Tuesday, March 27, 2007

السكينة سرقتني


مش عارف ابدأ منين.. علي غير العادة، أبدأ من - محمد جورج - صديقي العزيز اللي بيغيب يغيب ويرجع بإضافة جديدة في كتيب حياتي العملية؟ ولا ابدأ بالرجوع كام سنة لورا عشان أحكي عن حكايتي لما دخلت المقابر بالليل؟ ولا احكي عن "رانا" صديقتي من جمعية المتطوعون في العمل في الجامعة الأمريكية اللي صدعتها من الحكاية دي قبل ما اكتبها واللي هي اصلاً كانت سبب في اني اكتبها بإيميل صغير عنوانه كان " نصف ساعة تحت الأرض " اللي كان بيتكلم عن واحد دخل مقبرة لمدة نصف ساعة؟ ولا أتكلم عن غبائي وعدم إدراكي للصورة الإ لما بعدت عنها؟ ولا عن صديقي المدون البراء أشرف وتدوينته " صاحبتي " واللي كان من أسباب اني اكتب اللي باكتبه ده برضه؟.. مش عارف هبدأ وزي ما تيجي تيجي !


من اكتر من سنة كنت بألعب كورة مع صحابي في نادي في مدينة نصر إسمه الطلائع، النادي سوره جنب سور مقابر مدينة نصر... في مرة الريس ميزو مارس هوايته وشاط الكورة بعزم ما فيه فخرجت وكلنا كنا عارفين إنها خرجت جوا المقابر !! الساعة 11:30 بالليل.!! كله كالعادة قعد علي جنب لغاية ما اللي شاط الكورة يروح يجيبها، لكن معتز رجع وقال لأ مش داخل..!! انا ماصليتش !! معتز كان صريح مع نفسه ومعانا ووضح ان خوفه من انه يدخل المقابر عشان هو مش بيصلي.. فاكر اني قولتلهم آه أنا هأدخل ونطيت من السور ودخلت عادي خالص اكني داخل جنينة مانجا..!!


مش عارف بس محسيتش اني خايف.. محسيتش اني داخل مقابر.. زي ما كل الناس بيبقي قلبها مقبوض.. بل بالعكس كنت مبسوط وأنا باتمشي بين المقابر وبأحاول اتخيل نفسي جواها.. ده وأنا بأدور علي الكورة، قعدت جوه حوالي 20 دقيقة.. وخرجت بالكورة، السما كانت مظلمة جداً لكن ده مخلنيش اخاف برضه ماعرفتش ليه ساعتها، ولما روحت وحكيت لأهلي كانت علامات الغضب علي وشهم بيقولي اني فعلاً مجنون إني اعمل كده بس انا برضه كنت مش خايف ومبسوط.. ده انا حتي كنت بأقولهم كنت حاسس بإرتياح وأنا جوه.


بعد الحكاية دي بكام شهر عملتها تاني، بس أنا اللي شوطت الكورة المرة دي.. وجريت وكأني مستني ده يحصل عشان أجري أنط بسرعة جوه وأروح أجيب الكورة، أكني ماشبعتش من المرة اللي فاتت أو عايز أتأكد أنا كنت بعقلي فعلاً ولا الموضوع مش مخيف.. المرة دي دخل معايا - محمد عبد السلام - حد من الناس اللي زي الفل ما شاء الله ربنا يكرمه، محمد يمكن شجعني بس برضه كان نفس الإحساس.. وكأني مش في مقبرة !! مبسوط وقلبي مستريح والمرة دي بقي بيني وبينكم سيبت الكورة ونسيتها وقعدت امشي بين المقابر.. لغاية ما لاقيت قبر محفور.. مفتوح.. مستني صاحبه..!!


خلصنا ورجعنا الكورة وكملنا لعب والموضوع إنتهي عند حكاية الحكاية دي كام مرة لأهلي وعيلتي وخلاص راحت لحالها، والأيام أخدتني والسكينة سرقتني زي ما قالي - محمد جورج - بمعني إني مكنتش واعي ومندمج لدرجة عدم الإدراك من أساسه !! في أبلغ وصف للمرحلة اللي ضيعت فيها وقت كبير أوي وغلطت فيها كتير أوي أوي أوي وعملت فيها حاجات كتير مش بتاعتي ومش من مقامي، آه كان فيها أيام حلوة حلوة أوي كنت أحب إنها تكمل بس اللي حصل في أخر السنة أو الكام شهر اللي فاتوا دول أكد لي إنها كانت مجرد غلطة كبيرة !!


