مواطن عربي مسئول

منتدي جامعة الدول العربية للشباب – العين السخنة – مصر
اليوم الأول - 19 نوفمبر 2007

جلسة تعريف برنامج او بوابة مواطن عربي مسئول "RespAct" واللي اتكلم عنها مسئول مؤسسة إقتدار "Information and Communication Technology for Development in The Arab Region – ICTDAR” عجبنتي جداً، الفكرة نفسها واننا نبدأ نطور التكنولوجيا في خدمة اهداف التنمية ... يعني بالعربي، عجبني ان البرنامج طور لعبة لتأصيل مفاهيم التنمية والتطوير للمواطن العربي بطريقة تفاعلية سهلة عن طريق ألعاب والمشاركة بسواء مواضيع او فيدهات او ارآء خاصة بمتصفحي الموقع ... طبعاً لسه هاشوف الكلام ده كله اول ما اوصل لإنترنت فائق السرعة ولا حتي محدود السرعة !! للمرة التانية بنتواجد في قاعة مفترض انها للمؤتمرات وللمرة التانية مفيش انترنت !! ازاي مؤتمر تابع لمنظمة تكنولوجية بتعمل كل الكلام الحلو اللي انا حسيته وباقوله في اول المقطع ده .. ومفيش خدمة انترنت في القاعة !!؟

عجبني ان البرنامج لسه بيطور نفسه والقائمين عليه مش محبطين، بمعني ان الموقع لسه حالياً شغال فيه بس 4 الي 5 اشخاص ..!! بس المسئول عن الموقع والبرنامج بيقول ان البرنامج هيبقي "Open Source" وان اول ما يجهز هتتبناه اكثر من منظمة بحيث تكون كل منظمة مسئولة عن جزء من البرنامج.

مشاركة من مصر مش عارف اسمها، قالت ان المرحلة العمرية المستهدفة من البرنامج هي بتقترح انها تكون من 18 – 40 سنة ... الشئ اللي خلي المشاركين يتجهوا في الحوار حول المرحلة العمرية ... كام تكون ؟ بس انا عايز اسأل عن حاجتين مهمتين جداً ... اول حاجة اسم الراجل المسئول اللي بيتكلم ؟ لأن ده شئ مهم بالنسبة لي ... تاني حاجة عن ليه ميتعملش Game تسهل علي الشباب معرفة كل محتويات وافكار واهداف البرنامج !!؟ لأني اكتشفت ان مفيش لعبة زي ما انا كنت معتقد ... المسألة انهم استخدموا كارتون توضيحي ..!! عايز اسأل ليه مفيش لعبة زي "CIVILIZATION".

سألت الأسئلة بتاعتي !! وعرفت ان اسمه زياد من لبنان، وان فيه كارتون او لعبة توضيحية بس بسيطة !! لأ انا عايز لعبة زي "CIVILIZATION" مليش دعوة !! احنا مش اقل من اللي عملوا اللعبة دي ... تاخد مهما ما تاخد مننا !! المهم تتعمل ..!! واشتكيت ان ازاي قاعة مؤتمرات وتكنولوجيا معلوماااااات ومفيش انترنت !! زياد قالي انه ملوش ذنب لكن هيوصل شكوتي ...

كلمة مواطن عالمي ... كلمة من اميرة من مصر، عجبتني جداً ... كده يبقي فيه "قرن الديناصورات" و"مواطن عالمي" ... طبعاً انا عارف اميرة تقصد ايه بس اهي من الكلمات اللي صوتها حلو! المواااطن العااالمي ..!!

كلام ماعرفش ايه لازمته الصراحة بس فجأة لاقيت استاذة اعتقد من تونس وزي ما رؤي من السعودية سمتها "المحاربة" قالت كلام كبير اوي وانتوا قادة الغد .. انتوا قادة المستقبل .. وكلام كتير حاولت ما اسمعوش مع كامل احترامي ليه بس هو كلام تشجيعي ملوش طائل ... كلام من الماركات العربية اللي احنا متعودين عليها في عالمنا العربي اللذيذ !!

