الكورة فييييييين

النهاردة كانت مصر كلها مزوغة من شغلها ومدارسها وحتي من بيوتها، كله كان في الشارع.. كله كان بيتفرج علي ماتش الأهلي ونيوأوكلاند في كاااااااااااااااس العالم للأندية، الكاس اللي كل الزملكاوية "الرماديين" اللي من جوه فيه جمر عندهم - طبعا مش كلهم - بيقولك "كاس عالم مين يا عم" ...!!

نزلت الصبح طبعاً ماروحتش الشغل ...!!! يوم تاريخي مش هانطلع كل سنة كأس العالم يعني.. ولو اني قولت كده برضه السنة اللي فاتت... ربنا يخليك لينا يا أهلي وتدلعنا كل سنة.. المشكلة اني قابلت كذا حاجة في اليوم ده بالإضافة للماتش، ارجع كام يوم كده قبل الماتش ده، عناوين الأخبار كانت : "غلق اكتر من 40 كافيه في مساكن الشيراتون والنزهة" عشان شكاوي السكان المجاورين من دخان الشيشة والضوضاء واللي انا فعلا معاهم فيه تماماً لكن اللطيف بقي ان المنطقة كلها كانت كافيهات وشغالة زي الفل وكله شال الشمع "الأحمر" وفتح واستقبل الناس ..!!! دي نقطة بدون تعليق ..!

نيجي لتاني نقطة وهي التعليق علي الماتش كابتن محمووووووووود بكر ربنا يديله الصحة ويمتعنا اكتر واكتر ..!! والله الراجل ده انا بأٌسبرنشق لما اعرف انه هو اللي هيعلق ... بقول تمام كده انا هاضحك ...!! اللي منكم ميعرفش محمود بكر فلاااا ده راجل ليه صولات وجولات في مجال التعليق، بكر إسكندراني الجنسية حيث الأيوه وطالاعو ونازالو والكلام اللي باللهجة الإسكندراني اللي زي العسل ده، لكن المشكلة الكبيرة في الكابتن بكر .. إنه بينسي !! وبيغلط كتير اوي !! وتحس تماما في أوقات انه بيعلق علي ماتش تاني اصلاً ... اينعم الراجل من اجدع الناس اللي تلاقيه بيعلق وبيحلل زي الفل لكن في التعليق وهمي !!! مثلاً وليس علي سبيل الحصر لأني لسه هاحكيلكم علي غيره كتير من المعلقين اللطاف جداً جداً جداً ... إمبارح وسط التعليق "متعب" اتأخر في كورة فإذ بي اتفاجئي بالكابتن بيقول " يااااااااه عماد اتأخر سالسة ! " إيه سالسة دي يا كابتن ..؟؟ يعني ثانية ولا سنتي ولا ايه بالظبط... الناس كلهم اصلا نسيوا متعب وانه فعلا ضيع هدف وقعدوا يضحكوا علي سالسة.. واحد قال انه اكتشف اكتشاف جديد زي زويل ..!!

في نهاية الشوط الأول والراجل عارف قبلنا انه بيعلق علي قناة إيه أر تي ... الاقيه بيقفل وبيحيي مشاهدي مجموعة قنوات " أوربت " ...!!! مزيييييييييييييد من الضحك والقهقهة ... وغير ده كتير كتير كتير الشئ اللي خلاني اسرح مع زمايلي في الشغل النهاردة وقعدنا نفتكر كل الوقعات اللي حصلت قبل كده من معلقين.

مرة كان حسين السيد حارس مرمي الزمالك "البركة" جاياله الكورة هادية جدا من أوت من زميله !!! شوفتوا الحلاوة .. سقطت من ورا إيده ودخلت فيه جون !! افتكر المعلق كان أشرف شاكر والمعروف بزملكاويته يومها قال : " أ** دي جون ..!!! " بس وكانت اخر مرة يعلق فيها الباشا في التليفزيون المصري !!! ومرة برضه حبيبي وحبيب قلبي مجدي عبد الغني في كأس العالم 2002 في ماتش البرازيل وتركيا... كااااااااااااااان وهمي خرافي حاجة محصلتش ..!! فاكره كان بيقول لما سمع جمهور تركيا بيشجع : "حد يقولي يا كابتن مجدي هما بيقولوا ايه !! اقولكم بيقولوا توركيا توركيا " يا سلاااااااااااااااام جيبت التايهة حضرتك .. اللي منكم سمع الماتش ده هيعرف كان بيقولها ازاي بطريقة وهمية مضحكة تماماً .. كمل اليوم ده التعليق بطريقة هيستيرية .. برضه قال : " حد يسألني يا كابتن مجدي - يا عم محدش سألك - يقولي يا كابتن مجدي هو ايه اللي حاطه حارس تركيا تحت عينيه ده !؟ اقولكم معرفش !!! " اصل كان الحارس ده حاطط حاجتين سود كده تحت عينيه .. محدش سألك يا كابتن ويا ريتك قولت معلومة .. فكرني بسمير غانم وهو بيقول " الكورة فييييييين "

ياه ولو حكيتلكم مش هانشتغل النهاردة خالص عشان فيه بلاوي بتتقال في التعليق مضحكة ساعات.. شتايم ساعات.. حاجات غريبة بس ساعات بتبقي مضحكة الصراحة، اقفل كلامي بموقف من المواقف المضحكة وقع فيه كابتن حمادة إمام مع إبنه حازم إمام.. واحد مشجع فضل قاعد فوق دماغه ..." إيديله حقه يا كاااااااابتن إهتم بيه شوية يا كاااااااابتن - طبعاً هو يقصد حازم امام عشان كابتن حمادة كان بيتجاهل عشان محدش يقول بيتحيز له - يا كابتن مش كده يا كابتن هي دي الكورة المصرية والله ده حرااااااااااااام " ... هنا بقي الكابتن حمادة ممسكش نفسه وحاول يغطي الميكروفون بس صوته طلع برضه وهو بيقوله " يا عم ده إبني !! "

-

سلاموا عليكم وكل ماتش واحنا مزوغين ...