Sunday, May 27, 2007

الحكاية وما فيها

وحشني التدوين بجد


ناس كتير سألتني وبعتتلي وبتقولي فينك وكل ما حد من صحابي يشوف وشي يقولي ... فينك يا راجل ؟؟ مبتكتبش حاجة جديدة ليه !؟!؟ ده حتي فيه ناس ما كنتش اعرف انهم بيقروا اللي بأكتبه .. فوجئت بيهم لما بطلت ... او اتشغلت عن التدوين.


الحكاية بقي وما فيها بدأت من شهر فبراير 2007، في يوم غريب كنت بأعاني انا فيه من اضطرابات علي الصعيد العاطفي والعملي وكل الأصعدة ...!! فوجئت بمحمود إبراهيم صديقي بيكلمني من نمرة غريبة وبيقولي ايه يا عم المهم مبتردش علي نمرة متعرفهاش ولا ايه ؟؟ قولتله لأ وسمعت كان عايز يقول ايه ...


قالي عايزين في أندلس يعملوا تصميم لحاجة ... فقولتلهم مفيش غير عز وكلمتك ... ها ايه رأيك ؟؟ وعلي الرغم من اني كنت قرفان لكني قولتله اوك انا جاي هاعدي عليك بعد الشغل، مكنتش اعرف ان بقي اني هأدخل ثقب أسود - علي رأي سميح - مش هأعرف اخرج منه تاني .... بغض النظر ان الثقب ده دلوقتي بقي امتع حاجة انا عايشها.


وصلت مركز أندلس وقابلت أحمد سميح وقالي عايزينك تعمل دعوة الكترونية لحفل افتتاح الإذاعة بتاعتنا - إذاعة حريتنا - وقعدت معاه ورغينا كتير ... ووسط الكلام عرف ان عندي مدونة ... قالي طب ما تعملنا تحليل لحكاية المدونات دي ... قولتله سهلة .. دي شغلتي بأحب اتفرج علي الناس وأشوف الناس بتفكر ازاي، قالي طب ما تعمل تحليل لأربع مدونات كل شهر .. قولتله ماشي، قالي طب ماتعمله برنامج عندنا ؟؟ قولتله اوك موافق .. وكان !! قبل ما اوصل بيتي كنت مفكر في الإسم بتاع اول برنامج اذاعي ليا !! مدونة علي الهوا Blog On Air والإسم طبعا واضح مدونة هيتم مناقشة صاحبها في تجربته معاها علي الهوا ... وكان كمان ليا هدف في الإسم انه لو تم نطقه بسرعة هيبقي Blogonaire اللي هي تشبيه للمليونير ... لأن التدوين انا في اعتقادي ثروة ... بس لسه الفكرة دي هأستخدمها في المستقبل شوية.


اللي ما يعرفوش كتير عني ... اني من زمان اوي وانا نفسي اكون مذيع ... مش عشان اي حاجة اكتر من اني حاسس اني موهبة !!! لأ بأهرج طبعاً ... بس هو ده الكلام اللي الناس كلها بتقولوا لما يستضيفوهم في التليفزيون قبل شهرين من وفاتهم غالباًُ !!!


الحكاية وما فيها إني صوتي نبراته عالية شوية شويتين كده ... وكتير من صحاب اختي الصغيرة سها .. لما كنت بأرد عليهم كانوا يقولولها "إيه ده !!! ولا اكن اخوكي ريسيبشن في فندق !!" ما علينا ... شوية بشوية .. بقيت معد ومخرج ومذيع البرناااااااااااااامج الإذاعي الأول في مصر والشرق الأوسط اللي بيتكلم عن المدونين وبيستضيف في كل حلقة مدون يحكي عن تجربته بكل ببساطة ، بيني وبينكم عجبتني الحكاية ... بقيت بايت ليل نهار في الإستديو افهم ده ايه وده ليه وده ازاي ... حسيت انها تجربة جديدة ورغم انها تطوعية !! الإ انها ممتعة بالنسبة ليا.


