Tuesday, February 20, 2007

زي مراتي بالظبط


اللي يعرف محمد عزالدين بجد يعرف يعني إيه كاميرا بالنسبة له.. يعرف اني من سنة 95 مثلاً وأنا بألعب بالكاميرات يعني أكتر من 12 سنة.. وأكيد يعرف أو سمعني مرة وأنا بأقول إن كاميرتي زي مراتي أو خطيبتي بالظبط لا يمكن أسلفها لحد ..!! الفكرة بقي إني النهادرة إتـاخدت مني الكاميرا بتاعتي ... إتقلبت وبمزاجي، بس علي غير عادة المرات اللي الواحد بيتقلب فيها بمزاجه ماكنتش مبسوط ... طيب نبدأ الحكاية من الأول.


زمان وأنا في حضانة ..!! لأ كده زمان أوي نقدم شوية، وأنا في سنة رابعة إبتدائي كنت بأحب الرسم، عندي رسومات من العمر ده لغاية دلوقتي، ماكنتش بارسم ورد وزهرية وفيل بزلومة زي الأطفال مابيعملوا دلوقتي !! لأ انا فاكر رسوماتي كويس جداً كانت كلها رسومات بتجسد حركة مشهد منظر معين.. من الرسومات اللي فاكرها أوي بوابة المعسكر بتاعت الأمن المركزي أيام ما كان والدي بياخدني معاه الشغل، كان ساعتها قائد كتيبة في قطاع المرج علي ما أفتكر.. فاكر الرسمة دي أوي وفعلاً لو حد شافها هي صورة مش رسمة.. عربية بابا خارجة من البوابة والعسكري واقف علي شمال العربية بيفتح السدادة بتاعت الطريق وفاكر اوي ان شكل العساكر كان مضحك ..!!


بدأت أحط الموضوع في دماغي من 95 وهي كانت بداية حياتي العملية بعيد عن البيت كان عندي 14 سنة وكانت السنة دي أول موسم ليا ألعب في النادي الأهلي كرة سلة وكان فيها سفر ومغامرات، فاكر اول صورة خدتها بأول كاميرا خاصة بيا كانت في القناطر الخيرية مش فاكر كنت طالع تبع مين او فين بس فاكر اني كنت في فيلا من الفيلات اللي قدام القناطر وفاكر اني وقفت 15 دقيقة اتفرج علي المنظر لغاية ما فكرت اروح اجيب الكاميرا عشان أصور ..!! فين دلوقتي بأخد قرار التصوير في ثواني والكاميرا بتكون طالعة والصورة متاخدة وممكن اوي اكون باتكلم في الموبايل اصلاً خلال ده كله .. ياه غريب الإنسان سبحان الله


إذا لم تظهر الصورة - Right Click / Show Picture - www.baitelezz.blogspot.com


بعد كده غيرت الكاميرات كذا واحدة وكان ليا مغامرات طبعاً في التصوير والتحميض بقي أيامها مكانش فيه ديجيتال لسه طبعاً !! إيه ده انا عجوز أوي كده ولا إيه !! المهم، من الشتطحات اللي أفتكرها برضه كانت في مرسي مطروح وكنت فقدت الأمل في أهلي إنهم يخرجوا ويروحوا شاطئ الغرام وحمام كليوباترا والأماكن اللي الناس كلها بتروح مطروح عشانها !! فنزلت لوحدي والمسافة 14 كليومتر علي الأقل ركبت " إختراع ميكروباص " والله عمري ما شوفت في حياتي زيه بس طبعاً كانت جرأتي علي التصوير مش زي دلوقتي ... لو شوفته ده دلوقتي كنت بهدلته، كان ما شاء الله ماشي بجركن بنزين جنب الأخ السواق !! وحاطط فيه الخرطوم اللي بيشد البنزين !! وجركن تاني والله فيه مية وبرضه الخرطوم ونازلين لجوة العربية .. طبعاً مش فاهم ولا قادر أفهم الشئ ده كان ماشي ازاي بس وصلني والسلام روحت حمام كليوباترا خدت جولة الأول لفيت وصورت كام صورة وبعد كده وأنا ماشي داخل للحمام ، اللي منكم راح حمام كليوباترا الأرض هناك مش زي أي أرض عليها " ريم البحر " وأنا ماشي طبعاً مش واخد بالي وهايم علي وجهي زي ما بيقولوا - الكلام ده كان في 1997 فاكر كان شريط حميد الشاعري " عيني " مكسر الدنيا - المهم اني وانا ماشي فجأة لاقيت رجلي بتطير لفوق وبأقع علي ضهري فاكر جداً اني وأنا بأقع حملت علي كوعي عشان الكاميرا متوقعش في المية بس برضه لمست المية طبعاً لأن كوعي ماستحملش الوقعة ... كملت اليوم عادي جداً وروحت وشيلت الفيلم ودعيت ربنا ان الصور تطلع علي خير

