Wednesday, November 08, 2006

عايز الشخليلة واليويو


حكاية حياة

زي ما سميتها جينا

-

النهاردة عدي من عمري 25 سنة، يعني أنا بأحتفل النهاردة باليوبيل الفضي... أحب أشكر اللي ما أفتكروش عيد ميلادي قبل اللي إفتكروا وبالمناسبة الغريبة دي أحب أرغي شوية عن حاجات عدت في حياتي ...، صديقة عزيزة عليا سألتني: ها عايز إيه في السنة الجديدة ؟ قولتيلها عايز الشخليلة واليويو ..!! فاكرين الجملة دي من إعلان فودافون ؟ ..أنا إفتكرتها أول ما سألتني.. وبعد شوية ضحك شرحت لها أنا عايز إيه.


طول عمري وأنا بأحب الحياة الجميلة، بأحب الحياة عاماً.. بأحب ألعب بأحب أسمع فيروز بأحب أرسم بأحب أفكر في ربنا بأحب أروح البحر مع إني مبعرفش أعوم لحد دلوقتي... بأحب أجري مع إني مجرتش كتير وأنا صغير نظراً لإني كنت أطول واحد في الصف بتاعي..!! كنت عم القائد بقي وكده فكان لازم أبقي قدوة للباقيين في الإلتزام.. بأقف مع المدرسات والمدرسين لحد ما البريك يخلص وطبعاً ولا لعب ولا جري الإ قليل أوي لو عرفت أفلت من المدرسة وهي بتتكلم مع حد من المدرسين... حد هيضحك دلوقتي ويقولي "إيه الطفولة المشردة دي يا عم !!" لا متتخيلوش كانت سعادتي أد إيه وأنا مميز وواقف مع الناس الكبار ..!! اللي هما كانوا المدرسين ساعتها.


فاكر أوي كل تفاصيل وأنا في الحضانة " بسم الله ما شاء الله " مش عايزين حسد ..!! فاكر "محمد عادل" كان عنده أنيميا البحر المتوسط علي ما أتذكر وكان المفروض إنه مياكولش فول وطعمية ..! أفتكر ساعتها كنت في روضة سادس - فضلت في سادس دي لغاية ما وصلت إعدادي - متذكر جداً إن الأولاد كانوا بياخدوا منه السندويتشات بتاعته ويحاوله يأكلوه فول وطعمية !! عيال مؤذية ؟ صح. تصدقوا إني فاكر شكل وشه وهو بيعيط قبل ما ينزل الفسحة - تم تسميتها بريك لزوم إن المدرسة دخل فيها قسم لغات وكده - مش عارف ليه أكيد مش فاكر بس كنت بأديله سندويتشاتي أنا واخد انا منه الفول والطعمية اللي الأولاد حطوهملوا في الشنطة، أنا ماشوفتوش بعد روضة، حسب عقليتي ساعتها .. محمد إختفي !! وحشتني يا واد علي فكرة الله يمسيك بالخير لو لسه عايش ويرحمك لو مت.


فاكر بعد كده سنة رابعة، كانت فصول مختلطة ساعتها كان معانا بنات، أنا ساعتها كنت بأرسم حلو أوي وفاكر إني كنت حافظ خريطة الوطن العربي "صم" وكنت بأرسمها للعيال في الفصل وكانوا بيقفوا طابور عشان أرسمهالهم... تصدقوا أنا فاكر شكل الخريطة حتي كنت بأرسمها بقلم جاف "بيك" وطبعاً كنت ساعات بأرسم للبنات الأول قبل الأولاد - محدش يضحك مش عشان حاجة !! - أكيد مكانش فيه حاجة جوايا ساعتها... بس مش عارف ! ده شئ كان بيخلي ناس كتير من الأولاد ميحبونيش !! علي عكس البنات... مقولوكوش بقي إيـــــــــــــــه ..! كنت عفريت ساعتها، وإحتمال لغاية دلوقتي معرفش مش فاكر الصراحة ..!!