بدأت افكر في مين هيبقوا ضيوفي !!! بعت لناس كتير وناس كتير ردت وناس اكتر مردتش ... مش عارف ليه ؟؟ خايفين مثلاً ؟؟ لكن اللي ساعدتني في اول حلقة ليا واللي قولتلها تقريباً قبل ساعات من تسجيلنا للحلقة واللي كان عندها خطوبة واحدة صاحبتها في اليوم ده وبالرغم من كده مقدرتش ترفض لي طلب ... كانت مريم ( كريزي راما ) وبعد كده توالي الضيوف ما بين الإنسانة الخلوقة الأخت المحبة لإخواتها الهادئة هاجر ( إيبيتاف ) بعد كده جت الرايقة المزاجنجية الشاعرة الصغيرة ريما ( جارة القمر ) بعد كده جه ولظروف مش مترتبة تماماً العبد الفقير صاحب مدونة ( بيت العز ) والحلقة دي كانت عشان الزميل المدون البراء وعدني انه هيجي وخلف بميعاده ومأعتذرش وماردش علي تليفوني !!! مش عشان انا عايز اسجل مع نفسي يعني ... وقامت بالحلقة دي زميلتنا ريما وإييييييه كانت اكنها مستنياني اقولها كده !!! اسألتها كانت جاهزة.


ثم توالت الحلقات ... فكانت حلقة لعرض لفيلم ( المدونات .. هوامش شعبية ) ولقاء خاص مع كريم وسلمي من فريق العمل الخاص بالفيلم، وبعد كده حلقة زميلي وصديقي العزيز محمود إبراهيم صاحب مدونة ( مصر اللي بحبها ) وكانت اخر الحلقات اللي سجلتها لحد يومنا ده مع الإخ العزيز محمد حسن صاحب الخلق الرائع صاحب مدونة ( Moe 4 VendettA ) ولسه أعتقد اني طول ما أنا عايش هأفضل اعمل البرنامج ده لأنه بيكسيبني خبرات حيوات الناس دي كلها ... وبيعرفني ان لسه فيه في البلد ناس بتفكر !!! بغض النظر الفكر موافق ولا معارض لفكرنا.


البرنامج والإذاعة عاماً والموقع اللي أنا بأديره ( www.horytna.net ) واللي بالمناسبة الشغل فيه تقيل أوي يا سميح وأنا من موقعي هذا بأطالب بعلاوة !! ... بالإضافة إلي شغلي الرسمي صباحاً والخاص اللي في كل وقت ومالوش أيام محددة ... كل دول شغلوني جداً عن المدونة ... وأنا كنت بجد بأبقي حزين وانا مش لاقي وقت اكتب حاجة انا عايز اكتبها ولما كنت بأقول لضيوفي إوعوا تبطلوا تدوين في أخر الحلقة ... كنت بأقول طب ما انت شاكلك هتبطل قريب يا برنس !!


يلا ... فلنكتفي بهذا القدر ... فاصل صغير ونرجعلكم

21 comments:

  1. من موقعي هذا
    والساعة الان السابعة وخمس وعشرون دقيقة صباحا
    وامتحاني الساعة 9 الصبح
    يعني فاضل ساعة ونص ولسة فاضل حاجات تتذاكر

    بس انا تقريبا بعدي على كام مدونة كدة الصبح لازم اشوف حصل فيهم ايه

    وبصراحة ماقدرتش امسك نفسي اني اقرا البوست

    ده عز ياناس رجع للبلوج بتاعه

    مبروك علينا رجوعك يا مستر

    ادعيلي بقى لحسن اللجنة بتنادي عليا

    سلام

    ReplyDelete

  2. يااااااه كنت مخبي كل ده؟

    شكل السكينة سرقتك فعلا

    تحياتي لك من ماناساس البلد

    ReplyDelete
  3. أنا فعلا كنت متابعاك من فتره يا عز
    مع انى مش كنت بعلق
    بس حطيت كومنت فى البوست اللى فات
    ولما رجعت اشوف جديدك
    استغربت جدا من انك منزلتش بوست بقالك كتير
    بس طلع الاذاعه هى السبب
    أنا عرفتها أول مره عن طريق ريما جاره القمر
    وبجد سمعت كل حلقات البرنامج
    وعجبتنى الفكره جدا
    ربنا يوفقك
    ومتتأخرش تانى عن التدوين
    لانه بجد زى ما قلت ثروه
    تحياتى واحترامى