-

إذا لم تظهر الصورة - Right Click / Show Picture - www.baitelezz.blogspot.com


طبعاً واضح اثر المية علي الصور، الراجل اللي حمض الفيلم حلف لي انه نزل رمل من الكاميرا !! وانه نشف الفيلم من المية !! والكاميرا دي عندي لغاية دلوقتي وعليها لسه أثر الرمل لغاية دلوقتي .... من مغامراتي برضه كانت في الإسكندرية وبرضه كنت فقدت الأمل في أهلي الأعزاء إننا ننزل في أخر ايام الأجازة ونروح القلعة والمنشية والأماكن اللي كان نفسي اروح الإسكندرية اصلاً عشان أصورها ... مش عارف أهلي مستقصديني ليه !! مش عارف بس بأحب أوي وأنا ماشي لوحدي ومعايا الكاميرا بتاعتي بأحس اني سعيد فعلاً مالك كل حاجة انا محتاجها كل حاجة أنا بأحبها .. نزلت من الترام في المنشية إتمشيت وصورت صورة من أجمل الصور اللي صورتها في الفترة دي -


إذا لم تظهر الصورة - Right Click / Show Picture - www.baitelezz.blogspot.com


فاكر يومها كان فيه عند النصب التذكاري ده فرح !! وهيصة ولمة وكان فيه العساكر اللي بتحرس النصب بمشيتهم العسكرية في نظام وعدم إهتمام بأي شئ حواليهم حتي ولو كان فرح !! او كان واحد واقف عايز يصور نصب الجندي البحري المجهول ... فاكر إن يومها فضلت واقف 30 دقيقة بالتمام والكمال في نفس مكاني بنفس الزاوية دي لغاية ما صحاب الفرح خلصوا اللي كانوا عايزينه من المكان والعساكر برضه فضلت مستني لغاية ما مشيتهم اتوافقت مع بعض وكانوا ورا النصب التذكاري وتاك !! خدت صورتي ومشيت .... فاكر برضه " سعيد محمود " صديقي المبتسم دائماً .. سعيد من الناس اللي سبحان الله ربنا يتم عليه نعمته عمري عمري عمري ما شفته مش مبتسم !! من أولي ثانوي لغاية ما إتجوز وإختفي وإتشغل في حياته، سعيد كان مسافر معانا من السفريات القليلة اللي طلعها معانا وسعيد ده شخص كان هادي جداً مبينطقش الإ كل فين وفين ودايماً كان بيبقي قبل الكلام إبتسامة وبعدها إبتسامه برضه ما شاء الله، وقفنا عند كوبري ستانلي كان لسه في تجاربه الأولي وطبعاً كان من أهدافي إني أصوره ... سيبتهم واقفين علي الكوبري بيبوصوا علي البحر ونزلت من السلم بتاع الشط وروحت ناحية البحر عشان ألقط صورة لقواعد الكوبري وطبعاً محدش عرف إني هانزل لغاية تحت عند المية ... فاكر أوي سعيد وهو بيزعق !! تخيلوا سعيد بيزعق وبيصرخ !! " حد يطخه بالنار خد يطخه قبل ما يفضحنا ! هاهاهاهاهاها !

