ياريت نفضل كده دايماً

وتتوالى المكالمات الغير متوقعة.. يوم السبت روحت لتوكيل ابوغالي اوتوموتيف في العبور علشان اعمل صيانة دورية للعربية، مش أول مرة اروح صيانة عربية بس اول مرة ليا في المكان ده ومع شيفروليه.. طبعاً غلطتي اني روحت يوم أجازة، دخلت المركز 10:30 كان قبليا فيه 16 عربية سجلوا وده طبعا خلاني اخرج من المركز بعد انتهاء الصيانة الساعة 3:30 العصر! كل ده نسيته لمجرد اني لاقيتهم غاسلين العربية وهي خارجة من ورشة الصيانة، كان هاين عليا احضن الراجل بتاع الأمن وهو بيسلملي العربية.. من 5 دقايق، لاقيت رقم المركز بيكلمني.. قولت بس، أكيد نسيوا فوطة جوة تنك البنزين، اتفاجئت انهم بيتصلوا عشان يطمنوا فيه اي شئ ضايقني في العربية بعد الصيانة او لو كان ليا أي طلبات في المرة الجاية! انا اتأثرت.

انا باتصل اسلم عليك

النهارده عميل كنت صورت فرحه في يناير اللي فات، اتصل بيا و هو مش عايز حاجه غير انه يسلم عليا ويسأل عليا وقالي اتمنى نتقابل قريب و يوم سعيد عليك.. و دي حاجه جميلة الحمدلله نادرة الحدوث في الحقيقة.

اول شريط أجنبي سمعته

ريهام اختي اكبر مني بسنتين بس.. لكن كتير من الحاجات اللي اتعلمتها في بدايات حياتي، هي كانت السبب فيها، أول فيلم أجنبي اتفرجت عليه في السينما كان معاها، فيلم هاريسون فورد The Fugitive .. أول مرة حبيت اسمع فيها اغاني غير العربي، سألتها اسمع ايه.. هي كانت امتداد لخالنا "محمد" اللي كان ساعتها عنده مكتبة هايلة من الشرايط الأجنبي. سألتها وكان الكلام ده تحديداً سنة 1994. قالتلي انزل لمحل الكاسيت واسأله عن شريط "Air Supply" الجديد.. سمعت كلامها و مشيت مسافة ماتقلش عن ست او سبع شوارع بعيد عن البيت عشان اوصل لأروش محل كاسيت، عشان يكون عنده شرايط اجنبي وجديدة كمان. نقيت شريط انا لوحدي وكان (Eric Clapton - Greatest Hits) مكانش عندي وقت، قررت اني اسمع اجنبي، وعايز اعرف اللي فاتني... قولت اسأل برضه عن الفرقة اللي قالتلي ريهام عنهم. قولتله لو سمحت عايز شريط "ايرث فلاي" الجديد.. والراجل يدور ومفيش. يقولي متأكد من اسمهم؟ اقوله طبعاااااااً .. ويدور لحد ما قالي طب هو فيه فرقة اسمها شبههم، قولتله ايوة انا قصدي دول، انت تلاقيك سمعت غلط :)

عزيزتي Reham .. باهديلك بعد 21 سنة، اول شريط أجنبي سمعته :)

آخر اهتماماتي

صديق عزيز عليا سألني واحنا خارجين من حفل ريم بنا الأخير في مصر: إنت زمان قبل الجواز كنت بتكتب عن قد ايه بتحب خطيبتك. فاكر لما كتبت عن اول مرة اتقابلتم ولما روحت تتقدملها، او لما صورت لها صور في عمّان في عيد ميلادها وعملتلها ألبوم.. انا كنت باقرا كلامك وبانبسط، راح فين الكلام ده دلوقتي؟ ايه اللي اتغير؟

