Thursday, January 11, 2007

قصة عـُملة


ولا قصة شعب ؟ مشيها قصة عملة أحسن، غريبة الدنيا..!! ممكن تنور لحد فكرة وهو مش واخد باله وساعات كتير أوي بتبقي ضلمة.. مهما عمل مبيفهمش ومبيستوعبش.


النهاردة وأنا باتفرج علي أهم صور غيرت التاريخ.. أثرت فيه وفي تطور الدنيا من حوالينا.. بصفتي راجل باحب التصوير مش أكتر، لاقيت مواقع بتتكلم عن الموضوع ده وهيصة وموال كبير أوي مش مجرد حاجة كده انا خدت بالي منها... لأ ده طلع إن فيه كتب ومقالات منشورة عن المسألة دي.. قلت كويس ادور علي افضل موقع واكثرهم موضوعية وانشر الصور دي، علي الأقل احاول افرج صحابي قبل الناس اللي بتقرا المدونة إن فيه حاجات كتير حصلت مهمة ممكن ميكونش حد سمع عنها.. وبدأت.


لاقيت حاجات كتير اوي هأوريهالكم منها شوية لأننا كلنا أكيد عايزين نتعلم ونتثقف ودي مش حاجتي لوحدي يعني ... ولأن كتير صور شدتني وكنت باتناقش انا وصديقتي " بابريكا " - مريم أو رووما زي ما بتحب يتقالها - وقالتلي ان احسن صور في رأيها كانت كالتالي:


إذا لم تظهر الصورة - Right Click / Show Picture - www.baitelezz.blogspot.com

The Kiss of Times Square

Alfred Eisenstaedt, 1945


إذا لم تظهر الصورة - Right Click / Show Picture - www.baitelezz.blogspot.com

Migrant Mother

Dorothea Lange, 1936


إذا لم تظهر الصورة - Right Click / Show Picture - www.baitelezz.blogspot.com

Gandhi at his Spinning Wheel

Margaret Bourke-White, 1946


وأنا وافقتها فكل من الصور دي كان ليها قصتها وحكايتها اللي كانت علامة مميزة في التاريخ .. مش الصورة نفسها طبعاً لكن القصة، الحكاية .. اللحظة اللي العالم وقف فيها لحظة وساب ذكري وراه اللقطة دي، وهو ده رأيي في التصوير إنه أداه اني اوقف الوقت واحتفظ باللحظة دي ليا ... نرجع تاني للصور لأن كان عندي إختلاف مع رووما وإحنا بنشوف موقع "13 صورة غيروا التاريخ"وهو اني مش شايف ان من احسن 3 صور .. صورة غاندي. لأني يمكن مش حاسس بيه اوي او مش مقتنع مع علينا من رأيي لكني إخترت صورة تانية عجبتني..


إذا لم تظهر الصورة - Right Click / Show Picture - www.baitelezz.blogspot.com

Omaha Beach, Normandy, France

Robert Capa, 1944


عجبتني الصورة دي أكتر لأني إفتكرت كلمة كان بيقولها المصور الحربي الشهير روبرت كابا "لو صورتك مش جيدة كفاية.. يبقي إنت مش قريب كفاية" فحسيت إنه كان قريب في الصورة دي أوي.. لكن بعد كده لما نامت رووما وانا قعدت اقلب لاقيت صور تاني احلي ولاقيت صور تاني اوقع واكتر تأثير في التاريخ ولاقيت إن ... إيه ده !! إحنا كنا في موقع شايف ان كل حاجة في التاريخ هي أمريكية !! يعني وجهة نظر محدودة جداً جداً جداً مش شايف إن فيه حاجة برة تستاهل اصلاً إنها تكون في مجري التاريخ.. يعني مثلاً.. - وده كان بشهادة وتعليق من واحد أمريكي كاتب في التعليقات - إن الصور ما هي إلا كوكتيل صور في ألبوم صور أمريكي..!! فالصورة الأولي - يعني في الموقع - لجندي أمريكي - واللي انا بادلتها بصورة غاندي - والصورة التانية لعائلة أمريكية فقيرة والصورة الثالثة للحرب الأمريكية الأهلية والصورة الرابعة لحرب كانت أمريكا جزء منها - يقصد حرب فيتنام - والصورة الخامسة لجندي أمريكي يعود من ساحة المعركة - يقصد صورة القبلة - والصورة السادسة لصورة كارثة أمريكية - يقصد صورة إنفجار البالون هيندينبرج سنة 1937 - والصورة السابعة صورة طبيعية أمريكية - يقصد صورة لبركان في أمريكا - ويكمل الراجل العاقل الأمريكي ده ويقول هل مش كان من الأحسن ان الإختيار يترك لكل واحد يختار الصور اللي هو شايف من ثقافته انها غيرت التاريخ ..!! كلامه معقول الصراحة!


