا مصر

الله علي جمهورك يا مصر

الله علي بنات مصر

الله علي حسناوات مصر (مع إنهم مش حسناوات خالص)

الله علي أطفال مصر

عظيمة يا مصر بجمهورك

الله علي علم مصر

الله التشجيع بطريقة الموجة (هي بقت طريقة !!)

الجمهور النهاردة مرعب !!

كل المدربين بيقولوا إحنا ماشوفناش زي كده !!

صوت الجمهور المصري مسمع في كل انحاء البلد !!

.

انا ساكن قريب من الإستاد ومش سامع حاجة يا كابتن !!

عايز افهم مين اللي قاله ان المدربين بيقولوا كده؟؟

عمل معاهم لقاءات صحفية مثلاً وسألهم؟؟

يعني ايه الله علي حسناوات مصر !؟

هي الرياضة بقت بتتحسب بالحسناوات !؟

.

مش عايز طبعا انسي مخرج اللقاء العبقري..!!

اللي لسه من دقيقة مركز علي رٍجل الحكم !!

عشان عامل عليها وشم !!!!

.

ويا سلام لما النور قطع في الصالة

وده خطأ اتحاسبت عليه اللجنة المنظمة قبل كده

من قبل الإتحاد الدولي واتفرض عليها غرامه بالدولار الحي!

الحمد لله مسمعتوش بيقول الله علي كهرباء مصر !!

بس قال حاجة ضحكتني.. لما المخرج جاب الصورة

علي اعمدة النور في الصالة اللي انطفت..

قال واهو المخرج مندمج في اجواء المباراة !!

هو المفروض يكون مندمج في اجواء ايه بالظبط ؟؟؟

الشوط الأول خلص

والمذيع المتألق تمني ان يا رب مصر تفضل دايماً متقدمة

مجابش سيرة أي خطة لعبوا بيها خلاص تعليقه

ولا هما بيدافعوا ازاي ولا بيعتمدوا علي ايه !!

انا كنت لاعب كرة يد لمدة سنتين !!

كنت حارس مرمي وفاهم كرة يد اكتر من كرة القدم !!

عايز اقولك يا كابتن اللي انت قولته في الماتش ده !!

اهانة مباشرة ليا ولكل واحد بيلعب او لعب كرة يد !!

قال الله علي حسناوات مصر قال !!

.

مفيش استديو للتعليق زي أي بشر بتحترم الرياضة

باسمع دلوقتي لمزيج من الأغاني الوطنية الفاكسة !!

للأسف هنفضل كده ماشيين بالزق وفاكرين ان هو اللي بينفع

للأسف هنفضل فاكرين ان بدلة سمير زاهر هي اللي كسبتنا كاس افريقيا

للأسف هنفضل فاكرين ان لما البنات بتحضر ماتشات ده انجاز عالمي!

للأسف هنفضل نهدي الفوز لكل رؤساء الإتحادات ومجالس الإدارات!

للأسف هنفضل بنشغل اغاني منير وشيرين وحماده هلال ونانسي عجرم!

قبل كل ماتش ان شاالله ماتش بلي مسافات طويلة!

.

سلام عشان اغنية منير بدأت..!!

دي اصطباحه يا بيه

صباح الخير

ماهو لازم كان هيجي اليوم !

للتاكسي الأبيض ابو عداد ديجيتال !

كنت حابه جدا لأن مشاويري كلها طويلة الأمد

بما إن حياتي كلها في وسط البلد و الزمالك وانا ساكن في هليوبوليس

و أنا اصلاً عندي مشكلة شخصية مع العربيات

اتمني انها تخلص قريب ..!!

صاحي متأخر

ولازم اكون الساعة 9 علي مكتبي

مع ان حالة من الإحباط بدأت تسيطر عليا

لكن عشان ماأكدش المعلومة اللي بتسطير "عليها" اني باتدلع

وأنا مش باتدلع تماماً

_

- زمالك ؟

- اتفضل

.. التاكسي مشي لحد صلاح سالم ..

- لاحظت ان العداد مش شغال ..!!

