Monday, July 07, 2008

إجوان الأهلي هتفضل أحلي

مات جدي "الله يرحمه" يوم السبت اللي فات، 5 يوليو 2008 ... عن اكتر من 80 سنة – لو صح معلومة انه من مواليد 1924، مات وانا في الإسكندرية في رحلة مع صحابي من الجامعة، الله يرحمه كان بيحبني بجد مش مجرد اني ابن بنته وبس.. لأ كان بيحبني وكان حاسس بيا في حاجات كتير اوي مريت بيها في حياتي، طبعاً لأني متربي عنده في البيت لغاية ما وعيت علي الدنيا لأن والدي كان بيخدم سنتين الصعيد اللي علي كل ظابط شرطة وهو لسه متخرج جديد.

فاكر اوي لما كان يوصلني للبيت وكانوا هو وجدتي الله يرحمها ساكنين قريب اوي من بيتنا القديم، كان يوصلني وهو ماسك ايدي جامد جداً..!! كنت مبقدرش اقوله بالراحة يا جدو لأنه هي دي كانت طبيعته – الله يرحمه – صلب قوي سريع الخطوات.

كنت باقعد اضحك وهو بيحكيلي عن مغامرات والده لما هرب من حفر قناة السويس، وازاي هرب هو وأخوه من اللي كانوا بيلموهم عشان يروحوا يبنوا القناة، وكان يحكيلي عن ادق التفاصيل بطريقة جميله جداً ومشوقة، فاكر جداً انه كان بيتكلم في كل حاجه واسع الأفق متعلم لبق في الحديث، الله يرحمه كان حافظ للقرآن ودايماً كنت متأكد انه خاتمته جميلة تليق بواحد جميل، عاش حياته كله يربي اولاده وبناته الثمانية، وعلمهم احسن تعليم وشاف ما شاء الله بنات وولاد ولاده وبناته.

الله يرحمه كان احسن واحد يتناقش معايا بعد ماتشات الأهلي، كنت استني الماتش يخلص عشان اكلمه اسمع رأيه إيه، سواء خسرنا او كسبنا، كان ينقد لي الماتش بالتفصيل لدرجة اني كنت باحس اني مابفهمش كورة، من كتر ما هو دقيق في المعلومات وانا مش باحفظ اماكن اللاعبين ولا مراكزهم.!!

كنت ساعات بأهرب من مكالمته بعد الخسارة عشان عارف انه هيكون زعلان، وياما اتفرجت معاه علي ماتشات، يمكن في السنتين الآخريتين كنت باهرب من مكالمته عاماً.!! لأنه كان بدأ – الله يرحمه – يصاب بالزهايمر وكان بيصعب عليا اوي لما اكلمه واحس ان الشخص القوي اوي اللي كنت باكلمه زمان مش فاكر التفاصيل زي زمان، او بيتوه مني في الكلام في النص، كان بيصعب عليا اوي وبأحس بخنقة في صدري لما باشوفه كده.

في آخر مناسبة وانا كنت باحتفل بشهادة تأجيل الجيش، كان اكتر يوم ألمني اني اشوفه تعبان، لما لاقيته بيقولي "يلا قوم البس عشان نروح لمحمد عشان عامل ليلة وبيحتفل عشان الجيش، يلا قوم مش عايز تروحله ليه".. محاولاتي اني اقنعه اني انا محمد وان انت موجود عندنا يا جدو، ألمتني اوي، انه مش عارفني.! بعد ما كان كل الناس لما كان بيتعب بيخلوه يكلمني لأنهم عارفين انه لايمكن يتلغبط فيا.

الله يرحمه كان كل ما بيكلمني يقولي "عايزين نفرح بيك بقي يا محمد؟" وانا اقوله ان شاء الله قريب يا جدو إن شاء الله قريب، بس ربنا يسهل بس... كان يقولي دايماً مقولة لا يمكن انساها... "ضاقت ولما استحكمت حلقاتها فرجت، وكنت أظنها لن تفرج".

