Friday, December 19, 2008

هاي موهاماد

لسه قافل الموبايل بتاعي من شوية.. من دقيقة، لاقيت علي الموبايل كلمة "Call" وبما إني فيه موضوع شاغلني من كام يوم كده وبأتكلم مع حد من صحابي من شيكاغو في الكام يوم اللي فاتوا، فقولت ان يمكن هي اللي بتتصل عشان إمبارح كان حظنا سئ جداً كان فيه عاصفة والخطوط كانت بتقطع بشكل خلاني عايز انزل ابوس السلك بتاع المصرية للإتصالات !!

رديت علي الموبايل لاقيت حد بيقولي "هاي موهاماد"، هاي... هو ايز زيس، اي سييد.

لأن "أسما" بتعرف تتكلم عربي زي الفل مش بتتكلم معايا إنجليزي، يبقي ده حد تاني !! ، لاقيت البنت اللي بتتكلم بتقولي ان انا من شركة "USAFIS" وان حد من صحابك رشحك عشان تدخل معانا في سحب لوتاري للحصول علي "الجرين كارد"، هل انت مهتم؟ قولتلها والله كنت لسه باتكلم مع صاحبتي امبارح اني مهتم جداً مهتم أوي، قوليلي ايه اللي عندك.

مش عارف ليه كملت كلامي معاها، مع ان اي كلام مع اي حد من النوع البياعيين ده في مصر باقفل معاه جداً وبادي المتصل ارقام الناس اللي مخنوق منهم عشان يكلموهم يقرفوهم !! مش عارف ليه بس كملت الكلام معاها، يمكن الحلم الأمريكي يراودني، المهم قالتلي صديقتك اللي رشحتك اسمها "Yara Inemadelb Ayafah" طبعاً انا ماعرفش اي حد مشوه بالإسم ده خالص ههههههههه !! قولتلها لأ ماعرفش حد بالإسم ده خالص، قالتلي هي من سوريا وعايشة دلوقتي في أبو ظبي !!! حابكه جداً القصة : ولد اللي رشحته اكيد تبقي بنت .. عايشة في ابو ظبي ... وهي من سوريا .!!! كان ناقص تقول انها مواليد الحلمية وعندها شقة في التجمع الخامس !!

المهم برضه كملت المكالمة قولت اتفرج اشوف بينصبوا ازاي هناك، اهوا الواحد برضه يتعلم... كملت الشابة الكلام وقالتلي ان كل سنة الحكومة الأمريكية بتدي 75000 جرين كارد لبلاد كتير مش ممنوع منها ان يجي منها هجره، انت عايز تهاجر لأمريكا؟ قولتلها يعني انا بافكر استخرج فيزا اني اروح امريكا بس الموضوع ده بياخد وقت عندنا في مصر مش سريع، قالتلي لأ الفيزا حاجة والجرين كارد حاجة تانية... دي احسن من الفيزا ..!! يا سلام يا فكيكة مانا عارف !! موهاماد، انت عندك كام سنة؟ مواليد القاهرة؟ متجوز ولا اعزب؟ بتشتغل ايه؟ مممممم اوك موهاماد انت عندك فرصة حلوة اوي انا مبسوطة جداً ليك !!! يا سلام والله ده شئ حلو اوي شكراً ليكي !!!

طيب موهاماد، انت بتستخدم فيزا كارد؟ ماستر كارد؟ ولا اي بطاقة تانية؟ ....ايوووووووووووه تعالي هنا بقي!! اه يا شابه باستخدم فيزا كارد (ده شئ مش صحيح طبعاً)، استخدمتها بره مصر يا موهاماد؟ اه في الأردن (طبعاً ده محصلش) اوك موهاماد، اسمك بيتكتب كده؟ طب ايميلك؟ اوك موهاماد ده الموقع بتاعنا (www.usafis.org) وهاديك باسورد عشان تتابع الأبليكيشن معانا اونلاين، اللوتاري بيبدأ في فبراير وفي مايو بتعرف اذا كنت هتسافر ولا لأ، احنا هنعمل كل الإجراءات ليك وهنودي الأبليكيشن بتاعتك ونتابعها مع الحكومة، بس هتدفع مرة واحدة مبلغ 349 دولار ودي هتدفعها مرة واحدة بس طول فترة السحب علي الجرين كارد، حتي لو كانت 10 سنوات وليك ولكل العائلة واولادك، يعني هي دفعة واحدة بس مرة واحدة بس .!!!! بتحاول تقلل تأثير الكلمة عليا اللي هو يعني ايه يعني 349 دولار مرة واحدة !! وكمان هندخلك مسابقة (VIP) ودي تخليك تدخل مسابقة اكبر لمدة عشر سنين يعني فرص الجرين كارد تبقي متاحة ليك ولكل عيلتك لمدة عشر سنين، الحكومة بترفض الطلبات من دول زي الصين اندونيسيا روسيا.. وقالت كام اسم كده بس نسيتهم، انت عندك فرصة كبيرة يا موهاماد !! ايه رأيك يا ؟

واخدين بالكم طبعاً ان موهاماد بيشتري منها الكلام بس مش بتكلم الا، اوكيه، ممممم اوكيه، يسس اوكيه ممممم منبهر جداً ان كل الإخوة النصابين حول العالم متفقين علي كود ومبادئ واحدة في الشغل وده حلو!! حقيقي حلو منهم!!