فاكر وأنا في سنة خامسة في مرة المدرسة سابت الفصل وبصفتي رائد الفصل ومكنتش بأفرق بين صاحب وغير صاحب بنت أو ولد وكنت حقاني - اللي بيتكلم بأطلعه بره وأوقفه علي السبورة - وقفتي علي الفصل .. ومشيت إختفت تماما لباقي اليوم اللي كان فاضل فيه أكتر من تلات حصص .. أفتكر يومها قعدت أتكلم مع الفصل كتيــــــــــــــــــــــــــر وحكينا حكاوي !! فاكر الديسك اللي كنت قاعد فيه والله وصوت الصمت وهما بيسمعوني... كان ساعتها إحساس حلو أوي وإنت شايف الفصل كله قاعد ساكت وبيسمعلك !! مش فاكر أوي كنت بأقول إيه ولا بأتكلم في إيه..!! بس فاكر إن فيه بنات كتير كانوا بيتكلموا معايا وبيتناقشوا في اللي احنا بنقوله - كبيرة اوي كلمة يتناقشوا علي بنات في سنة خامسة ؟؟ - لأ أصلكم ماشوفتوهمش ساعتها... أنا فاكرهم حتي بالإسم، أميرة ، سها ، سلافة، رانيا و سارة - متضحكوش عشان انا مش فاكر ولا إسم ولد .. المسألة بدأت تقلقني أنا شخصياً ... أنا مالي كنت مركز مع البنات كده ليه !؟! المهم كانوا تحس إنهم اكبر من سنهم بمراحل... سنة خامسة دي يعني كان عندي 10 أو 11 سنة مش فاكر بس كانوا آنسات كده وفاكر أوي قوة شخصيتهم وتفوقهم كنت انا وهما وكمان واحد تاني بس إسمه رايح مني خالص.. كنا الفريق بتاع الفصل.


أميرة كانت طول كتفي في الوقت ده شعرها أصفر تقيل لونها كان عادي مش أبيض ومش أسمر اللون المصري العادي، سها دي بقي كانت ما شاء الله من الناس اللي كنت بأتمني إننا نبقي أكبر 900 سنة عشان أتجوزها مع إني مش فاكر أوي إني كنت اعرف يعني إيه جواز !!! بس كنت معجب بيها أوي ... كان طولها مش كبير اقصر من أميرة، كانوا أصدقاء أوي شعرها كان أصفر من شعر أميرة ولونها أبيض لدرجة الشفافية - يظهر إني كنت معجب بيها أوي - عينيها رمادي فاتح صوتها كان مضحك ولا تتخيلوا إني ممكن اكون فاكر صوتها... سها من الناس اللي إختفوا من الحياة بعد سنة خامسة، شوفتها بعد كده بكذا سنة في الشارع بس خفت أروح اعملها قصة مسرحية عشان أقولها إني أنا محمد اللي كان في معرفش إيه بتاع مدرسة إيه .... عشان تقولي لأ آسفة والله مش فاكرة.. سلافة مش فاكرها أوي، رانيا بقي رسمياً ولأول مرة أقول الحكاية دي بس رانيا أول وآخر بنت مشيت وراها عشان أعرف بيتها فين !!!! متتخضوش مش معاكسة ولله الحمد عمري ما عاكست بنت في حياتي .. ممكن أعجب بحد آه يمكن كتير جداً لكن عمري ما قليت أدبي ... بس أصلكم مش فاهمين ..!!! دي كانت لعبة بنلعبها وأكننا بنراقب البنات وعاملين فيها شارلوك هولمز - اللي أكيـــــــد ما كنتش أعرفه ساعتها ..!! بس البنات كانوا عارفين إننا بنمشي وراهم وكانوا بيستخبوا مننا وكانت لعبة غريبة بس جميلة، فاكر أوي الأماكن اللي كنا بنستخبي فيها، إحنا كنا صحاب أوي ساعتها.


