Wednesday, January 31, 2007

كله بقي برتقال


إستغربت علي جريدة المصري اليوم - الصادرة يوم 29 يناير 2007 - وهي من الجرايد اللي بأعتقد فيها إنها حرة ومستنيرة ومش تبع حد ودي أهم حاجة عندي لأني بأكره مسألة التبعية دي في أي شئ ... إستغربت إنها تنزل عنوان بالسطحية والهبل ده في صفحتها الفنية .. " إليسا تنهي إعتكافها بألبوم جديد .. " أنا من الناس اللي بيحب صوت إليسا وكنت بأقول إنها ماعملتش إغنية وحشة مع إني مش باسمعها بس برضه ميمنعش إن محبيها كتير .. الشئ اللي خلاني اغير إضاءة الصورة عن اللي كانت في الأصل عشان كتف الهانم اللي كان باين وهي نايمة لأن مش ناقصة حد يديني ذنوب علي الماشي، بس يا حرام البنت تعبت من الإعتكاف وبتريح !!


إللي ضايقني بقي تسفيه اللفظ بالشكل ده، وإنه يطلق علي مغنية !! مش هأدعي إني شيخ طريقة بس من وأنا صغير وأنا أعرف إن الإعتكاف ده لما إنسان يعتكف علي عباده الله سبحانه وتعالي وينفصل عن كل ما حوله من أمور الدنيا ويخلص ويفرد الله بقلبه... حتي لما جيت أبحث عن أصل الكلمة قولت يمكن أنا جاهل، لقيت إن معني الإعتكاف هو لزوم الشئ وحبس النفس عليه، خيراً كان أم شراً، فلما يفتكس الأخ كاتب المقال العنوان ده ...!!! يبقي مش قصده غير حاجة واحدة .. إنه يخلط كله ببعضه الخير بالشر، الغـُنا بالعبادة، يمكن لجهل منه.. أو عشان مش فارقه معاه ..!! ما هو لو كان إعتكف مرة في حياته كان إتكسف من إنه يكتب العنوان ده ...


السؤال : لما الآقي العنوان ده علي الجرايد الصفرا والحمرا ماشي .. هأقول عايزين يبيعوا لازم يعملوا عناوين من نوع " لاعب كرة مشهور في سهرة رجل أعمال مع فتاة ليل في فيلا ثري عربي في مارينا !! " لكن المصري اليوم ليه تلجأ للعناوين الخايبة دي .. خلاص خلصت الأفكار ولا خلاص كله بقي برتقال مش فارقة !!

15 comments:

  1. طيب ياعز لما لاقيت اصل الكلمة لزوم
    الشئ وحبس النفس عليه
    يمكن هو ده اعتكاف اليسا
    ومش حايمنع انه يكون في اعتكاف هيفا بلاش نانسي عشان بحبها :D

    للاسف لما يكون في خبر معين وعايز الصحفي يبيع بيلجأ لأرخص الوسائل وهي اللعب بالالفاظ والمعنى هو في نظره انه كده جايب كلمة جديد او حاجة وااو يعني اننا اول مانشوفها حانجيب الجورنال او المجلة بس احب اقولك ان الناس بقيت بتفهم ومش بتشدها الطريقة دي دلوقتي

    ReplyDelete
  2. خلصت الأفكار ولا خلاص كله بقي برتقال

    عندك حق فى الكلامة يا عز

    دلوقتى تتوقع أى حاجة

    كل شئ بقى مباح وزى ما بتقول لو كان

    اعتكف مرة فى حياته كان عرف

    ReplyDelete
  3. والله يا عز انت اول ما ورتهالى سالت نفس السؤال .. وقلتلك هيا خالتى اليسا كانت بتعتكف فين ؟
    عامتة انا مبحبش اليسا اساسا سبحان الله لية معرفش مع ان صوتها حلو .. وكويس اوى ان انت غيرت اضاءة الصورة الواحد مش ناقص عقد . قصدى ذنوب

    كمان يا عز لو ركزت معايا شوية هتلاقينى بقالى قرن بنادى بان .. كلة برتقااااااااااااااااااال

    رمضان السكرى رمضان ابو سرة مش هتفرق .. واهو كلة برتقال

    ReplyDelete
  4. يبقي مش قصده غير حاجة واحدة .. إنه يخلط كله ببعضه الخير بالشر، الغـُنا بالعبادة، يمكن لجهل منه.. أو عشان مش فارقه معاه ..!! ما هو لو كان إعتكف مرة في حياته كان إتكسف من إنه يكتب العنوان ده ...



