Wednesday, March 14, 2007

صوت فرملة


إذا لم تظهر الصورة - Right Click / Show Picture - www.baitelezz.blogspot.com


صوت فرملة .. طفل بيطير متر قدام العربية .. كله في صوت واحد .. يا نهار !! الناس بتتجمع في ثواني .. الولد بيقوم لكن ماسك حنبه وبيعيط .. واحد بيوشوش السواق .. إتكل علي الله يا اسطي .. وأكنه بيقوله سيبك منه .. مش مهم !! ده عيل من عيال الشوارع !!


تذكرة لو سمحت .. آه التحرير .. شكراً .. يا إستاذ يا إستاذ .. لو سمحت ممكن تاخد الإستاذ معاك .. ويشاور علي عينه عشان يقول انه ضرير .. إسم حضرتك إيه ؟ .. عماد .. حضرتك نازل فين ؟ .. حدائق المعادي إن شاء الله .. عاشت الأسامي .. ممكن لو سمحت نركب من عند الساعة !! عشان من عند الساعة هيبدأ طريقه .. من عند الساعة هو حافظ طريقه .. يركب المترو .. طفل صغير بيقوم وبيقعده .. الطفل لازم يتشجع علي اللي عمله .. لكنه نام علي شنطة المدرسة بتاعته .. جنب عماد !! بص اللي جاية التحرير إن شاء الله .. بعدها بست محطات الحدائق هتيجي .. آه شكراً انا عارف ..!!


صديقة تتكلم عايزة تنتقم .. تتنتقم من اللي انتقم منها !! تسأل هو ينفع اطبع رسايل من علي موبايلي ؟ طب استني اسأل .. هو ينفع ؟ اه ينفع .. تسأله وتكون عليها التواريخ والأرقام واضحة ؟ إستني .. هو ينفع ؟ يرد نفس اللي رد قبل كده آه ينفع .. تقول طب جهز نفسك يوم الخميس .. هنعملها !!


في المحطة كابينة .. بتتكلم فيها ست محجبة .. كبيرة في السن .. لابسة نضارة سودا .. الكابينة بتقرب .. صوتها وهي بتعيط بيبان ويوضح .. بتتكلم وهي بتعيط .. بتحلف وهي بتعيط ..!!


يا آنسة .. يا آنسة .. تعالي هنا .. إيه ده عملت إيه دي ؟ تلاقيها عدت مع صاحبتها بالتذكرة نفسها !! طب وإيه المشكلة ما ياما ناس بتعمل كده .. إشمعني المراقب راقبها هي !! البنتين مش سامعين .. أو عاملين مش حاسين .. كلمي دي بينادي عليكي توقفهم واحدة وتقولهم !! يبصولها وهما عايزين يصرخوا فيها .. وإنت مالك !! هو إبن عمك !! بس بيكملوا طريقهم واكنهم مش شايفين .. ينط المراقب من فوق البوابة وهو بيقول لنفسه .. صحيح هو إشمعني دي اللي بأجري وراها !! وفجأة يتسمع تاني صوت فرملة ..... !!

10 comments:

  1. من العمق وفي العمق يارب نتغير

    ReplyDelete

  2. وبيسألوني أنا حزين ليه؟

    لك الله يا مصر

    اللهم ارحمنا واغفر لنا

    أثرت في الكثير من الشجن يا عز - شكرا

    سلااااام

    ReplyDelete
  3. للأسف ياصديقي صوت الفرملة بيتكرر في اليوم الالاف المرات في شوارع وضواحي مصر
    وللأسف كمان اللي بيقول بيتكلوا على الله ساعتها كتييييييير:)
    زي مايكون بيقولوا عادي بقى كمل طريقك انت بس ولا كأن حاجة حصلت

    مش عارفة اقولك ايه انت جبت صور للأسف بتتكرر دايما وكل يوم لحد ماوصل الامر بأن بقى ده الطبيعي وماحدش بيهتم بيه لانه ده العادي خلاص

    اتمنى اننا نتغير لكنها امنية ده احساسي
    ربنا يستر بقى:)

    سلاماتي

    ReplyDelete
  4. انا مش فاهمه حاجه..........................................................؟

    ReplyDelete
  5. Gloomy..isn't it?

    but who said our life is not...!!

    lana Allah!

    ReplyDelete
  6. :( ... كملت عليا يا عز
    مش كفاية كتاب تاكسى اللى لسه مخلصاه!
    وللا الفيلم التسجيلى "مكان اسمه الوطن" اللى لسه شايفاه امبارح

    حسبنا الله ونعم الوكيل

    ReplyDelete
  7. هو اليوم كان ناقصه حاجة كدة

    تحياتى

    ReplyDelete
  8. bgad post 3a22ad
    3abqary fe3lan :))
    3agebny bshakl!

    ba3sha2 ana aslan nezaam al la2ataat mn 7aiaat al a7'areen da

    so great post ya ezz :))

    ReplyDelete
  9. فى الطريق قلوب بريئه...قلوب غريقه...فى الطريق..
    والحقيقه ..مش حقيقه...فى كل شىء..
    دوامه الحياه...فيها قلبى تاه...
    ليه كل واحد فينا...
    ماشى فى اتجاه؟!!!

    ReplyDelete
  10. الحياه بقت مصالح..وشيلنى اشيلك..وبدام محدش شايفك ..اعمل اللى على كيفك..اسرق انهب اهرب..والكبير قبل الصغير..معدش حد بيستحمل حد..ولا فاضى يسمع حد...انا ومن بعدى الطوفان..
    ومين اللى بيضيع فى النص؟...القلوب الحساسه اللى مش بتستحمل تشوف كل ده بيحصل ادامها..فالنتيجه بعد كده مش محتاجه خيال...اكتئاب
    واحباط..ويأس...عشان عمرنا ماهنعرف نعيش كده..عشان ببساطه احنا مش كده..
    بس تعرفوا حاجه...بحس ساعات ان الامل لسه موجود..وان فى ناس كتير لسه كويسه..صحيح قليلين بس موجودين...واعتراضنا على النماذج دى هو اللى بيحسسنا اننا لسه بنى ادمين مش حيوانات بتجرى ورا اكل وشهوه وبس..ياريت ابدا ابدا مانسكتش كل واحد فينا يعترض ويعترض ويتكلم وصوته يعلى ويعرف انه هو الصح..ويضرب انذار..
    او يعمل فرمله ....:)

    ReplyDelete