معظم المصريين

النهاردة كنت معدي في ميدان العتبة، وقعت عينيا علي أجمل إعلان شوفته في حياتي !! من الدعاية الإنتخابية لرئيس الجمهورية..!! حد هيسألني إزاي بقول كده ؟ الصورة أنا حاولت أصورها لكنها طلعت مهزوزة لأني كنت في عربية وسرعة إستجابة الكاميرا بتاعتي خانتني، بس هأوصفلكم الصورة ومش هأتكلم بعدها عايز أسمع ضحك بقي وكده، ها؟ الصورة مكتوب تحتها عبارة (من أجل الإستقرار) والإمضاء "معظم المصريين" !! إيه معظم المصريين دي ؟؟! يعني إيه لسه فيه كلام !! مش متأكدين يعني !! مين اللي عمل الإعلان ده !! وكان قصده إيه بيه !!؟ أنا ضحكت ضحك من الكلمة دي لا تتخيلوا قد إيه علي معظم المصريين دي ..... واللي يعيش ياما يشوف !

حادث المنصة

وبعدين بقي يا ابني !! انت مش هتتهد ؟ ربنا يهديه رئيس الزمالك ده، مش ناوي يجيبها البر ومش ناوي يعقل... يعني كان نائب في مجلس الشعب وخرج منه.. كان رئيس النادي وشالوه.. رجعوه تاني ليه الله أعلم بس رجعوه.. خد ست شهور حبس زيه زي اي واحد مشبوه..!! وبرضوا مش ناوي يعقل، كان بيقولوا له "يا سيادة المستشار" دلوقتي بيقولوا له "يا مرتضي!!" يعني فرقته ممسوح بيها الأرض وشايلة تلات اجوان مع الرأفة المضاعفة القصوي الرحيمة بذوي القلوب الضعيفة من بقايا مشجعي ناديه.. وقال إيه !؟ قايم يرفع الجزمة لمندوب الأهلي عن مجلس الإدارة في وش كبير الياواران (مندوب رئيس الجمهورية) !! خلاص مفيش في البلد كبير يحترم !! عامل فيها انه حامي الحمي والمحافظ علي كرامة الزملكاوية !!!

عم أحمد / حكومة مسجلة خطر

لاتزال الحكومة تنتهز أي فرصة وتمد يدها لنشل المواطنين. احمد عفيفي شاب كاتب كتابه. موظف حكومة لا يملك الا مرتبه. يعني يدخل في عداد المساكين وأبناء السبيل. يدفع للحكومة 8 الاف جنيه ربنا عالم دبرهم ازاي ليحجز شقة في اسكان الشيخ زايد فرفضوه لادعاء كاذب وردوا له فلوسه ناقصة الف جنيه، ليه يا حكومة.. الالف جنيه دول رسم ايه؟؟ رسم رفض طلبه؟؟ من يحمي المواطنين من حكومة حرامية مسجلة خطر؟

أحمد رجب - جريدة الأخبار المصرية - الثلاثاء - 30 مايو 2006