-

إذا لم تظهر الصورة - Right Click / Show Picture - www.baitelezz.blogspot.com


طبعاً كل فطس علي نفسه من الضحك مش عشان اللي قاله كان مضحك !! بس عشان أنا نطقت سعيد !! الله يمسيك بخير يا سِعدة... جيه كمان علي دماغي دلوقتي " مريم " صديقة أختي الصغيرة من الناس القليلين اللي شافوني وأنا لوحدي في سيشنز التصوير بتاعتي .. شافتني فين الفقرية دي !! في الحسين !! في آخر أيام رمضان كانت بتفطر هي ووالدها .. مش عارف أصلا شافتني ازاي وسط الهيصة دي بس لاقيتها بتقولي انا شوفتك وانت هائم علي وجهك بس قولت اسيبك تصور بمزاجك بس ايه يا واد ده تقولش سايح أجنبي !! .... وفاكر " محمد سميح " صديقي العزيز ' المحاسب العملاق ' ' وزير خارجية قطر ' أو ' الحمل الوديع ' زي آخر الألقاب اللي طلعت عليه مرة كنا واقفين في شارع الخيلفة المأمون وجاتلي فكرة صورة فطلعت الكاميرا ووقفت شبه في وسط الشارع وبأصور وتاكسي وقف قدامي !! وأنا مركز تماماً لاقيته بيقول للتاكسي صحافة صحافة !!! الله يمسيك بخير يا برونتو ! هاهاهاها ! يعني أعتقد إن من أكتر متع الحياة عندي هي التصوير .. مش مجرد التصوير وانا باصور صحابي وانا باحتفظ بذكرياتي مع اهلي في صوري .. لا المسألة اكتر من كده ومش هأقدر أشرح لأنه مفيش حد يقدر يشرح شغفه بشئ أو جماد أو حتي إنسان وللأسف فيه ناس أنا عرفتهم وكانوا قريبين مني جداً ومحاولوش يفهموا يعني إيه تصوير بالنسبة ليا !! ... نرجع للكاميرا اللي اتقلبت مني بمزاجي النهاردة دي ..!! و ليا وانا في طريقي إلي بيتي وانا جيبي فاضي مفيهوش كاميرا ... يمكن لأول مرة من زمن بعيد.


النهاردة كنت بأوصل خطيبتي لمحطة القطار برمسيس مسافرة رحلة برضه من الحاجات اللي لسه ماعملتهاش لغاية دلوقتي إلي الأقصر وأسوان ... كوكتيل حاجات حصل إستغربت نفسي فيها بس كان إحساس جديد زي ما اختنا نانسي بتقول ..!! " محمد جورج " صديقي كلمني بالصدفة قالي انت فين قولتله في محطة مصر .. قالي ارجعلنا بكام صورة كده.. قولتله عيب عليك أكيد إن شاء الله وفعلاً خرجت صورت كام صورة لجراج رمسيس اللي كان ..!! وأنا واقف مستني القطار يشد رحاله لاقيتها نازلة تقف معايا شوية كان معاها محمد أخوها، وسط الكلام قالتلي مش كنت جبت الكاميرا .. قولتلها عيب عليكي وهي مش هتبقي معايا يعني !! قالتلي متجيبها ؟ قولتلها اوك بصي الزرار ده اللي بتفتح منه والزرار ده اللي بتغيري بيه الفلترز ................... إيه ده !! أنا بأشرح طريقة إستعمال الكاميرا !! أنا هاسيب الكاميرا بتاعتي لأول مرة من سنتين لمدة إسبوع بعيد عني !! بس إبتسمت وانا بأشرح وكملت ... بصي الزرار ده اللي بتعرضي بيه الصور اللي صورتيها وده اللي بيعمل ........ حسيت إن آه انا مبديش كاميرتي لحد لأن كاميرتي زي خطيبتي إستحالة أديها لحد !! لكن إبتسمت لأن اللي خدت الكاميرا هي خطيبتي