دلوقتي وأنا في حال أفضل الحمد لله في الشغل بتاعي وفي علاقتي مع ربنا سبحانه وتعالي ده بالإضافة إلي حياتي العائلية طبعاً والشخصية، لما هديت وفوقت وراجعت نفسي لاقيت إني في مرة وأنا في المرحلة اللي فاتت دي إتواجدت لسبب ما.. عند مقابر الغفير في طريق صلاح سالم.. الساعة 11 بالليل، لما إفتكرت دلوقتي يومها.. أنا كنت خايف أمشي علي الرصيف بتاع المقابر !! سبحان الله نفس الشخص اللي كان بيتمشي بين المقابر وهو مبسوط وحاسس بقلبه مستريح مش خايف.. هو نفسه الشخص اللي خايف يمشي جنب المقابر !! علي الرصيف !! وفضل إنه يمشي جنب الرصيف في الطريق !! اللي هو صلاح سالم !!


دلوقتي بس عرفت إني كنت ساعتها شخص سيئ جداً وخايف بشكل عمري ما كنت عليه !! كنت ساعتها خايف من كل حاجة.. مش واثق في أي حاجة.. مش واثق في نفسي.. مش واثق في حد.. خايف من كل حد.. مخنوق مرعوب مش مستريح في شغلي.. مش مستريح في أي حاجة.. علي عكس ما أنا دايماً بأبين بإبتسامتي وأنا بأتكلم مع أي حد.. وأكني مالك الدنيا ومافيها..!! علي الرغم من إني لو كان عدي يومين هاديين عليا.. كانت بتبقي عيبة !! إيه ده إحنا بقالنا يومين متخنقناش !!!!!؟


إفتكرت وأنا بأتكلم معاها يوم في 2004 كان نقطة تحول في حياتي.. يوم كان ماتش للأهلي والزمالك والتنظيم كان تنظيم الزمالك وكان الله يهديهم فاتحين لجماهير النادي الأهلي اللي يقدروا بالآلاف بوابة واحدة لما بادخل منها أنا.. بأدخل بجنب من صغرها !! اليوم ده أنا كنت هاموت فيه أنا و أحمد أخويا اللي كان ساعتها صغير.. وإفتكرت وشه وهو بيصرخ وبيعيط من الخنقة وإني ولأول مرة أحس إني ضعيف.. مكنتش قادر أحمي أخويا .!!

-

فاكر أوي لما كتافي الإتنين وأنا كنت لاعب كرة سلة قديم !! فاكر لما كتافي بقت مية !! مش قادر ازق أكتر من كده عشان أدافع عن أخويا وابعد عنه اللي قدامي عشان يعرف يتنفس وهو وشه عند أكواع الهمج من الجماهير اللي كان معندهمش اي احساس بأي شئ ..!! بل دول كانوا بيضحكوا وهما بيترنحوا وبيفعصوا بعض !! وأكنهم بيزغزغوا بعض ..!! ساعتها ولما لاقيت نفسي بأموت.. كل حاجة وحشة في حياتي عملتها عدت عليا.. كنت في سري بأقول لأ مش هي دي نهايتي !! لأ مش هاموت كده !! لأ مش هاقابل ربنا في طابور ماتش !! فاكر لما دخلت مكنتش مركز مع الماتش خالص.. اللي فاكره ان كان معايا أصحابي - مصطفي العربي، محمد السروجي، تامر حافظ، نبيل بسيوني - وإن النتيجة كانت 2-2 وبس ولا حاجة تانية غير كده.. لأني كنت بأراجع نفسي طول التسعين دقيقة..!! كنت ساعتها ولا حلو ولا وحش .. كنت بين البنيين .. ولا إلي هؤلاء ولا إلي هؤلاء ..!!


لما إتكلمت مع - رانا - دلوقتي قبل دقايق من كتابتي السطور دي .. ولما قريت الإيميل اللي باعتته عرفت لما ربطت بين المرتين اللي نزلت فيهم المقابر وبين المرة اللي خوفت اعدي من جنبها !! قولتلها أنا دلوقتي بس عرفت أنا ليه مكنتش خايف زمان وليه خفت إني أمشي علي رصيف المقابر ساعتها !! دلوقتي بس عرفت !!