فاكر أيام الزلزال اللي ضرب مصر أول مرة في سنة 1992، كنت في أولي إعدادي وكنا في آخر حصة وفاكر أوي المشهد، أنا قاعد في آخر صف - كالعادة بصفتي أطول واحد برضه في الفصل - والشباك علي شمالي والساعة 3:12 دقيقة، فيه طيارة شوفتها من الشباك وبعدها الأرض بدأت تتهز.. الإستاذ جري والعيال كلهم بدؤا يجروا، فاكر أوي إن الفصل في دقايق كان فاضي والدور كله صريخ... وأنا كنت قمة في الهدوء وفاكر وأنا بألم أقلامي وبأحطهم في المقلمة - أنا شايف واحدة دلوقتي هي عارفة نفسها لو بتقرا السطور دي هاتقول : أصلك يا محمد منظم بطريقة مملة .. ماشي هاعديهالك - فاكر إن الفصل كله فضي وأنا لسه بألم حاجتي وبأحطها في الشنطة وساعتها واحد صاحبي - للأسف الشديد بجد للأسف الشديد مش فاكر إسمه - رجع !! شوفوا الجدعنة رجع والمدرسة كانت بتقع - علي حد تفكيرنا في الوقت ده - وشدني وقالي : يلااااااااا تعالي وسيبهم هنا وشدني من دراعي.. الله يمسيك بالخير يا صديقي والله لو كنت إفتكرتك لأكلمك ولازم أشوفك ... كان جدع فعلاً وأنا مش فاكر ايه اللي كان في دماغي ساعتها !! أقلام إيه !! المهم جرينا ونزلنا علي السلم وفاكر منظر السلم وهو متكدس تلاميذ واقعين فوق بعض !! وفاكر إن فيه حد زقني ووقعت عليهم !!!! طبعا اللي كانوا تحتي دول اتفعصوا !! كان يوم وحش أوي والفترة كلها كانت مؤلمة بلاش أفتكر أكتر من كده.


الإعدادية أنا كنت فيها ملك !! بكل معاني الكلمات، كنت عبقري الدور - هي سنة تالتة إعدادي كلها كانت دور واحد في المدرسة - كنت بآخد درس مع أستاذ خالد عبده ... واللي كان معايا في المدرسة كان يعرف مين خالد عبده، الراجل كان مقتنع بيا لدرجة غريبة وكان بيعملني أكني قابل للكسر وثروة يجب الحفاظ عليها !!! بيني وبينكم انا كانت عجباني الحكاية .. وفعلاً كنت عفريت مكانش فيه مسألة في الجبر والهندسة كانت بتقف قدامي، بجد كنت فظيع لدرجة إني كنت معروف في المدرسة كلها وكانت الفصول لما تيجي تعمل مسابقات مع فصول تانية من مدارس تانية كانوا بياخدوني علي إني معاهم ...!! بدأت في السنة دي ألعب كرة سلة !! تخيلوا بقي معايا... رائد للفصل - وعلي فكرة السنة دي أنا أخدت رائد الفصل وأنا في البيت !! بالتزكية زي ما بيقولوا !! تصدقوا كنت أنفع في الحزب الوطني والله !!!!! آه والله وانا في البيت تخيلوا مدي الشهرة وكمان خدت المقرر الرياضي - يعني رائد فصل ومقرر رياضي ولاعب سلة وملك في الجبر والهندسة !!! يخرب بيت عقلي أنا كنت جامد جداً في الأيام دي.. كان الفصل بتاعي هو الفصل الوحيد اللي في المدرسة فيه مسيحين، كنت مصاحب الكل وبأعملهم الكل نفس المقدار مفيش فرق بين مسلم ومسيحي... يمكن ده اللي خلا علاقتي بالمسيحين كويسة لحد دلوقتي لأني فعلاً مش بأكره حد عشان دينه !! لأن هو ده الإسلام فعلاً ... فاكر ماجد كان من البروتستانت كان الوحيد اللي في المدرسة اللي كده، الشئ اللي خلاني أتطلع وأعرف مين فين ومين إيه وأعرف الطوائف في المسيحية.


ودخلت المرحلة الثانوية وكان لازم أختار !! علمي ولا أدبي ..!؟ طبعاً اللي كان يعرفني كان لا يمكن يفكر أويخطر له ببال إني هأبقي أدبي !! لكن فعلاً دخلت القسم الأدبي لأني بيني وبينكم مش بتاع مذاكرة.. مسألة الجبر والهندسة دي كانت حكاية تانية .. الجبر أنا خدته عند لأني مكنتش فاهمة وأنا مبحبش أخسر !! والهندسة إستاذ خالد عبده ربنا يمسيه بالخير والله عايز أروح أزوره هو اللي صنع الهالة دي حواليا ... أنا كنت بأفكر مش بأحفظ - وهو ده اللي خلاني أدخل الأدبي مع إنه كله حفظ !! بس برضه كان - عند - من العناد يعني !!