البلد ضلمة من غيرك علي فكرة ،،،

31 comments:

  1. ليه كل ما ودعنا شيئا نشعر وكأننا ودعنا معنى حلو من
    حياتنا ليه بتحتفظ الاشياء بهذه القوة في معانيها مع انها مجرد اسياء عادية
    قوة هذه الاشياء تكمن فى الخصوصية ...خصوصية مش بنكتشفها غير ما نفارق الاشياء التي الفناها وتآلفنامعها تقدر تقول عشرة عمر
    تقدر تقول انها بتبقى سايبه ذكريات و مواقف فى حياتنا
    بس يا ترى الاشياء هى اللى بتدى المعانى معناها و لا المعانى هى اللى بتدى للاشياء خصوصيتها ....تحياتى على البوست ...و يا سيدى مبروك

    ReplyDelete
  2. انت مجنون بجد.....انت مش متخيل انا بحب انك تحكي علي حاجه قد ايه
    وعلي كل حال كويس قوي ان حبايبك كلهم سافروا علشان تكتب من " واقع العشاق اللي بيتألموا "
    وعجبي
    الله الوطن جنجن

    ReplyDelete
  3. في ناس ربنا بيديهم موهبه معينه زي صوت حلو .. مهاره في لعب الكوره ... انا بعتبر التصوير من المواهب اللي ربنا مبيديهاش لاي حد
    المهم انت يا عم عز عليك حاجات غريبه اوي ... بس هبقى اقولهالك بيني وبينك هههههه
    عموما ربنا يخليلك كاميرتك اللي زي مراتك بالظبط وتجيبو كاميرات صغنتته كده تتربى في عزكو

    JanKiez

    ReplyDelete
  4. سلام عليكم
    أنا بادخل البيت هنا كتير بس زى الحرامية:)بأخرج من غير ما أعلق بس ماأقدرتش أمسك نفسى من الضحك لما اتخيلتك وانت واقع فى حمام كليوباترا أصل أنا وقعت نفس الوقعة:( بس من غير الكاميراومن ساعتها ما رحتش هناك تانى.ربنا ما يحرمنا من قلمك الساخر يا عز.وربنا يوفقك يا ابنى و يخليلك مراتك:)

    ReplyDelete
  5. والله يا عز على يدى سمعت منك الكلمة دية قبل كدة كذا مرة
    هههههههههه
    فاكر يا عز اخر موقف مع الكاميرا بتاع ربنا ما يحوجنا لحد
    اكيد فاهم بضحك لية ..بس فعلا فى حاجات مبنقدرش نفرط فيها
    حتى لو لاقرب حد او صديق مش علشان خايف عليها منهم ولا علشان هما مش غاليين عندك .. انما علشان انت مرتبط
    بيها لدرجة بعدها عنك صعب جدا

    على العموم مفيش احلى ولا اغلى من الشخص اللى انت اديتة الكاميرا

    وربنا ما يحوجنا لحد
    ههههه

    ReplyDelete
  6. والله يا عز باشا انا اول ماشوفت الاميل مكتوب عليه زي مراتي بالظبط
    قلت بس عز عمل بوست للكاميرا بتاعته:)

    بس بصراحة ماتخيلتش خالص انك ممكن تكون سيبتها

    بس اهي مراتك راحت لخطيبتك فمتضايقش خليها تتعود ان بقى ليها ضرة في البيت:))

    على فكرة صورة الجندي المجهول روعة بجد من احلى اللقطات اللي اتخدت للنصب ده

    تسلم ايدك يا مستر

    ReplyDelete
  7. maha atef :
    -------------
    كلامك أكتر من رائع.. قريته لناس كتير مفهموهوش ... بس سيبك أنا فاهم انت تقصدي إيه

    :) شكراً ليكي والله يبارك فيكي

    ReplyDelete
  8. جــــينا :
    -----------
    إيه يا جنجن انت اول مرة تعرفي اني مجنون !! :) بس ايه ده انت عمرك ما قولتيلي انك بتحبي تسمعيني بأحكي علي فكرة :)