    ReplyDelete
  4. ربنا يوفقك يا طمطومة ...
    مبسوط جداً من مدونتك .. مش مصدق انك انت اللي كنت عاملة المدونة كده بتخبطي وبتحاولي ... لكن اتضح انك مدونة ماهرة ;)

    شوفي لو جاية في أي وقت القاهرة يبقي شرف ليا يا فندم أسجل معاكي ... إبقي فكري في الموضوع لو ممكن تنزلي القاهرة بعد الإمتحانات

    شكراً ليكي ترحيبك بيا يا طمطم
    :)

    ReplyDelete
  5. The Groom :
    --------------
    أوومااااااال وهو انا قولت حاجة يا بني اصلاً لسه في الجراب الكتير ... بس ان شاء الله هاحاول احكي عن التجربة اكتر وعن حاجات كتير عايز احكي عنها

    نصيحة مني متقراش المدونة في الفترة اللي جاية !!!

    :)
    شرفتنا بزيارتك

    ReplyDelete
  6. Remmo :
    ---------
    شرف ليا يا ريموو متابعتك للمدونة
    مبسوط فعلاً انك سمعتي كل الحلقات
    انا معاكي اننا عايزين نغير المذيع !!!

    :)
    أهلاً بيكي وخليكي متابعة بيت العز
    راجعين يا هوي راجعين

    ReplyDelete
  7. Welcome back to the blogsphere ya Ezz we MABROOK 3ala el program... I think it's a very joyful experience

    rabbena yewaffa2ak

    ReplyDelete
  8. مرحبا بعودتك للتدوين يا عز
    و مبروك علينا رجوعك
    و أنا من الناس اللى متابعة المدونة
    بس دى المرة الأولى اللى أعلق
    وان شاء الله ماتبقاش الأخيرة
    و السلام عليكم
    mayoya

    ReplyDelete
  9. اخيررررررا

    شكلي هاحصلك ياعز والله انا كمان البلوج بتاعي صعبان عليااوي وعايزة اكتب حاجات كتير
    بس زي ماسميح قالك البلاك هول
    وجرتني ليها ياعز
    :)

    صحيح بقى انا الشاعرة الصغيرة.. محسساني بالبرلمان الصغير شوية
    مش عارفة ليه؟
    heheheheheheheehe

    ReplyDelete
  10. WOW .. eh ya ezz da ??? ana mabsoota leek awyyy ... 3la fekra ana kaman kan dayman nfsy ab2a mozee3a .. we mo2mna bi qodraty awyy .. but never had the chance to really do it .. bravoo ya ezz .. bravo a7'r 7aga .. w rabena yewafa2ak .. w ew3a tebatl tadween ;)

    ReplyDelete
  11. انا مش متخيلة انى اول مرة اعرف حكاية بلوج على الهوا دى دلوقتى بس عن طريق الفيس بوك

    بس بجد فكرة جميلة جدااااا وعجبانى اوى وهبقى اتابع المدونين فرد فرد إن شاء الله

    ربنا يوفقك ويوفقهم وربنا معانا جميعا

    سلااام عليكم

    ReplyDelete
  12. мїяάЖάгїм ™ :
    ------------------------
    thanks ya Karim, w allah ybarek feek ... walahy hiea 7aga gamela w khsosan enaha ur thing .. ur idea .. ur show ... ya3ni 7aga mot3eba gedan tab3an 3shan amake el 30 min. dol ... ba23od asagel 2 hrs !!! w aEdit kaman 1 hr

    bs still gamela :) rabena yekrem

    ReplyDelete
  13. mayoya :
    ----------------
    الله يكرمك يا مي ويبارك فيكي
    متكبريش الموضوع رجوعي للتدوين مش حدث يعني
    هي بس الحاجات زادت اوي فمبقاش فيه وقت اعمل اي حاجة
    حتي الماسينجر مبقتش ادخله الا كل اسبوعين مرة خطف كده