زهقت من الكلام عن المدرسة يمكن مفيش حاجة جميلة حصلتلي في المرحلة الثانوية إحتمال !! بس مش عايز أفتكر حاجة اكتر من اني دخلت وخرجت من الطبري الثانوية بنين وما أدراك ما هي الطبري الثانوية بنين ! وأنا زي ما أنا متغيرتش.. كملت كرة سلة - كنت بدأت ساعتها ألعب في النادي الأهلي - فضلت محترم مبحبش الخناق زي ما أنا، معاكستش ولا بنت، مزوغتش ولا يوم، مشربتش سجاير ولله الحمد من قبل ومن بعد، لآخر يوم في المدرسة أنا كنت ملتزم.


حاجات كتير حصلت من اليوم اللي عرفت إني جايب فيه 83% في القسم الأدبي في الثانوية العامة لغاية يومنا هذا... حاجات كتير أوي وفرح وحزن وحب وكره وحب تاني ونسيان وحب تاني ودموع وزعل وزهق وجري ولعب ومنطقة وعمار بن ياسر وإستاد ومراقبة وجامعة وتنمية وأوتوماركت وافلام وخروجات وشمس وحفلات وإعتكاف ودقن وبساطة وروستري وسيتي ستارز الصبح والغردقة وتطوع ونزول وطلوع ومارينا والبيت وأنا لوحدي وموبايلات وصلاة ونقاشات وصوم ومجادلات ومواقع وتصميم ودبلومات وصحاب راحوا وصحاب جم وبنات كلمتها وبنات بعدت عنها وصحاب رجالة وصحاب لأ وحاجات كتير أوي لدرجة إني إتلغبطت ..!! هو أنا كده عايز كل حاجة !؟ ولا ده العادي !! أنا كده اللي عايز أكوي القميص وبرضه أخيط الزراير ..!! وعايز العب الشوط الأول والتاني والإضافي ويا سلام لو فيه ضربات جزاء !! أنا اللي عايز الشخليلة واليويو وده كتير إني أطلبه !؟ ولا هو ده المفروض أساساً إن الإنسان يطلبه !!


أنا كل ده علي فكرة لسه ما قولتش أنا فعلاً عايز إيه !! كل ما أتمناه من الله بعد ما أتميت ربع قرن علي وجه هذه الكرة الصاخبة... إنه يتولاني برحمته لأني فعلاً من غيره ماكنتش نجيت من كل الهيصة اللي أنا عديت بينها دي.. ماكنتش إتعلمت من كل اللي شوفتهم في حياتي.. ما كنتش بقيت لسه أنا الأخ اللي كان بيحب "محمد عادل" وبيعامله اكنه مسئول منه.. ماكنتش فضلت الإبن اللي أستاذ خالد كان بيتعامل معاه.. ولا اللي كان بيسيطر علي الفصل والمدرسة مش موجودة.. ولا اللي الناس بتحبه حتي وهو مش موجود بينهم.. واللي حب وعرف معني الكره.. بأحمد ربنا إني لسه زي ما أنا نفس الإنسان اللي صورته فوق على اليمين تحت عنوان المدونة، يلا كل سنة وإنتم طيبين وأنا زي ما أنا بس ربنا يكرم بس وأقدر أكمل.-

-

30 comments:

  1. كل سنة وانت طيب ياعز

    احساس جميل لما تقعد تفتكر ايام زمان والمدرسة واصحابك وكل الكلام الجميل اللي كتبته عن حياتك -على فكرة مشاكل الطول واطول واحد في الفصل دي حاسة بيها اوي لأني عنيت منها كتير:D-

    كل ربع قرن وانت طيب وعقبال 100سنة ونص

    ReplyDelete
  2. انا مش عارف اقولك ايه
    المتأمل لهذه القصة يجد قصة كفاح
    وفيها سؤال مهم
    انت عايز ايه ؟؟؟؟
    تلك هي المشكلة
    احنا عايزين ايه
    وعلي رأي حسن أرابيسك
    قبل ما نعرف احنا عايزين ايه لازم نعرف احنا مين ؟؟؟!!!!
    أحب سوسو

    ReplyDelete
  3. سوسووووووووو مين يا واد يا محمود اللي جايبهالي البيت يخرب عقققققققققققلك :d

    كل سنة وانت طيب يا ريس وان شاء الله نعرف كلنا احنا مين

    ReplyDelete
  4. كل سنة وانت طيب ياباشا وكل عام يمر عليك ان شاء الله وانت بصحة وعافية لان الصحة والعافية كنوز لا تقدر بثمن بل لا تقدر بشيء فمن طلب غير العافية في الدنيا فقد ظلم نفسه

