Wednesday, May 31, 2006

عندما يلتقي عالمان


المدرسة العالمية في بريدجفيو - إلينوي - الولايات المتحدة الأمريكية، حيث تحتوي علي 638 طالب وطالبة من مرحلة رياض الأطفال وحتي الثانوية جميعهم يتلقوا العلم تحت سقف واحد، ترتدي البنات الحجاب إختيارياً في المراحل حتي الصف الـ 12 ولكنه إجبارياً لمن هم في المرحلة الثانوية، إليكم صور من المدرسة.. والحمد لله رب العالمين.










Monday, May 29, 2006

خبر تفاحة مكة، خاطئ


موضوع إعتزام شركة أبل للكمبيوتر بناء "بار" علي شكل الكعبة المشرفة في وسط مانهاتن بنيويورك بالولايات المتحدة الأمريكية إتضح إنه غير صحيح بعد رفع الستار عن "المعرض" الخاص بالشركة تحت الأرض وإتضح أن المبني ما هو الإ مبني زجاجي كشكل جمالي للمعرض، وإليكم الصور.









Sunday, May 28, 2006

البيت بيتك... بس الزمن غريب


النهاردة يوم 28 مايو 2006 - إتفرجت علي حلقة البيت بيتك النهاردة وكانت الحلقة إلي حد كبير مستفزة ليا، من كل شئ من الضيوف من الكلام من المواضيع، كله كان مستفز!! الضيوف كانوا "أم لينا" اللي عملت اللي عملته مع أحمد الفيشاوي وجاية دلوقتي تحتفل بإنتصــارها التاريخي بإنها قدرت تثبت إن البنت دي بنته !! وهو بيتصل بيقول وبيأكد "أنا متجوزتهاش!! أنا متجوزتهاش!! أحنا غلطنا.. لكن انا متجوزتش وهربت" وإيه كله فخر.. عجبي.


تاني ضيف كان بهاء سلطان، مش هاكذب عليكم في أغاني ليه بتعجبني بس الراجل كان قاعد بيتكلم اكنه عمل حاجة اختراع وهما بيقولوا "إيه ده انت خجول أوي ليه كده" وهو يقولوهم "آه أنا كده" شكلهم ماشفوهوش وهو قلبه بيوجعه... عجبي.


تالت ضيفة بقي دي انا فعلاً بحبها كانت حنان ترك، لبست الحجاب ربنا يكرمها ويهديها مع إنها كان شكلها عامل زي المماليك مش حجاب خالص بس المهم ربنا يهدينا جميعاً، كانوا بيتكلموا معاها وبيحتفلوا بيها أكنها توصلت إلي مسألة فقهية موصلهاش حد قبل كده ويسألوها إنتي فكرتي في الحجاب إزاي!؟ وخططتيله إزاي!؟ وعملتي كده إزاي ومخوفتيش!؟


عجبي علي زمن إختلطت فيه الأوراق
زمن المقلوب فيه عِدل والعِدل فيه مقلوب

وبعدين بقي.. مين هيغلب الأهلي؟


بصوا يا شباب مش هاخبي عليكوا اهلاويتي.. ولكني قلقان علي حال الكرة المصرية، الأهلي ماشي طايح مفيش حد عارف يوقفوا.. بقالوا موسمين كاملين بدون هزيمة !! ليه مفيش كورة خلاص، بيلعب لوحده !! طب انا عندي اقتراح ما الفرق كلها تلعب دوري من دور واحد وليكن يعني... والفائز يلاعب الأهلي علي الدوري !! واهو نريح الناس دول بقي بدل وجع القلب اللي هما فيه ده، رايح جاي رايح جاي .. ستة أربعة خمسة !! مش كده يا جماعة مش مشكلتهم إنهم مفيش حد قادر يغلبهم. مش كده ولا إيه !!

أكتر حاجة عجبتني في القضاه


أكتر حاجة عجبتني في موضوع القضاه.. هي اكتر حاجة ضحكتني في موضوع كله زعل وألم وسحل وضرب وبهدلة، اللي عجبني وضحكني في نفس الوقت هو تناول الناس للموضوع ومعلوماتهم عنه.. من غير رغي كتير وانا راكب مترو مصر الجديدة - حبيبتي وحبيبة قلبي - ومروح بالصدفة من كتير اوي مكنتش ركبته


قعدت جنب بنت مش عارف ليه بس كانت خايفة مني "المهم" علي شمالي كان اتنين قاعدين جنب بعض قدامهم واحد بيقرا الجورنال، لاقيت واحد منهم بيقول للتاني: انت عارف انا ايه اكتر حاجة عجبتني في حكاية القضاه دي إنهم خدوا قرارهم ومرجعوش فيه !؟ التاني قاله: هو إيه كان قرارهم ؟ - ببساطة شديدة اكيد مقصدش يحرجوا بس حس ان صاحبه عنده معلومة حب ياخدها- الأول رد: يعني.. قراراهم آآآ قراراهم ..القرار اللي خدوه يعني ..حاجة عندهم كده في القضاء !! قانون جديد..!! بنفس الطريقة دي كده وبنفس التهتهة ... بس وسكت الجميع الراجل كمل قراية في الجورنال وصاحبنا سكت وبص في الشباك وصاحبه بص في اللي كان في ايديه.. وانا مش قادر امسك نفسي من الضحك.. علي اللي انا باسمعه.


طبعاً كان واضح تماما ان الراجل مكنش عنده اي معلومة ولا عن القضاه ولا عن الأحداث ولا عن أي حاجة... بس هو قرر إنه يفتي كعادتنا يعني كمصريين.. 75 مليـــــــون مفتي وخبير اقتصادي ومحلل كروي وكل حاجة في الحياة، قرر انه يقول رأيه في أزمة القضاه... بس ضحكني بجد إبن الإيه لدرجة إني قمت من مكاني عشان اتكلم في الموبايل عشان كنت بضحك لدرجة ان البنت اللي كانت خايفة مني في الأول دي فاكرنها، كانت بتبصلي شذراً !!

Saturday, May 27, 2006

لماذا كل هذا الصخب !؟


لماذا كل هذا الصخب ؟ لماذا كل هذ الضجيج في كل شئ ؟ لماذا تعالت الأصوات ؟ لماذا إختلطت الأوراق ؟ لماذا كل شئ أصبح يعني كل وجع وألم ؟ هل أصبح من المستحيل إلي هذا الحد الحوار ؟ هل أصبح من المستحيل إلي هذا الحد ان نتفق ؟ أن نتانقش ؟ وعلي ماذا نتفق أصلاً ونحن لا نسمع فيما نختلف ! وفي ماذا نتناقش إذا كان صراخنا يمنعنا من حتي سماع أنفسنا ؟؟ ... الوضع أصبح متأزم والجو عكر، إلي متي ؟ ولماذا كل هذا أصلاً ؟