صحيت وكأني منمتش!

منتدي جامعة الدول العربية للشباب – العين السخنة – مصر
اليوم الأول - 19 نوفمبر 2007

ثلاث ساعات بس وصحيت لوحدي قبل ما المنبه يضرب !! ولأول مرة !!

الجلسة الإفتتاحيية للمنتدي والكلمات الإفتتاحية بدأت في قاعة بفندق "سي كلوب" الساعة 9 صباحاً والشئ الغريب ان مفيش انترنت في القاعة !! والمفترض انها قاعة اجتماعات !! اول غلطة في الفندق اللي اعتقده جميل وهادي جداً.

كلمة برنامج Capacity 2015 التابع لبرنامج الأمم المتحدة الإنمائي "UNDP" ألقتها الدكتورة عبلة العماوي ... دكتورة عبلة اللي كنت استقبلتها مع وفد من 22 شاب وفتاه من الآردن واللي رفضت انها تستني اكتر من ساعتين في المطار عشان الإتوبيس يجي !! وجبتلها اربع باصات نقلتها ووفدها.

مرة تانية يجي ذكر الأهداف الإنمائية للألفية !! ابقوا فكروني فعلاً اعرف ايه هي الأهداف الإنمائية للألفية !!

كلمة برنامج الأيدز التابع للأمم المتحدة .. الممثل للبرنامج بدأ علي طول الكلام بطريقة لفتت نظر الناس كلها !! من غير صباح الخير وكمان بيتكلم عن ايه !!؟ بيتكلم عن الإيدز !!!! جانبي "أفنان" وهي منسق برامج التعليم في المحميات من الأردن .. بتقول ان موضوع الأيدز محشور حشر !! وكمان خمس ساعات أفلام عن الأيدز !! مش كده يعني ..!!

كلمة نائب مؤسسة اقتدار التابع دكتور زياد، وهو برنامج اقليمي مركزه القاهرة تابع لبرنامج الأمم المتحدة الإنمائي يستمد اهدافه من تقرير التنمية العربية، والحمد لله قال صباح الخير !! وكمان خص الشباب بصباح الخير مخصوصة!! يعيشك حبيبي !! اعلن النائب عن برنامج انتجه برنامج اقتدار اسمه "مواطن فعال" RESPACT – Responsible Citizen Act ودعانا لجلسة تعريفية عن البرنامج عشان ياخد ارآنا ونتواصل لأنه برنامج لينا في الأصل.

كلمة أستاذ عبد الله ممثل البرلمان العربي الإنتقالي... احب اني اعرف ايه هو البرلمان العربي الإنتقالي .. برضه ابقوا فكروني اقرا عنه ..!! تقريباً كلمة البرلمان العربي مؤثرة علي كلام ممثله !! الكلام مفهمتش منه ايه هو البرلمان ومفهمتش من كلامه ولا الكلمة الشعرية اللي القاها ايه المفروض اننا نعمله ؟؟

قرن الديناصورات !! كلمة قالتها ممثله منتدي الشباب الخليجي ..!! انا مش افهم كان قصدها ايه بس هي اللي قصدته ان الفجوة اللي بينا وبين العالم كبرت .. اننا بقينا في قرن الديناصورات والناس في مكان تاني خالص ...\بس عجبتني كلمة قرن الديناصورات !!

كلمة منظمة العمل الدولية الدكتور عبد الكريم ... وكلمة وتحية للشباب مع امل بأن تزيد مشاركة الشباب في البرلمانات العربية لأنها قليلة جداً ...!! بس متقولش برلمانات بس !!