    اسأل الله لنا التوفيق دائما ولأمة سيدنا محمد اللهم صلي وسلم عليه وعلى آله وان يجعلنا من الطائعين الشاكرين الحامدين

    كل عام وانت بصحة وعافية

    ReplyDelete
  5. كل سنه وانت طيب يا عز
    بس يا راجل انت دوختنى معاك
    خليت راسى تلف
    شكلك كنت عفريت وانت صغير
    يا عفريتتتتتتتتتتتتتتتتتت

    ReplyDelete
  6. ezzzzzzzzzzzzzzz
    kefaya 25 sana fe 3ahd mubarak ya moftary
    bas yoobeel fedy sa3eeed ya 3eeeeez ana lessa ma2retsh keste 7ayatak de bas for sure ha2raha 3shan a3raf tareekh el kefa7 ya rafeek 3lana nasteeefd menha we teb2a 3ebra le kol el shabab 3shan ya7zoo 7azwaaaaaaak..heheheh
    bbye ya ezzzz
    urs
    Emad sha3ban emam

    ReplyDelete
  7. kol rob3 karn we inta tayeb bas ya ezz elmoshkella en 3omrak men 3omr elra2eess mubarak fe el7okm ya3ny akeed akeeeeed
    hand3eelak betool el3omr we bardo ned3eelo ye2sef 3omroo ne2oolo kefaya we ne2olak mesh kefaya...
    urs
    Emad Sha3ban Emam

    ReplyDelete
  8. عز كل سنة وأنت مسييح لنفسك كده
    كل سنة وأنت واخد الدنيا قفش
    كل سنة وأنت أطول واحد فى الحارة
    كل سنة واحنا أصحاب ...
    و يا رب كمان 100 سنة يعدوا عليك أحلى و أحلى
    و كل سنة و أنت طييب و أمرى لله

    ReplyDelete
  9. كل سنة وانت طيب

    ReplyDelete
  10. كل سنه وانت طيب يا استاذ عزززززز ... بجد قصة كفاح من الدرجه الاولى بس اكتر حاجه عاجبتني و موتيتني ضحك قصة سندوتشات فتى البحر المتوسط ههههههههههههههههه
    بس فيك الخير والله انك ظبطو من سندوتشاتك وربنا يكرم الجميع ...

    وعقبال اليوبيل الذهبي ان شاااااااااء الله ;D

    ReplyDelete
  11. السلام عليكم ورحمة الله وبركاته
    الأول وقبل كل شئ "كل سنة وانت طيب" وعقبال كده ما تكمل اربع قرون، وتقضيهم فى خير يارب

    جميل أوى انك تكون فاكر ذكريات الطفولة بالشكل ده بحلوها وبمرها ولو أننا فى الوقت ده مش بنمر بحاجات وحشة كتير زى الوقت اللى احنا عايشينه حاليا (على فكرة أنا كمان ذاكرتى قوية كده لدرجة انى فاكرة مواصفات الاماكن اللى عشت فيها واتعلمت فيها وكمان البلاد اللى سافرتها وانا عمرى 3 او 4 سنين)، اكيد هتستغرب ومش هتصدق بس ده اللى بيحصل فعلا

    وجميل أوى انك تكون انسان طموح وانك تكون حققت حاجات كتير فى حياتك، بس المفروض انك تستمر كمان
    مش معنى انك عايز كل حاجة ان كده يكون فيك حاجة غلط او انك تكون غير الناس

    الطموح شئ ضرورى جدا علشان النجاح
    يعنى مثلا لما الواحد يطمح فى انه يحقق عشر حاجات فى فترة معينة ويوصل ان شاء الله حتى لنصهم يبقى كده حقق نجاح وده هيشجعه انه يسعى للباقى، بعكس واحد يكون طموحه قليل مش هيوصل لحاجة خالص
    لان مش كل اللى بنتمناه بنحققه
    على العموم ربنا يوفقك فى حياتك وفى شغلك

    وكل سنة وانت طيب

    ReplyDelete
  12. يا عز ربنا يعزك ويكرمك ويبارك في عمرك

    ما تعرفش قد ايه رسالتك دي حلوة
    كل سطر قعدت افتكر نفسي وافتكر ذكرياتي الحلوة والوحشة لاني على فكرة قريب منك سنا بس انا 23 سنة بس من الانجازات وافتكرت كل مرحلة عدت عليا وعايز اقول لك على حاجة بس ما تقولش اني عقد وكلا كيع