ابتسمت وقولتله يا صديقي، قبل كده كنا في اماكن مختلفة وانا باسافر كتير وعايز اسلم عليها واكتبلها من كل مكان وأقولها هي واللي حواليها ان في وسط كل الدوشة دي، انا بافكر فيكي. بعد الجواز انت مش محتاج تثبت او تظهر حاجه لحد سواء حولك او حول اللي بتحبه.. اللي محتاج اقولها اني باحبها على بعد خطوات. الكتابة وقتها بتكون آخر اهتماماتي :)

طول الوقت

فيه الناس بتشوف الصور والكلام هنا وبتفتكر ان ده الحال طول الوقت.. انا مش طول الوقت مبتسم زي الصورة. وانا باشتغل مش مبتسم زي الصورة. الحال مش هادي ومنظم زي كتابتي. وعلى الرغم من مشاكل الحياة اللي بتزيد يوم بعد يوم، الكل متوقع إنك تؤدي بكفاءة طول الوقت.

الأربعين دول مايلزمونيش

طيب، انا طولي 190 سم و وزني ايام الجامعة كان 82 كجم وده كان شئ رائع زي ما الصور كانت بتوضح. في 2007 وصلت 135 كجم بدون اسباب واضحة، دي طبعاً كانت مشكلة بس مش واضحة لأن مقاييس الطول والعرض عندي مختلفة وده يعرفه الناس اللي تعرفني. في 2010 نجحت ان الوزن ينزل ويثبت لوقت طويل عند 120 كجم. لكن طبعاً سرعان ما وصلت لمرحلة عزومات ما بعد الجواز ورمضان ومجاملات الأهل والاصدقاء.. وزني دلوقتي 140 كجم وده شئ غلط بكل الطرق والأشكال.. عندي 40 كجم ضروري يختفوا. المهمة بدأت في 4 أغسطس 2014.. تصفيق.

تغيير في الخطة

أنا عن نفسي مبتعد تماماً وبقالي شهور مركز في شغلي وحياتي وتفاصيلها. أي شئ مفيش عائد منه بابعد عنه تماماً. مش مستعد أضيّع وقتي على كل دبة نملة بتحصل في بلد فيها خرطوم من البشر غرقان في المشاكل. بطلّت اتعصب زي زمان. مفيش حد واخد منها حاجة.

ثقافة اليوتيوب

يعني انا ممكن اتحمل كل وجهات النظر وأتناقش معاها، لكن اللي مش باقدر اتحمله، فتي الإخوة والأخوات العرب في الشأن المصري الداخلي وهما مش عارفين أم اي حاجه حصلت في البلد من الإخوان والجيش والشرطة خلال ال3 سنين اللي فاتت ولا عارفين أبعاد اي مواقف على الأرض وكل معلوماتهم من اليوتيوب وقناة الجزيرة.. والاقيهم بيفتوا ويدلوا بخراهم ويقفوا في صف الإخوان.. كلهم من الأردن وده شئ محزن. طب إنتوا عندكم اتساق مع الخرا اللي عندكم من الخمسينات وعاجبكم، متشاركوناش بيه إذا سمحتم.

أسوء ناس

واحدة بتتصل ببرنامج أكل على قناة الحياة بتقول "انتوا اسوء برنامج واسوء ناس في الدنيا".. طبعاً الراجل ضحك وقالها طب إحنا اسوء ناس تاعبة نفسك ومكلفة نفسك ليه وبتكلمينا؟... في رأيي إن الشخصية التافهة دي وأمثالها هما سبب نكسة مصر. هيربوا أجيال تافهة زيهم وهيعلموهم إزاي يكونوا سطحيين وإنتقاميين.

فكرة انها تمسك التليفون وتتصل وتكلم الإعداد وتستنى وقت عشان تدخل على الهوا عشان تشاركنا بحقدها وشعورها البغيض اللي عبرت عنه، مع ان عندها فرصة انها تحول القناة وتريحنا من كراهيتها وسطحيتها.. لكن نقول إيه، اللي زيها هيدمر البلد على كل المستويات.