- يا ريس انت مش مشغل العداد ؟؟

- يا بيه اصل دي منطقتي مابخرجش منها

- بس قولت يلا جالك رزق بره مترفضش

- ف قولت اوصلك ...!

- متشكر جدا علي كرمك

- بس انا باركب التاكسي ده عشان العداد

- ليه بس يا بيه.. في بيتها

- كلها حاجات بسيطة خالص

.. كل ده العداد مش شغال ..

- علي فكرة يا ريس لو فيه مشكلة انا ممكن انزل

- يا بيه ليه بس هاوصلك

- وانت كل يوم بتروح الزمالك وهتقدر كويس

- لأ ما هو انا باركب التاكسي ده عشان ماقدرش

- لا حول ولا قوة الا بالله ليه كده بس يا بيه

- ايوة عشان ماحدش يقولي ظلمته و الكلام ده

- لا يا بيه مفيش ظلم ولا حاجة

- انا بس مش باخرج من المنطقة مشاويرها صغيرة

.. كل ده العداد لسه ماشتغلش ..

- طب يا ريس انا بس مش فاهم المبدأ

- يا بيه مفيش مشكلة والله خليها علي الله

- انت عارف يا بيه دانا امبارح نزلت لاقيت القزاز متفشفش ميت حته

- لا حول ولا قوة الا بالله معلش

- يا بيه خليها علي الله دي اصطباحه العربية

_

لحد الوقت ده انا مافهمتش انا ليه دخلت في الحوار ده كله

وايه اللي دخل الرزق في انه يشغل العداد

وايه مشكلة انه مش بيخرج من منطقته و انه يشغل العداد

وايه مفهومه عن انه قال يلا هيوصلني.. كتر خيره

وصلت الزمالك و كان شغل العداد ..!!!

طبعا مش هاحكي الحكاوي المعتادة

ان التاكسيات اللي ركبتها في عمان الأردن

كانت عاملة ازاي و السواقين كانت اخلاقهم ازاي

او المواصلات اللي ركبتها في لوكسمبورج كانت ازاي

لأن ده كلام هيكون مقارنة بالكلام اللي عندنا ... كلام مبتذل !

انا مش متضايق تماماً

انا في اسعد ايام حياتي تقريباً

بس حبيت اشارككم

سلام

and for my friends from ALF EuroMed Training

I won't forget my promise and I will use Meedan.net

to translate this post and upcoming posts too

I have so much to post about those lovely days we spent

الحمد لله يا حبيبي

هو أنا ليه بأرخم عليكي؟

مش عارفه بجد رد أنت

أصل أنا مش بأرخم علي حد

ولا عليها ولا عليها ولا كمان عليها ولا حتي عليه.. أشمعني !

عارفه يمكن عشان مش عايز أرخم !

زمان كانوا بيحكولي..

لما كنت امسك اي حاجة واكسرها

كنت أروح أقول لماما..

ماما أنا كسرت الفازا

الحمد لله يا حبيبي

ماما أنا كسرت القطر

الحمد لله يا حبيبي

لحد ما بقيت باروح أقولها..

ماما أنا الحمد لله كسرت الكوبايه

تقولي الحمد لله يا حبيبي

كراريس الجغرافيا

صباح الخير

من زمان جداً وانا صغير

أيام ما كنت صغير يعني

كان نفسي أشوف الحاجات من فوق

يعني اعرف الحدود واعرف ارسمها

كنت بأحب الجغرافيا عشان كده

وأنا في سنة رابعة ابتدائي كنت بارسم الخريطة

بتاعت الوطن اللي كان عربي.. في ثواني

كنت بارسمها للعيال اللي في الفصل

كانوا بيجمعوا كل الكراريس تحت بعض

وانا ارسم !

عشان كده وأنا في أي مكان باروحوا

الذاكرة الفوتوغرافية بتشتغل وباحفظ أبعاد المكان

طبعا أمل حياتي اتحقق لما اخترعوا Google Earth !

وراني كل حاجة من فوق زي مانا كنت باحلم

برج القاهرة بالنسبة لي متعة تانية !