    بس انا سألت نفسي سؤال انا عملت ايه لديني ولبلدي ولاهلي ولنفسي هل لو مت فعلا الناس هتحس بفرق ولا زي الاف قبلي والاف بعدي مش عارف بس نفسي اعرف

    كل سنة وأنت طيب

    ReplyDelete
  13. kol sana wenta tayeb ya basha ..we 3o2bal 1000000 sana..walahy makontesh 2a3raf we enta 3aref zeroofy kewayess,,bas el3eeb 3aleek,kont lama7ly welaw bekelma...rabena yekremak we yehdeek aktar we aktar..we yerzoo2ak be kol 2ely tetmanaah

    ReplyDelete
  14. كل سنة و انت طيب يا عز

    ReplyDelete
  15. إزيك يا عزعوز
    معلش انا كنت منعزل عن العالم الأسبوع اللي فات ده كله
    النت في الجامعة مقطوع من شركة لينك
    وفي البيت الشركة قطعت الخط
    والتليفون بايظ
    يعني ولله الحمد كانت متقفله من كل جانب
    بس يلا ما علينا
    المهم حمد الله على سلامتي

    كل سنة وانت طيب يا عزعوز
    وعقبال يارب ما أفرح بيك وانت عريس قاعد في الكوشة
    لولولولولولولولييييييييييييييييييييييييييييييييييييييي
    وعقبال يارب ما أشوفك كده جدو عزعوز وانت عندك 30سنة كده

    وكان يوم فوشيا يوم ما جيت
    كان يوم بمبى مسخسخ يوم ما جيت

    تخيل بأه إسود مع فوشيا وبمبى مسخسخ يعملوا إيه
    تبقى ماشي بتلعلط في الشارع

    كل سنة وانت كويس يا عزعوز وعيد ميلاد فرحان

    وتحيا سيدة جمهورية البصاصين الأولى
    First Lady
    ويحيا رئيس جمهورية البصاصين
    Mr. President
    وسلاااااااااااااااااااااااااااام سلاح

    ReplyDelete
  16. موسيقي التتر(لحن عيد الميلاد) تيراااااااااااااااااااااااام
    كان يوم اسود يوم ما جيت
    جيت يوميها ضلمت البيت
    كان يوم اسسسسسود
    كان يوم أسسسسود
    كان يوم أسود يوم ما جييييييييييييييييييت
    تصفيق حاااااااااااااااااااااااااااد
    برافووووووووووو برافوووووووووووووووووووو
    و صفافير بقي
    ههههههههههههههههههههههههههههههههههههههههههههههههه
    كل سنه و انت طيب يا عز يا رئيس الرابطة با مظبطنا و مدلعنا
    و عيد ميلاد سعيد و رشيد و مجيد و فهيم و عبد الصمد و مباااااااااااااااااااااااارك إن شاء الله

    و إن شاء الله ربنا يكرمك و يحققلك كل أمانيك و يرضيك يا رب
    و كل سنه و انتوا طيبين يا بصاصين
    و قد قامت سيدة الرابطة الاولي باصدار فرمان بجعل يوم 7/11 و 8/11 و 9/11 اجازة رسمية و عيدا قوميا للبصاصين و نظرا لطول عززززززززز العرب فقد تم مد الاجازة لثلاث أيام
    كل واحد و طوله بقي
    ههههههههههههههههههههههههههههه
    سلام يا حلوين يا مقطقطين
    إنجي أبوحميد
    First Lady

    ReplyDelete
  17. كل سنة وانت طيب يا عز

    دى هديتك متفتحاش خليها مفاجأة

    بجد انا مبسوطة جدا انى ليا صديق زيك

    يارب تحقق كل اللى تتمناه لان انت فعلا انسان محترم وتستاهل كل خير

    ReplyDelete
  18. صباح الخير يا حلوييين

    ازيكوا عامليين ايه؟؟ يارب كلكوا تكونوا كويسين و في احسن حال

    انهاردة معادنا مع حكاية من حكايات ابلة نهلة هيييييييييييه

    هحكيلكوا انهاردة عن يوم في تاريخ مصر، شهد حدث لم يسبق ان شهده التاريخ من قبل او من بعد