    شرف ليا متابعتك للمدونة طبعاً
    ونصيحة مني متاخديش بأي كلام فيها :p

    ان شاء الله متبقاش اخر مرة تعلقي فيها
    عليكم السلام ورحمة الله وبركاته
    وشدي حيلك في المذاكرة

    ReplyDelete
  14. ريـــما :
    ---------
    أخيرررررررررررررا

    بس الفكرة اني معملتش حاجة يا ريما
    دانا بس بأشرج انا كنت مخطوف فين ؟؟؟
    لسه بقي لما افوق هاحكي شوية حكاوي حصلت

    هأحكي عن قلعة الكبش
    وعن سانت كاترين
    وعن اللي شوفته في سيناء الحبيبة
    وعن الأهلي وبرشلونة
    وعن الأهلي والزمالك

    يوووووووووووه لسه فيه شوية كلام حلوين واقف في زوري

    ReplyDelete
  15. carnation :
    -------------------
    :D SHOKRAN

    ana mabsot enek mabsota walahy ... ana makansh nefsy ab2a moze3 wla 7aga ana bs kont mestakhsar el not2 bta3y fel 3araby w 2olt eh dah !! tb mab2a moze3 belmara :D

    walahy ya benty kolo naseb lama bib2a feh naseb kol 7aga btetresem ... bs enty 7awly w keep tryin lo 3aiza fe3lan teb2y moze3a matbataleesh ...

    w aked hatgelek el forsa lo feh naseb tkony :)

    ReplyDelete
  16. إنسانة :
    -------------
    طب دي والله صدفة سعيدة انك تعرفي البرنامج عن طريق الفيس بوك او زي ما صديقي الرخم اللي مفيش داعي اذكر اسمه ما بيقول " كتاب الوش " هو فعلاً عرف ناس كتير بالبرنامج

    اه هي فكرة حلوة واتمني انها تكمل ان شاء الله

    ربنا يوفقك في ظل ظروف الإمتحانات العجيبة دي !؟!؟؟

    بس سؤال ؟؟؟ هي كلية ايه ولا جامعة ايه دي ؟؟؟

    ReplyDelete
  17. يااااااااااااااه
    يا ابنى انا كنت قربت ايأس منك
    كل ما اجى ابص على المدونه بتاعتك والاقيها مافيهاش جديد

    واقول هو الاستاذ عز باشا فين

    وكل ما اكلمك تقولى مشغول

    قولت خلاص بقى
    عز اتشغل خااااااالص عن بيت العز

    بس الحمد لله
    حمد الله على سلامتك فى بيتك يا فندم

    اه صحيح على فكره
    البرنامج بتاعك بجد حلو لدرجه انى ممكن اعمل مدونه بسببه
    احاول تانى بعد الخبره عن طريق الاستماع

    ReplyDelete
  18. ههههههههههههههه
    هو احنا اتفضحنا اوى كدة؟؟

    بص يافندم

    بس ماتتخضش

    امسك نفسك كوييييس

    خد عندك

    دى كلية إقتصاد وعلوم سياسية جامعة القاهرة

    ايوووووووووون

    بس المبنى العجيب ده مش فى الكلية .. الكلية تحفة والله بس امتحنونا فى المدينة الجامعية تقريبا عشان مانخدش على الدلع والبغددة

    والله أعلم

    :D

    ReplyDelete
  19. mabrook ya 3ezz el programme beta3aak...we begad wa7ashny 2ny 2a2ra el blog taba3ak,feenak men zamaan....matawelshy 3'eyabak 3aleena ;)

    ReplyDelete
  20. بجد البرنامج ده هايل جدا جدا
    وفكرته رائعة
    ربنا يوفقك والى الأمام دائما
    تحياتى لك

    ReplyDelete
  21. شكرا ليكي يا
    bosbso

    اتمني بجد ان البرنامج يكون حلو زي ما انت بتقولي كده ...

    استني قريب فيه ضيوف جامدين جدا ان شاء الله

    ReplyDelete