Monday, April 07, 2008

إضرب.. خليك راجل


المسألة بقت عاملة ببساطة شديدة يمكن زي السجاير، لما حد يجي يقولك إشرب يا عم إِشرب خليك راجل..!! طبعاً انا بدأت الموضوع من النهاية، نبدأ من البداية؟ يللا.

من شهر او اكتر بدء جروب علي الفييس بوك الموقع اللي ربنا يخليهولنا جروب بينادي بإضراب شامل وعام في شتي ربوع مصر وانحائها... الجروب لاقي اقبال غريب !! وصل عدد المشتركين فيه لـ 56 ألف مثلاً ده علي اقل تقدير... صاحبة الجروب واللي اسمها اسراء كانت محور حديثي انا ورجب زميلي في الشغل.

لما باقوله ان فيه واحد صاحبنا اسمه شادي اتمسك في الإضراب امبارح يا رجب... وكمان اسراء اللي عملت الجروب بتاع الإضراب وناس كتير، فقالي طب وانت مالك فرحان ليه او مبسوط وانت بتقول علي اسراء تلاقيها اتبهدلت؟؟ قولتله اكيد مش فرحان !! بس انا متضايق عشانها.. كان لازم لو عايزة تعمل حاجة زي كده تحاول تعملها من غير ما تعرض نفسها للتهلكة !! تحاول تعملها بذكاء شوية مش تدخل تعمل الجروب بإسمها وبشخصيتها !! كانت تحاول تتعب نفسها شوية وتعمل حاجة تانية بدل ما هي كده يا عيني تلاقيهم بيظبطوها !! عارف طبعاً إنها صاحبة قضية وأكيد مش في دماغها كده ... بس دي بنت وانا بجد كنت أتمني ان الإضراب يكون أكتر نظاماً وملوش ضحاياً بالشكل ده.

رطم رجب بكلمات وهمهمة انا مسمعتهاش بس السيجارة اللي ولعها بعصبية اكدتلي انه اتضايق!! بس فعلاً انا سواء الإضراب نجح أو فشل زي ما شافه كل الناس امبارح واللي كان اعتقد بيتلخص في المحلة الكبري والضرب اللي حصل فيها، والمظاهرة اليتيمة اللي حصلت امام نقابة الأطباء، وكمان شوية احداث في الإسكندرية... او حتي كونه إضراب يرضي جميع الأطراف .. زي ما قالت جريدة المصري اليوم، انا شايف انه علي الرغم من كونه كان ضروري ان الناس تصحي وتعرف مسئوليتها وحقوقها.. لكن اللي انا مش راضي عليه انه مكانش اضراب منظم !! يعني الكلام اتطاير في الهوا.. مكانش معروف مين اللي منظمه، مين صاحب الفكرة؟ ايه الهدف منها؟ ايه مطالبنا؟ بنطالب بأي وزير مثلاً يسيب وزارته؟ فوضي!!

الصور اللي شوفتها والفيديوهات لناس همج بيكسروا كباين الميناتيل والنيل اللي في الشارع، ولا اللي بيرموا القطار اللي ماشي بالطوب ولا اللي ولعوا نار في السكة الحديد واتضطر القطار انه يعدي فيها وهي مولعة !! ولما كانت النار تمسك في العربية... كان هيبقي كده كويس؟؟ كان هيبقي الإضراب نجح؟؟

الملخص انك طلعت بيوم مش عارف ايه اللي هيحصل فيه؟ ايه الغرض منه؟ ايه الفايدة منه؟ غير ان الناس تقول ااااااااه بصوت عالي عشان الحكومة تعرف انهم موجوعين! انا شخصياً من الناس الي مكنتش مقتنع بالإضراب.. بس عشان اكيد معنديش بديل ولا انا مفوض عن الشعب ولا الي الشعب حتي.