لفت انتباه فاطمة امام المشاركة معايا في جروب المدونين في المنتدي، اننا احنا الإتنين مش لابسين اي حاجة تدل اننا من مصر ... الشباب والصبايا كله لابس بادجات او رست بألوان بلادهم .. قالتلي عايزين نجيب بادجات مصر علي فكرة!! قولتلها اوك او نجيب كوفيات الأهلي ...!! بصتلي بصة تعني انها زملكاوية .. قولتلها بصي قدامك طب !! بس البنت طلعت اجدع مني وقالتلي ممكن البسها معاك تضامن !! هو ده الكلام !!

طبعاً واضح اني باكتب ومازلت كلمة ممثل منظمة العمل الدولية بتضخ ارقام ونسب وكميات بليونات دولارات !!

كلمة مرة اخري للدكتورة عبلة للتعريف بفكرة تعزيز قدارت المنطقة العربية لتحقيق اهداف المنطقة العربية، استعرضت جروب المنظمة التابعة ليها البرنامج واللي بيتكون من 22 شاب وفتاه بعمر 15 سنه ... اللي انا كنت استقبلتهم في اول يوم بهدلة .. اقصد تطوع ليا في استقبال الوافدين.

للمرة التانية تذكر كلمة الأهداف الإنمائية ... بس الحمد لله عرفت انهم 8 غايات و28 مؤشر وان الأهداف دي مقدر ليها غاية سنة 2015 لتحقيقها ... منها خفض الفقر والجوع الي النصف ، تحقيق شمولية التعليم الإبتدائي والألزامي، تحقيق المساواة في العمل
الإجتماعي، خفض وفيات الأطفال، خفض وفيات الأمهات، خفض وفيات الإيدز والأوبئة، وتحقيق شراكة عالمية ... كل ده مقدر ليه انه يحصل في 2015 .... ممكن حد يصحيني لما ده يحصل ؟؟

الصوت بدأ يظهر بطريقة عربية جميلة ..!! كله بدأ يمل وكله بدأ يتكلم بطريقة غير منظمة والممثلين مازالوا يتكلموا شارحين ازاي هيتم سير عمل فرق العمل في المنتدي.

مش عارف أحضر الشنطة

منتدي الجامعة العربية للشباب – العين السخنة – مصر
اليوم صفر – 17 نوفمبر 2007

التحرك بالأتوبيس الي العين السخنة كان اسهل الخطوات في التجهيز لرحلة منتدي الجامعة العربية للشباب، اولاً حبيت اني اكون مساعد جيد ومرحب بضيوف بلدي... اتصلت بمنسق أعمال المنتدي هيثم كامل عشان اقوله انا معاك يا معلم!! هيثم مكدبش خبر وكلمني وقالي بكرة اول وفودك اللي هتستقبلها مطار القاهرة.

كلمني الساعة 10:45 بيقولي فيه طيارة الساعة 11:20 الصبح !! يعني بعد نص ساعة ... ساعتها قولتله هيثم انا ساكن جنب المطار مش نايم جنب المطار ... بس روحت واستقبلت وفد جاي من الأردن قائدة الجروب ست زي العسل .. د عبلة استقبلتهم ومشيتهم في اتوبيسات غير اللي المفروض كانوا هيروحوا فيها عشان اتأخرت !!

روحت نمت وعشان اصحي اقابل جروب بالليل ... الجروب ده هو اللي تقريباً حسسني بالموضوع ! حسسني اني علي وشك تجربة حلوة، حاجة جديدة عليا ... ليه ؟

اقولكم ليه ... انا طول عمري في النشاطات الطلابية بس كان دايماً بتبقي النشاطات دي نشاطات بين طلاب الجامعات المصرية، فكانت دايماً الكلام اللي بيتقلب في دماغي كان واحد من خلفية اجتماعية وثقافية واحدة !! قابلت وئام وسلينا من سوريا ... البنتين دول من كلامي معاهم اللي متعداش فترة انتظارنا لعبد الفتاح انه يوصل علي الخطوط الليبية .. بس كلامهم اللي هاتكلم عنه بعد كده اثر فيا الي حد كبير... كلام غير !! مختلف من خلفية مختلفة ، ناس فاهمة هي بتقول ايه ومش هاقول ان كلامهم كله كان صح بس اللي عجبني فيه انهم مش ناصريين واللي صدمني فيه ان مفيش مدونات في سوريا !! ولا تعرف تقرا مدونات ولا يكون ليك مدونة اصلاً ..!!! عايزكم تصلوا علي النبي كده في سركم وتشكروا اونكل طارق ..!!