    انت كده قلت اللى فيها

    واهو كله برتقال

    ReplyDelete
  5. اقترح وده مجرد اقتراح ان احنا نعمل نادي اهو كله برتقال وذلك لكترة الاعضاء المشاركين فيه :D
    يا استاذ عز يعني هي جت عليه ماهو كله بقى لخبطيته خلاص ومابقاش في غيرة على دينا
    ولا نسيت دينا اللي شوية اتحجبت وشوية وراحت تحج
    الراقصة دينا سبب انفجار ازمة وسط البلد

    للأسف ده مابقاش برتقال .. ده بقى قرع بس مش عسل لأ بصل

    ReplyDelete
  6. بصراحة حاجه مخزية جدا جدا
    هل الاستهتار ومحاولة التميز تخلى الانسان يتغاضى عن مسلمات ومبادئ وقيم دينية؟؟
    وفعلا اللى يغيظ ان الكلام ده جاي من صحيفة المفروض ان ليها قدر كبير من الحيادية واللى اعتقد انها فقدته فى موضوع حركات طلاب الازهر الاستعراضية

    تحياتى لكم جميعا

    ReplyDelete
  7. بص يا عز انا رديت عليك قبل كده بس ماشيه طول الطريق بفكر فى الموضوع ده لانى متغاظه منه اوى
    انت عرضت نقطه انه استخدم كلمه اعتكاف اليسا لان الهانم اكيد مش معتكفه فى جامع لا طبعا خالص

    بس بعيد عن الدين ده اصلا ممكن مايكونش عارف معنى الكلمه بالظبط وده نفسه كارثه لان الاستاذ المفروض انه صحفى يعنى شغلته اصلا الكلمات ومعانى الكلمات

    وانا معاكى يا طمطم فى اقتراح النادى
    ههههههههههههههههه

    ReplyDelete
  8. هي المصري اليوم أصلها كان ايه؟؟؟ صفرا!! الطبع غلاب

    ReplyDelete
  9. علي رأيك اهو كله برتقال و بيعدّي مفيش مشاكل

    ReplyDelete
  10. جري ايه يا عم عز ديه حريه رأي وتعبير ولا ايه؟.........

    ReplyDelete
  11. ماشي يا جينتي ما هي برضه حرية رأي وتعبير وبأقول انه قليل الأدب

    :)

    ReplyDelete
  12. ينصر دين يا عز يا اخويا دانا جالي حموضه من الصور الي محطوطه بلازمه ومن غير و مش قادره اصدق ان جريده محترمه زي المصري اليوم تحط صوره كدا
    بس العيب على رئيس التحرير الي سمح بتسيب زي كده في مجله جميله زي المصري اليوم ياله كلو برتقال
    تحياتشي

    ReplyDelete
  13. Salam Ezz,

    Sorry that i post this on a topic for Elissa :( But i found this documentary bout Lady Fairuz and thought to share it with Firuz lovers:
    http://www.youtube.com/watch?v=Z-B9vmoLzYY

    Enjoy

    ReplyDelete
  14. Walahi ya Ezz,
    as for my loooooooooooooong experience in journalism , haaaaaaaaaaaa, u know abou 8 months now! i just discoevred that ther is no quite objective nor honest, nor clear journalism,it's pure matter of interests,and on of them El Masri El yom , i discovered that they are just put oil on fire, if u remebre the case of Farouk Hosni and Veil , i reported it quoting the newspaper witjout being able to understand the reason of such a kind of declaration, i mean the circumestances had nth to do with religion or veil or anythg, i afterwards knew that it was sth personal he had said to somebody, even if refuse totally what has he said, i began to see the picture more clearly , ther is no truth or honesty , every body want to make his own Scoope, without paying attention that such a thg can make a crisis in the whole country. I began to hate journalism from such deeds.Kefaya frustration today.

    ReplyDelete
  15. انا شايف يا جماعه انكم غلطوا في البرتقال !!!!ايوه اصل البرتقال ده نعمه بس الصوره ديه نقمه و ياريت البرتقال ميكونش زعل منكم و يطلعلنا السنه الجايه من غير قشر و يقولكم اشمعنا

    ReplyDelete