رانا قالت كلام كبير أوي وإنها مبسوطة إني باقول كده وإني بأحاسب نفسي وقالت كلام كبير أوي أنا مش قده.. شكرتها ودعيت ربنا إنه لا يؤاخذني علي ما يعتقده الناس في وإنه يحسن خاتمتي وقولت أكتب البوست ده أهو زي ما قال - البراء - في تدوينته " صاحبتي " إنه نوع من التطهر نوع من الإعتراف بالغلط عشان ربنا يكرم ومنرجعش ليه تاني.. قولتلها خايف ارجع تاني وانسي وأغفل.. خايف لما أشطح مرة تانية ميحصلش حاجة تاني تفوقني.. خايف أموت وأنا السكينة سرقاني ..!!

19 comments:

  1. may I say...it evoked my tears!!

    we do need this stance of salvations...such signs we neglect..and signs we stop at!!

    those are signs of enlightenment

    Life is a long journey in a long path... once you reach the source of light you're safe!!

    the purification of the soul is an achivement in itself.. where things get calmer.. and a mystified kinda life is there for you!!

    rabena yebarklak..and May Allah grant you success and happiness insha Allah

    :)

    ReplyDelete
  2. هو انا ليه قريت البوست مرتين
    وحسيت بحاجات غريبة كده
    مش عارفة..؟؟

    بس هو حكاية المقابر دي انا اتخيلت لو مشيت فيها احتمال كبير مش حاخاف
    كمان مش عارفة ليه بحب ساعات النور يقطع واكون في الضلمة يمكن لاني مش بخاف؟؟؟ :))

    مش عارفة ياعز خلاص خلاص ماتسألنيش انا ايه اللي بقولوه ده انت خليتني افكر في حاجات كتييييييييييير اوي دلوقتي

    :((

    ReplyDelete
  3. 1st of All msA begad la2en msh kol el nas beye2daro yefhamo el msgs el beteb2a gayalhom 3ashan tewarihom 2en el beye3melo dah 3'alat msh howa dah el ye2daro yemoto w homa beye3melo,msh howa dah el tari2 el sa7 aw at least msh el tari2 el 3'alat,so 2enak tefham dih 7aga begad kwayesa gidan :)


    Tany 7aga lel asaf kolena msh bene2dar nefasar awy el mar7ala el 3ayshena aw msh bene2dar ne7kom 3aleiha 2ela ba3d ma beno7'rog menha hena bas ne2dar neda2a2 w ne2oul eh el 3'alatat w dah la2enak msh momken te2oul ra2yak f lo7a 2ela lama teshofha men be3id.

    Matfakar terou7 henak tany ya Mohamed aw te3ady 3ala el rassif w dih teb2a zay thermometre,ana 3arfa 2en kolena beneb2a 3arfin 2meta 2e7na bene3mel 7agat sa7 w 2emta beneb2a msh sa7 awy bas a3taked 2en heya mofida le7ad kebir..
    Anyway Rabeina yekremna kolena w ye2adarna 2en 2e7na nesta3'el el foras el Rabeina beyeb3athalna la2enaha msh betigy ketir.

    ReplyDelete
  4. اقولك ايه ؟
    انك بتيجى فى وقتك بجد

    فعلا بتيجى فى وقتك
    والحمد لله انك بتقدر تحاسب نفسك وترجع وتظبط حالك بسرعه

    لازم نقف كده وقفت رجاله مع نفسنا ونشوف ايه الصح وايه اللى ........... وايه اللى هنغيره وايه اللى مقصرين فيه
    مقصرين فى حق ربنا وفى حق اهلنا وفى حق نفسنا
    وفى كل الحقوق

    بجد والله يا عز البوست ده جه فى وقته تمام

    ReplyDelete
  5. السكينة عمرها ماهتسرقك طول ماضميرك صاحي
    ربنا يهدينا جميعا يارب

    اتمنى تكون بصحة كويسة
    شيماء نجم

    ReplyDelete

  6. ربنا يصلح حالنا جميعا يا رب

    فعلا زي ما قالت انت جيت في وقتك

    ربنا يكرمك و يكرمنا جميعا

    بس في حاجة صغنطوطة

    انت كنت بتلعب في الطلائع جنبي يا جاري :)

    تحياتي من ماناساس البلد

    ReplyDelete
  7. Ezz,

    El post mashallah gameel awi, wel agmal we agmal el kalam ely feh... yemken ana 7asses kalamak dah 3ashan marret be mawakef orayeba menoh, sebak men eny dayman bal3ab fel tala2e3 we en nafs el koora beto2a3 fe nafs el 7eta kol mara =)

    Rabena dayman ya rab yekremak wyeb3atlak 7agat tefawa2ak wetzakarak...