    حكاية واقع العشاق اللي بيتألموا دي بقي فيها كلام كتيرررررررر أوي مانتي عارفة

    هاشوفك يوم السبت بقي عشان جاي أندلس هاشتغل إن شاء الله في الإذاعة بتاع حريتنا

    ReplyDelete
  9. JanKiez :
    ----------
    والله يا أبو عمرو ربك بيكرم الواحد بحاجات كتير أوي بس إحنا نبص ونركز في نفسنا جوانا إيه نقدر نشارك بيه مع اللي حوالينا

    وشكراً ليك يا جنكيز ويكرمك بكام كاميرا صغيرة كده يملوا عليك البيت

    :p

    ReplyDelete
  10. Reham :
    --------
    وعليكم السلام ورحمة الله وبركاته

    إبقي علقي كده وشرفينا كتير بلاش الزيارات الخطف دي ... وبالنسبة للوقعة فإنت لاااااا تتخيلي وقعت ازاي وفي قد إيه ..!! كسر من الثانية أصلاً كنت في الأرض وباصص للسما ورد فعلي السريع الطبيعي كان اني حميت الكاميرا :)

    شكراً لمجاملتك في حكاية قلمي الساخر دي .. يا ستي ده كلام كبير عليا أوي
    ربنا يخليكي ويكرمك يا رب

    ReplyDelete
  11. Crazy Rama :
    ------------
    انت فاكرة اليوم ده يوم ما قالي ربنا ما يحوجنا لحد !!! كنت عايز أقوله إيه يا عم وهو أنا متطالب إني اسلفك الكاميرا ولا إيه !!!! يلا راح مطرح ما راح بقي

    وطبعاً مفيش عندي أغلي من الشخصاية اللي خدت الكاميرا :) هي كل حاجة ربنا يحميها لأهلها ويكرمني بيها ويكرمها بيا وربنا ما يحوجنا لحد

    ههههههه

    ReplyDelete
  12. طبعا انت عارف رايي في موهبتك واد ايه صورك جميلة في الحقيقة حاولت اسميها ولما ماعرفتش ضحكت وافتكرت يوم ماقلت لي سمي الصورة دي قعدت ساعة افكر وفي الاخر ماعرفتش
    هههههههههههههههههه

    على فكرة لما كنت في اسكندرية سنة 97
    كنت انا كمان هناك وفاكرة شريط حميد كان عامل ازاي كل العربيات كانت
    بتسمعه والناس ع الكورنيش والقهاوي بقى كلهم عيني عيني ..كمان اغنية يا ام الفساتن الاسود شكلك حلو وعجبني
    ههههههههههههههههههههه
    كان فعلا مكسر الدنيافاكره اوي الحاجات دي
    طلعتيني من الموود ياعز
    :)
    اه صحيح حلوة
    " ريم البحر "
    دي ;p

    سلاماتي

    ReplyDelete
  13. اقول ايه الكاميرا ندهتك

    ربنا يخليك مراتك وتحبها كمان وكمان

    انا عشقت الكاميرا من كلامك

    يمكن اوقات الواحد يشوف منظر ويبقى هيموت ويكون معاه كاميرا عشان يصوره

    بس برده سبحان الله هى بتبقى موهبة مش اى حد يصور برده

    تحياتى

    ReplyDelete
  14. اه صحيح نسيت اسأل سؤال هى البلد ضلمة عشان مين فيهم ؟؟؟:)

    ReplyDelete
  15. ريما :
    -------
    تحياتي يا ريم أيوة انا فاكر يوم الصورة اللي كنت عايزك تسميها تقديراً لمجهودك الحربي معانا .. وفي الآخر قلتلك خلاص شكراً أنا سميتها مشكرييين :)

    وبالنسبة لريم البحر دي .. اه هو اسمه كده الحاجات الخضرا المزحلقة دي اللي بتكسي الصخور .. قالولي انها اسمها كده انا مليش دعوة :D