القاهرة بدون إضافات

شوارع القاهرة يومي الأحد والإتنين كانت أكتر من رائعة، لأول مرة من مدة طويلة أروح من هليوبوليس للزمالك في 25 دقيقة وأرجع في 20 دقيقة.. واضح ان توقف القطارات وصعوبة انتقال الملايين اللي بتدخل القاهرة يومياً لقضاء مصالحها فعلاً مؤثر مش بس كلام.. يخرب بيت المركزية في الحكم اللي خلت حياتنا كده.

الأمل

مش هيكون فيه أمل في شعب جاهل فوضوي بعيد عن الأخلاق.

اللانشون.. إرادة شعب

من كام يوم راجع متأخر ومش عايز اصحي حد يعمل لي عشا، قولت أتصرّف من غير ما أعرف فيه إيه في البيت وأهي حاجات هتفضل موجودة لوقت تاني.. اشتريت ربع لانشون فراخ وعلبة حلاوة نص كيلو وعلبة مربى صغيرة وفينو.. بـ45 جنيه، بس.

كل دول هيفتكروني

عايز أزور المكان اللي اتربيت فيه، أفتكر الشوارع لمدرستي، أشوف باب شقتنا القديمة، السلم اللي كنت بالعب عليه بالعساكر الزيتي البلاستيك، أقابل احمد سعيد و اسامة الرشيدي، أروح مدرستي في عين شمس، أتمشى حوالين السور، اسأل على مدرس الرياضيات خالد عبده، أفتكر وقت زلزال 92 لما كل الفصل جري و انا بادور على اقلامي وشنطتي، أخد الكاميرا بتاعتي و أزور شارع رزق سليمان اللي بين بيت جدتي وبيتنا القديم، أفتكرها الله يرحمها وهي بتقولي امشي ع الرصيف، أشوف المكان اللي عربيتنا فضلت مركونة فيه سنين، أروح الفرن اللي عند الكنيسة اللي ياما وقفت في طابوره أجيب بإتنين جنيه عيش، أقف عند بتاع الجرايد اللي تحت بيت محمود عرابي، أصلّي المغرب في جامع آدم، أشوف اي محل لسه زي ما هو بعد 13 سنة، أعرف هافتكر كل ده؟ أو كل دول هيفتكروني.

والدي لما كنا بنقدر نتمشى.. كنا بنمشي في شارع الشرفا في غمرة، الشارع اللي اتربى فيه، وحكى لي، دي الناصية اللي كان بيقف عليها لما يرجع خميس وجمعة من كلية الشرطة، وده الراجل اللي كان بيشتري منه بقرش صاغ جبنة، وراني الحلاق اللي كان بيحلق عنده، كنت باستغرب جداً انه فاكرهم بالإسم.. كنت سعيد و هو مبسوط بي إبنه وهو ماشي جنبه طوله، والناس فاكراه وبيسلموا عليه ويقولوا له ما شاء الله محمد نسخة منك.. على الرغم من إن الشارع دلوقتي اسوء مليون مرة من زمان، بس انا كنت متأكد ان والدي لسه شايفه ببلاط مغسول بالمية والصابون زي زمان وكل العمارات نضيفة والستات واقفة في البلكونة زي زمان بالظبط، متأكد انه في عينيه لسه زي ما سابه.. أنا عايز ده، عايز افضل حافظ الذكريات بتاعتي، لأني في يوم من الأيام إن شاء الله هامشي زيه تمام، مع ابني أو بنتي.

لا ترحل

متعجّبة كانت وهي تغادر، فلأول مرة تشعر مثل هذا شعور، يغادر هو أيضاً لا يظهر على وجهه أي حركة سوى لعينيه، يبحث عن سيارته ليغادر هذه البلدة، تبكيه بدون دموع، فهي لا تريده أن يراها فيتردد، كعادته يبدأ في السير بعيداً، يتذكر السيارة، فيعود ليجدها وقد إستعملت مفتاحها الإحتياطي وأحكمت حزام الأمان.. لا ترحل.