فأنا شوفت الحكاية بتاعت الإضراب زي السجاير، اضرب خليك راجل ..!! كان نفسي تبقي لو هتحصل فتحصل زي في فرنسا لما سواقين القطارات بيضربوا عن العمل يوم ولا يومين... بيبقي الكل متضامن وبجد!! عمري ما شوفت سواق ماشي بالقطر والتاني راكن!! عشان مضرب!!

طبعاً انا حزين وقلقان علي أصحابي اللي اتقبض عليهم في حكاية الإضراب زي شادي العدل ومحمد شرقاوي، وحتي اللي مش صحابي... الشباب المتحمس الجميل جداً.. واللي مضايقني ان كل ده كان ممكن يتنظم بطريقة وشكل أحسن من كده وميبقاش فيه خساير ولا حد يروح ميرجعش..!!

12 comments:

  1. موضوع الاضراب الاخير ده مهما كانت سلبياته اللى انت ذكرتها يا عز الا ان ده يعتبر خطوه كبيره جدا فى تحقيق اللى بيقولوا عليها الديموقراطيه يعنى لو الاضراب ده هو البدايه دى تبقى حاجه جميله خالص
    اما بقى الناس اللى بتضرب دى حكايه تانيه خالص منهم اللى بيضرب كنوع من التغيير وكسر للملل ومنهم اللى مش عارف هو الاضراب عن ايه اصلا وبيحاول يعمل زى الناس ما بتعمل وخلاص
    ومنهم اللى ليه هدف وبيحاول يعبر عن رأى وموقف بس بشكل حضارى
    بس اللى بيجتمعوا عليه كل الانواع دى هو زى ما قولت انهم يقولوا اه ه ه ه ه بس بصوت عالى وجماعى
    انا مع الاضراب جدا بس لو اتنفذ بشكل اكثر تنظيما لأن احداث الشغب اللى حصلت ضيعت مجهود الناس اللى ليها هدف وبتحاول تعمل حاجه

    ReplyDelete
  2. بص ياسيدي الاضراب فعلا نجح لأن الحكومه كانت معتقده ان الشعب في غيبوبة وطلع لسه عايش وبيعرف يقول لأ

    بالنسبة للمحله فمحدش قال ان اللي بيكسر كانو اهل المحله
    اعتقد انك سمعت عن بلظجية الحزب الوطني في الانتخابات ودول اللي كانو بيكسرو في المحله

    والسبب زي ماقالت مني الشاذلي اللي ماجبتش سيرة اللي حصل غير بعد كذا يوم

    ان عشان لما الحكومة تقطم رقبة حد محدش يقدر يتكلم

    الاضراب لو كنت متابع أخباره من الول فهو كان فكرة عمال المحلة والمعارضه واللي مش عاجبهم حال البلد انضموا ليهم

    وكانت المطالب هي زيادة المرتبات عشان الناس تعرف تعيش

    مرتبات تكون علي أد الزياده في الأسعار

    ReplyDelete
  3. يااااااخبر
    it's impossible
    c'eat impossibles


    ايه يا عز بتحرض الناس على المظاهرات
    على اخر الزمن كمان بقينا نلم الناس علشان نعمل بيهم اضراب
    لا وكمان سواقين القطارات
    سيب الناس تاكل عيش يا عز
    وربى عيالك
    انت مش حمل حاجه يا جندى مجند عز الدين

    هههههه حلو جندى مجند ديه صح


    عز ده اخر انظار ليك قبل ما اكلم بابا حسنى على الموبايل واقوله على موضوع الاضراب ده ...