    وعلي فكرة انا مطلعتش حد من اي موود متتلكيكيش

    ReplyDelete
  16. أميرة ويلز :
    -------------
    حلو تعبير الكاميرا ندهتني باين كده فعلاً :)

    شكراً لمجاملتك اللطيفة وأكيد الدنيا ضلمة من غيرها هي :)

    ReplyDelete
  17. عززززززز
    انزلي تحت علشان أعرف اتفاهم معاك
    انت خطبت من ورانا ولا اييييييييههههههه
    دي فيها موتك يا عززززز
    كدة محدش يعرف... ماشي يا عززز، عموما انهاردة عندك.. بكرة انشاء الله عندي ;)
    الي ميعرفش عز فعلاً ميعرفش الكاميرا بالنسبة ليه تكون إيه، عز و الكاميرا لا يفترقا، و بيها فعلاً بيسجل لحظات كتير جداً الناس بعد كدة بتيجي تدور عليها مش بتلاقيها غير عنده هو
    ربنا يخليهالك يا عز ياخويا... الكاميرا و خطيبتك :P

    ReplyDelete
  18. صباااااح الخير

    استنى بقى شوية كده

    " الحاجات الخضرا المزحلقة"

    يع يع يع

    (3 يع)

    ريم يعني حاجات خضرا مزحلقة دي لااااااااا لا لا

    ريم يعني غزال ابيض صغير كده وكميلة
    على راي احمد شوقي
    ريم على القاع بين البان
    والعلم ..احلى سفك الدم في الاشهر الحرم

    البيت الوحيد اللي حفظاه من عند

    :))

    ماااااااااااشي ماشي ياعز

    ReplyDelete
  19. انت فعلا مديتش كاميرتك لحد, لأن انت وخطيبتك واحد (:
    حتي هي أول ماقلتلك انت شرحتلها علي طول من غير تفكير, الحب بيعمل أكتر من كده يامان, ماشاء الله يعني ده مش أر (:
    لكن انت احساسك بالتصوير جميل أوي , ووصفك لمشاعرك جميل جدا كمان.

    ReplyDelete
  20. نسيت أقولك ربنا يخليكو لبعض (:

    ReplyDelete
  21. ريما :
    --------
    والله يا ريما هما اللي قاااااااالوللي ان الريم دي الحاجات الخضرا المزحلقة اللي بتبقي علي الصخور دي

    علي العموم معلش بقي جت فيكي
    :)

    ReplyDelete
  22. Esraa :
    -------------
    الله يكرمك لا هتقري علي إيه انا عارف والله

    ربنا يخليكي وشكراً ليكي علي التعليق

    البوست خرج زي ما انا حاسس بيه من غير رتوش

    شكراً ليكي مرة تانية

    ReplyDelete
  23. دي مش حدوته واحد و الكاميرا بتاعته .... لأ ... دي ملحمه عن التصوير
    عجبتني قوي شويه صور علي المدونه ... خصوصا أن دي أول مره أزورك

    ReplyDelete
  24. كلمة :
    ------------
    يااااااااااااااااااااااه كبيرة اوي الكلمة دي للأسف من الحاجات اللي لا يمكن اكتبعها عن نفسي لأن ساعتها هابقي عامل زي بتوع اوبريت أكتوبر !!

    بس بجد ضحكتيني في يوم صعب جداً في الشغل وبجد أي حد بيكتب تعليق هنا في بيتي متتخيلوش بأبقي مبسوط ازاي

    شكراً لذوقك وتعليقك فوق راسي من فوق ومتطوليش الغيبة تعالي زورينا علي طول البيت مفتوح 23 ساعة في اليوم زي الصيدليات بالظبط :)

    ReplyDelete
  25. ههههههههههههههههههه

    ترجع بالسلامه يا رب هى والكاميرا
    بص بصراحه انا افتكرت كلمه كاميرتى دى زى مراتى ماسيبهاش لحد ابدا
    وافتكرت رد معين على الجمله دى
    ربنا ما يحوجنا لحد