طلعتوا اخر مرة في 2006 في عيد ميلادي الـ 25

مع صديقة عمري جينا

هي مبتحبش الإرتفاعات بس طلعت عشاني

علي رغم ان طلوع البرج مش انجاز تاريخي

بس لحد دلوقتي فاكر اليوم ده جداً

لانها قد ايه كانت خايفة.. بس قد ايه كانت مستعدة تعمل

عشان تحتفل بعيد ميلاد صديق الكفاح المسلح !

يومها قالت لي انت بتعرف تستمتع بوقتك جداً

انا كنت فاكرة اننا هنطلع فوق 20 دقيقة نتفرج وننزل

لكن احنا قعدنا فوق 4 ساعات

انا مبسوطة !

مش عايز اقول كلام إنشائي

بس مصر حلوة اوي من فوق

تحت بس لينا القرف والزحمة والصداع

حاجه باظت جوه

صباح الخير

امبارح كان يوم لطيف الي حد ما

بس ده ميمنعش اني لسه حاسس بنفس التقل علي صدري

مش قادر اضحك

مش عايز أتصور

ولا أصور

ودي حاجة للي يعرفني.. خلاص من علامات النهاية

اتفرجت علي فيلم اسمه "Fever Pitch" كان علي عكس ما توقعت

الفيلم يديك انطباع انه من الإفلام اللي تشوفها وانت بتتغدي!

لكن الفيلم شدني وكملته للآخر مع اني كان لازم انزل

عشان احضر العرض الأول لفيلم "العالمي" في نايل تاورز

الفيلم عن مهووس بحب فريق "Red Sox" للبيسبول

مدرس بيحب شغله بس مش اكتر من فريقه

قابل بنت ناجحة جدا وكان بينهم قصه حب

الفيلم بيمر وباحس ان كل حاجة في الفيلم بتخبط فيا

سواء كنت في معظم لحظات الفيلم باكون "Ben" او "Lindsey!"

يعني أحداث أكون زيه وأحداث أكون زيها!

جملة مهمة جدا قالتها بطلة الفيلم "Drew Barrymore" في اللحظة

اللي حست فيها ان قلبها انكسر... لأ خليني ارجع بيكم شوية من قبل!

جت لحظة في الفيلم حس "Ben" ان حبه ليها "لازم" يكون اكبر من فريقه

وقرر انه مش هيضحي بيها لأنها بتحبه

وانه هيسيب الماتش اللي بين فريقه و"NY Yankees"

وهو الشخص اللي عمره ما فوت ماتش واحد من 11 سنة لفريقه

في لحظة حميمية من اللي "دايماً" بيتقطعوا في القناة الثانية !!

قالها.. الليلة دي من أجمل الليالي اللي كانت بينا!

ثواني.. جاله تليفون قاله ان فريقه بعد ما كان مهزوم 0-7 كسب 8-7

فجأة رجع لشغفه ونسي اللي قاله وقالها ان الليلة دي من اسوء الليالي

وانه لا يمكن كان يتخيل ان الماتش الوحيد اللي يفوته هيكون تاريخي

وانه وانه وانه... وعمل زي ما كلنا بنعمل لما بنكون مرتاحين!

راجعين بضهرنا! مش خايفين اننا نفقد اللي معانا!

لما بيكون اللي معانا.. "أمر مسلم بيه" !

بيمر الفيلم بس مش فاكر أي حاجة من اللي حصلت

لأني كنت باشوف فيلم تاني في دماغي!

بافتكر الفيلم التقيل.. الفيلم اللي الإستراحة فيه لسه ماجتش!

بس رجعت وفوقت علي الجملة اللي كان بيحاول فيها

انه يرجعلها ويقولها يلا نتجوز!

المشهد بين "Ben" و "Lindsey!".. واقفين علي باب بيتها

ردت عليه.. شغفك لفريقك هو نفس شغفي ليك

كان نفسي شغفك ده يكون في يوم من الأيام ليا

للأسف مش هاقدر اكمل

لأني انجرحت

جداً

ولما ده بيحصل

فيه شئ جوانا بينكسر

ومبيرجعش زي الأول

إنتهي !

Fade to Black