لسه زي ما وعدت "سيلينا – سوريا" اننا هنكمل كلامنا ... انا دلوقتي في بلكونة غرفتي في ستيلا دي ماري بس لسه ماشوفتش سلينا ... لما نكمل كلامنا يمكن اقولكم علي بقية الكلام ... ولا بلاش عشان وئام قالتلي متنشرش الكلام ده !!

تست تست واحد اتنين تلاتة

حاجة غريبة جداً حصلت

ناس اتصلوا بيا وقالولي ان جدي اللي في البلد مات !!

لا حول ولا قوة الا بالله ... دانا لسه كنت شايفة من كام اسبوع

طب يا جدعان ايه اللي حصل ؟؟ مانعرفش ..

طب ايه كان عنده ايه ؟؟ مانعرفش ..

طب المستشفي قالت ايه ؟؟ لا ما نعرفش .. اصل اهل جدك مكتمين علي الموضوع

طب ازاي طب انا من حقي اني اعرف ايه اللي حصله ... ده جدي يعني

مانعرفش مانعرفش مانعرفش !!

الغريب !! ان تاني يوم وانا بأجهز نفسي اني اروحله

حد اتصل بيا وقالي : جدك نزل يصلي الفجر معانا !!!

يا ربي !!! ازاي بقي !! هو مات ولا لسه عايش

والمشكلة اني ماعرفش اتصل بيه ازاي

مفيش وسيلة بينا للإتصال !!

وقالولي ان جدي لما خرج يصلي قالهم انه كويس وان مفيش حاجة

بس تقريباً اهل البلد محدش كتير منهم شافوا

فبرضه ترتيبات الميتم كانت مستمرة !!

والخبر انتشر في البلد كلها

وجدتي قالت في قعدة مع صحابها يا حبايب الحج بخير

ولا حصل حاجة وصحته "زي الفل" انا مش عارفه مين اللي قال الخبر ده

برضه ستات البلد مصدقوش جدتي

مشكلة كبيرة حصلت في العيلة !!

طب نأكد للناس ازاي ان جدي لسه عايش

احنا نفسنا نتأكد ازاي ان جدنا لسه عايش

انا قولت مبدهاش انا مسافر يعني مسافر

واللي يحصل يحصل بقي ... ده جدي يعني !!

وانا مسافر واول ما دخلت البلد الناس مفيش علي لسانها الا سؤال واحد

هو ليه الحاج مطلعش بنفسه يقول انه كويس وانه لسه مامتش

ليه مش عايز يظهر تاني بعد صلاة العشا

بأبص لاقيت عيل صغير كده بيجري بيقول

عم الحاج ظهر عند برج الكهربا

عم الحاج ظهر عند برج الكهربا

عم الحاج ظهر عند برج الكهربا

مسكته من قفاه ... خد تعالي يا ابني عم الحاج مين ؟؟

قالي عم الحاج جدك يا استاذ !!!

الواد ده عرفني منين اصلا !!؟

هو انا بقيت مشهور اوي كده !!

هو ايه اللي بيحصل وليه كل ده بيحصل اصلا

جريت علي بيته لأني خلاص بقي عايز اتاكد هو ولا مش هو

عايش ولا ميت

فوجئت ان بيت جدي حواليه قلق وماعرفتش ادخل

قعدت طول الليلة بارغي مع الناس وانا مش فاهم انا ليه هنا اصلا

اللي يقولي انه مات وهو شاف جثته بنفسه

واللي يقولي ده كانوا ناقيلنه في عربية وهو اللي كان شايله

واللي يقولي دي حركة يا استاذ عشان جدك يشوف حسه في البلد !!