    يوم 8 نوفمبر عام 1981 كان يوم ماحدش يعرف كان برد ولا حر ولا مطرة، ما علينا يعني كان يوم مش باينلوا و خلاص

    اتولد في اليوم ده ولد اسمر طويييييييييييييل عريض المنكبين شلولخ، هو كان مولود كدة، أو على الأقل معتقدش انه كان صغير زينا كدة يعني

    الولد دة كبر و طول زيادة و دخل المدرسة و بعد كدة الجامعة (شوفتوا ازاي- سبحان الله) و بعد كدة شفناة

    و يوم ما دخل علينا حسييت ان الدنيا ضلمت و المكان هبت عليه رياح التغيير و اصبح البقاء للأطول

    محمد عز كل سنة و انت طيب و كل سنة جديدة من عمرك انشاء الله تحقق فيها حاجات كتير جديدة و تفضل صديق لينا على طول

    مش على طول يعني معناها انك تطول و محدش يعرف يكلمك و انزلي تحت من فضلك علشان اعرف اتفاهم معاك

    في نهاية الرسالة القصيرة دي احب اقول ان اليوم دة لن تنساه مصر او المصريين مهما طال الزمن (برده الطول ملازمك مفيييييش فايدة) سيكتب هذااليوم بحروف من ذهب على صدر الامة العربية و الغربية، بل و المحشية بالرز باللخلطة بالفريك باللحمة مش مهم، كله محشي و خلاص

    اكتفي في النهاية بقول ان هذا اليوم اقترح ان يكون اجازة رسمية و يضم الى اعياد دولة البصاصين المتحدة

    عيد ميلاد الرابط لازم يكون اجازة علشان نروح الجنينة و نلعب بالعجل و ناخد العيدية من بابا عز

    و كفاية عليكوا كدة علشان ورايا شغل

    كل سنة و انت طيب مرة تانية يا عز

    NANA

    ReplyDelete
  19. كل سنة وانت طيب وتفضل طيب وتفضل زى ماانت صادق مع نفسك وماتتغيرش وتفضل جميل زى ماانت جميل كدة جمال الروح طبعا

    وسط كل الذكريات دى حسيت انى كنت زميلتك فى المدرسة والا حاجة يمكن عشان نفس الفترة وومعاصرة الزلزال دة ليا معاه ذكريات فظيعة صحيح هو انت مدرستك كانت فترتين ؟؟

    كل سنة وانت طيب مرة تانية وربنا يسعدك ويجعل مابعد الربع قرن افضل وافضل

    تقبل تحياتى

    أختك رشا

    ReplyDelete
  20. السلام عليكم :
    اعتقد يا عز اننا كلنا عايزيين الشخليلة و اليويو

    بس علي فكرة مكنتش عارفة انك عفريت كدة قال مش بتاع بنات قال
    هههههههههههههههههههههههه
    علي فكرة كلامك خلاني ارجع بالذاكرة و افتكر ايام المجد بتاعتي ايام المدرسة
    ياااااااه كانت احلي ايام

    ربنا ان شاء الله يسعدك و يسعدنا جميعا في ايامنا القادمة و عقبال اليوبيل الدهبي و تكتبلنا احلي كلام و تكتبلنا عن سعادتك مع اللي امها داعية عليها ههههههههههههههههه بهرج يا عز
    وعموما انت في جزء طنشته مكتبتش فيه تفاصيل و احنا بما اننا بصاصين فيهمنا كل التفاصيل و لا يه يا جماعة
    هههههه

    كل سنه و انت طيب مرة تانية
    First Lady
    ولا تزعل نفسك
    ههههههههههههههههههههههه

    ReplyDelete
  21. كل ربع قرن وانت طيب
    ا...ح....م....د

    ReplyDelete
  22. كل سنه وانت صديقي
    بجد يا عز انت بس لو تركز شويه في موضوع الكتابه ده هاتبقي فنان تجنن لانك ببساطة ما بيفوتكش اي حاجة عينك مدربه كويس قوي وبتلقط حاجات كتيييييييييير وواضح طبعا انها ما بتتنساش ومحفوره جوه احساسك..لاني اكتشفت يا وز انك بتحكي بأحساسك مش زي ما الناس كلها بتحكي
    وبجد قاعدت افتكر معاك حياتي انا وحسيت انك بتفسحني في حكايه انا عارفها كويس (حكايه حياه) كل الناس عاشوها ولسه ايام هايعيشوها
    ربنا يخليك للوطن .......ومتنساش الله. الوطن. جننن
    ginathapetرفيقة السلاح

