فوقوا من الغيبوبة

مستغرب جداً من الناس اللي بتبكي

علي موت شاب لبناني بيقوله انه كان بيغني في ستار أكاديمي

مات في حادث وصفته الصحافة بالمروع

أعلي كوبري أكتوبر في القاهرة يوم 8 يوليو 2010

راح ضحية الحادث راجل مصري علي المعاش هو و زوجته

واصيبت زوجة إبنهم نتيجه تخطي سيارة الأخ رامي الله يرحمه

حاجز الكوبري اللي كلنا عارفين إزاي بيكون بطئ الساعة 2 الضهر

.

فوجئت بإن ردود الأفعال لم تتعدي كونهم بيشعروا بالحزن عشان هو مغني

أو عشان اتعلقوا بيه من خلال برنامج ستار اكاديمي

فوجئت إنهم متأثرين لدرجة إنهم عملوا الحركة الشهيرة اليومين دول

إنهم يغيروا صور الصفحات بتاعتهم علي أي موقع إجتماعي زي الفيس بوك مثلاً

كله ترجمته للحادث هي "مصرع نجم ستار أكاديمي" .. بس كده ؟

طب بالنسبة لروح الإنسان ؟ إيه أخبارها معاكم ؟ ملهاش قيمة ؟

أرجوكم محدش يقولي حرام عليك و يحاول يشعرني إني عديم القلب

لأن مشكلتي إني عندي قلب.. وعقل في بعض الأوقات

مش محتاجه ذكاء خارق عشان نعرف إنه كان سايق بسرعة

و لولا كده مكانش كل الأرواح دي راحت .. وكان بقي مجرد تصادم

علي كوبري أصلاً كلنا بنزحف عليه من مدينة نصر لحد المهندسين !!

.

إبكوا موت الجدّين اللي ماتوا نتيجة إستهتاره و قيادته المتهورة !!

الناس اللي حياتهم اتدمرت دي أهاليكم ودول كانوا ممكن يكونوا اجدادكم !!

واللي في المستشفي دي كانت ممكن تكون مراتك !!

صاحبه اللي في الرعاية المركزة دلوقتي كان ممكن يكون إنت !!

او هو نفسه الله يرحمه كان ممكن يكون إنت أو أخوك ..

ليه بقينا سطحيين بالشكل ده و بطلنا نعقل و نحاسب و نفكر

فوقوا من الغيبوبة و إرحموا اللي باقي مني يرحمكم الله

.

مصدر الخبر: تويتر في وقت الحادث - ثم - موقع جريدة اليوم السابع