واللي يكذب الباقيين ويقولهم انت بتفتروا علي الراجل

واللي يقولي واللي يقولي واللي يقولي

وانا قاعد مش فاهم حاجة

بس طن في وداني صوت ميكرفون البلد وصفرته العالية

اللي خلتني اسد وداني عشان ما فقدهاش

لاقيت واحد صوته سئ جداً بيقول :

تست تست تست واحد اتنين تلاتة

يا أهالي البلد الكرام

الحاج بكره عنده اجتماع مع شيخ الغفر عشان يتفقدوا اي حاجة!!!

والصوت اتقطع فجأة ورجعت صفارة الميكروفون تاني

لدرجة خلتني اغمض عينيا

من كتر ما انا خايف علي ودني انها تطير من صوت الصفارة

فتحت عينيا بس ملقيتش حد من اللي كنت باكلمهم حواليا
لاقيتني قاعد في سيلنترو وماسك جرنان الدستور في ايديا

!!!

----------------------------

ملحوظة : جدتي متوفية من 5 سنين وجدي عايش هنا في القاهرة

كل واحد منا في قلبه حكاية

أنا : إنتِ فيه حد مضايقك ؟
هي : ليه بتقول كده
أنا : لا معرفش الناس كلها تحرق الدم ، ده شئ عادي
هي : لأ مش أوي كده بس أنا متضايقة قولت اريحكم مني واريح نفسي كمان
أنا : اذا كان كده يبقي ريحينا علي طول !!
هي : بقي كده ... يعني اعمل بنصيحتك ؟؟

بصي .. هو أنا هاقتبص من اختنا سعاد ماسي كلمتها "كل واحد منا في قلبه حكاية" وهأقولك
ان كل واحد (بجانب ان في قلبه حكاية) ليه طريقة في حل المشاكل ومواجهة الصعوبات والألم
أنا أكيد مش هأعرف اقولك تتعامل ازاي مع امورك لأني ما عرفش عنك سوا إسمك ...
أه وانك نجحتي من كام يوم

خليني أقولك اوعي تخلي الدنيا تغلبك وتزعلي بقي وتبعدي عن الناس وتتهمي بيها
لأنها دنيا فاضية فارغة فانية ...

أنا في مرة من المرات زعلت وحسيت بالخيانة، كان الكلام ده في 2001
وكانت اول قصة حب ليا وحسيت ان اهلي خانوني لسبب ما في العلاقة
قعدت اربع شهور مش بتكلم! ساكت! مش بأكلم حد! بأصلي وبأكل وبأبكي

مكنتش بأكلم حد غير أحمد اخويا اللي كان عنده 8 سنين
خدت إيه ؟ ولا حاجة
كسبت إيه ؟ قعدت اتعالج من الموضوع 4 شهور كمان

واتخبطت تاني وتالت واخرهم من كام يوم قبل خطوبتي بكام يوم اللي كانت مفروض في 7-7

تفتكري زعلت ؟ اه طبعاً
لكن بان عليا ؟؟ استحالة

عشان اتعلمت الدرس .. ان اي انفجار مهما كان جوه مكسر الدنيا
إستحالة اخلييه يأثر علي الجدار اللي بره
اه ممكن يتشقق او يبان عليه ان جواه ضرب ... بس الناس تقولي ايه ده !!!؟
انت مجروج انت متضايق !!! لأ

يمكن عشان انا اتضربت كتير
ويكمن عشان هو ده الصح

وأرجع وأقول ... كل واحد منا في قلبه حكاية

** شكراً لـ هبه

إتجاه المرج

فيلم

إتجاه المرج

Etegah El Marg

للمخرج / كريم الشناوي

أنا فخور بكريم الصراحة ... لما جيه كريم يقولي عز انا عايزك تتفرج علي المشروع بتاع التخرج بتاعي ولو عجبك عايزك تعملي الغلاف بتاع علبة الدي في دي ... قولت الولد ده عارف هو بيعمل ايه.. قولتله عيب عليك من غير ما يعجبني حتي !! بس لو عجبني هأعمله بنفس فهيبقي أحلي ان شاء الله ... واتفرجت علي الفيلم.