    3andy ta3lekeen, el awal en rabena dayman beyeb3atlena 7agat, el 7agat de betzakarna we tehdeena, we heya heya nafs el 7agat betdel nas tanya wetzawedhom fel dalal ely homa feh! dah kalam Rabena ely 2aloh fel Quraan... fa7na lazm nakhod balna mel mawdo3 dah kowayes... simpy law 7ad gatloh moseeba, feh 7ad yosbor we ye7med we dah aked bey2arab aktar ,we fe 7ad beyedaye2 we yeshky we yamkot, we dah akeed 3amal beyeb3ed...!! fa argookom ya shabab rakezo...

    El 7aga el tanya, ana ma2sodsh sa7bak bezat ely makansh mesally dah bas generally, tefteker leh dayman el ensan mahma kan fe ghafla aw daye3 aw ghar2an fel ma3asy, leh dayman beykhaf men ay 7aga tefakaro berabena ?! aw bel moot ? aw bel 7esab ? el egaba sahla awi, 3ashan de fetretna ely etkhala2na 3aleha ! enena tayebeen, khayereen, ben7eb el kher wel sa7 we benekrah el shar wel ghalat!!! de fetretne aly etkhala2na 3aleha... we men haz ael montalak bansa7 el nas awalan matafkedosh el amal fe en 7ad yethedy, wa saneyan dawaro 3al kher ely gowako webda2o men henak....

    ma3lesh ana 3aref en kalamy momken shata7 we shwaya ba2a irrelevant lel mawdo3 bas dah yemken met2assar be7agat bashofha fe 7ayati 7aleyan, we ma3lesh esma7ly ya Ezz astaghel el blog bta3ak 3ashan aba3bar....

    Rabena yekremna we yehdeena gamee3an...

    ReplyDelete
  8. Epitaph :
    ----------
    sorry Hagar for the tears, never meant... rabena ykremek w yatakabal menek el do3aa2 isA :)

    ReplyDelete
  9. ريما :
    -------
    عذراً سيدتي عن القشعريرة :)
    وكويس انك جدعة مبتخفيش ...

    أشوفك يوم السبت ان شاء الله
    شكراً لتعليقك

    ReplyDelete
  10. Amira Alaa :
    -------------
    thanks Amira for your nice words, bgd you r always supportive w bgd wishing you all the best of luck

    rabena ykremek w yatakabal 3amalek el sale7

    ReplyDelete
  11. ReRe :
    ---------
    طول عمري بأجي في وقتي يا رؤي
    heheheheheheheheheeeee

    يلا شدي حيلك وخلصي الكام محضر اللي انت عاملاهم لصحابك واتصالحي معاهم كده وخليكي انت الكبيرة
    :p

    ربنا يكرمك يا رب

    ReplyDelete
  12. السلام عليكم/
    ده اجمل بوست قريته فى المدونة مع العلم انى متابع ليها
    قد كده صادق وقد كده حقيقى ..قد كده طالع من القلب ..بجد حلو قوى
    ربنا يثبتك ويهديك كمان وكمان..انا فرحان قوى انى بسمع منك الكلام ده بس اسمحلى "الدين النصيحة"انا عارف -من اللى قريته لك قبل كده - تنك بتعمل ده عادى ومن غير نية سيئة..بس ربنا هة اللى قال "ولا متخذات أخدان" اى أصدقاء "شباب" واكيد الآية تنطبق برضه على الرجال مش البنات بس ياعز ..ربنا يهدينى ويهديك واذكرك ب الآيه اللى مهناها وماكان لمؤمن ولا مؤمنة اذا قضى الله ورسوله امرا ان يكون لهم الخيرة من امرهم ..اللهم اجعلنا ممن يقولون سمعنا واطعنا ..
    وبالنسبة للانسانة اللى ربنا يجعلها ان شاء الله من نصيبك ياريت تعجل بالخطوبة"احفظ الله يحفظك ..احفظ الله تجده تجاهك" "عايزين نفرح بيك بقى" وربنا يتمم بخير
    فى انتظار صور الخطوبة قريبا حتى لو كانت عائلية ملناش دعوة ..والف مبروك مقدما