    ReplyDelete
  23. شرف ليا يا جنجن اني عرفتك، شرف ليا :)

    هي فعلاً حكاية حياة، الله عليكي سمتيها اسم احسن من اللي انا سميته :) هأغيره علي فكرة لأنه اسم جميل اوي

    اشوفك بكرة يا رفيقة السلاح

    الله ... الوطن ... جنجن :)

    ReplyDelete
  24. 2awalan kol sana wenta taib we 3o2bal 100 years begad el mail 3ala ad mahowa 7elw bs feh afkar 7elwa 2awi menha 2enak bani2adam kewais meen so3'rak(besm allah masha2 allah) we 2enatk lesa faker el nas le kewaisa el 3amalolak 7agat 7elwa deh ne3ma kbeera 2awi ya ret el nas teb2a keda wel welad el kano bi7a'do sanswitshat el walad dah foza3 2awi mesh fahmahom we el 2alitlak 2enta momel ma3'eltitsh la2enak mesh momken el madrasa bet2o2a3 wenta btelem el 2e2lam 3eeb ya3ni dah brod anyway rabena yewafa2ak we yekremak 3ashan 2enta bani2adam kewais

    ReplyDelete
  25. hehehehe
    kol sana we enta tayeb we 3o2bal kda el youbil el dahaby we nekon lessa asdeka2 ..
    ana mastaghrabtesh akeed lama 2aret el nice story di .. kont motawaqe3a da ,, bas begad fekra moftakasa 3ala el 2akher..
    ezz enta walad top7fa we rabena isa hayekremak .. we tezawed engazatak kaman we kaman ..
    we fe3lan ana kol youm bazdad seka fi ra2ie fiek la2enak 3omrak ma khayebt amali feik dayman kda rafe3 rasy.." mesh awi ha "

    we fi 7aga ba2a 3ayza a2olhalak el 7ozn we el domo3 we experiences fe3lan heya eli 3amalet ezz da eli e7na kolena far7aneen beih we proud of him ..

    yalla take care of urself ..we 3o2bal kol sana

    ReplyDelete
  26. kalam kber :) ana msh 2ado ya petitaaa, thx w rabena y2adarny w akaml eli fadel mn el 3omr yasd a7mad

    ReplyDelete
  27. أيه يا عم ده أنا أسيبك شوية أرجع ألاقيك بالنشاط ده
    الف مبروك يا عم

    ReplyDelete
  28. الله يبارك فيك يا ماشى الطريق ومتبقاش تطول الغيبة كده .. الأرض كروية تلف حول نفسها :) شرفتنا الشوية الصغيرين دول

    ReplyDelete
  29. hi ya Mohamed,
    7awelt awel ma da7'alt 2eny a3mel comment 3ala mawdou3 tany agdad men dah,bas begad ma3reftesh,la2en begad dih men a7la el 7agat el ana aretha,sa3at ketir ba7awel 2eny allem el donya beltari2a dih w ashouf ana 3amalt eh 2emta w eh el 2asar feya w 7'alany ab2a Amira el ana 3aleiha now w f anhy mar7ala men mara7el 3omry qarart 2eny a3mel 7aga w ashouf 2iza kont 2estamareit wala la2,bas sa3b awy lel asaf,so 3ashan keda men awel mara areit fiha elmawdou3 dah w ana begad msh adra a2olak 3agabny ad eh w fe3lan ba2eit 3amala a2oul ya rab tigy online 3ashan a2olak ad eh howa to7fa msA...

    el moheim ana 7abeit bas a2olak 2en begad kan to7fffffa w Rabeina yekremak f kol 7aga te7'tarha f 7ayatak whatever ba2a was el sho7'shei7'a aw el yoyo :D

    ReplyDelete
  30. حاجات كتير أوي وفرح وحزن وحب وكره وحب تاني ونسيان وحب تاني ودموع وزعل وزهق وجري ولعب ومنطقة وعمار بن ياسر وإستاد ومراقبة وجامعة وتنمية وأوتوماركت ... el goz2 da men awelo el a7'ro wahmyyyyyy... Happy birthday dear begad ana etwahamt men oslobak el gamil bezabt ka2ny ba2ra elli gowaia keep going bezat 7etet el

    ReplyDelete