بلاش كلام كتير ... اتفرجوا ولو سمحتوا علقوا علي الفيلم لو عجبكم ..

وده الغلاف اللي انا عملته، مبسوط بجد ان كان ليا تواجد في فريق عمل الفيلم ...

سكريبت : سلمي أبو الفتوح - سارة طارق

تعليق صوتي : تامر عبد العزيز

مونتاج : مصطفي فؤاد - محمود عبد النافع

تصوير : إسلام الجبالي

المخرج المساعد : رانيا جلال

مدير الإنتاج : سها لقمان

إشراف أكاديمي : أ. نشوي جمال

إخراج : كريم الشناوي

الحكاية وما فيها

وحشني التدوين بجد

ناس كتير سألتني وبعتتلي وبتقولي فينك وكل ما حد من صحابي يشوف وشي يقولي ... فينك يا راجل ؟؟ مبتكتبش حاجة جديدة ليه !؟!؟ ده حتي فيه ناس ما كنتش اعرف انهم بيقروا اللي بأكتبه .. فوجئت بيهم لما بطلت ... او اتشغلت عن التدوين.

الحكاية بقي وما فيها بدأت من شهر فبراير 2007، في يوم غريب كنت بأعاني انا فيه من اضطرابات علي الصعيد العاطفي والعملي وكل الأصعدة ...!! فوجئت بمحمود إبراهيم صديقي بيكلمني من نمرة غريبة وبيقولي ايه يا عم المهم مبتردش علي نمرة متعرفهاش ولا ايه ؟؟ قولتله لأ وسمعت كان عايز يقول ايه ...

قالي عايزين في أندلس يعملوا تصميم لحاجة ... فقولتلهم مفيش غير عز وكلمتك ... ها ايه رأيك ؟؟ وعلي الرغم من اني كنت قرفان لكني قولتله اوك انا جاي هاعدي عليك بعد الشغل، مكنتش اعرف ان بقي اني هأدخل ثقب أسود - علي رأي سميح - مش هأعرف اخرج منه تاني .... بغض النظر ان الثقب ده دلوقتي بقي امتع حاجة انا عايشها.

وصلت مركز أندلس وقابلت أحمد سميح وقالي عايزينك تعمل دعوة الكترونية لحفل افتتاح الإذاعة بتاعتنا - إذاعة حريتنا - وقعدت معاه ورغينا كتير ... ووسط الكلام عرف ان عندي مدونة ... قالي طب ما تعملنا تحليل لحكاية المدونات دي ... قولتله سهلة .. دي شغلتي بأحب اتفرج علي الناس وأشوف الناس بتفكر ازاي، قالي طب ما تعمل تحليل لأربع مدونات كل شهر .. قولتله ماشي، قالي طب ماتعمله برنامج عندنا ؟؟ قولتله اوك موافق .. وكان !! قبل ما اوصل بيتي كنت مفكر في الإسم بتاع اول برنامج اذاعي ليا !! مدونة علي الهوا Blog On Air والإسم طبعا واضح مدونة هيتم مناقشة صاحبها في تجربته معاها علي الهوا ... وكان كمان ليا هدف في الإسم انه لو تم نطقه بسرعة هيبقي Blogonaire اللي هي تشبيه للمليونير ... لأن التدوين انا في اعتقادي ثروة ... بس لسه الفكرة دي هأستخدمها في المستقبل شوية.

اللي ما يعرفوش كتير عني ... اني من زمان اوي وانا نفسي اكون مذيع ... مش عشان اي حاجة اكتر من اني حاسس اني موهبة !!! لأ بأهرج طبعاً ... بس هو ده الكلام اللي الناس كلها بتقولوا لما يستضيفوهم في التليفزيون قبل شهرين من وفاتهم غالباًُ !!!