    ReplyDelete
  13. Anonymous :
    -------------
    شكراً علي قولك بإذن ده اجمل بوست انت قريته في المدونة مع العلم بإنك زائر دايم

    شكراً لزيارتك ولنصيحتك بس انا باعتب عليك بما انك بتابع المدونة بإستمرار ... لو قريت التدوينة اللي اسمها "زي مراتي بالظبط" هتعرف اني خطبت يا صديقي المجهول .. فالحكاية مفيهاش أخدان ولا خليلات... الحمد لله ربنا أكرمني بإنسانة طيبة
    :)

    وابقي اكتب اسمك عشان نتشرف يا أخي ..

    ReplyDelete
  14. c'est la vie
    هي كده ، انا كمان لما برجع بالزمن لورا مش مبصدق حاجات كتير كنت بعملها
    ومش بعيد ييجي يوم بعد كام سنه تقف مع نفسك وقفه تانيه وتبص للي بتعمله دلوقتي علي انه درب من دروب الجنون

    ReplyDelete
  15. اولا انا اهنيك انك لمحت مجرد تلميح عن الاخطاء الي انت كنت تراها ولم تجهر بها \
    و احي فيك روح الصراحه و الاسلوب الذي في تعاملك مع المحيطين بيك

    ثانيا معلش انا شايفه الراء مكنش المفروض انو يبعت بوست زي ده يعني ايه تطهر يا محمد ؟؟؟ الاسلام دين ستره ومش دين فضح ولا سرد لاخطاء لو فعلا عايز يتطهر يتوب و يحسن عمله لاكن مايبعتش بوست كامل عن علاقه ببنت ربنا يسترها و يسترو

    تحياتي لاسلوبك الراقي و مفردات الجميله وربنا يتمملك بخير و يسعدك ويجبر بخاطرك

    ReplyDelete
  16. بصي انا اتضايقت من البراء مش عشان البوست بس ... وده طبعا ظهر في اني بعدت عن اني افضح نفسي والآخرين لمجرد اني عايز اتكلم ...

    انا ماقصدش اصلح علي البراء طبعاً .. هو حر وده اسلوبه بس انا قصدت اني اقول اللي عايز اقوله من غير ما اجرح حد..

    :) انا دايما باعمل كده ... اللي زعلني من البراء حاجة تانية خالص برة التدوين ... بس ده مش مكانها

    شكرا ليكي يا ميمو علي التعليق الجميل والنصيحة .

    ReplyDelete
  17. فى اول مره والتانيه كمان لما كنت جوه المقابر كنت راضى عن نفسك
    وده نعمه كبيره اوى من عند ربنا
    محدش بيقدرها فعلا
    الرضا والراحه النفسيه احساس نادر جدا
    فى ناس كتير ممكن تدفع كل ما تملك وتحسه
    وممكن تكون فى قمه النجاح المادى والاجتماعى من وجهه نظر البشر
    لكنها مش مرتاحه نفسيا ولا راضيه على نفسها لانها عارفه ان ربنا مش راضى عنها
    ومحاسبه النفس بجد صعبه اوى
    فى كتير ناس مش بتقدر تواجهه نفسها
    معندهاش القوه على المواجهه دى لانها عارفه انها غلطانه
    بجد اللى حصلك ده انا بشوفه حب من ربنا ونعمه عليك انك قدرت تحاسب نفسك
    وانك راضى عنها
    ربنا يكرمك يا رب
    تحياتى

    ReplyDelete
  18. هو ده الوقت اللى لازم اقول فيه لا تعليق


    انها الحياة تأتي بنا وتذهب

    ReplyDelete
  19. سبحان الله

    هي بتبقي حاجات بسيطة
    ربنا بيحطها علي طريقنا

    علشان نشوف احنا فين

    واللي مبياخدش باله بقي

    يبقي خلاويص

    ربنا يهديك ويهدينا

    انت فين بقي

    مش باين بقالك كتير

    ReplyDelete