حياة الواحد

فيه ناس بتفضل متعلقة بكل شئ حصل في الماضي،
حتى لما تقابلهم بعد فترة، تلاقيهم بيعاملوك زي زمان،
ميعرفوش ان ممكن يوم واحد يفرق في حياة الواحد.

راحة سلبية

صديقي الدكتور قالي: إنت م الآخر بتحرق "البروسيسور" بتاعك.. ولو ماديتش نفسك راحة الفترة الجاية من ساعات الوقوف الطويلة وعدّلت مواعيد نومك، عُمر أجهزتك هيبقى قصير وجسمك هياخد الراحة غصب عنك وساعتها الآثار ممكن تعيش معاك باقي عمرك.

شئ محزن جداً ان الواحد ميقدرش يهتم بصحته ونفسه علشان الشغل والإلتزامات اللي عليه. ما هو لو الصحة تعبت، مش هيبقى فيه شغل ولا إلتزامات، ومفيش حد بينفع حد في الأيام دي.. هابدأ راحة سلبية من النهاردة.

نفسي أصوّر داليدا

لو كنت عايش أيام زمان.. كان نفسي أصوّر داليدا

ثورتي مع التاكسجية

النهارده ركبت تاكسيين من وإلى نفس المشوار.. وكعادتي لازم كلمة من سواق التاكسي هي اللي بتشدني، وغالباً في يوم هيتقبض عليا من تاكسي! أول واحد صدمني لما قالي إنه بيفكر يرشح "ابو اسماعيل"، بكل هدوء على عكس عادتي ذكرت له إزاي هو شخص يمكن يكون شيخ كويس لكنه سياسي وإقتصادي ومشروع رئيس فاشل. ومانزلتش الإ لما قالي انت صدمتني في الراجل مكنتش اعرف ده كله، ومانزلتش مشواري الا ما اقنعته يقرا عن الدكتور عبدالمنعم أبو الفتوح. تاني تاكسي كان راجل مثقف جداً لدرجة اذهلتني، حكالي عن الشيخ "أسامة عبدالعظيم" اللي كان الشيخ حسان من تلامذته، وإزاي الراجل ده ضد دخول رجال الدين في السياسة وبيعتبره فتنة. نزلت من التاكسي بعد ما اقنعته يقرا عن الدكتور عبدالمنعم أبو الفتوح. ثورتي مع التاكسجية مستمرة

شعب طفرات

من زمان و رأيي متأكد منه، ان المصريين شعب طفرات وأعمال تعجيزية لدرجة اننا أنفسنا نعجز عن تكرارها مرة أخرى، أو حتى صونها. بناءنا للأهرامات، كان طفرة في حياتنا وحياة البشرية، حفرنا لقناة السويس كان مبهر في وقته بل كاد أن يكون إعجاز، إنتصارنا على إسرائيل وامريكا في حرب واحدة سنة 1973، حتى إنتصارتنا الرياضية من أول كرم جابر لحد منتخب الكرة، مروراً بكرة اليد ومحمد رشوان. إزاي مستغربين قيامنا بعد سنين من السلبية والجهل والتخلف السياسي والإجتماعي بثورة عظيمة اسقطت ديكتاتور، أن تضيع منا وإحنا نايمين في العسل.. تذكروا، بسلبيتكم ستقضون على آخر أمالنا وقد تكون آمال ابناءكم.. ربنا يرحمنا.

المثابرة كنز لا يقدر بثمن

يقول أينشتاين: ”ليست الفكرة في أني فائق الذكاء، بل كل ما في الأمر أني أقضي وقتاً أطول في حل المشاكل”.. فيعتبر أينشتاين أن العبقرية عبارة عن 1٪ موهبة و 99٪ عمل واجتهاد. فلا يوجد عباقرة بالفطرة بل يوجد مجتهدون يسعون لتحقيق ما يؤمنون به أنفسهم ولمن حولهم، ولا يفشل حقاً إلا أولئك الذين يكفون عن المحاولة! وتذكر أنك إن أردت أن تبحث عن الفرص فابحث عنها وسط الصعوبات!