    بس ابقى قولى على المعاد علشان البلاغ يبقى سليم .. حظك ان شبكه موبينيل واقعه دلوقتى .. وبابا حسنى موبينيل

    ReplyDelete
  4. من محمد بصيلة اشكرك على تعليقك على مدونة اخبار بنى سويف
    ونرجو ارسال ملاحظاتكم ونحن نتابع مدونتك بشغف وهى متميزة

    ReplyDelete
  5. من محمد بصيلة اشكرك على تعليقك على مدونة اخبار بنى سويف
    ونرجو ارسال ملاحظاتكم ونحن نتابع مدونتك بشغف وهى متميزة

    ReplyDelete
  6. من محمد بصيلة اشكرك على تعليقك على مدونة اخبار بنى سويف
    ونرجو ارسال ملاحظاتكم ونحن نتابع مدونتك بشغف وهى متميزة

    ReplyDelete
  7. والله زمان يا عز...

    انت قللت جدا من مدوناتك الجميلة

    بالنسبة لموضوع الاضراب فأنا شايفة ان وجهة نظرك سليمة 100 فى 100

    بس الناس مخنوقة بجد وبدور على أي متنفس لغضبها

    و أنا أعتقد ان هى دى البداية

    صحيح هى مش منظمة لكن أهى بداية برده

    ReplyDelete
  8. life is sooo sweeeeeet:

    طيب أنا شايف ان تمام خطوة كبيرة ومحدش كان يتخيل ان في مصر يحصل كده ... كل ده كلام جميل لكن انا كان رأيي انه لو كان منظم وفيه مطالب معروفة وليه جهة متبنياه كان هيبقي احسن واوقع وكمان نقدر ناخد منه نتائج ... عندك اضراب موظفي الضرائب العقارية ما انا كنت متابع معاهم بحكم شغلي في راديو حريتنا اللي تصادف جنب مقر الإعتصام ... كانوا ناس فاهمه هي بتعمل ايه وجاية هنا ليه ... عشان كده روحوا معاهم اللي كانوا عايزينه

    ReplyDelete
  9. esraa:

    انا معاكي يا اسراء ان كان فيه بلطجية وكان واضح اوي من الصور مش محتاجة حد يطلع يقول كده... علي الرغم من اني كنت احب ان الإعلام يوضح ده بس واضح انه لسه مش حر علي الرغم من انه مش حكومي !!!

    بس بالنسبة لإن الإضراب اللي دعا اليه عمال المحلة، طب ما من وانا صغير كنت باشوف وباسمع عن اضرابات عمال السكك الحديدية في فرنسا وحاجات من دي كتير

    ليه عمري ما شوفت مهزلة زي اللي حصلت دي في فرنسا، ليه محدش عمل حاجة غير منظمة سمحت لبلطجية انهم يدخلوا..؟ ليه اصلا يبقي فيه ضرب وحرق ونار ؟

    حتي لو دخلاء ازاي سمحولهم يعملوا كده في بلدهم، هو كلامنا متأخر شوية بس نأمل ان لو حصل حاجة بعد كده تبقي منظمة عشان الواحد يفرح ان لسه في البلد حد بيعرف يقول لأ ... مش مجرد حد بيزعق وخلاص

    ReplyDelete
  10. crazyrama:

    خدت تأجيل يا رامااااااااا

    اطلعلك لساني ازاي انت واللي هتكلميه علي الموبايل، انا عارف طبعا انك بتهرجي وان ده مش اللي انت فهمتيه من البوست

    :D

    ReplyDelete
  11. محمد بصيلة:

    أشكرك علي تعليقك يا استاذي ويا ريت تبلغ الجميع في بني سويف تحياتي والله عايز اجي اطب عليكم مرة كده

    تحياتي للجميع

    :)

    ReplyDelete
  12. مــــــي:

    أخبارك ايه ؟ :)

    والله الشغل قاتل كل الوقت دانا بالعافية باهرب عشان اكتب حاجة والا انشر حاجة... بس فيه حاجات كتير هانشرها ان شاء الله ... متأخرة بس معلش

    انا معاكي ان الناس مخنوقة طبعاً اي حد ممكن يلاحظ ده... بس زي ما قلت لإسراء ان يا ريت ميكونش بس زعيق... اتمني انه يبقي كلام وكلام مسموع جداً

    ReplyDelete