الحكاية وما فيها إني صوتي نبراته عالية شوية شويتين كده ... وكتير من صحاب اختي الصغيرة سها .. لما كنت بأرد عليهم كانوا يقولولها "إيه ده !!! ولا اكن اخوكي ريسيبشن في فندق !!" ما علينا ... شوية بشوية .. بقيت معد ومخرج ومذيع البرناااااااااااااامج الإذاعي الأول في مصر والشرق الأوسط اللي بيتكلم عن المدونين وبيستضيف في كل حلقة مدون يحكي عن تجربته بكل ببساطة ، بيني وبينكم عجبتني الحكاية ... بقيت بايت ليل نهار في الإستديو افهم ده ايه وده ليه وده ازاي ... حسيت انها تجربة جديدة ورغم انها تطوعية !! الإ انها ممتعة بالنسبة ليا.

بدأت افكر في مين هيبقوا ضيوفي !!! بعت لناس كتير وناس كتير ردت وناس اكتر مردتش ... مش عارف ليه ؟؟ خايفين مثلاً ؟؟ لكن اللي ساعدتني في اول حلقة ليا واللي قولتلها تقريباً قبل ساعات من تسجيلنا للحلقة واللي كان عندها خطوبة واحدة صاحبتها في اليوم ده وبالرغم من كده مقدرتش ترفض لي طلب ... كانت مريم ( كريزي راما ) وبعد كده توالي الضيوف ما بين الإنسانة الخلوقة الأخت المحبة لإخواتها الهادئة هاجر ( إيبيتاف ) بعد كده جت الرايقة المزاجنجية الشاعرة الصغيرة ريما ( جارة القمر ) بعد كده جه ولظروف مش مترتبة تماماً العبد الفقير صاحب مدونة ( بيت العز ) والحلقة دي كانت عشان الزميل المدون البراء وعدني انه هيجي وخلف بميعاده ومأعتذرش وماردش علي تليفوني !!! مش عشان انا عايز اسجل مع نفسي يعني ... وقامت بالحلقة دي زميلتنا ريما وإييييييه كانت اكنها مستنياني اقولها كده !!! اسألتها كانت جاهزة.

ثم توالت الحلقات ... فكانت حلقة لعرض لفيلم ( المدونات .. هوامش شعبية ) ولقاء خاص مع كريم وسلمي من فريق العمل الخاص بالفيلم، وبعد كده حلقة زميلي وصديقي العزيز محمود إبراهيم صاحب مدونة ( مصر اللي بحبها ) وكانت اخر الحلقات اللي سجلتها لحد يومنا ده مع الإخ العزيز محمد حسن صاحب الخلق الرائع صاحب مدونة ( Moe 4 VendettA ) ولسه أعتقد اني طول ما أنا عايش هأفضل اعمل البرنامج ده لأنه بيكسيبني خبرات حيوات الناس دي كلها ... وبيعرفني ان لسه فيه في البلد ناس بتفكر !!! بغض النظر الفكر موافق ولا معارض لفكرنا.

البرنامج والإذاعة عاماً والموقع اللي أنا بأديره ( www.horytna.net ) واللي بالمناسبة الشغل فيه تقيل أوي يا سميح وأنا من موقعي هذا بأطالب بعلاوة !! ... بالإضافة إلي شغلي الرسمي صباحاً والخاص اللي في كل وقت ومالوش أيام محددة ... كل دول شغلوني جداً عن المدونة ... وأنا كنت بجد بأبقي حزين وانا مش لاقي وقت اكتب حاجة انا عايز اكتبها ولما كنت بأقول لضيوفي إوعوا تبطلوا تدوين في أخر الحلقة ... كنت بأقول طب ما انت شاكلك هتبطل قريب يا برنس !!

يلا ... فلنكتفي بهذا القدر ... فاصل صغير ونرجعلكم