الله يرحمه كان دايماً شايف ان الأهلي أحسن فريق بيلعب كورة، مش بس لما بيكسب، لأ... كمان لما كان الأهلي كان بيخسر، كنت اكلمه ويكون الأهلي خسران 3-1 يقولي وبكل ثقة وبدون تردد.... "شوفت جون الأهلي؟، جون الأهلي احلي..!! التلات اجوان اي كلام، لكن جون الأهلي ملعووب" ويتقل علي الواو واكنه بيغنيها... من مدي حبه للأهلي.


آسف يا جدي إني ماكنتش موجود في دفنك

وماكنتش موجود في عزاك زي ما انت كنت موجود في كل مناسبة ليا

آسف إني ماروحتش اشوفك وقولت لوالدتي ان شاء الله هاروح

آسف إني قولتلها لأ مش يوم السبت، يوم السبت مسافر مع صحابي

آسف اني مقدرتش اشوفك

آسف وأوعدك اني هافتكرك دايماً بالدعاء زي ما انت كنت بتدعيلي دايماً

وهافتكرك دايماً كل ما الأهلي يجيب جون..

وهتفضل في نظري زي ما هي كانت في نظرك بس

إجوان الأهلي دايماً هي الأحلي

7 comments:

  1. البقااء لله

    ReplyDelete
  2. السلام عليكم
    بوست مؤثر وصادق جداااا
    بوست او مرثية جميلة قوووى.أثر فيا لما كنتى بتحكى عن جدك لما كان بيكلم حضرتك وهو مش عارفك..
    مش عايزة اضايقك بس ربنا يرحمه ويغفره ويبدله دار خير من داره واهل خير من اهله..أكثر من الدعاء ليه وصل رحمه واعتقد انك اذا عملتله صدقة جارية ان شاء الله تنفعه فى اخرته وتُشعرك بالارتياح.ربنا يحسن ختامنا اجمعين.

    ReplyDelete
  3. البقاء لله يا عز ...وربنا يرحمه ...ويتقبله انشاء الله ...هى كده الدنيا ...بتخدنا ومش بنحس بقيمة الناس اللى موجودين فى حياتنا غير لما بيرحلوا عنا ... دائما" افتكره بقراءة الفاتحة ...وربنا يرحمه ويرحم موتى المسلمين .
    Maha Atef

    ReplyDelete
  4. ma3lesh ya 3ez el bkaa2 lel allaaah ana awel mara katblk comment wkan nefsi teb2a fe wa2t a7la mn keda bs eli 7sal ba2aaa ana gdeed hena 3al blogs we3aml blog bs b2ralk mn zmaaan momken ted5ol 3al blog wt2oli ra2yek l2en akeed akeeeeeed akeeeeeeeeed hyfdni whyzwdni kteeeeeeer el blog esmha vatreena ( vatreena.blogspot.com )mestani radk merciiiii

    ReplyDelete
  5. أعتقد بعد البوست دا
    مش أنت لوحدك
    إللى هتبقى دايما فى عنيه
    إجوان الأهلى أحلى
    حتى لو انهزم


    البقاء لله
    وأحسن الله عزائكم
    وغفر لجدك

    علياء

    ReplyDelete
  6. الله يرحمه

    قلبت علي المواجع وفكرتني بجدتي الله يرحمها وازاي كنت بحس بالضيق والحزن لما اكلمها والاقيها مش فهماني في اواخر ايامها بسبب تصلب الشرايين، وازاي في اليوم اللي حسيت انها استجبتلي شوية وعرفتني لما ابتسمتلي وانا بفطرها كان ده اخر يوم لها في الدنيا

    الله يرحم جدك وجدتي وامواتنا جميعا، بس هما حيفضلوا عايشين فينا

    ReplyDelete