أوكيه موهاماد انا دلوقتي هادي التليفون مع المديرة بتاعتي عشان تكمل معاك الإجراءات (يااااااااااااااا ربي نفس الأداء بالظبط نفس الدخلة) ودخلت عليا المديرة، هاي موهاماد ايام هانا... ها هانا هاو ار يو؟ انا شايفة انك عندك فرصة كبيرة اوي وحلوة جداً مبروك وحظ طيب، انا بس عايزة اتأكد منك من شوية معلومات، اسمك كده صح؟ ايميلك كده صح؟ بتستخدم فيزا كارد؟ تاريخ الصلاحية بتاعها بينتهي امتي موهاماد؟ هنا بقي كنت خلاص زهقت وعايز اقفل اللي هو شكراً يعني انستونا، فقولتلها ممممممم سبتمبر 19 ممم سبتمبر، لما لاقيتني بافتكر، بسرعة شديدة اوك موهاماد انت ممكن تروح تشوف تاريخ انتهاء الصلاحية وانا هاستناك هنا اتس اوكيه!! اوكيه يا شابه ثانية واحدة.. وحطيت الموبايل ع المكتب فعلاً

سيبتها 30 ثانية كده وقفلت المكالمة وقفلت الموبايل وكتبت البوست ده !!

طبعاً انا اه عايز اروح أمريكا، لأسباب كتيرة لسه بافكر فيها بتمعن وبهدوء شديد، عشان دي مش حكاية سهلة، مش هاروح اشتغل في دبي!! لأ دي تجربة ممكن تغير حياة الإنسان، يا إما للأحسن يا إما للأسوأ، المشكلة بس إن مش هي دي الطريقة اللي هاروح بيها .!!! ومش علي آخر الزمن يتنصب عليا من هانا مونتانا اللي كلمتني دي !!

11 comments:

  1. ناس غريبه يا اخي
    في حد ينصب علي مصري برضو

    ReplyDelete
  2. ما انا قولت كده برضه يا عاشقة :))

    ينصبوا علينا؟ دا احنا استوينا
    علي رأي "بيبو" في فيلم كده رضا

    ReplyDelete
  3. It is been a while since I've followed up with your writtings.It great how you could make a normal story sounds intresting with your talented style. You still have a special writting style:)

    ReplyDelete
  4. هاهاهاها ايه ياعز بيه مش احنا بردوا اللي يتعمل فين الحركات دي

    و فعلا نفس النظام بالظبط تقريبا نظام نصب موحد علي مستوي العالم

    و انت بقي وقعت بلسانك يامان

    يبقي انت اللي اديت رقمي للعيال بتوع الفيزا اللي وجعوا دماغ اهلي وانا مع الواد هلال

    بيس يامعلم بقي انت تعمل فيه كده ماشي ياعم ماشي


    بيس يا مان و ابقي سلملي علي هانا يا موهامد :@

    ReplyDelete
  5. Mohamad and the american dream!

    ReplyDelete
  6. عايشة في ابو ظبي ... وهي من سوريا .!!! كان ناقص تقول انها مواليد الحلمية وعندها شقة في التجمع الخامس


    دي بقي صايعة جدا
    ههههههههه مرحبا بعودتك لعالم التدوين

    ReplyDelete
  7. بردك الجامد جامد
    خلي بالك من افريقيا ودي الحلقة الجاية

    ReplyDelete
  8. 3la ad mana mtdy2a mn enhom bystghflona w fe nas kter btsd2hom bs 3gbny awe rdk rad msry 72e2y
    elblog gamda gdn w3la fkra 7l2et wust el balad kany 7elwa awe rghm enhom kano wkhden r7ethom shwya
    by the way ana dina hasan on facebook

    ReplyDelete
  9. محمود:
    اشكرك هي فعلا كانت فاكره انها ممكن تصيع علي مصري
    هههههههه غلبانة

    ReplyDelete
  10. كريم سعيد:
    حبيبي..
    عيب عليك ابن عمتك دولي برضه

    ReplyDelete
  11. فيونكات:
    hi ya dina ya hassan :) wust el balad gamden gedan
    ana 3aref enek enbasaty mn el 7ala2a w ensha2allah
    bazabat m3ahom 7ala2a 2orayeb bs 3ayzha fekra gamda b2a
    welcome to the Blog

    ReplyDelete