كملت بحث ولاقيت حاجات كتير برضه معظمها إتمحور حول الثقافة الأمريكية ورؤية نظرهم وواضح ان هما بس اللي بيحاولوا يسطروا التاريخ يمكن عشان يبقي تاريخهم هما وبس، زي ما كنت باتكلم مع صديقي " أحمد صلاح " مدير تسويق ومشتريات في شركة عافية - مصر عن حكاية الأمريكان والأعياد بتاعتهم واللغة بتاعتهم وكل الهالة اللي بيعملوها ليهم دي وأكنهم صحاب أصل أو تاريخ، فقلتله دايماً تلاقيهم بيحاولوا يبقوا حاجة !! لأنهم ولا حاجة أصلاً شتات متجمع ... مطاريد وحرامية العالم لما حبوا يهربوا من العالم القديم وكل واحد حب يدفن وراه اللي وراه... جري هرب وراح العالم الجديد عشان يفتح صفحة جديدة !! أو قديمة ميهمش محدش عارف حد أصلاً.. وقلتله ان فيه مقولة مشهورة بتقول إن " أشر الناس في العالم إتجهوا للغرب، فوصلوا أمريكا، وأشر الناس في أمريكا إتجهوا للغرب، فوصلوا كاليفورنيا..!! "

-

رجعت تاني للصور رنت في دماغي اكتر من صورة كان اجملهم علي الإطلاق صورتين، الأولي الصورة الشهيرة لميدان تيانانمين في الصين عام 1989 طبعاً كنت لسه عيل صغير مش هأقولكم كنت قاعد مع ابن عمة بنت اختي باتفرج علي القناة التالتة !! بس عارف إن اليوم ده اتولد فيه بطلين .. الأول كان الشاب اللي وقف قدام الدبابة رافض إنه يتحرك رافض للظلم للمهانة للقرف في لقمة العيش وقف قدام الدبابة ومخافش علي اهله ليموتوا !!! ما هما ميتين ميتين "قال هيسخطوك يا قرد !!" والبطل التاني الجندي اللي ماخافش من قائده ورفض انه يدوس علي الشاب ويادوب حرك الدبابة يمين عشان ميدوسوش ويكمل طريقه .. طبعاً هاحاول اجبلكم الفيديو لأن الشاب موقفش لحد كده واتحرك مع الدبابة يمين - مكانش بيعمل حركات عشان الجزيرة بتصور لأ كان واقف وقفة رجالة بصحيح زي ما بيقولوا، بجد هاحاول اجيب الفيديو اللي ألهم الملايين من الصينيين وقالهم ان لسه في امل في انتهاء الديكتاتورية !!


Tiananmen Square

Sturat Franklin Magnum, 1989


والصورة التانية لأول صورة بإشعة إكس في العالم..


First Human X-ray
Wilhelm Roentgen, 1896


كل الصور دي أثرت فيا وكانت شئ جميل اني اتفرج الناس بتشوف الذكري إزاي وبتقدرها علي أي وجه، لكن الصورة اللي خلتني اكتب المقال ده، هي الصورة التالية: وهي صورة لعملة من فئة الدولار الأمريكي، الصورة ببساطة هي صورة لإحتفالات إنتصار الولايات المتحدة الأمريكية في الحرب العالمية الثانية ضمن جيش الحلفاء، الصورة إلتقطت لمظاهر الإحتفال اللي عمت البلاد في الوقت ده واللي منها برضه صورة قبلة ميدان التايمز اللي فوق، الجميل في الصورة إن الراجل كان مبسوط وبيرقص... الأجمل إن صورته بقت للأبد علي عملة أمريكية !!


إذا لم تظهر الصورة - Right Click / Show Picture - www.baitelezz.blogspot.com


محصلش إن العملة إترسم عليها وجه القائد الأعلي للقوات المسلحة الأمريكية !! ولا اللي فكر في إنزال نورماندي !! ولا اللي عمل الشاي للرجالة اللي نزلوا في نورماندي !! ولا أي حاجة من التمجيد والفخر بالإعمال والإنجازات ولا أي حاجة خالص من اللي متعودين عليها في عالمنا العربي اللذيذ !! الذكري بالظبط كانت عند الناس دول اللي إحنا يمكن بنشوفهم كفرة ومفتريين وبنكنس عليهم السيدة نفيسة وبنهريهم دعا ..!! الذكري عند الناس دول إتلخصت في فرحة شعب .. الذكري خلدت عندهم ببساطة شديدة في فرحة الرجل ده بالإنتصار ده !!


14 comments:

  1. ما شالله الصور عجبتنى اووى .. واكتر حاجة عجبتنى اشارتك لان امريكا اصلا ملهاش ماضى ولا تاريخ وان التاريخ ممكن يكون فى الشعوب اللى امريكا بتحتقرها .. ومع ذلك والله بحترمهم يا اخى , العزيمة والاصرار بيعملو كل حاجة وخلاهم ينسوا الماضى المشرد ويفتكروا انهم بس دلوقتى امريكا

    اللى عجبنى بجد اكتر واكتر .. كلمة
    هايسخطوك اية يا قرد ؟؟
    دة انا ضحكت ضحك .. انت طلعت منهم
    كويس انك عارف المبدء بتاع القرد دة اصلة حبيبى
    المبدء مش القرد هه