    هههههههههههه


    طبعا مش هتكلم على موهبتك فى التصوير لانى مش هعرف اصلا اتكلم عليها انا فاكره انك كنت بتصور العمارات فى الشارع ببوزات مختلفه وكانت بتبقى حلوة اوى

    وبرده يا عز هاقولك انت مابتعديش حاجه ابدا؟

    بس فى سؤال يا عز

    مين محمد جورج؟ وازاى محمد جورج؟

    ReplyDelete
  26. rere :
    ---------
    الله يسلمك :)

    هي رجعت الحمد لله بالسلامة هي والكاميرا وخمس شرايط فيديو فيهم الرحلة كلها ...

    عيب عليكي بإذن الله لازم مراتي تبقي متعودة علي كده من ومننننننننن نفسها محدش هيجبرها تعمل حاجة
    انت عارفة .... انا ديمقراطي طول عمري

    بالنسبة لمحمد جورج
    فده اخويا واعز اعز اعز اصدقائي
    واسمه الكامل : محمد إيميل جورج نصر
    لبناني الجنسية سابقاً مصري الجنسية حالياً
    والده رحمه الله لبناني وكان إسمه المتداول أمين
    جده جورج رحمه الله هو اللي أسلم بس ماغيرش إسمه
    وفضل الإسم زي ما هو في الشهادات بس المتعارف بينا محمد أمين

    محمد أخد الجنسية المصرية لأن والدته مصرية

    تحياتي ليك يا أبو حميد وشكراً ليكي يا رؤي علي التعليق والملاحظة اللي محدش خد باله منها

    ReplyDelete
  27. حسيت إن آه انا مبديش كاميرتي لحد لأن كاميرتي زي خطيبتي إستحالة أديها لحد !! لكن إبتسمت لأن اللي خدت الكاميرا هي خطيبتي

    مبرووووووووووووووووووووووووووووووووووك يا عم عز بيت العز يا بتنا حيكبر و حيزيد فرداااااااااااااية هههههههههههههههههههههههههههههههههه

    ReplyDelete
  28. rabna ytmemlak b7'ir ya mohamed we ys3dak
    we b3din awl lama trg3 elcamera a7na 3izin kam sora helwa kda bcamera elazz
    tahiatshy

    ReplyDelete
  29. Engy Abou El Ezz
    -----------------
    الله يبارك فيكي يا انجييييييييييييييييي بس ربنا يكرم بس ويتمم علي خير والبصاصين كلهم ليهم عندي عزوووووووووووووووومة كبيرة وتكون هي معايا ان شاء الله ما انتوا اتنكدتوا معايا يبقي تفرحوا معايا

    الله يبارك فيكي مرة تانية وتسلم ايدك يا ريس علي الشغل بتاع امبارح ... الحلقة طالعة جناااااااااان اينعم نص كلامي اتحذف بس فل أأأأأأأأأأأأأأأأأ تمام تمام

    :)

    ReplyDelete
  30. Memo :
    -------------
    allah ykremek ya memo w nefra7 feky enty kaman

    aiwa ma el camera reg3et mn kam yom w lsa masawartsh walahy 7aga :D mashghol fe Programe ba3melo 3al Radio about Bloggers :) so soon neb2a ngebek fel show w nstadefek

    ta7iaty ana ba2a :D

    ReplyDelete


  31. اي حد يعرف يصور بس مش أي حد ممكن يخلي الصور تنطق في صور بتشتم و في صور بتتكلم كلام جميل أوي يعجز الانسان عن قوله

    انا كمان بحب التصوير لكن مهتمتشي بيه أوي زي حاجات كتير راحت مني

    ربنا يخليك لخطيبتك و يتمملكم على خير يا رب

    يا رب ما يحكم عليك بأي حاجة تقلب منك اللي بتحبه ;)

    أحلى مساء الخير من ماناساس البلد

    ReplyDelete