    ReplyDelete
  2. جميل اوى يا عز البوست ده
    فعلا الصور مش هقول بتوقف الوقت او الزمن بس بتوقف الاحداث
    زكريات معينه فى حياتنا لو شوفت الصوره بعد سنين بتفتكر الحدث
    وده كمان اكيد فى حياه الشعوب
    اما بقى بالنسبه لموضوع ان الصور تقريبا البوم صور امريكى

    لا تعليق

    ReplyDelete
  3. طب معلش افهم بقي عشان الموضوع بقي فيه قرود... أنا من مييييييييييييين بالظبط يا غالية !! :)

    ReplyDelete
  4. هي مش كل الصور هي بس الصور الثلاثة عشر اللي كان الموقع متفشخر بيهم.. لكن عاماً بقية المواقع ضمت صور لبقية الناس مش أمريكا بس

    ReplyDelete
  5. انت عز يا عز انت نسيت ؟؟ !!!!

    معلش هو اكيد علشان منمتش بقالك كتير فنام ولما تصحى احكيلك حكاية القرود .. على امل باللقاء

    معانا اتصال تانى ونقول الووووووووو

    ReplyDelete
  6. اسمحلي أحييك يا عز على اختياراتك للمقالات و الموضوعات على البلوج الخاص بيك.

    المقال دة عجبني فعلا، حسسني انه فعلاً احتفظ بلحظات من الزمن في صور، كل صورة منهم ليها حكاية وراها، و حتى لو متعرفش ايه هي الحكايات دي، كفاية لما تشوف الصور أكيد هتحس بيها

    ReplyDelete
  7. شكراً يا نهلة والله انا قعدت اروح واجي اكتر من مرة واترددت اكتب ولا مش مهم اوي لكن لما لاقيت صورة العملة دي !! كان لازم اكتب بدل ما ابكي علي حالنا

    بصي انا مش باحب اتمسح في الحضارة الأمريكية بس شكل العملة وهي عليها فرحة مواطن !! عادي !! شكلها فرحني انا شخصياً

    حاجة بجد اغلي من قيمتها بكتير..

    ReplyDelete
  8. بوست هايل والصور اللي فيه بجد تحفة وزي ما انت عارف اني بحب الصور وبالذات الغريبة منها والمختلفة واللي فيها فكرة وده اللي لاقيته في البوست بجد اما كلامك فالاتعليق بجد من اجمل حاجات كتبتها

    ReplyDelete
  9. مشكلتك يا ريما معايا انك كلمنجية كبيرة.. مش اقصد اساءة لا سمح الله بس انت بتكتبي احسن مني ستميت مرة فلما بتعلقي علي اللي انا باكتبه بتثبتيني...

    كالعادة مش هاعرف ارد عليكي غير شكراً شكراً متصدقيش الصور كانت ممتعة قد ايه.. لما اشوفك هابقي اوريهالك.

    ReplyDelete
  10. hayel bgd ya Ezz as usual :D but i need u to think of ur own pic that wud be remembered by ur kids and kids of kids so on and so forth;)

    ReplyDelete
  11. بجد البوست حلو خالص, والأحلي فعلا انه انسان عادي اللي صورته علي العمله, بس ده يمكن لأن الشعب عندهم حاجه مهمه وهو اللي بيحدد حاجات كتير فشئ طبيعي ان العمله يكون عليها صورة واحد من الشعب.

    ReplyDelete
  12. dont worry Somy.. i have tonz of pictures to share wiz my Kids.. bs omohom tegy bs w homa yego kaman bs welad el ........ teeeeeeeeeet

    :D thanks somy for the comment

    ReplyDelete
  13. عارفة يا إسراء الفكرة ان الحياة فعلاً بسيطة احنا اللي كلكعناها علي نفسنا... للأسف الشديد هما لسه محتفظين بيها بسيطة، وقت اللعب لعب ووقت الجد جد ووقت الحب حبيبة ووقت الحزن نكديين.. ده الفرق بينهم وبينا احنا بقي عندنا كله برتقال علي رأي مريم

    ReplyDelete
  14. اكتر من رائع يا عز
    بجد عليك اسلوب سرد رائع ربنا يكرمك اكتر واكتر
    بالنسبة للبوست فهو كعادة موضوعاتك جميل جدا
    بالنسبة لصورة غاندي انا حبيتها جدا جدا يكفى اني اول ماشفتها افتكرت الفيلم وقصة حياته وكفاحه عشان شعبه كل ده عدى على بالي في ثانية بمجرد صورة
    التصوير عموما انا بعتبره من الفنون الراقية بكل معنى الكلمة بالزبط زيي سيمفونيات بيتهوفن في ليله صفى فيها البدر باسم على الكون
    بالنسبة للعملة
    انا برده اتعرض عليا لقطة تتحط على الجنيه الخشب يوم نتيجة الثانوي بيصوروا فيها فرحة الطالب المصري بعد الشقى :))
    طبعا رفضت p:
    تاريخ امريكا
    انت عارف اني مش بحب اتكلم في السياسة :)

    ReplyDelete